Umutumwa Paulo alembeele Abena Kristu mu Tesalonika ati: “Umuntu nga talekonka amashiwi yesu ayali muli ino kalata, mumwishibe bwino.” (2 Tes. 3:14) Kale twalelanda ukuti abo Paulo aebele ukulacita ifi ni baeluda. Umuntu nga atwalilila ukusuula amashinte ya mafunde ya mu Baibo nangu bamufunde shani, baeluda balelanda ilyashi lya kusoka icilonganino pali uyo muntu. Lyena bakasabankanya baleleka ukwampana na uyo muntu.

Lelo nomba tulingile ukwalula ifyo twaishibe. Nomba natwishiba ukuti abafwile ukukonka ifyo Paulo alandilepo Bena Kristu umo umo, nga ca kuti mu cilonganino muli uukwete imibele yabipa. Kanshi baeluda tabafwile ukulanda ilyashi lya kusoka. Cinshi twa-alwila ifyo twaishibe? Moneni ifyo Paulo alelandapo ilyo alefunda Abena Kristu.

Paulo alimwene ukuti bamo mu cilonganino ca mu Tesalonika ‘tabaleumfwa.’ Balesuula ifyo alebafunda ukubomfya Icebo ca kwa Lesa. Pa nshita imo ilyo abatandalile, abebele ati: “Umuntu nga tafwaya ukubomba, no kulya elalya.” Na lyo line bamo tabalefwaya ukubomba pa kuti baleisakamana, nangu ca kuti balikwete amaka ya kubomba. Na kabili baleibika na mu fishalebakuma. Bushe Abena Kristu balingile ukulamona shani aba abashumfwa?—2 Tes. 3:​6, 10-12.

Paulo alandile ati: “mumwishibe bwino.” Ishiwi lya ciGriki ilyo bapilibula ukuti ‘ukwishiba bwino umuntu,’ lilanda pa kwishiba bwino umuntu uucita ifyabipa no kucenjela nankwe pa kuti talengele na ifwe twalacita ifyabipa. Abo Paulo aebele ifi cilonganino conse, te baeluda beka. (2 Tes. 1:1; 3:6) Kanshi Umwina Kristu umo na umo nga amona Umwina Kristu munankwe talekonka ifyo tusambilila mu Baibo, kuti asalapo ukuleka “ukwampana” na uyo Mwina Kristu ‘uushumfwa.’

Bushe ifi filolele mu kuti tufwile ukulamona umuntu wa musango yu nga filya tumona umuntu uo bafumya mu cilonganino? Awe. Pantu Paulo alundilepo no kuti: “Muletwalilila ukumukonkomesha pantu wa bwananyina.” Kanshi bakasabankanya kuti batwalilila ukuba pamo nankwe pa kulongana na lintu balebila imbila nsuma, lelo kuti basalapo ukukanaba nankwe ilyo baleangalila pamo na ba bwananyina bambi nelyo ilyo balelesha icitendwe. Cinshi twalandila ifi? Pantu Paulo alandile ati: “Pa kuti ekatwe nsoni.” Bakasabankanya nga baishiba bwino uyu Umwina Kristu uushumfwa kabili baleka ukwampana nankwe, kuti aumfwa insoni pa fyo acita kabili kuti ayaluka.—2 Tes. 3:​14, 15.

Bushe Abena Kristu muno nshiku kuti bakonka shani ifi Paulo afundile? Ica kubalilapo, tufwile ukushininkisha ukuti ifyo umuntu acita filanga ukuti tomfwa, nga fintu Paulo alondolwele. Paulo talelanda pa bantu abacita ifyo kampingu yesu ishingatusuminisha ukucita, lelo ifishapusana na mashinte ya mafunde ya mu Baibo e lyo na mafunde. Kabili Paulo talelanda pa bantu abasalapo ukucita ifyapusana ne fyo twingasalapo ukucita. Kabili Paulo talelanda pa bantu abengatukalifya, lelo alelanda pa bantu abakaana ukukonka ifyo Lesa atusambilisha ku mufulo fye.

Kanshi nga twamona uwa bwananyina talekonka ifyo Lesa atusambilisha ku mufulo fye, a tufwile ukusalapo ukukanaba nankwe ilyo tuleangalila pamo na ba bwananyina bambi nelyo ilyo tulelesha icitendwe. Apo nifwe tufwile ukuisalilapo ifya kucita, tatufwile ukwebako nangu umo uo tatwikala nankwe pa ng’anda. Nomba tukatwalilila ukuba pamo nankwe ilyo tuli pa kulongana na lintu tulebila imbila nsuma. Nga ayaluka, kuti twatendeka ukuba pamo nankwe na kabili na pa nshita shimbi.