Bushe kuti mwaasuka aya mepusho ukubomfya magazini ya mu 2019 iya Ulupungu lwa kwa Kalinda?

Bushe filya Lesa atulaya ukuti: “Icanso conse ico bakupangila tacakabombe” fyalola mwi? (Esa. 54:17)

Nga filya fine icibumba citucingilila ku mfula ya citalawe, e fyo na Yehova atucingilila ku “mwela wa ba buluku.” (Esa. 25:4, 5) Abalwani besu te kuti batuleshe ukubombela Yehova ica kuti twaisafilwa no kuba no mweo wa muyayaya.—w19.01, amabu. 6-7.

Bushe filya Lesa akandile abena Kanaani na bena Israele abashalemumfwila filanga shani ukuti wa mulinganya?

Lesa alikandile bonse abalecita ubulalelale nelyo abalecusha abanakashi na bana. Na lyo line, alipaalile bonse abalemumfwila kabili abaali ne cikuuku ku bantu banabo.—w19.02, amabu. 22-23.

Finshi twingacita nga ca kuti tuli apo uushili Nte alepepa?

Tulingile ukwikala fye tondolo kabili aba mucinshi. Tatufwile ukulandako ukuti “ameni,” kabili tatufwile ukwikatana nabo amaboko ilyo balepepa. Nga tulefwaya kuti twaipepela ipepo mu mutima.—w19.03, ibu. 31.

Cinshi ukuulungana na bana kwabipila sana?

Umuntu nga aulungana no mwana ninshi amubembukila, abembukila icilonganino, abembukila ubuteko, kabili ninshi abembukila na Lesa. Baeluda balakonka amafunde ya mu calo bekala ayalanda ukuti umo nga balemutunganya ukuti naulungana no mwana bafwile ukuyaeba abalashi ba buteko.—w19.05, amabu. 9-10.

Finshi mwingacita pa kuti mulealula amatontonkanyo yenu?

Ifyacindama ifyo mwingacita: Mulepepa kuli Yehova. Muletontonkanya sana pa fyo mwingacita pa kuti mwalukeko muli fimo. Mulesala ifibusa ifisuma.—w19.06, ibu. 11.

Finshi tulingile ukucita pali ino nshita pa kuti tukashipikishe ilyo bakalatucusha?

Tulingile ukutemwa sana Yehova. Tulingile ukucetekela ukuti alitutemwa kabili takatulekeleshe. Tufwile ukulabelenga Baibolo cila bushiku no kulapepa lyonse. Na kabili, tatulingile ukulatwishika ukuti Lesa akabomfya Ubufumu bwakwe pa kufikilisha ifisuma ifyo atulaya. Mulesungila amalembo mwatemwa sana e lyo ne nyimbo.— w19.07, amabu. 2-4.

Finshi tufwile ukucita pa kuti twafwe balupwa lwesu pa kuti nabo bakapusuke?

Calicindama ukulalangulukilako ba lupwa ilyo tulebafwa. Tufwile ukuba ne mibele iisuma iingalenga balafwaisha ukubombela Lesa. Na kabili, tufwile ukuba abatekanya, lelo tatulingile ukuleka balenga twayalula ifyo twasalapo ukucita.— w19.08, amabu. 15-17.

Bushe tusansamushiwa shani, nga fintu Yesu alandile pali Mateo 11:28?

Twalikwata bakangalila abatutemwa, ifibusa ifisuma ifyacila pa fibusa fyonse, e lyo no mulimo uwawamisha ukucila imilimo yonse.—w19.09, ibu.  23.

Bushe Lesa kuti alenga shani twalafwaya ukumubombela kabili kuti atupeela shani amaka ya kucitapo cimo? (Fil. 2:13)

Nga tulebelenga Icebo ca kwa Lesa kabili nga tuletontonkanya sana pa fyo tulebelenga, Lesa kuti alenga twalafwaya ukucita ukufwaya kwakwe kabili kuti atupeela amaka ya kucitapo cimo. Kuti atupeela umupashi wa mushilo uwingalenga twaishiba ifya kubomba bwino imilimo.—w19.10, ibu. 21.

Finshi tulingile ukucita ilyo tushilasalapo ifya kucita?

Tulingile ukucita ifintu 5: Tulefwailisha sana. Tulelomba amano. Tulepituluka mu filenga tulesalapo ukucita fimo. Tulepanga ifya kucita. Kabili tuleishiba ifyo twingacita ne fyo tushingacita.—w19.11, amabu. 27-29.

Ilyo Satana aebele Efa ukuti tali no kufwa, bushe aloseshe mu kuti abantu bakwata umweo uushifwa?

Afwile te mo aloseshe. Satana aebele Efa ukuti ali no kufwa, tamwebele ukuti umubili wakwe wali no kufwa lelo umupashi wena wali no kutwalilila ukubako ku cifulo cimbi. Imipepele yonse iya bufi yalilobele ilyo kwali Ilyeshi mu nshita ya kwa Noa. Kanshi icisambilisho ca kuti abantu bakwata umweo uushifwa cifwile catendeke pa numa ya Lyeshi ilyo Lesa ashilasalanganya abantu abalekuula ulupungu lwa Babele.—w19.12, ibu. 15.