Muleba Aba Luse ku “Bantu Balekanalekana.”
ILYO Yesu alesambilisha abasambi bakwe ifya kubila imbila nsuma, alishibe ukuti te bantu bonse bakatemwa imbila ya Bufumu. (Luka 10:3, 5, 6) Ilyo tulebila imbila nsuma abantu bamo balatusasukila kabili balafwaya no kutuuma. Kwena ifya musango uyu nga fyatucitikila, kuti twafilwa ukutwalilila ukulaumfwila uluse abo tubilako imbila nsuma.
Umuntu uwaba no luse aleluka ifyo abantu balekabila na mafya bakwete, alabalangulukilako kabili alafwaya no kubafwa. Nomba nga twaleka ukulaumfwila uluse abantu tusanga ilyo tulebila imbila nsuma, kuti twaleka ukuba abacincila kabili kuti twaleka no kulabila bwino imbila nsuma. Lelo nga tuli no luse ciba kwati tulebika inkuni pa mulilo pa kuti utwalilile ukwaka. Kanshi nga tuli no luse, tukatwalilila ukuba abacincila ilyo tulebila imbila nsuma!—1 Tes. 5:19.
Kuti twacita shani pa kuti tuleba no luse na lintu cafishe ukuba no luse? Natulandeko pali Yehova, Yesu no mutumwa Paulo abo tulingile ukulapashanya.
MULEPASHANYA YEHOVA UWABA NO LUSE
Nangu ca kuti Yehova balimuseebanya pa myaka iingi nga nshi, alitwalilila ukushipikisha. Alitwalilila ukuba “uwa cikuuku ku bashitasha na ku babifi.” (Luka 6:35) Tulamona ukuti wa cikuuku pantu alitekanya. Yehova afwaya “abantu balekanalekana” bakapusuke. (1 Tim. 2:3, 4) Nangu ca kuti Lesa alipata ifyabipa, alicindika sana abantu kabili tafwaya umuntu nangu umo akafwe.—2 Pet. 3:9.
Yehova alishiba ifyo Satana apofwisha abashatetekela. (2 Kor. 4:3, 4) Abantu abengi balibasambilisha ifisambilisho ifya bufi ne misango yabipa ukutula ku bwaice kabili ici calenga balekaana ukukutika icine. Yehova alafwaya sana ukwafwa abantu ba musango uyu. Twaishiba shani?
Moneni ifyo Yehova alemona abena Ninebe. Nangu ca kuti bali bankalwe Yehova aebele Yona ati: “Bushe na ine nshifwile ukuumfwila ubulanda Ninebe umusumba uukalamba, umwaba abantu ukucila [pali] 120,000 abashaishiba nangu panono ukulekanya ukuboko kwabo ukwa ku kulyo no kwa ku kuso?” (Yona 4:11) Yehova alemona abena Ninebe ukuti tabaishibe icine, e co atumiine Yona ukuyabasoka.
Na ifwe tumona abantu ukuti balicindama nga filya fine Yehova abamona. Na kabili tulafwaya ukwafwa umuntu onse uwingafwaya ukukutika nangu ca kutila alemoneka kwati kuti akaana ukukutika.
MULEPASHANYA YESU UWALI NO LUSE
Yesu na o alyumfwilile abantu uluse pantu balekabila ifya kwa Lesa. Baibolo itila: “Ilyo amwene amabumba, abomfwilile uluse pantu balebacusha kabili bali abapaswa nge mpaanga ishabula kacema.” (Mat. 9:36) Yesu talemona fye ifyo balemoneka ku nse; alimwene ukuti abaleya kuli ena ku kukutika ifyo alelanda balibasambilishe ifya bufi kabili balebacusha ku ntungulushi sha mapepo. Nangu ca kuti Yesu alishibe ukuti abantu abengi tabali na kukonka ifyo alebasambilisha pa mulandu wa fintu ifyalekanalekana, alitwalilile “ukubasambilisha ifintu ifingi.”—Marko 4:1-9.
Mwilaumfwa ububi umuntu nga akaana ukukutika pa muku wa kubalilapo mwalanda nankwe
Ifintu filaaluka kanshi no muntu uwakeene ukukutika icine kuti ayaluka
Abantu nga bakaana ukukutika imbila tubila, tulingile ukutontonkanya pa calenga bakaane. Abantu bamo nalimo tabatemwa Baibolo nelyo imipepele ya Bena Kristu pa mulandu wa mibele iyabipa iyo abantu abatila Bena Kristu bakwata. Nalimo bambi bena balibeba ifya bufi pa fyo twasuminamo. E lyo bambi nabo balatiina ukuti abantu mu bwikashi nelyo balupwa lwabo bakalabaseka nga bakutika kuli ifwe.
Bamo abo tubilako imbila nsuma kuti balakaana pa mulandu ne fyabipa ifyabacitikile ifyalenga baba no bulanda. Ba Kim bamishonari, batile: “Abantu abengi abekala mu ncende imo umo tubila imbila nsuma balipuswike mu nkondo kabili ifipe fyabo fyonse fyalyonaika. Tabakwata isubilo lya kuti ifintu fikawama ku ntanshi. Baliba ne cikonko kabili tabacetekela abantu. Muli iyi ncende tulasanga abantu abapata imbila tubila. Inshita imo, balingumine ilyo nalebila.”
Finshi ba Kim bacita pa kuti batwalilile ukuba no luse ku bantu nangu ca kuti balibomine? Batile: “Abantu nga bansaalula, ndatontonkanya pa mashiwi yaba pa Amapinda 19:11 apatila: ‘Umuntu wa mano takalipa bwangu.’ Nga naibukisha ifyacitikila abantu ababa mu cifulo tubila imbila nsuma ndabomfwila uluse. Na kabili te bonse abatupata. Muli iyi ine incende twalikwatamo ne fipempu.”
Nalimo kuti twayipusha atuti, ‘Nga nine nali aba bantu baba mu cifulo tushimikilamo, bushe kuti nakutika imbila ya Bufumu nelyo iyo?’ Ku ca kumwenako, bushe kuti nakutika imbila nsuma nga ca kuti balatweba ifya bufi pa Nte sha kwa Yehova? Nalimo na ifwe bene kuti twakaana kabili kuti twafwaya umuntu atumfwila uluse. Nga tuleibukisha ukuti Yesu atwebele ukulacitila abantu ifyo twingafwaya baletucitila, tukalabalangulukilako na lintu cafishe.—Mat. 7:12.
MULEPASHANYA PAULO UWALI NO LUSE
Umutumwa Paulo ali no luse na ku bantu abalemucusha. Mulandu nshi? Pantu aleibukisha ifyo ali kale. Atile: “Kale nali uwa miponto kabili uwalecusha abantu bakwe kabili uwa musaalula. Lelo, nabelelwe uluse, pantu nshaishibe ifyo nalecita kabili nacitiile mu kubula icitetekelo.” (1 Tim. 1:13) Alishibe ukuti Yehova na Yesu balimubelele uluse. Paulo afwile alemona abo alebilako imbila nsuma ukuti bali fye filya fine ali ilyo ashilayaluka.
Inshita shimo, Paulo alesanga abantu abasumine mu fisambilisho fya bufi ifyali nga amalinga ayakosa. Bushe alecita shani? Pa Imilimo 17:16 alandile ukuti ilyo ali mu Atena, “alikalifiwe pa kumona ukuti umusumba waiswilemo utulubi.” Na lyo line, Paulo abomfeshe ifi fine ifyamukalifye pa kubila imbila nsuma. (Imil. 17:22, 23) Aleyalula inshila ya kubililamo imbila nsuma ukulingana ne nkulilo ya bantu pa kuti “mu nshila iili yonse apususheko bamo.”—1 Kor. 9:20-23.
Kuti twapashanya Paulo nga twaishiba ifyo abantu baba nelyo ifisambilisho fya bufi ifyo abantu basuminamo pa kuti tuletendeka bwino ukulanshanya nabo “imbila nsuma iya fintu ifisuma.” (Esa. 52:7) Nkashi Dorothy atile: “Abantu abengi mu cifulo tubilamo imbila nsuma babasambilisha ukuti Lesa munkalwe kabili alapingula bwangu abantu ukwabula no kwishiba ifishinka. Ndatasha abantu ba musango uyu pa fyo basumina ukuti Lesa e ko aba kabili ntendeka ukubeba ifyo Baibolo ilanda pa mibele iisuma iya kwa Yehova na pa fyo alaya ukucitila abantu ku ntanshi.”
“ULECIMFISHA UBUBI PA KUCITA IFISUMA”
Apo tuli sana mu “nshiku sha kulekelesha,” tulingile ukwenekela ukuti abantu bamo abo tubilako imbila nsuma “bakaya balebipilako fye.” (2 Tim. 3:1, 13) Lelo tatulingile ukuleka ifyo abantu bacita fyalenga twaleka ukuba no luse nelyo fyalenga twaleka ukuba ne nsansa. Yehova kuti atupeela amaka ya ‘kucimfisha ububi pa kucita ifisuma.’ (Rom. 12:21) Nkashi Jessica painiya atile: “Ilingi line ndasanga abantu abashaicefya kabili abatusuula kabili abasuula imbila tubila. Ici cilakalifya umutima. Ilyo natendeka ukulanshanya no muntu, ndapepa mu mutima kuli Yehova no kumweba ukuti angafwe ukulamona uyu muntu nga fintu amumona. Nga nacita ifi nshumfwa ububi lelo ntontonkanya pa fyo ningacita pa kumwafwa.”
Tulatwalilila ukufwaya abantu abafwaya umweo wa muyayaya
Abantu bamo balasuka basumina ukusambilila icine
Tulingile no kulatontonkanya pa fyo twingakoselesha abo tubila nabo imbila nsuma. Ba Jessica batile: “Nga ca kuti abantu bakaana ukukutika ku o ndebomba na o mu mulimo, nshilandapo sana. Lelo ndalula ilyashi no kulanda pa fintu ifingatukoselesha, pamo nga ifisuma ifilecitika mu mulimo wa kubila imbila nsuma nangu ca kuti kwaliba bamo abakaana ukukutika.”
Yehova alishiba amafya tukwata ilyo tulebila imbila nsuma. Alatemwa sana nga amona tuli no luse nga fintu aba! (Luka 6:36) Kwena Yehova takatwalilile fye ukuba no luse. Kuti twacetekela ukuti alishiba inshita iyalinga ilyo akonaula cino calo. Ilyo Yehova ashilaonaula cino calo, natutwalilile ukuba abacincila mu mulimo wa kubila. (2 Tim. 4:2) Natutwalilile ukuba abacincila pa kubomba umulimo wesu no kuba aba luse ku “bantu balekanalekana.”
