IFYO BAIBOLO ISAMBILISHA | UKUPONYA IFUMO
Ukuponya Ifumo
Abanakashi abengi balaponya amafumo cila mwaka. Nga kupenda amafumo baponya yalacila ne mpendwa ya bantu baba mu fyalo fimo.
Bushe ukuponya ifumo kwalibipa nelyo kwaliba fye bwino?
IFYO ABANTU BALANDA
Abanakashi abaponya amafumo balakwata imilandu bacitila ifyo. Icilenga bamo ukuponya amafumo kukanakwata indalama, ukukwata amafya mu fyupo, ukufwaya ukulundapo amasambililo nelyo ukufwaya ukukwata incito iisuma. Bambi nabo tabafwaya ukufyala umwana uwabula wishi. Na lyo line, abantu bambi batila umwanakashi talingile ukuponya ifumo pantu Lesa e wamupeela umulimo wa kusunga umwana mwi fumo.
IFYO BAIBOLO ILANDA
Lesa amona ukuti ubumi bwa muntu bwalicindama. (Ukutendeka 9:6; Amalumbo 36:9) Kanshi nangu fye bumi bwa mwana uuli mwi fumo bwalicindama, pantu Lesa apangile ifumo lya mwanakashi ukuti umwana e mo alekulila ilyo ashilafyalwa. Uwalembele amalumbo atile: “Mwancingilile mu nda muli mayo. Ilyo fye nalepangwa amenso yenu yalimwene, kabili mwi buuku lyenu mwalembelwe ifilundwa fyandi fyonse, mwalembelwe inshiku ifilundwa fyapangilwe.”—Amalumbo 139:13, 16.
Amafunde ayo Lesa apeele abena Israele e lyo na kampingu iyo atupeela, na fyo filalanga ifyo Lesa amona ubumi bwa mwana uushilafyalwa. Mu Mafunde ya kwa Lesa mwali ne funde lyaleti, umuntu uwauma umwanakashi uuli pa bukulu no kwipaya umwana uuli mwi fumo, balingile ukumwipaya. (Ukufuma 21:22, 23) Lelo ilyo bashilamupingula, bakapingula balingile ukwishiba icalengele ukuti acite ifyo.—Impendwa 35:22-24, 31.
Abantu balikwata kampingu. Umwanakashi nga akaana ukuponya ifumo pantu kampingu naimukaanya, kampingu yakwe tayakulamucusha. * Lelo nga aponya ifumo, kampingu yakwe yakulamucusha. (Abena Roma 2:14, 15) Abafwailisha pa fintu basanga ukuti abanakashi abaponya amafumo balalwala amasakamika kabili balaba sana no bulanda.
Nomba kuti mwacita shani nga mulemona kwati cikamwafya ukukusha umwana, maka maka nga tamwalefwaya ukwimita? Moneni ifyo Lesa alaya abantu abacita ifyo afwaya. Atila: “Ku wa cishinka mukaba aba cishinka; Ku wa kaele mukaba aba kaele.” (Amalumbo 18:25) Na kabili Baibolo itila: “Yehova atemwa umulinganya, kabili takashe aba cishinka bakwe.”—Amalumbo 37:28.
“Kampingu wabo aleshimika ubunte pamo na bo, kabili mu matontonkanyo yabo abene, balepeelwa umulandu nelyo fye ukulungamikwa.”—Abena Roma 2:15.
Inga ca kuti mwaliponeshepo ifumo?
IFYO ABANTU BALANDA
Ba Ruth abashimbe balandile ukuti: “Nalikwete abana batatu kabili nalemona kwati te kuti nsunge abana 4. Nomba ilyo naponeshe ifumo nalyumfwile sana ububi.” * Nomba bushe Lesa te kuti abelele ba Ruth uluse pa fyo bacitile?
IFYO BAIBOLO ILANDA
Yesu Kristu alilandile ifyo Lesa amona ababembu ilyo alandile ukuti: “Nshaisa ku kwita abalungami iyo, kano ababembu ukuti balapile.” (Luka 5:32) Nga ca kuti tulomfwa ububi pa fyo twacitile kabili twalapila no ukulomba ukuti Lesa utubelele uluse, akatwelela nangu ulubembu twacitile lwalibipile sana. (Esaya 1:18) Pa Amalumbo 51:17 patila: “Umutima uwa bulanda kabili uwasakamikwa, tamwakausuule, mwe Lesa.”
Nga ca kuti umuntu aicefya no kupepa ukuti bamwelele, Lesa kuti amupeela kampingu iisuma kabili kuti alenga uwabembwike aleka ukusakamikwa sana. Baibolo pa Abena Filipi 4:6, 7 itila: “Lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu.” * Ilyo ba Ruth batendeke ukusambilila Baibolo, balipepele ukuti Lesa ababelele uluse, ne ci calengele ukuti belaumfwa sana ububi. Balishileishiba ukuti kuli Lesa e “kwaba ukwelela kwa cine.”—Amalumbo 130:4.
“[Lesa] taacita kuli ifwe ukulingana ne membu shesu; kabili taatukanda ifyo tufwile ukukandwa ukulingana ne membu shesu.”—Amalumbo 103:10.
^ para. 8 Nangu ca kuti nyina nelyo umwana kuti afwa pa kupaapa, ukuponya ifumo kwalibipa. Inshita ya kupaapa nga yafika, umulume no mukashi e bafwile ukusalapo uufwile ukupusuka nga ca kuti ni nyina nelyo mwana. Na lyo line, mu fyalo ifikankaala ifingi, aba mu fipatala balishiba ifya kucita pa kuti takuli ubu ubwafya.
^ para. 12 Ili te shina lyabo.
^ para. 14 Ukwishiba ukuti Lesa akabuusha abafwa na ko kuti kwalenga umuntu elasakamikwa sana. Belengeni icipande caleti “Amepusho Ukufuma ku Babelenga” muli magazini ya Ulupungu lwa kwa Kalinda ulwa April 15, 2009. Iyi magazini yalilanda pa filanga ukutila Lesa kuti abuusha umwana uwafwile ninshi talafyalwa.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Finshi Baibolo Ilanda pa Kuponya Ifumo?
Ni lilali ubumi bwa muntu butendeka? Bushe Lesa kuti aeleela umuntu uwaponyapo ifumo?
