BUSHE MUMONA UKUTI MWALIBA NE NSANSA? Nga mwaliba ne nsansa, finshi filenga muleba ne nsansa? Bushe ni balupwa, incito, nelyo kuntu mupepa? Nalimo mumona kwati mukaba sana ne nsansa nga mwapwisha isukulu, mwatendeka ukubomba incito iisuma, nelyo mwashita motoka iipya.

Abantu bamo balaba ne nsansa nga bacita fimo ifyo balefwaisha ukucita nelyo bakwata icintu ico balefwaisha. Nomba bushe ishi insansa bakwata shilatwalilila? Ku ca bulanda, ilingi line ishi insansa shiba fye sha pa kashita akanono.

Ishiwi lya kuti insansa talyalola mu kuti umuntu alingile fye ukumfwa bwino pa nshita iinono, lelo kutwalilila ukumfwa bwino no kulafwaisha ukuba uwa mweo. Umuntu uwaba ne nsansa alamoneka ukuti ca cine aliba ne nsansa.

Na kabili apo umuntu afwile ukulaba ne nsansa pa nshita iitali, kuti twatila ukuba ne nsansa takupwa, lelo kufwile fye ukutwalilila. Kanshi umuntu nga alanda ukuti, “nkaba ne nsansa nga . .” ninshi tali ne nsansa pali iyo nshita, lelo akaba ne nsansa inshita imbi.

Kuti twalinganya ukuba ne nsansa ku kuba no bumi busuma. Finshi fitwafwa ukuba no bumi busuma? Kulalya ifya kulya ifisuma, ukutukusha umubili no kulaikala bwino. Tulaba ne nsansa nga tulecita ifingalenga twaba ne nsansa kabili tulekonka amafunde ya kwa Lesa.

Fintu nshi nelyo mibele nshi iingalenga twaba ne nsansa? Nangu ca kuti ifintu fimo fyalicindama ukucila fimbi, ifi ifili pe samba kuti fyatwafwa sana ukuba ne nsansa:

• UKUTEKA UMUTIMA KU FYO TUKWETE NO KUBA BAKAPEKAPE

• UKUBA NO BUMI UBUSUMA

• UKUTEMWA

• UKULAELELA

• UKWISHIBA ICO TWABELA PANO CALO

• ISUBILO

Icitabo ico abantu bacindika sana citila: “Balipaalwa aba kaele mu myendele yabo.” (Amalumbo 119:1) Lekeni nomba tulande pa fingatwafwa ukuba ne nsansa