“Abombeshe, abombe umulimo usuma ku minwe yakwe, pa kuti akwate ica kupeelako uushikwete.” —ABENA EFESE 4:28.

Kabumba wesu afwaya tulebombesha. Mulandu nshi? Umuntu uubombesha alaba ne nsansa pantu alakwata ifyo akabila e lyo ne fyo ulupwa lwakwe lukabila. Na kabili alakwata ne fya kupeelako abashikwete. Abamwingisha incito nabo balamutemwa. E ico ilingi line umuntu uubombesha alakokola pa ncito. Baibolo ilanda pa fisuma ifyo umuntu akwata nga alebombesha ukuti “bupe bwa kwa Lesa.”—Lukala Milandu 3:13.

“Natucetekela ukuti tuli na kampingu umusuma, apo tufwaya ukuba aba cishinka muli fyonse.”—ABAHEBERE 13:18.

Nga ca kuti tuli ne cishinka, tatuisuula, tatusakamana sana kabili tatufufiwa utulo. Abantu balatucetekela no kutucindika. Abantu abashaba ne cishinka tabakwata ifi fyonse twalandapo. Na kabili kampingu yabo ilabacusha kabili balasakamana ukuti bushiku bumo abantu bakeshiba ifyo bacita.

“Mu mikalile yenu mwilatemwa indalama, lelo muteke imitima ku fintu ifyo mukwete.”—ABAHEBERE 13:5.

Tulakabila indalama sha kushitamo ifya kulya e lyo ne fintu fimbi ifyo tukabila. Na lyo line, “ukutemwa indalama” kwalibipa. Umuntu uwatemwa indalama alakwata amafya mu cupo. Takwata inshita ya kuba na bana bakwe kabili kuti aonaula ubumi. (1 Timote 6:9, 10) Na kabili, umuntu uwatemwa indalama kuti aleka ukuba ne cishinka. Umuntu umo uwali na mano atile: “Umuntu uubomba ifya cishinka akapaalwa nga nshi, lelo uwangufyanya ukunonka icuma takabe uwa kaele.”—Amapinda 28:20.

“Sunga amano yene yene no kulingulula.”—AMAPINDA 3:21.

Amasambililo ayasuma kuti yalenga twaba abantu abasuma kabili abafyashi abasuma abo abantu bengacetekela. Nomba ifyo tusambilila ku masukulu fyeka fye te kuti filenge twaba ne nsansa sha cine cine nelyo ukulakwata fyonse ifyo tukabila. Lelo nga tulefwaya ukutunguluka muli fyonse ifyo tucita, tulingile ukulasambilila ifya kwa Lesa. Amalembo yalanda pa muntu uusambilila ifya kwa Lesa ukuti: “Conse ico acita cikatunguluka.”—Amalumbo 1:1-3.