Ubumi Ubusuma
Baibolo te citabo cilanda pa fya bumi. Na lyo line, ilalanda pa fyo twingacita pa kuti tube no bumi ubusuma. Natulande pali fimo ifyo Baibolo ilanda ifingatwafwa ukuba no bumi ubusuma.
MULESUNGA BWINO UMUBILI WENU
IFYO BAIBOLO ILANDA: “Takwatala akuba umuntu nangu umo uwapata umubili wakwe; lelo alauliisha no ku-usunga bwino.”—Abena Efese 5:29.
UMWALOLA AYA AMASHIWI: Amashiwi yaba pali ili ilembo yalatukoselesha ukulasunga bwino imibili yesu. Abafwailisha pa fintu bamo basangile ukuti ilingi line icilenga tulelwala, fintu tusunga imibili yesu. Kanshi nga tulesunga bwino imibili yesu, ubumi bwesu kuti bwawaminako.
IFYO MWINGACITA:
-
Mulelya Ifya Kulya Ifisuma. Mulelya ifya kulya ifingamwafwa ukuba no bumi ubusuma kabili mulenwa amenshi ayengi.
-
Muletukusha Umubili. Ukutukusha umubili kulalenga ubumi bwa muntu ukuwaminako, nampo nga alalwalilila, alilemana nelyo mukoloci. Nangu ca kuti balupwa, ifibusa e lyo na ba ku cipatala kuti batukoselesha ukulatukusha umubili kabili kuti batwebako ne fyo tulingile ukulacita, na ifwe bene tulingile ukuibikilishako pa kuti tuletukusha umubili.
-
Mulelaala Amaawala Ayalinga. Nga ca kuti mulelaala fye amaawala ayanono pa nshiku ishingi, kuti mwatendeka ukulwala. Ku ca bulanda, abantu abengi balacita ifintu fimbi pa nshita iyo balingile ukulaala. Nomba icishinka ca kuti nga tulelaala amaawala ayalinga, ubumi bulawaminako.
MWILACITA IFINGALENGA MWAFILWA UKUBA NO BUMI UBUSUMA
IFYO BAIBOLO ILANDA: “Tuisangulule kuli fyonse ifikowesha umubili no mupashi.”—2 Abena Korinti 7:1.
UMWALOLA AYA AMASHIWI: Tulaba no bumi ubusuma nga tatulekowesha imibili yesu ku fintu pamo nga fwaka. Fwaka e lyo ne miti imbi iyabindwa filalwalika no kwipaya abantu.
IFYO MWINGACITA: Mufwile ukusala ubushiku mulefwaya ukuleka ukupeepa. Ubushiku mulefwaya ukuleka ukupeepa nga bwapalama, mufwile ukupoosa fwaka e lyo ne fintu fimbi ifyo mubomfya pa kupeepa. Na kabili, mwilaya ku ncende ukusangwa sana abacita ifyo mulefwaya ukuleka. Mulingile no kwebako balupwa ne fibusa fyenu ukuti mulefwaya ukuleka ukupeepa pa kuti bengamwafwa.
FIMBI IFYO BAIBOLO ILANDA IFINGAMWAFWA
Nga mulefwaya Baibolo iyapulintwa kuti mwaeba Inte sha kwa Yehova ababa ku ncende mwikala
MULEICINGILILA KU FINGALETA AMASANSO.
“Nga wakuula ing’anda, ukabikepo ica kucingilila pa mutenge, pa kuti taubikile umulandu wa mulopa pa ng’anda yobe pantu umo kuti aponapo.”—AMALANGO 22:8.
MWILAFULWA BWANGU.
“Uukokola ukukalipa muntu uwiluka nga nshi, lelo uushatekanya alanga ukuti mupumbu.”—AMAPINDA 14:29.
MWILALIISHA.
‘Wiba pa . . . bafunushi.’—AMAPINDA 23:20.
Nalimo Kuti Mwatemwako ne fi
LOLENI!
Ifya Kucita pa Kuba ne Nsansa—Ukuba no Bumi Ubusuma
Bushe ukukanaba no bumi ubusuma kulalenga umuntu ukukanaba ne nsansa?
