Bushe basayantisti kuti balondolola ifyo ifyaba mu muulu na pe sonde ukubikako ne fya mweo fyaishilebako? Te kuti balondolole. Bamo balanda ukuti basayantisti abasambilila pa fyaba mu muulu na pano isonde kuti ba-asuka ici cipusho. Na lyo line, ba Marcelo Gleiser, ba profesa abasambilisha ifya physics pa Dartmouth College batile: “Tatwabala atulondolola ifyo ifyaba mu muulu na pano isonde fyaishilebako.”

Icipande icali muli magazini ya Science News icalandile pa fyo ubumi bwatendeke catile: “Kuti cakosa ukulondolola ifyo ifya mweo fyaishilebako pano isonde. Ifintu ifingi ifingatulanga ifyo ifya mweo fyaishilebako pe sonde fyalyonaika kale.” Ifi twalandapo filanga ukuti basayantisti tabasanga icasuko ku cipusho ca kuti, bushe ifya mu muulu na pe sonde ukubikako fye ne fya mweo fyaishilebako shani?

Nomba nalimo kuti mwayipusha ukuti, ‘nga ca kuti ifya mweo pe sonde kwaliba uwafibumbile, ninshi nani uyo wine? Nga ca kuti kabumba uwakwata amano kabili uwakwata ukutemwa e ko aba ninshi mulandu nshi tuculila? Cinshi alekela ukuti kube imipepele yalekanalekana? Cinshi alekela abantu abamupepa ukulacita ifyabipa?’

Te kuti tusange amasuko kuli ifi fipusho mu fya sayansi. Lelo ici tacilolele mu kuti te kuti musange amasuko ya cine kuli aya mepusho. Na kuba abantu balisanga amasuko kuli aya mepusho muli Baibolo.

Nga mulafwaya ukwishiba icalenga basayantisti abengi abasambilila Baibolo basumine ukuti kwaliba kabumba, kabiyeni pa jw.org/bem, lyena muye apatila “ifyo balanda pa fyo ifya mweo fyaishilebako.”