IFYO ABASAMBILILA PA BUMI BALANDA

Ukulingana ne cipande cimo icaba muli Harvard Mental Health Letter, “umuntu nga aletasha, alaba sana ne nsansa. Ukutasha kulalenga abantu baleba ne nsansa, baletontonkanya pa fintu ifisuma, baleba no bumi ubusuma, baleshipikisha ilyo bali na mafya, no kulaumfwana sana na bantu bambi.”

IFYO BAIBOLO ILANDA

Baibolo ilatweba ukuti tufwile ukulatasha. Umutumwa Paulo alembele ukuti, “muletootela,” kabili alitulangile ifyo tulingile ukucita pa kulatasha. Ku ca kumwenako, Paulo aletasha “Lesa lyonse,” pa fyo abantu balekutika ku mbila nsuma iyo alebila. (Abena Kolose 3:15; 1 Abena Tesalonika 2:13) Umuntu alaba ne nsansa sana nga ca kuti aletasha lyonse ukufuma pa nshi ya mutima, te kulanda fye ati natotela limo limo. Nga tuletasha ukufuma pa nshi ya mutima, tatwakulaba no mufimbila no lupato, ne ci cikalenga tukabe ne nsansa sana.

Kabumba wesu alatasha fye na bantu, kanshi na ifwe tulingile ukumupashanya. Pa AbaHebere 6:10 patila: “Lesa taba uushalungama, takalabe umulimo wenu no kutemwa uko mwalangile kwi shina lyakwe.” Ca cine, Kabumba wesu amona ukuti calibipa ukukanatasha.

“Mulesekelela lyonse. Muli fyonse muletootela.”—1 Abena Tesalonika 5:16, 18.

IFYO MWINGASAMBILILAKO KU FYACITIKILAPO BAMBI

Nga ca kuti twatasha ilyo umuntu atupeela ubupe, atweba amashiwi ayasuma nelyo atwafwa, tulalenga uyo muntu ukumfwa ukuti twalimucindika kabili alaba ne nsansa. Nangu fye bantu abo tatwaishiba, balatasha nga twabacitila ifintu ifisuma pamo nga ukubekatilako iciibi.

IFYO BAIBOLO ILANDA

Yesu Kristu atile: “Mulepeela, na imwe abantu bakulamupeela. E lyo bakamupeela muli tumba wenu icipimo icisuma, icashindailwa, ico basunkanya bwino bwino kabili icaisula.” (Luka 6:38) Natulande pali Rose, umukashana nkomamatwi uwikala ku Vanuatu, icishi cabela ku South Pacific.

Rose aleya lyonse mu kulongana kwa Nte sha kwa Yehova, lelo finono aleumfwa pantu taishibe ululimi lwa bankomamatwi kabili mu cilonganino namo tamwali abaishibe ulu ululimi. Ilyo ba Nte babili abaupana abaishibisha ukupilibula ululimi lwa bankomamatwi baile kuli ici cilonganino no kumona ubwafya bakwete, batendeke ukubasambilisha ululimi lwa bankomamatwi. Rose alitashishe ukufuma pa nshi ya mutima. Atile: “Nalitemwa ukukwata ifibusa ifingi abantemwa.” Aba abaupana balatemwa sana nga bamona ifyo alanga ukutasha ne fyo asukapo pa kulongana. Rose alatasha na pa fyo bambi basambilile ulu lulimi pa kuti fye balelanda nankwe.—Imilimo 20:35.

“Uuletuula ilambo lya kutootela ngo mutuulo wakwe e uncindika [Lesa].”—Amalumbo 50:23.

IFYO BAIBOLO ILANDA

Fwe bantu tucita ifyo tutontonkanya. Davidi uwalembeleko Baibolo aebele Lesa mwi pepo ukuti: “Ntontonkanya pa micitile yenu yonse; Nabika umutima wandi pa fyo iminwe yenu yacitile.” (Amalumbo 143:5) Ca cine, Davidi aletontonkanya sana pa fyo Lesa acita. Ici e calengele Davidi aletasha sana Lesa, kabili ifi fine e fyo alecita ubumi bwakwe bonse.—Amalumbo 71:5, 17.

Baibolo ilatupanda amano ukuti: ‘Pali fyonse ifya cine, pali fyonse ifyatemwikwa, pali fyonse ifyawama, pali conse icisuma icabako na pali conse ica kutasha icabako, twalilileni ukutontonkanya pali fi fintu.’ (Abena Filipi 4:8) Amashiwi ya kuti “twalilileni ukutontonkanya” yalangilila ukuti, pa kuti tuletasha tufwile ukulatontonkanya lyonse pa fintu ifyo bambi batucitila.

“Ifyo umutima wandi ukalatontonkanyapo fikaba fya mano.”—Amalumbo 49:3.