Lipoti imo iya ba Wildlife Conservation Society (WCS) yalandile pa calo ca Belize ne ncende shimbi ishaba mu Caribbean ukuti: “Basanga ukuti isabi pamo nga conch, lobster ne sabi limbi lilafula bwangu mu ncende isho ubuteko bwabinda ukwipayamo isabi.” Iyi lipoti yalandile no kuti: “Cisenda fye umwaka umo ukufika ku myaka 6 pa kuti isabi lifule na kabili mu ncende umo ubuteko bwabinda, lelo pa kuti libe ifyo lyali pa kubala cilasenda imyaka iingi.” Ba Janet Gibson abangalila ili ibumba lya ba WCS balandile pa calo ca Belize ukuti: “Ukukwata incende umo ubuteko bwabinda ukwipaya isabi, kuti kwalenga isabi ne fintu fimbi ifyaba mu mimana ukufula na kabili.”

TONTONKANYENI PALI ICI: Bushe ifi ifya mweo fifula bwangu tafilanga ukuti kwaliba Kabumba uwa mano?—Amalumbo 104:24, 25.

Ifyo bafwailishe mu Vancouver, ku Canada, filanga ukuti, abantu tabakwata sana amasakamika nga balebelenga fye amameseji ya pa Intaneti imiku itatu mu bushiku bumo. Ba Kostadin Kushlev abali pa ntanshi mu kufwailisha batile: “Abantu balafilwa ukwikala fye ukwabula ukulabelenga amameseji babatumina pa Intaneti, lelo tabaishiba ukuti nga bacita ifi amasakamika yalacepako.”

TONTONKANYENI PALI ICI: Apo twikala mu “inshita ishayafya nga nshi,” bushe tatufwile ukulacita ifintu ifingalenga twilasakamikwa sana?—2 Timote 3:1.

Akabungwe akasabankanya ilyashi, aka Agência Brasil katile, abantu balebepaya sana mu Brazil. Icipani cilolekesha pa bumi casangile ukuti mu 2012, abantu abo baipeye balifulile sana ica kuti balicilile pali 56,000. Ba Luís Sapori, abasambilila pa fya kucingilila abantu, basanga ukuti icilenga fyonse ifi ni co abantu balileka ukuba ne mibele iisuma. Balandile ukuti abantu nga baleka ukukonka amafunde, “balatendeka ukubomfya amaka pa kuti ifyo balefwaya ficitike.”

BUSHE MWALISHIBA UKUTI Baibolo yalisobele ukuti kukaba inshita ilyo ukutemwa “kukacepa” na lintu abantu bakaba bampulamafunde?—Mateo 24:3, 12.