1, 2. (a) Mutende nshi uo twingakwata muno nshiku? (b) Cinshi cilenga ukuti twiba no mutende wine wine muno nshiku? (Moneni icikope pa muulu.)

BONSE fye tulafwaya ukulaikala bwino ukwabula amasakamika. Ala tulatasha sana Yehova pa kutupeela “mutende wa kwa Lesa,” uulenga twilatontonkanya pa fingalenga twalasakamana! (Fil. 4:6, 7) Na kabili, apo twaliipeela kuli Yehova, tulaba no “mutende na Lesa,” e kutila ukuba ifibusa na ena.—Rom. 5:1.

² Na lyo line, inshita tailafika iya kuti Lesa atupeele umutende wine wine. Muli shino nshiku sha kulekelesha ishayafya, abantu balapusana sana kabili abantu abengi nga nshi balitemwa ukukansana. (2 Tim. 3:1-4) Apo tuli Bena Kristu, tulingile ukulwisha Satana ne fisambilisho fyakwe ifya bufi. (2 Kor. 10:4, 5) Lelo abengalenga sana twaleka ukuba no mutende ni balupwa wesu abashili ba Nte. Balupwa wesu bamo nalimo kuti balatupumya pa fyo twasuminamo, kuti balatweba ukuti twalileta amalekano mu lupwa, nelyo kuti balatutiinya ukuti bakatukaana nga twatwalilila ukuba Inte. Finshi tulingile ukucita nga ca kuti balupwa wesu  balatukaanya ukupepa? Finshi twingacita pa kuti tushipikishe ifya musango uyu nga fyacitika?

3, 4. (a) Bushe ifyo Yesu alesambilisha fyali no kukuma shani abantu? (b) Ni lilali maka maka cingafya ukukonka Yesu?

³ Yesu alishibe ukuti ifyo alesambilisha fyali no kulekanya abantu no kuti abali no kuba abasambi bakwe balingile ukuba abashipa pa kuti batwalilile ukumukonka na lintu balebakaanya. Aba mu lupwa nga baletukaanya ukupepa, mu lupwa tamuba umutende. Yesu atile: “Mwitila naisa ku kuleta umutende pe sonde; nshaisa ku kuleta umutende, kano ulupanga. Pantu naisa ku kulekanya umuntu na wishi, no mwana mwanakashi na nyina, no mukashana waupwa na nafyala. Cine cine, abalwani ba muntu bakaba aba mu ng’anda yakwe.”—Mat. 10:34-36.

⁴ Ilyo Yesu atile, “Mwitila naisa ku kuleta umutende,” aloseshe mu kuti abalekutika kuli ena balingile ukutontonkanya pa fyali no kubacitikila nga baba abasambi bakwe. Ubukombe ubo alebila bwali no kulekanya abantu. Kwena ico Yesu alefwaya kusambilisha abantu icine pali Lesa, te kulekanya abantu iyo. (Yoh. 18:37) Na lyo line, bonse abali no kuba abasambi ba kwa Kristu baali no kukwata amafya nga ca kuti balupwa wabo ne fibusa bakaana ukusambilila icine.

5. Mafya nshi abasambi ba kwa Yesu bakwata?

⁵ Pa mafya ayo Yesu aebele abasambi bakwe ukushipikisha, paba no kubakaanya ukupepa kuli balupwa wabo. (Mat. 10:38) Pa kuti abasambi ba kwa Kristu batwalilile ukumukonka, balingile ukushipikisha ilyo balebapumya nelyo nga babakaana kuli balupwa wabo. Na kuba, balipokelela ifingi ukucila pa fyo basha.—Belengeni Marko 10:29, 30.

6. Finshi tulingile ukwibukisha nga ca kuti balupwa lwesu baletukaanya ukupepa Yehova?

⁶ Nangu balupwa wesu batukaanye shani ukupepa Yehova tatuleka ukubatemwa, na lyo line tulingile ukulaibukisha ukuti abo tufwile ukutemwa sana ni Lesa na Kristu. (Mat. 10:37) Na kabili tulingile ukwishiba ukuti Satana kuti alenga twatemwa sana balupwa wesu ica kuti twaleka ukuba aba cishinka kuli Lesa. Nomba natulande pali fimo ifyo balupwa bengalatukaanya ukucita ne fyo twingashipikisha aya mafya.

7. Bushe abaupana na bashili ba Nte banabo bafwile ukulamona shani amafya bakwata mu cupo?

⁷ Baibolo isoka ukuti abaupana “bakaba na macushi mu bumi bwabo.” (1 Kor. 7:28) Nga ca kuti abena mwenu te ba Nte mukalakwata na mafya e lyo na masakamika ayo abaupana na ba Nte banabo bashikwata. Na lyo line, mulingile ukulamona ifintu nga fintu Yehova afimona. Nga ca kuti abena mwenu balakaana ukuba abasambi ba kwa Kristu, uyu te mulandu wa kupaatukaninapo nelyo ukulekaninapo. (1 Kor. 7:12-16) Nangu ca kuti umulume uushili Nte tatungulula ulupwa mu fya kwa Lesa, umwina mwakwe alingile ukumucindika pantu e mutwe wa lupwa. No mulume Umwina Kristu alingile ukutemwa umwina mwakwe uushili Nte.—Efes. 5:22, 23, 28, 29.

8. Mepusho nshi mulingile ukuyipusha nga ca kuti abena mwenu limo limo balemukaanya ukupepa Lesa?

⁸ Kuti mwacita shani nga ca kuti abena mwenu limo limo balemukaanya ukupepa? Ku ca kumwenako, nkashi umo balimukeenye ku mwina mwakwe ukulabila imbila nsuma inshiku shimo mu mulungu. Ifi nga e fyamucitikila, mufwile ukuyipusha amuti: ‘Bushe abena mwandi balefwaya ndeke ukupepa Lesa wandi? Ifi nga te fyo balefwaya, bushe mfwile ukubanakila?’ Nga tamulepampamina fye pa  cintu cimo tamwakulakwata amafya ayengi mu cupo.—Fil. 4:5.

9. Bushe umufyashi Umwina Kristu kuti asambilisha shani abana bakwe ukulacindika umufyashi wabo uushili Nte?

⁹ Cilafya ukusambilisha abana ifya kwa Lesa nga ca kuti abena mwenu te ba Nte. Ku ca kumwenako, mulingile ukusambilisha abana benu ukulakonka ifunde lya mu Baibolo ilitila: “Ulecindika wiso na noko.” (Efes. 6:1-3) Nomba kuti mwacita shani abena mwenu nga tabakonka ifyo Baibolo ilanda pa mibele iisuma iyo tulingile ukukwata? Mufwile ukulacindika abena mwenu pa kuti abana benu balemupashanya. Mulebika amano ku mibele ya bena mwenu iisuma kabili mulebatasha. Mwilalanda ifyabipa pa bena mwenu pa menso ya bana. Lelo mulingile ukulondolwela abana benu ukuti cila muntu afwile ukuisalilapo ukubombela Yehova. Abana benu nga bali ne mibele iisuma, nalimo abena mwenu abashili ba Nte kuti batendeka ukupepa Yehova.

10. Bushe umufyashi Umwina Kristu kuti asambilisha shani abana bakwe icine ca mu Baibolo nga ca kuti umwina mwakwe te Nte?

¹⁰ Inshita shimo umufyashi uushili Nte kuti alapatikisha abana ukulasefya ifyo ababa mu kupepa kwa bufi basefya nelyo ukulabasambilisha ifyaba mu kupepa kwa bufi. Abalume bamo abashili ba Nte kuti balalesha abena mwabo ba Nte ukusambilisha abana ifya mu Baibolo. Na lyo line, umukashi Umwina Kristu alingile ukwesha apapela amaka yakwe ukusambilisha abana icine ca mu Baibolo. (Imil. 16:1; 2 Tim. 3:14, 15) Ku ca kumwenako, umulume kuti akaanya umwina mwakwe Umwina Kristu ukulatungulula abana bakwe abanono amasambililo ya Baibolo nelyo ukulabasenda mu kulongana. Nangu ca kuti umukashi alingile ukukonka ifyo umwina mwakwe alefwaya,  kuti alaebako abana ifyo asuminamo ilyo umwina mwakwe ashilipo, nga alecita ifi, ninshi alesambilisha abana bakwe imibele iisuma na pali Yehova. (Imil. 4:19, 20) Kwena abana abene e bakaisalilapo ukubombela Yehova nelyo iyo.—Amala. 30:19, 20. *

11. Cinshi cingalenga mwalapusana na balupwa abashili ba Nte?

¹¹ Nalimo pa kubala tatwaebele balupwa wesu ukuti tulalongana ne Nte sha kwa Yehova. Na lyo line, ilyo icitetekelo cesu calekoselako, twalisalilepo ukubeba ifyo twasuminemo. (Marko 8:38) Nga ca kuti ifi fyalilenga mwapusana na balupwa wenu abashili ba Nte, natusambilile ifyo mwingacita pa kuti mwilapusana sana kabili mutwalilile ukuba aba cishinka.

12. Mulandu nshi balupwa lwesu abashili ba Nte bengalatukaanisha ukupepa Yehova, lelo kuti twacita shani pa kuti tulebalangulukilako?

¹² Mulelangulukilako balupwa wenu abashili ba Nte. Nangu ca kutila natutemwa sana pa cine ca mu Baibolo ico tusambilile, balupwa wesu nalimo kuti balamona kwati twalibepwa nelyo twaba mu kabungwe ka mapepo akashaishibikwa bwino. Nalimo kuti balamona kwati twalibapata pantu tatusefya nabo amaholide. Kuti balatiina ukuti ifyabipa kuti fyatucitikila nga twafwa. Pa kuti tulebalangulukilako, tulingile ukulamona ifintu nge fyo balefimona kabili tufwile ukulakutika sana pa kuti twiluke ifilelenga balemona ifintu muli iyo nshila. (Amapi. 20:5) Umutumwa Paulo aleesha ukwishiba “abantu bonse” pa kuti alebashimikila imbila nsuma, ifi fine e fyo na ifwe tulingile ukulacita.—1 Kor. 9:19-23.

13. Bushe tulingile ukulalanda shani na balupwa lwesu abashili ba Nte?

¹³ Muleba abanakilila ilyo mulelanda nabo. Baibolo itila, “Imilandile yenu yonse ibe iisuma.” (Kol. 4:6) Kuti twalomba Yehova ukuti atupeele umupashi wa mushilo pa kuti tulelanga ukuti twalikwata ifisabo fya mupashi ilyo tulelanda na balupwa wesu. Tatufwile ukulabatalika pali fyonse fye ifyo basuminamo. Nga ca kuti ifyo balanda nelyo ifyo bacita fyatukalifya, tulingile ukupashanya abatumwa. Paulo alembele ati: “Ilyo baletutuka, tulapaala; ilyo baletucusha, tulashipikisha; ilyo baletuseebanya, ifwe tubasuka no mutembo.”—1 Kor. 4:12, 13.

14. Busuma nshi bwaba mu kuba ne mibele iisuma?

¹⁴ Muleba ne myendele iisuma. Nangu ca kuti ukuba abanakilila ilyo tulelanda na balupwa wesu abatukaanya ukupepa kuti kwalenga twalaumfwana nabo, imibele yesu iisuma kuti yatwafwa sana. (Belengeni 1 Petro 3:1, 2, 16.) Mulecita ifingalenga balupwa wenu bamona ukuti Inte sha kwa Yehova balekala bwino mu fyupo, balasunga bwino abana, baliba ne mibele iisuma kabili balaba ne nsansa. Nangu ca kuti balupwa wesu tabasambilile icine, kuti twaba ne nsansa ukwishiba ukuti imibele yesu ilelenga Yehova alesekelela.

15. Bushe kuti twapekanishisha shani kabela ifya kucita nga kwaba ifingalenga twapusana?

¹⁵ Muletontonkanishisha libela ifya kucita. Muletontonkanya pa fingalenga mwakansana na ba lupwa wenu, kabili muletontonkanya na pa fyo mwingacita. (Amapi. 12:16, 23) Nkashi uwa ku Australia alandile ati: “Batatafyala balipatile sana icine. Ilyo tushilabatumina foni, ine na bena mwandi twalepepa kuli Yehova pa kuti atwafwe ukuba ne cikuuku pa kubasuka nga bakalipa. Twalepekanya amalyashi ya kulandapo pa kuti tulanshanya bwino nabo. Tatwalefwaya ukulanshanya nabo ifingi sana ica kuti twatampa no kukansanina pa mipepele, e co twalecefyako inshita ya kulanda nabo.”

16. Kuti mwacita shani pa kuti muleke ukumfwa ububi nga mwacita ifyo balupwa wenu bashifwaya?

 ¹⁶ Kwena te kuti mwenekele ukutila lyonse mukalaumfwana na balupwa wenu abashili ba Nte. Nga mwapusana na balupwa wenu, kuti mwaumfwa ububi pantu mwalibatemwa nga nshi kabili lyonse mufwaya ukubasekesha. Nga ca kuti mwaumfwa ububi, mwilaleka ukutemwa mwatemwa balupwa wenu kwalenga mwafilwa ukuba aba cishinka kuli Yehova. Na kuba nga mwatwalilila ukuba aba cishinka kuli Yehova, balupwa wenu bakamona ukuti calicindama ukubombela Yehova. Na lyo line, mufwile ukulaibukisha ukutila te kuti mubapatikishe ukusambilila icine. Lelo mulecita ifingalenga bamona ukuti mwaliba ubusuma mu kukonka ifyo Yehova atweba. Lesa wesu uwaba no kutemwa afwaya ukuti nabo bene bakasalepo ukulamubombela.—Esa. 48:17, 18.

17, 18. Finshi fingamwafwa ukushipikisha nga ca kuti uwa mu lupwa lwenu aleka ukubombela Yehova?

¹⁷ Nga ca kuti lupwa wenu atamfiwa nelyo aifumya mu cilonganino, kuti mwaumfwa kwati bamulasa ulupanga. Kuti mwacita shani pa kuti mushipikishe?

¹⁸ Twalilileni ukubika amano ku fya kwa Lesa. Pa kuti mutwalilile ukukosha icitetekelo cenu, mulingile ukulabelenga Baibolo, ukulapekanya ukulongana no kulasangwa ku kulongana, ukulabila imbila nsuma, e lyo no kulapepa pa kuti muleshipikisha. (Yuda 20, 21) Kuti mwacita shani nga ca kuti mulecita fyonse ifi lelo mucili muleumfwa ububi? Tamufwile ukunenuka! Nga mwatwalilila ukuba abakosa mu fya kwa Lesa kuti mwaleka ukulaumfwa ububi. Natulande pa fyacitikile uwalembele Amalumbo 73. Ifyo atendeke ukumona ifintu fyalipusene ne fyo Yehova alefimona kabili atampile ukumfwa ububi, lelo alyalwike mu fyo aletontonkanya ilyo aingile mu ng’anda ya kwa Lesa. (Amalu. 73:16, 17) Na imwe bene nga ca kuti mwatwalilila ukupepa Yehova kuti mwaleka ukumfwa ububi.

19. Kuti mwalanga shani ukuti mwalicindika ifyo Yehova asalapula abantu bakwe?

¹⁹ Mulecita ifilanga ukuti mwalicindika ukusalapula kwa kwa Yehova. Ukutamfya umuntu uushilapila kuti kwalenga bonse mu cilonganino banonkelamo, ukubikako fye na ncitatubi wine nangu ca kuti pa kubala kulaba ukumfwa ububi. (Belengeni AbaHebere 12:11.) Ku ca kumwenako, Yehova alitweba ukuti “mwila-ampana” na bancitatubi abashilapila. (1 Kor. 5:11-13) Nangu ca kutila umutima kuti wakalipa, tatufwile ukulayampana na lupwa wesu uwatamfiwa, tatulingile ukulatumishanya amafoni, ukulatumishanya amameseji, ukulembeshanya amakalata, e lyo no kulembeshanya amameseji ya pa intaneti.

20. Lisubilo nshi tulingile ukukwata?

²⁰ Twalilileni ukuba ne subilo. Ukutemwa “kusuubila fyonse,” kulasuubila no kuti abantu abaleka ukubombela Yehova bakatampa ukumubombela na kabili. (1 Kor. 13:7) Nga ca kuti mwamona ukutila lupwa wenu alefwaya ukubombela Yehova na kabili, kuti mwamupepelako pa kuti Amalembo yamwafwe kabili acite ne fyo Yehova alanda pali Esaya 44:22, ati “bwelela kuli ine.”

21. Finshi mwingacita nga ca kuti tamumfwana na balupwa lwenu pa mulandu wa kuti mulakonka Yesu?

²¹ Yesu atile nga twatemwa sana abantu ukucila ifyo twamutemwa, te kuti tube abasambi bakwe. Na lyo line alicetekele ukuti abasambi bakwe baali no kutwalilila ukuba aba cishinka nangu balebacusha kuli balupwa wabo. Nga ca kuti mwalileta “ulupanga” mu lupwa lwenu pa mulandu wa kukonka Yesu, muleshintilila pali Yehova pa kuti alemwafwa ukushipikisha. (Esa. 41:10, 13) Muleba ne nsansa pantu Yehova na Yesu balatemwa ifyo mucita kabili bakamulambula nga mwatwalilila ukuba aba cishinka.