BA DIANA bali ne myaka ukucila pali 80. Abena mwabo balilwele ubulwele bwa kuli bongobongo ubulenga umuntu aba ne cilafi (Alzheimer’s disease). Ilyo ba muka ba Diana bashilafwa, balibasungilepo pa myaka imo mu ng’anda basungila abakote. Na kabili abana babili abaume aba ba Diana balifwile kabili ba Diana balilwele kansa ya kwi bele. Lelo ba Diana nga baya mu kulongana pa Ng’anda ya Bufumu nelyo nga balebila imbila nsuma, abo baba nabo mu cilonganino balamona ukuti balasekelela lyonse.

Ba John bali ni bakangalila benda ukucila pa myaka 43. Balitemenwe nga nshi uyu mulimo! Lelo balilekele ukubomba uyu mulimo pa kuti balesunga lupwa wabo uwalwele, kabili pali ino nshita babombela pa cilonganino. Abaishibe ba John kale, nga bamonana nabo pa kulongana kwa muputule nelyo ukwa citungu, balanda ukuti ba John tabayaluka, balitwalilila ukusekelela.

Cinshi cilenga ba Diana na ba John balesekelela? Cinshi cingalenga umuntu uuli no bulanda kabili uulecula alesekelela? Na kabili cinshi cingalenga umuntu uwaleka ukubomba umulimo uo atemenwe sana atwalilila ukuba ne nsansa? Baibolo ilatweba icilenga. Itila: “Uwalungama akasekelela muli Yehova.” (Amalu. 64:10) Kuti twaumfwikisha ici cishinka icacindama nga ca kuti twaishiba ifilenga umuntu alasekelela e lyo ne filenga elasekelela.

Mufwile mwalishibako fimo ifilenga abantu balasekelela. Tontonkanyeni pa fyo umwaume no mwanakashi abatemwana basekelela abali mu kuupana. Nelyo pa fyo abaupana basekelela nga bakwata umwana, nangu pa fyo uwa bwananyina asekelela nga bamupeela umulimo mu cilonganino. Ca cine ifi twalandapo filalenga abantu balesekelela pantu Yehova e Ntulo ya ifi fyonse. Yehova e watendeke icupo, e wabumbile abantu mu nshila ya kuti balekwata abana, kabili e upeela abantu imilimo mu cilonganino cakwe.—Ukute. 2:18, 22; Amalu. 127:3; 1 Tim. 3:1.

Na lyo line fimo ifilenga abantu balasekelela tafitwalilila ukulenga balesekelela. Ku ca bulanda, umo pa baupana kuti acita ubucende nelyo kuti afwa. (Esek. 24:18; Hos. 3:1) Abana bamo tabomfwila abafyashi babo na Lesa, kabili limo balatamfiwa na mu cilonganino. Abana ba kwa  Samwele tabalebombela Yehova ukulingana ne fyo alefwaya. Davidi na o ifyo acitile fyalengele mu lupwa lwakwe mwaba amafya. (1 Sam. 8:1-3; 2 Sam. 12:11) Ifya musango uyu nga fyacitika, tafilenga umuntu alasekelela lelo filenga fye aba no bulanda kabili alacula.

No muntu kuti aleka ukubomba imilimo imo mu cilonganino ca kwa Lesa nalimo pa mulandu wa kuti atendeka ukulwalilila, akwata abakusunga, nelyo nga kwaba fimo ifyayaluka mu cilonganino ca kwa Lesa. Abengi abo ifi twalandapo fyacitikilapo balanda ukuti balebukisha ifyo umulimo balebomba walelenga balesekelela.

Kanshi ifilenga abantu balesekelela ifyo twalandapo filenga balesekelela pa nshita fye iinono. Nomba bushe kwalibako icingalenga umuntu atwalilila ukusekelela na lintu ifintu fyayaluka? Cifwile eko caba, pantu Samwele, Davidi, e lyo na bambi balitwalilile ukusekelela na lintu bakwete amesho.

Yesu alishibe ifyo ukusekelela kwaba. Baibolo itweba ukuti ilyo ashilaisa pano calo, ‘aleanga ku cinso ca kwa Yehova inshita yonse.’ (Amapi. 8:30) Lelo ilyo ali pano calo, inshita shimo alekwata amafya ayakalamba. Na lyo line Yesu alesekelela ilyo alecita ukufwaya kwa kwa Wishi. (Yoh. 4:34) Bushe alitwalilile ukusekelela na lintu alecula pa cimuti? Baibolo itweba aiti: “Pa mulandu wa kusekelela ukwabikilwe pa ntanshi yakwe alishipikishe ilyo alecula pa cimuti ca kucushiwilwapo.” (Heb. 12:2) Kanshi kuti twasambililako fimo ku fintu fibili ifyo Yesu alandile pa kusekelela.

Yesu alandile ica kubalilapo ilyo abasambi 70 abo atumine ku kubila imbila nsuma babwelele. Abasambi balesekelela pantu balicitile ifipesha amano, ukubikako fye no kufumya ifibanda. Lyena Yesu abebele ati: “Mwisekelela pali ici, ukuti imipashi ilemunakila, lelo sekeleleni pa kuti amashina yenu nayalembwa mu muulu.” (Luka 10:1-9, 17, 20) Cine cine ukutemwikwa na Yehova e kwacindamisha ukucila pa kubomba umulimo uwaibela. Kanshi Yehova ali no kutwalilila ukwibukisha abasambi aba cishinka kabili ifi e fyalingile ukulenga batwalilila ukusekelela.

Yesu alandile icalenga bubili ilyo alesambilisha ibumba. Umwanakashi umo umuYuda uwatemenwe ifyo Yesu alesambilisha alandile ukuti banyina ba kwa Yesu bafwile bali sana ne nsansa kabili  bali abapaalwa. Lelo Yesu alilungike uyu mwanakashi ilyo amwaswike ati: “Awe, abapaalwa ni abo abomfwa no kukonka icebo ca kwa Lesa!” (Luka 11:27, 28) Abafyashi balaba ne nsansa nga ca kuti balitemwa abana babo, lelo ukuba cibusa na Yehova e lyo no kulamumfwila e filenga balesekelela nga nshi.

Ca cine nga twaishiba ukuti Yehova alitutemwa, tulasekelela nga nshi. Nangu ca kuti tatutemwa ukuba na amesho, tulatwalilila ukusekelela. Na kuba, ukutwalilila ukuba aba cishinka ilyo tuleshipikisha amesho kulalenga tulesekelela sana. (Rom. 5:3-5) Na kabili Yehova alapeela abamutetekela umupashi wakwe, kabili ukusekelela kwaba pa fisabo fya uyu mupashi. (Gal. 5:22) Ifi filenga twaumfwikisha ico Baibolo pa Amalumbo 64:10 itwebela ukuti: “Uwalungama akasekelela muli Yehova.”

Ifi fyalenga twaishiba icilenga ba Diana na ba John abo tulandilepo pa kubala balesekelela ilyo baleshipikisha amafya. Ba Diana batile: “Yehova alancingilila filya fine abafyashi bacingilila umwana.” Bushe ba Diana baishiba shani ukuti Yehova alibatemwa? Batile: “Ng’umfwa ukuti Yehova alimpaala pa kulenga natwalilila ukubomba umulimo wa kubila imbila nsuma lyonse no kulamwentula ilyo ndebomba uyu mulimo.” Ba John balabomba umulimo wa kubila imbila nsuma lyonse nangu ca kuti balileka ukubomba umulimo batemenwe sana uwa bukangalila wenda. Cinshi calenga? Batile: “Ukutendekela mu 1998 ilyo bampeele umulimo wa kusambilisha mwi Sukulu lya Kukansha Ilya Butumikishi, ndaisambilisha sana ukucila ifyo naleisambilisha kale.” Balandile no kuti: “Ine no mwina mwandi twaliipeeleshe ukubomba umulimo onse uo Yehova atupeela, kabili ici calengele twabelesha bwangu ilyo ifintu fyayalwike. Kabili tatulanguluka pa fyo tubombela Yehova.”

Aba bwananyina abengi balishininkisha ukuti ifyo Baibolo ilanda pa Amalumbo 64:10 fya cine. Ku ca kumwenako, abaupana bamo ababombele pa Bethel ya ku United States pa myaka 30, babebele ukufuma pa Bethel no kuya mu kubomba bupainiya bwaibela. Balandile ukuti: “Ca cifyalilwa fye ukuba no bulanda nga ca kuti waleka ukucita icintu ico watemwa, lelo te kuti ube no bulanda umuyayaya.” Bwangu bwangu balitendeke ukubombela pamo ne cilonganino umulimo wa kubila imbila nsuma. Aba abaupana balandile no kuti: “Twaleeba Yehova mu kulungatika ifyaleba ku mutima. Twalekoseleshiwa nga twamona ifyo Yehova aleyasuka amapepo yesu kabili ici calelenga tulesekelela. Ilyo twafikile fye, aba bwananyina bamo mu cilonganino balitendeke bupainiya, kabili Yehova alitupaalile pantu abantu babili abo twalesambilisha Baibolo balelunduluka.”

Kwena te lyonse tusekelela. Inshita shimo tulaba no bulanda. Na lyo line Yehova alilengele ukuti amashiwi ya kutukoselesha ayaba pa Amalumbo 64:10 yalembwe. Nangu fye ni lintu twafuupulwa, kuti twacetekela ukuti bonse ‘abalungama,’ e kutila abatwalilila ukuba aba cishinka na lintu bali na mafya ‘bakasekelela muli Yehova.’ Na kabili kuti twalalolela inshita iyo Yehova akafikilisha ubulayo bwa kuleta “imyulu ipya ne sonde lipya.” Nga acita ifi, bonse tukaba abapwililika. Abantu ba kwa Lesa bonse ‘bakasekelela kabili bakanga umuyayaya’ pa mulandu wa fintu fyonse ifyo Yehova akacita.—Esa. 65:17, 18.

Elenganyeni ifyo cikawama ukuba no bumi ubusuma ilyo tukalabuuka ninshi tuli na maka ayengi cila bushiku. Ifyaletukalifya sana kale tafyakabeko. Yehova atweba ukuti “ifya kale fikalabwa, kabili tafyakese na mu mutima.” Abantu abo Yehova akabuusha bakaba na balupwa lwabo na kabili. Abantu abengi nga nshi bakomfwa nge fyo abafyashi ba mukashana uwali ne myaka 12 uo Yesu abuushishe ku bafwa baumfwile. Baibolo itila: “Bapeshiwe amano no kusekelela nga nshi.” (Marko 5:42) Na mu kulekelesha, abantu bonse pano isonde bakaba ‘abalungama’ umupwilapo kabili ‘bakalasekelela muli Yehova’ umuyayaya.