ICIPANDE ICIKALAMBA | BUSHE MULATASHA PA BUPE UBWACINDAMISHA UBO LESA ATUPEELA?
Bushe Mukalanga Shani Ukuti Mulatasha pa Bupe Ubwacindama ubo Lesa Amupeela?
“Ukutemwa kwa kwa Kristu e kutucincisha . . . Afwilile bonse pa kuti aba mweo belaikalila abene beka kano ukulaikalila uwabafwilile.”—2 Abena Korinti 5:14, 15.
UBUPE UBUSUMA bufwile ukutulenga ukulatasha. Yesu alilandile pa fyo ukutasha kwawamina ilyo aundepe abaume 10 abakwete ubulwele bwabipisha kabili ubushalepola pali ilya nshita. Umo pali balya abaume 10 abo aundepe “alibwelulwike, ninshi alecindika Lesa ne shiwi ilikalamba” kabili Yesu amwipwishe ukuti: “Bushe te bantu 10 abapolele? Nga kanshi bambi 9 bali kwi?” (Luka 17:12-17) Finshi tulesambililako? Tulalaba bwangu ifisuma ifyo abantu batucitila.
Icilubula tacaba nga ifya bupe fimbi. Ici ica bupe calicila sana pa fya bupe fyonse. Kanshi kuti mwalanga shani ukuti mulatasha pa bupe ubwacindama ubo Lesa amupeela?
-
Mufwile ukwishiba uwamupeele icilubula. Ifi Lesa atupeela icilubula tacipilibula ukuti abantu bonse bakakwata umweo wa muyayaya. E mulandu wine Yesu apepele kuli Lesa ukuti: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yohane 17:3) Nga balimwebele ukuti ilyo mwali abaice kwali umuntu uwamupuswishe, bushe te kuti mufwaye ukwishiba ifingi pali uyo muntu ne calengele ukuti amupusushe? Yehova Lesa, uwamupeele icilubula ngo bupe ubwingamupususha, alafwaya ukuti mu mwishibe no kuba cibusa wakwe uwa pa mutima. Baibolo itila: “Palameni kuli Lesa, na o akapalama kuli imwe.”—Yakobo 4:8.
-
Mufwile ukutetekela mu cilubula. Baibolo itila: “Uutetekela Umwana aba no mweo wa muyayaya.” (Yohane 3:36) Bushe ukutetekela e kuti shani? Cipilibula ukulacita ifilanga ukuti twalitetekela icilubula. (Yakobo 2:17) Finshi tufwile ukulacita? Ubupe buba ubwenu nga ca kuti mwasumina ukubupoka. Kanshi mufwile ukusumina mu cilubula. Kuti mwacita shani ifyo? Mulingile ukwishiba ifyo Lesa afwaya ukuti mulecita, kabili nga mwafishiba, mufwile ukulacita ifyo fine. * Mulepepa kuli Lesa ukuti alemwelela no kuti muletontonkanya pa fyasanguluka. Ilyo mulepepa, mulecetekela ukuti icilubula cikalenga bonse ababa ne citetekelo bakekale umuyayaya mu calo umo bakacingililwa, umukaba umutende kabili umo bakalaikala bwino!—AbaHebere 11:1.
-
Mulingile ukusangwa ku Cibukisho ca Mfwa ya kwa Yesu. Yesu e watendeke icibukisho ca mfwa yakwe icibako cila mwaka pa kuti tuleibukisha icilubula. Alandile pa cibukisho ca mfwa yakwe ilyo atile: “Mulecita ici ku kunjibukisha.” (Luka 22:19) Inte sha kwa Yehova bakalaibukisha imfwa ya kwa Yesu pali Cibili, pa 11 April, 2017, akasuba nga kawa. Ukwibukisha imfwa ya kwa Yesu kupwa mwi awala limo, kabili kuli uku ukulongana kulaba ne lyashi ililondolola ico imfwa ya kwa Yesu yacindamina ne fyo ilenga twakwata amapaalo pali ino nshita e lyo na ku ntanshi. Umwaka wapwile, abantu nalimo amamilioni 20 e basangilwe ku Cibukisho mwi sonde lyonse. Kanshi tulemwita ukuti tukalongane capamo ilyo tukalalanga ukutasha pali ubu ubupe ubwacindama ubo Lesa atupeela.
^ para. 7 Nga mulefwaya ukwishiba Lesa no kupalama kuli ena, mufwile ukulasambilila Icebo cakwe Baibolo. Nga mulefwaya ukwishiba ifyo mwingalasambilila Baibolo, ebeni Inte sha kwa Yehova nelyo kabiyeni pa webusaiti yesu iya www.dan124.com/bem.
Nalimo Kuti Mwatemwako ne fi
PA NTE SHA KWA YEHOVA
Icibukisho ca Mfwa ya kwa Yesu
Cila mwaka abantu abengi sana balalongana pamo ku kwibukisha imfwa ya kwa Yesu. Mukwai tulemwita ukwisalongana na ifwe pa kuti mukeshibe ifyo uku ukulongana ukwacindama kwamukuma.
ICIBUKISHO
Muleibukisha Imfwa ya kwa Yesu
Tulemwita ku kulongana ukwacindama nga nshi, pali uku kulongana tukalaibukisha imfwa ya kwa Yesu. Mukesasambilila ifyo ubumi bwa kwa Yesu ne mfwa yakwe fingamunonsha.
