Mu cipande cifumineko, twacilanda pa cishibilo Yesu Kristu alandilepo icali no kulanga ukuti atendeka ukuteka ku muulu mu Bufumu bwa kwa Lesa.

Baibolo yasobele ukuti ilyo Yesu ali no kutendeka ukuteka, ali no kutamfya Satana ne fibanda fyakwe ku muulu. Pali ino nshita Satana ne fibanda fyakwe tabakwata amaka ya kufuma pano isonde no kuya ku muulu, e mulandu wine ifintu fyabipila sana pa calo ukufuma mu 1914.—Ukusokolola 12:7, 9.

Te mulandu no kuti ifintu fileya filebipilako fye pe sonde, Yesu Imfumu ya Bufumu bwa kwa Lesa alitwalilila ukwafwa abantu. Abengi balesambilila Baibolo nga fintu Yesu asobele, kabili imikalile yabo ilewaminako ilyo balekonka ifyo balesambilila mu Baibolo. (Esaya 2:2-4) Ifyo basambilila fyalilenga balebombesha, baleikala bwino mu ndupwa no kukanatemwisha ifyuma. Na kuba ifi tafilenga fye imikalile yabo ukuwaminako pali ino nshita, lelo filabafwa no kuba ne mibele iyo Yehova afwaya abantu abakaba mu Bufumu bwakwe ukukwata.

Nangu ca kuti Yesu e uteka ku muulu, pe sonde pacili paba amabuteko ya bantunse. Nomba nangu cibe ifi, Lesa alyeba Yesu ati: “Kabiye ulecimfya mu kati ka balwani bobe.” (Amalumbo 110:2) Nomba line, Yesu ali no konaula abalwani bakwe, no kulubula abakonka amafunde ya kwa Lesa.

Ilyo kukaba ubucushi bukalamba, Ubufumu bwa kwa Lesa bukacita ifyakonkapo:

• Bukafumyapo Imipepele ya bufi. Ubufumu bwa kwa Lesa bukafumyapo ifilonganino fya mapepo ifisambilisha abantu ifya bufi no kubatitikisha. Baibolo ita ifilonganino fya mapepo ifya bufi ukuti cilende. Ilanda no kuti abantu bakapapa ilyo bakafyonaula.—Ukusokolola 17:15, 16.

• Bukafumyapo amabuteko ya bantu. Ubufumu bwa kwa Lesa bukafumyapo amabufumu ya bantunse.—Ukusokolola 19:15, 17, 18.

• Bukafumyapo abantu abacita ifyabipa. Bushe finshi Ubufumu bukacita ku bantu abacita ifyabipa ku mufulo fye kabili abashifwaya ukunakila Lesa? Baibolo itila: “Ababifi, bakalofiwa mu calo.”—Amapinda 2:22.

• Bukafumyapo Satana ne fibanda fyakwe. Satana ne fibanda fyakwe tabakabe na maka ya ‘kulufya inko.’—Ukusokolola 20:3, 10.

Bushe ifintu fikaba shani ku bantu abafwaya ukuti Ubufumu bwa kwa Lesa bulebatungulula?

Ilyo Yesu akalateka isonde, akacita ifintu ifyo umuntu nangu umo ashingacita. Abantu 144,000 abo basala ukufuma pa calo, e bakalamwafwa ukuteka. (Ukusokolola 5:9, 10; 14:1, 3) Na kabili akalenga ukufwaya kwa kwa Lesa ukucitika pano isonde. Bushe finshi Ubufumu bwa kwa Lesa bukacitila abantu abo bukalateka?

• Bukafumyapo amalwele, ne mfwa. “Takuli umwikashi uukatila: ‘Nindwala,’” kabili “imfwa tayakabeko na kabili.”—Esaya 33:24; Ukusokolola 21:4.

• Bukalenga pa calo pakabe umutende wa cine cine. “Umutende wa bana bobe ukafula,” kabili “bakekala umuntu onse mwi samba lya mwangashi wakwe, na mwi samba lya mukunyu wakwe, tapakabe no wa kubatiinya.”—Esaya 54:13; Mika 4:4.

• Abantu bonse bakalabomba imilimo iisuma. “Umulimo wa minwe yabo abasalwa bandi bakasekelamo nga nshi. Tabakaculile apa fye.”—Esaya 65:22, 23.

• Bukalenga isonde ukuwama na kabili. “Amatololo ne mpanga yauma fikasekelela, kabili iciswebebe cikasansamuka no kubalula nga maluba ya ntongola.”—Esaya 35:1.

• Bukasambilisha abantu ifyo balingile ukulaikala pa kuti bakekale umuyayaya. “Pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.”—Yohane 17:3.

Lesa alafwaya na imwe mukabe pa bantu abakalaipakisha aya amapalo. (Esaya 48:18) Icipande cikonkelepo nacilondolola ifyo mulingile ukucita pa kuti mukabe pa bantu abakaba mu Bufumu bwa kwa Lesa.