ABANTUNSE

Ifyo Baibolo ilanda: Lesa ‘tapangile isonde apa fye, lelo alipangile ukuti lileikalwamo.’—ESAYA 45:18.

ISONDE

Ifyo Baibolo ilanda: “Inkulo imo ilepita, ne nkulo imbi ileisa; lelo isonde lyaikalilila fye umuyayaya.”—LUKALA MILANDU 1:4.

UMO AYA MASHIWI YALOLA: Baibolo ilanda ukuti isonde talyakonaulwe e lyo abantu nabo bakatwalilila fye ukwikalamo. Nomba ninshi ni mwisa Baibolo ilosha nga yatila icalo cikapwa?

TONTONKANYENI PALI ICI: Baibolo ilinganya ukupwa kwa calo ku fyacitike mu nshiku sha kwa Noa. Pali ilya nshita, pe ‘sonde palifulile ubunkalwe.’ (Ukutendeka 6:13) Lelo Noa ena, ali mulungami. E ico Lesa alipuswishe Noa no lupwa lwakwe, lelo alyonawile abantu bonse abalecita ifyabipa ilyo aletele ilyeshi. Baibolo ilanda pa fyacitike pali ilya nshita ukuti: “Pano isonde apaliko lilya pa kuponenwa ilyeshi palyonaike.” (2 Petro 3:6, Baibele wa Mushilo iya mu 1956) Cilya icalo calipwile. Nomba bushe finshi Lesa aonawile? Taonawile isonde, lelo aonawile abantu abalecita ifyabipa. Kanshi Baibolo nga yatila icalo cikapwa ninshi tailelanda ukutila isonde likonaulwa. Ninshi ilelanda ukuti abantu abacita ifyabipa bakonaulwa pamo ne fyabipa ifyo bacita.

AMAFYA E LYO NE FYABIPA

Ifyo Baibolo ilanda: “Pashala fye panono no mubifi takabepo; Awe ukalolekesha apo aali, no kusanga talipo. Lelo abafuuka e bakekala mu calo, kabili bakasekelela nga nshi pantu umutende ukafula.”—AMALUMBO 37:10, 11.

UMO AYA AMASHIWI YALOLA: Ilyeshi ilyaliko mu nshiku sha kwa Noa talyafumishepo ifyabipa umupwilapo. Pa numa ya lyeshi, abantu balitendeke ukucita ifyabipa na kabili no kucusha abanabo. Nangu cibe fyo, nomba line fye Lesa ali no kufumyapo ifyabipa fyonse. Uwalembeleko ibuuku lya mu Baibolo ilya Amalumbo atile: “Umubifi takabepo.” Lesa akabomfya Ubufumu bwakwe ukufumyapo ifyabipa fyonse pe sonde. Ubufumu bwa kwa Lesa buteko ubwaba ku muulu ubukalateka abantunse abalungama.

TONTONKANYENI PALI ICI: Bushe bakateka bakatemwa Ubufumu bwa kwa Lesa nga bwaisa? Baibolo itila tabakatemwe. Bakatendeka ukulwisha Ubufumu bwa kwa Lesa. (Amalumbo 2:2) Bushe cinshi Lesa akacita? Ubufumu bwa kwa Lesa bukafumyapo amabuteko ya bantunse yonse kabili bwena “bukeminina umuyayaya.” (Daniele 2:44) Cinshi Lesa akafumishapo amabufumu ya bantunse?

Ifyo Baibolo ilanda: ‘Umuntunse takwata amaka ya kutungulula intampulo shakwe.’—YEREMIA 10:23.

UMO AYA MASHIWI YALOLA: Lesa tapangile abantunse ukuti baleiteka. Ici e cilenga balefilwa ukuteka bwino abantu banabo nelyo ukupwisha amafya bakwata.

TONTONKANYENI PALI ICI: Webusaiti ya Britannica Academic itila: “Amabuteko yalifilwa ukupwisha ifipowe, ubupiina, amalwele, amasanso ayakalamba, inkondo, e lyo no bunkalwe.” Iyi webusaiti ilanda no kuti: “Abantu bamo . . . bamona kwati ubuteko bwe sonde lyonse e bwingapwisha fye aya amafya.” Na lyo line, nangu ca kuti amabuteko yonse yalyumene akapi, te kuti yapwishe amafya ayo tulandilepo pa muulu, pantu abateka aya mabuteko bantu abashapwililika. Ubufumu bwa kwa Lesa, e buteko fye ubwakwata amaka ya kupwisha amafya yonse ayo fwe bantunse tukwata.

Kanshi ukulingana ne fyo Baibolo ilanda, abantu abacita ifisuma tabalingile ukulatiina impela ya cino calo cabipa. Tabafwile ukusakamana, pantu cino calo cabipa nga capwa, kukesa icalo ca kwa Lesa icisuma!

Ni lilali cino calo cikapwa? Twalaumfwa ifyo Baibolo ya-asuka ici cipusho mu cipande cikonkelepo.