Bushe Yesu Atile ni Lilali Impela Ikesa?
Nga fintu tusambilile mu cipande cifumineko, Baibolo nga yalanda pa mpela ya calo, ninshi tailelanda ukuti isonde likonaulwa nelyo ukuti abantunse bonse bakonaulwa. Lelo ninshi ilelanda pa fyo Lesa akonaula abacita ifyabipa e lyo ne fyabipa ifyo bacita. Nomba bushe Baibolo yalilandapo pa nshita ilyo cino calo cabipa cikapwa?
NATULANDE PA FINTU FIBILI IFYO YESU ALANDILE PA KUPWA KWA CALO:
“E ico mulelola, pantu tamwaishiba ubushiku nangu ni nshita.”—MATEO 25:13.
“Cenjeleni, mulelola, pantu tamwaishiba inshita ifi fikacitika.”—MARKO 13:33.
Pano calo tapaba umuntu nangu umo uwaishiba ubushiku nelyo inshita ilyo cino calo cikapwa. Na lyo line, Lesa alibika “ubushiku bulya ne nshita” ilyo impela ikesa. (Mateo 24:36) Bushe ici calola mu kuti te kuti twishibe ukuti impela naipalama? Awe. Na kuba, Yesu alyebele abasambi bakwe ifyo bali no kwishibilako ukuti impela naipalama.
ICISHIBILO
Yesu alilandile pa fyo twingeshibilako ukuti “icalo cili ku mpela.” Atile: “Uluko lukemina uluko lubiye no buteko bukemina ubuteko bubiye, kabili kukaba ifipowe ne finkukuma mu ncende shimo shimo.” (Mateo 24:3, 7) Alilandile no kuti kukaba “ifikuko.” (Luka 21:11) Bushe ifi Yesu alandilepo mulefimona?
Muno nshiku, abantu abengi balecula ku nkondo, ifipowe, ifinkukuma, e lyo na malwele. Ku ca kumwenako, mu 2004, kwali icinkukuma icikalamba pali Bemba wa Indian Ocean icaimishe amabimbi ayaipeye abantu nalimo 225,000. Mu myaka itatu, icikuko ca COVID-19 calipeye abantu amamilioni nalimo 6.9 mwi sonde lyonse. Yesu alilandile ukuti ifintu fya musango yu nga fyatendeka ukucitika ninshi impela naipalama.
“INSHIKU SHA KULEKELESHA”
Baibolo ita inshiku tuleikalamo ukuti “inshiku sha kulekelesha.” (2 Petro 3:3, 4) Na kabili pali 2 Timote 3:1-5, itila mu nshiku sha kulekelesha abantu bakaba ne mibele iyabipa. (Belengeni akabokoshi akaleti “ Ilyo Impela ya Calo Tailaisa.”) Bushe mwalimona ukuti muno nshiku abantu abengi ni bakaitemwe, baliba no bufunushi, bakali kabili tababa no kutemwa? Ifi na fyo filelanga ukuti impela ya cino calo naipalama sana.
Bushe inshiku sha kulekelesha shikakokola? Baibolo itila ni “nshita inono.” Inshiku sha kulekelesha nga shapwa, Lesa akonaula “abaleonaula isonde.”—Ukusokolola 11:15-18; 12:12.
NOMBA LINE ISONDE LILI NO KUBA PARADAISE!
Lesa alibika ubushiku ne nshita ilyo akonaula bonse abacita ifyabipa. (Mateo 24:36) Nomba icawama ca kuti, Lesa tafwaya “umuntu nangu umo ukonaika.” (2 Petro 3:9) E ico alipeela abantunse inshita ya kuti bengaaluka no kutendeka ukumumfwila. Mulandu nshi? Ni co afwaya tukapusuke ilyo akonaula cino calo cabipa no kuti tukengile mu paradaise.
Lesa alipekanya ukuti abantu bonse balesambilila ifyo bengacita pa kuti bakengile mu calo cipya ico Ubufumu bwakwe bukalateka. Yesu atile imbila nsuma iyi iya Bufumu bwa kwa Lesa ikabilwa ku “bantu bonse aba pe sonde.” (Mateo 24:14) Inte sha kwa Yehova mwi sonde lyonse balasambilisha abantu Baibolo pa maawala ayengi nga nshi. Yesu atile imbila nsuma ikabilwa mwi sonde lyonse ilyo impela ishilaisa.
Nomba line amabuteko ya bantunse yali no konaulwa. Nomba icawama ca kuti na imwe bene kuti mwapusuka ilyo cino calo cikonaulwa no kwingila mu Paradaise iyo Lesa atulaya. Icipande cikonkelepo calalanda pa fyo mwingacita pa kuti na imwe mukengile mu calo cipya.
Ifyo Yesu aseseme pa “nshiku sha kulekelesha” filatusansamusha
Nalimo Kuti Mwatemwako ne fi
ULUPUNGU LWA KWA KALINDA
Ni Lilali Ubufumu bwa kwa Lesa Bukatendeka Ukuteka Isonde?
Na basambi ba kwa Yesu bamo balefwaya ukwishiba. Bushe abaswike shani?
AMASUKO KU MEPUSHO YA MU BAIBOLO
“Finshi Twingeshibilako Inshiku sha Kulekelesha, Nelyo ‘Inshita ya Mpela’?”
Baibolo yalisobele ifintu ifingi ifyali no kulanga ukuti tuleikala mu nshiku sha kulekelesha.
