Nafyaliilwe ku Mulhouse, mu France kabili muli iyi incende, mwali sana abantu abankalwe. Nga natontonkanya ifyo cali ilyo naali umwaice, njibukisha ifyo abantu baleumana ne fyo balelwa mu ndupwa. Mu lupwa lwesu, abanakashi balibasuulile sana kabili abaume nga balefwaya ukucita fimo, te lingi baleipusha abanakashi. Naishibe ukuti incito ya banakashi kwipika no kusakamana abana na baume.

Ilyo nalekula, ifintu tafyali bwino. Ilyo nali ne myaka 10, batata balifwile pantu baali ni bacakolwa. Lintu papitile imyaka 5, umukalamba wandi umwaume aliyipeye. Mu mwaka umo wine, ilyo mu lupwa mwali ukukansana, umo balimwipeye kabili ici calimpapwishe sana. Balupwa lwandi balinsambilishe ifya kubomfya imfuti ne myele e lyo no kulwa, kabili natendeke ukuilemba inembo pa mubili [ama tattoo] no kunwa ubwalwa.

Ilyo nali ne myaka 16, natendeke ukunwa amabotolo ya bwalwa ayali 10 ukufika kuli 15 cila bushiku kabili tapakokwele, natendeke no kubomfya imiti bubi bubi. Pa kuti ndekwata indalama, natendeke ukutoola ifyela no kufishitisha kabili natampile no kwiba. Ilyo nali ne myaka 17, ninshi balinkakapo mu cifungo pa miku 18 pa mulandu wa kwiba no lukakaala.

Ilyo nacilile fye imyaka 20, imibele yandi yalibipiileko. Cila bushiku nalepeepa imishanga 20 iye bange kabili nalebomfya imiti ikola pamo nga heroin e lyo ne miti imbi iyabindwa. Nalifwaile ukufwa pa miku iingi, pa mulandu wa kubomfya sana imiti ikola. Apo nalitendeke ukushitisha imiti ikola, lyonse naleenda ne mfuti ne myele. Bushiku bumo nafwaile ukulasa umuntu imfuti, lelo ku ce shuko, ulupolopolo lwailelasa pa cela ca mushipi. Ilyo nali ne myaka 24, bamayo balifwile, kabili ici calengele imbe sana umunkalwe. Apo abantu abengi balentiina, balefuma mu nshila nga bamona ndeisa. Apo nalelwa sana ulubuli, ilingi line pa mpela ya mulungu naleba mu cifungo e lyo limo naleba mu cipatala balembila ifilonda.

Ilyo nali ne myaka 28, nalyupile. Nga fintu mwingenekela, nshalecindika umwina mwandi. Nalemusaalula kabili nalemuuma sana. Tatwalecitila ifintu pamo kabili nalemona kwati cali fye bwino ukulamupeelako fye ifibekobeko ifingi ifyo naleiba. Lyena kwali icacitike ico nshaleenekela. Umwina mwandi atendeke ukusambilila Baibolo ne  Nte sha kwa Yehova. Ilyo asambilile fye pa muku wa kubalilapo, alilekele ukupeepa fwaka, alilekele ukupoka indalama shakwiba, kabili alimbweseeshe ifibekobeko fyonse ifyo nalemupeela. Nalifulilwe sana ica kuti nalimukeenye ukulasambilila Baibolo kabili nga ndepeepa fwaka, nalemupuutila icushi ca fwaka pa menso. Nalemupumya na ku bena mupalamano besu.

Bushiku bumo ninshi ninkolwa, nalyocele ing’anda yesu. Umwina mwandi alimpuswishe kabili alipuswishe no mwana wesu uwa myaka 5 ku mulilo. Ilyo nakololweke, nalyumfwile sana ububi. Mu mutima nalemona kwati Lesa takatale anjelela pa fyo nacitile. Naibukishe ifyo shimapepo alandile bushiku bumo ukuti ababifi bakayapya mu mulilo wa pe. Badokota nabo banjebele ukuti: “Calipwa iwe, te kuti waluke.”

Ilyo ing’anda twaleikalamo yapiile, twatendeke ukwikala na bapongoshi. Ilyo ba Nte baishiletandalila umwina mwandi, nabepwishe ukuti: “Bushe Lesa kuti anjelela imembu shandi shonse?” Bambelengeele ilembo lya 1 Abena Korinti 6:9-11. Ili ilembo lilanda pa mibele iyo Lesa apata kabili lilanda no kuti: “Bamo e fyo mwali.” Amashiwi bambelengeele yalengele naishiba ukutila kanshi kuti nayaluka. Ba Nte banjebele no kuti Lesa alintemwa ilyo bambelengeele 1 Yohane 4:8. Nalyumfwile bwino, e co nabebele ukuti balensambilisha Baibolo imiku ibili mu mulungu, kabili natendeke no kulongana. Nalepepa kuli Yehova lyonse.

Mu mweshi fye umo, nalilekele ukubomfya imiti bubi bubi e lyo no kunwa ubwalwa. Ilyo nacitile ifi, natendeke ukuloota ifiloto ifibi, umutwe walitendeke ukulakalipa, kabili naleumfwa kwati nindwala. Na lyo line, nalimwene ukuti Yehova alenkosha. Naumfwile kwati ni filya cali ku mutumwa Paulo. Paulo alembele pa fyo Lesa amwafwile ukuti: “Muli fyonse ndi na maka pantu kuli uulenkosha.” (Abena Filipi 4:13) Mu kuya kwa nshita, nalilekele no kupeepa fwaka.—2 Abena Korinti 7:1.

Baibolo tayangafwile fye ukuba ne mibele isuma, lelo yalilengele ne mikalile yesu mu lupwa ukuwaminako. Nalitendeke ukucindika umwina mwandi. Ku ca kumwenako, nalitendeke ukulanda no mwina mwandi mu mucinshi e lyo no kumweba ati “natotela.” Nalitendeke no kusunga bwino umwana wesu. Ilyo nasambilile Baibolo pa mwaka umo, naliipeele kuli Yehova kabili nalibatishiwe nga fintu umwina mwandi acitile.

Nalishininkisha ukuti ifyo nasambilila mu Baibolo fyalilenga natwalilila ukuba no mweo. Nangu fye ni balupwa lwandi abashili ba Nte, balishiba ukuti pali ino nshita nga nalifwa ku miti ikola nelyo nga balinjipaya ku bantu nalelwa nabo.

Baibolo yalilenga naishiba ifyo mfwile ukulasunga abena mwandi e lyo no mwana wandi. (Abena Efese 5:25; 6:4) Twalitendeke ukulacitila ifintu pamo no lupwa lwandi. Pali ino nshita, umwina mwandi tabomba fye imilimo ya kunjipikila ifya kulya, lelo ndabomba nankwe pa maawala ayengi cila mweshi mu mulimo wa kubila imbila nsuma, kabili twaliba sana ne nsansa. Umwina mwandi na o alangafwa sana ilyo ndebomba umulimo wa bueluda mu cilonganino.

Ndatasha sana pa fyo Yehova Lesa aba no kutemwa, na pa luse lwakwe. Ndafwaisha ukulanda pa mibele ya kwa Lesa kuli balya abo abantu bambi bamona kwati te kuti baluuke, pantu na ine e fyo abantu balemona. Nalishiba ukutila Baibolo kuti yayafwa umuntu uuli onse ukuba ne mibele isuma e lyo no kulaikala bwino. Baibolo yalilenga nasambilila ukucindika abantu bonse nampo nga baume nelyo banakashi kabili yalilenga nilaisuula.