Ishiwi lya kuti ukulangulukilako lipilibula “ukumfwa nelyo ukwelenganya ifyo umuntu umbi aleumfwa pa filemucitikila.” Ba Dr. Rick Hanson abasambilila sana pa fyo umuntu atontonkanya balandile ukuti “mu cifyalilwa fye, umuntu onse alalangulukilako bambi.”

TONTONKANYENI PALI ICI: Cinshi cilenga fwe bantu tulelangulukilako abantu banensu ukucila ifyo ifibumbwa fimbi ficita? Baibolo ilanda kuti Lesa abumbile abantu mu cipasho cakwe. (Ukutendeka 1:26) Apo twapangwa mu cipasho ca kwa Lesa, tulamupashanya, kabili ici cilalenga twaba ne mibele iisuma. E ico, abantu nga balangulukilako abantu banabo, balalanga ifyo Yehova Lesa wa cikuuku alangulukilako abantu.—Amapinda 14:31.

Lesa alatulangulukilako kabili tafwaya tulecula. Ilyo abena Israele balebacusha mu busha mu Egupti na lintu baculile pa myaka 40 mu matololo, Lesa aleumfwa ububi. Na kuba Baibolo ilanda ukuti “lyonse ilyo balecula, na o alecula.” (Esaya 63:9) Moneni ukuti Lesa talemona fye ifyo balecula, lelo aleumfwa ububi. Atile: “Ninjishiba ukukalipwa balekalipwa” (Ukufuma 3:7) Lesa alandile no kuti: “Uwakumya pali imwe ninshi akumya pa mboni ya linso lyandi.” (Sekaria 2:8) Abantu nga baletucusha, Lesa na o alomfwa ububi.

Nangu twingalaipeela imilandu no kulamona kwati Lesa te kuti atumfwile uluse nelyo ukutulangulukilako, Baibolo ilanda ukuti, “Lesa alicila imitima yesu kabili alishiba fyonse.” (1 Yohane 3:19, 20) Lesa alitwishiba bwino sana ukucila ne fyo twayishiba. Aleshiba ifiletucitikila, ifyo tuletontonkanya ne fyo tuleumfwa, kabili alatulangulukilako.

Ifyo Baibolo ilanda

• “Muketa, na Yehova akasuka; mukalila ukuti amwafwe, na o akatila, ‘E po ndi!’”—ESAYA 58:9.

• “‘Pantu ninjishiba amatontonkanyo ayo ndetontonkanya pali imwe,’ e fyasosa Yehova, ‘amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo. Kabili mukalilila kuli ine, mukesa no kupepa kuli ine, na ine nkomfwa kuli imwe.’”—YEREMIA 29:11, 12.

• “Bikeni ifilamba fyandi mu nyambi yenu. Bushe tafyalembwa mwi buuku lyenu?”—AMALUMBO 56:8.

Bushe ukwishiba ukuti Lesa alatulangulukilako kuti kwatwafwa shani ukushipikisha nga tuli na mafya? Natulande pa fyacitikile ba Maria.

Batile: “Ilyo umwana wandi uwali ne myaka 18 afwile pa numa ya kulwala kansa pa myaka ibili, nalyumfwile sana ububi kabili nalifuliilwe Yehova pa kukanaposha umwana wandi!

“Ilyo papitile imyaka 6, nalyebele umunandi uo twalelongana nankwe uwantemenwe sana ukuti nalemona kwati Yehova tantemwa. Pa numa ya kukutika ku fyo nalelanda pa nshita iitali, alandile amashiwi ayamfikile sana pa mutima, ayaba pali 1 Yohane 3:19, 20 ayatila: ‘Lesa alicila imitima yesu kabili alishiba fyonse.’ Alandile no kuti Yehova aleshiba amafya tukwata.

“Nangu ca kuti alinkoseleshe, palipitile inshita pa kuti ndeke ukufulilwa Yehova! Lyena nalibelengele pa Amalumbo 94:19, apatila: ‘Ilyo amatontonkanyo ya kusakamika yafulile muli ine, E lyo ifya kusansamusha fyenu fyantalalike umutima.’ Naumfwile kwati nine balembeele aya amashiwi! Nalitendeke ukumfwako bwino nga napepa kuli Yehova no kumweba ifili ku mutima, pantu alomfwa kabili aleshiba ifyo ng’umfwa.”

Ala tulaba ne nsansa pa kwishiba ukuti Lesa aleshiba ifyo tumfwa kabili alatulangulukilako! Nomba mulandu nshi ukucula kwafulila ifi? Bushe icalenga ni co Lesa alatukanda pa fyo tulufyanya? Bushe Lesa akapwisha ukucula konse? Ifi e fyo twalalandapo mu fipande fikonkelepo.