“Tuleya na Imwe”
“Tuleya na imwe, pantu natumfwa ukuti Lesa ali na imwe.”—SEKARIA 8:23.
INYIMBO: 65, 122
1, 2. (a) Cinshi Yehova asobele ukuti e cikacitika muno nshiku? (b) Mepusho nshi ayo twalayasuka muli cino cipande? (Moneni icikope pa muulu.)
YEHOVA asobele ukuti mu nshita yesu “abantu 10 aba mu ndimi shonse isha nko, bakekata ku nsenkebele sha ku ca kufwala ca muYuda umo, abati: ‘Tuleya na imwe, pantu natumfwa ukuti Lesa ali na imwe.’” (Sekaria 8:23) “UmuYuda” e mininako abo Lesa asuba no mupashi wa mushilo. Aba abasubwa betwa no kuti “Israele wa kwa Lesa.” (Abena Galatia 6:16) “Abantu 10” bemininako ababa ne subilo lya kwikala pano isonde. Balishiba ukuti Yehova alipaala abasubwa kabili balomfwa icilumba ukulapepa Yehova pamo nabo.
2 Nga filya kasesema Sekaria alandile, Yesu na o alilandile ukuti abantu ba kwa Lesa baali no kwikatana. Aitile ababa ne subilo lya kuya ku muulu ukuti “umukuni unono” e lyo ababa ne subilo lya kwikala pano isonde abetile ukuti “impaanga shimbi.” Lelo Yesu alandile ukuti bonse bakaba “umukuni umo” kabili bakalakonka “kacema umo,” Yesu. (Luka 12:32; Yohane 10:16) Apo kwaliba amabumba yabili, bamo nalimo kuti bayipusha aya mepusho: (1) Bushe impaanga shimbi bafwile ukwishiba amashina ya basubwa bonse muno nshiku? (2) Bushe abasubwa balingile ukuba shani? (3) Bushe imfwile ukumona shani umuntu mu cilonganino nga atendeka ukulyako umukate no kunwako umwangashi pa Cibukisho? (4) Bushe ningile ukusakamikwa nga namona impendwa ya balyako umukate no kunwako umwangashi pa Cibukisho ilekulilako? Twalayasuka aya mepusho muli cino cipande.
BUSHE TULINGILE UKWISHIBA AMASHINA YA BASUBWA BONSE?
3. Mulandu nshi tushingeshibila abakaba mwi bumba lya ba 144,000?
3 Bushe impaanga shimbi balingile ukwishiba amashina ya basubwa bonse abacili pano isonde? Awe. Mulandu nshi? Pantu takuli uwingeshiba abasubwa abakapokelela icilambu ico Lesa abalaya. [1] (Moneni ifyebo na fimbi.) Nangu ca kuti Lesa alibasala ukuya ku muulu, akabapeela fye icilambu nga ca kuti batwalilila aba cishinka kuli ena. Satana alishiba ici cishinka e mulandu wine abomfesha “bakasesema ba bufi” pa kuti alufye abasubwa. (Mateo 24:24) Abena Kristu abasubwa tabeshiba nga ca kuti bakapokelela icilambu mpaka Yehova alenga baishiba ukuti nabalinga ukuya ku muulu. Yehova alenga baishiba ukuti nabalinga nga abafwatika icishibilo ca kulekelesha ilyo bashilafwa nelyo ilyo “ubucushi bukalamba” bushilatendeka.—Ukusokolola 2:10; 7:3, 14.
Yesu e Ntungulushi yesu, kabili e o tufwile fye ukulakonka
4. Bushe ifi te kuti twishibe amashina ya basubwa bonse abacili pano isonde, kuti ‘twaya’ shani nabo?
4 Bushe impaanga shimbi kuti ‘baya’ shani na basubwa bonse abacili pano isonde abo bashaishiba amashina? Baibolo ilanda ukuti “abantu 10 . . bakekata ku nsenkebele sha ku ca kufwala ca muYuda umo, abati: ‘Tuleya na imwe, pantu natumfwa ukuti Lesa ali na imwe.’” Nangu ca kuti ici cikomo cilanda pa muYuda umo fye, tacalola mu kuti uyu muntu fye umo, lelo umuYuda e mininako abasubwa bonse. Ifi fine e fyo ne mpaanga shimbi baishiba, kabili balabombela Yehova pamo na basubwa. Tabakabila ukwishiba amashina ya basubwa bonse pa kuti balebakonka. Yesu e Ntungulushi yesu, kabili Baibolo itweba ukuti e o tufwile fye ukulakonka.—Mateo 23:10.
BUSHE ABASUBWA BALINGILE UKUBA SHANI?
5. Kusoka nshi uko abasubwa balingile ukutontonkanyapo sana, kabili mulandu nshi?
5 Abasubwa bafwile ukutontonkanya sana pa kusoka ukwaba pali 1 Abena Korinti 11:27-29. (Belengeni.) Bushe uwasubwa kuti alelya shani umukate no kunwa umwangashi pa Cibukisho mu “musango uushilingile”? Kuti acita ifi nga ca kuti tatwalilile ukuba cibusa wa kwa Yehova kabili tali na cishinka kuli ena, nga alelya umukate no kunwa umwangashi ninshi taba na mucinshi. (AbaHebere 6:4-6; 10:26-29) Uku kusoka kufwile kwalenga abasubwa batwalilila ukuba aba cishinka kuli Lesa nga ca kuti balefwaya bakapokelele “icilambu ca bwite bwa ku muulu ubwafuma kuli Lesa ukupitila muli Kristu Yesu.”—Abena Filipi 3:13-16.
6. Bushe abasubwa bafwile ukuba shani?
6 Paulo aebele Abena Kristu basubwa ati: “Ine, ne mufungwa muli Shikulu, ndemupapaata ukuti muleikala ukulingana no bwite ubo Lesa amwitako.” Bushe abasubwa bali no kucita shani ifi? Paulo abebele ati: “Muleicefya nga nshi kabili muleba abafuuka, muleshishimisha no kushipikishanya mu kutemwa. Mule-esha nga nshi ukusungilila ukwikatana uko umupashi wamupeela mu mutende uwikatanya.” (Abena Efese 4:1-3) Umupashi wa mushilo uwa kwa Yehova ulalenga ababomfi bakwe ukuba abaicefya, no kukanaba ne cilumba. (Abena Kolose 3:12) Kanshi abasubwa tabatontonkanya ukuti balicila abantu bambi. Balishiba ukuti Yehova tabapeela umupashi wa mushilo uwingi ukucila ifyo apeela ababomfi bakwe bambi. Tabatontonkanya no kutila kuti baishiba sana icine ca mu Baibolo ukucila bambi. Tabeba umuntu ukuti nasubwa kabili afwile ukutendeka ukulya umukate no kunwa umwangashi pa Cibukisho. Lelo baliicefya kabili balishiba ukuti ni Yehova fye e usala abantu ukuya ku muulu.
7, 8. Finshi abasubwa bashilingile ukulaenekela, kabili mulandu nshi?
7 Nangu ca kuti abasubwa balishiba ukuti lishuko nga nshi ukusalwa ukuya ku muulu, tabafwile ukulaenekela abantu ukulabamona ukuti balicindama ukucila Abena Kristu banabo. (Abena Efese 1:18, 19; belengeni Abena Filipi 2:2, 3.) Na kabili balishiba ukuti ilyo Yehova abasubile no mupashi, tabilishe ku bantu ukuti nabasubwa. Kanshi uwasubwa talingile ukupapa nga ca kuti bamo tabasumine ukuti nasubwa nga atendeka ukulyako umukate no kunwako umwangashi. Alishiba ukuti Baibolo itweba ukukanasumina bwangu nga ca kuti umo atweba ukuti Lesa namupeela umulimo uwaibela. (Ukusokolola 2:2) Apo uwasubwa tenekela abantu ukulamumona ukuti alicindama sana, tafwile ukulaeba abo aishibana nabo pa muku wa kubalilapo ukuti alisubwa. Na kuba, nalimo te kuti ebeko umuntu nangu umo ukuti alisubwa. Kabili tafwile ukulayumfwa pa milimo akalabomba ku muulu.—1 Abena Korinti 1:28, 29; belengeni 1 Abena Korinti 4:6-8.
8 Abena Kristu abasubwa tabalingile ukulaba fye na basubwa banabo kwati nalimo balipanga akabungwe ka basubwa. Tabafwile ukulafwaya ukwaba abasubwa banabo pa kuti balelanshanya pa fyo Lesa abasuba no mupashi, nelyo ukulakumana pamo ku kusambilila Baibolo. (Abena Galatia 1:15-17) Abasubwa nga balecita ifi, aba mu cilonganino te kuti bekatane. Kabili ninshi tabalebombela pamo no mupashi wa mushilo uulenga abantu ba kwa Lesa ukuba aba mutende kabili abaikatana.—Belengeni Abena Roma 16:17, 18.
BUSHE MUFWILE UKULAMONA SHANI ABASUBWA?
9. Finshi ifyo mushifwile ukucita ku ba bwananyina abalyako umukate no kunwako umwangashi pa Cibukisho? (Moneni akabokoshi akaleti, “Mu Kutemwa Tamwaba Ukucita Ifishayana.”)
9 Bushe mufwile ukulamona shani bamunyinefwe na bankashi abasubwa? Yesu aebele abasambi bakwe ati: “Imwe bonse muli ba bwananyina.” Abebele no kuti: “Onse uwaicindamika bakamuceefya, na onse uuiceefya bakamucindamika.” (Mateo 23:8-12) Kanshi te kuti cibe bwino ukulamona kwati abantu bamo balicindama sana ukucila bambi, nangu fye ni bamunyina ba kwa Kristu abasubwa. Baibolo nga yalanda pali baeluda, itukoselesha ukulapashanya icitetekelo cabo, lelo taitweba ukuti tufwile ukulamona umuntu nangu umo ukuti e ntungulushi yesu. (AbaHebere 13:7) Ca cine Baibolo yalilanda ukuti bamo balilinga ukupeelwa “umucinshi ubili,” pantu ‘balatungulula bwino’ kabili ‘balabombesha mu kulanda na mu kusambilisha amashiwi ya kwa Lesa,’ lelo te pa mulandu wa kuti balisubwa. (1 Timote 5:17) Nga tulelumbanya sana abasubwa kabili tulebamona kwati balicindama sana, kuti tulebalenga insoni, nelyo kuti twalenga baba ne cilumba, kabili ici te kuti ciwame nangu fye panono. (Abena Roma 12:3) Tatufwile ukucita ifingalenga bamunyina ba kwa Kristu abasubwa baba ne cilumba!—Luka 17:2.
Mufwile ukulamona shani uwatendeka ukulyako umukate no kunwako umwangashi pa Cibukisho? (Moneni amaparagrafu 9-11)
10. Kuti twalanga shani ukuti twalicindika abasubwa?
10 Kuti twalanga shani ukuti twalicindika abo Yehova asuba no mupashi wa mushilo? Tatulingile ukulabepusha ukuti, ‘mwaishibe shani ukuti namusubwa?’ No mulandu wa kuti tatwakwata insambu sha kufwaya ukwishiba ilyashi ilishitukumine. (1 Abena Tesalonika 4:11; 2 Abena Tesalonika 3:11) Tatufwile no kulatontonkanya ukuti abena mwabo, abafyashi babo, nelyo aba mu lupwa lwabo nabo balisubwa. Ukusubwa no mupashi wa mushilo takwaba ngo bupyani bwa mu lupwa. (1 Abena Tesalonika 2:12) Tatufwile no kulayipusha amepusho ayengalenga bambi baumfwa ububi. Ku ca kumwenako, te kuti ciwame ukwipusha nkashi uwaupwa kuli munyinefwe uwasubwa pa fyo omfwa ifi ashakekale no mwina mwakwe pano isonde umuyayaya. Twalishininkisha ukuti mu calo cipya Yehova ‘akapeela ica mweo conse ifyo cilefwaya.’—Amalumbo 145:16.
11. Kuti twaicingilila shani nga tatulemona abantu bamo ukuti ‘balicindama’ ukucila bambi?
11 Nga ca kuti tatulemona abasubwa ukuti balicindama ukucila bambi, kuti twaicingilila. Cinshi twalandila ifi? Pantu Baibolo itweba ukuti mu cilonganino nalimo kuti mwaba “aba bwananyina ba bufi” abengalalanda ukuti balisubwa. (Abena Galatia 2:4, 5; 1 Yohane 2:19) Na kabili abasubwa bamo te kuti batwalilile ukuba aba cishinka kuli Lesa. (Mateo 25:10-12; 2 Petro 2:20, 21) Lelo nga tatulemona bamo ukuti ‘balicindama’ ukucila bambi, tatwakalebakonkelela nangu balisubwa, nelyo balishibikwa sana, nangu nga balibombela Yehova pa myaka iingi. Pantu nga tabatwalilile ukuba ne cishinka, nelyo nga bafuma mu cilonganino, ifwe tatwakanenuke, nelyo ukuleka ukubombela Yehova.—Yuda 16.
BUSHE IMPENDWA YA BASUBWA NGA ILEKULILAKO TULINGILE UKUSAKAMIKWA?
12, 13. Cinshi ico tushilingile ukusakamikilwa nga twamona impendwa ya balyako umukate no kunwako umwangashi ilekulilako?
12 Pa myaka iingi, impendwa ya balelyako umukate no kunwako umwangashi pa Cibukisho yalecepelako. Lelo pali nomba, impendwa ilakulilako cila mwaka. Bushe tulingile ukusakamikwa? Awe. Natulande pa milandu iyo tushilingile ukusakamikilwa.
13 ‘Yehova alishiba abakwe.’ (2 Timote 2:19) Bamunyinefwe abo beba ukupenda abalalyako umukate no kunwako umwangashi pa Cibukisho tabeshiba umuntu nga alisubwa nelyo iyo, lelo Yehova ena aleshiba. Kanshi pa mpendwa ya balyako no kunwako umwangashi palaba na bashasubwa, abamona kwati balisubwa. Ku ca kumwenako, bamo abalelyako umukate kale no kunwako umwangashi pa Cibukisho pali ino nshita balileka. Bamo nalimo icilenga balelyako no kunwako ni co tabatontonkanya bwino, nelyo batendeka fye ukumona kwati bakateka na Kristu ku muulu. Kanshi tatwaishiba bwino impendwa ya basubwa abacili pano isonde.
14. Finshi Baibolo yalanda pa mpendwa ya basubwa abakaba pano calo ilyo ubucushi bukalamba bukatendeka?
14 Mu ncende ishingi pano calo mukaba abasubwa ilyo Yesu akesa mu kubasenda ku muulu. Baibolo yalanda ukuti Yesu “akatuma bamalaika bakwe ne ciunda icikalamba ice penga, kabili bakalonganika pamo abasalwa bakwe ukufuma ku kabanga, ku masamba, ku kapinda ka ku kuso na ku kapinda ka ku kulyo, ukufuma ku mpela imo iya mu muulu no kufika ku mpela ibiye.” (Mateo 24:31) Na kabili Baibolo itila, na mu nshiku sha ku kulekelesha mwine abasubwa bamo bakabapo pano isonde. (Ukusokolola 12:17) Lelo tayalanda impendwa ya bakabapo ilyo ubucushi bukalamba bukatendeka.
15, 16. Finshi ifyo tulingile ukwishiba pa basubwa abo Yehova asala?
15 Yehova e wishiba inshita ya kusala abasubwa. (Abena Roma 8:28-30) Yehova atendeke ukusala abasubwa ilyo Yesu abuukile ku bafwa. Cimoneka kwati Abena Kristu bonse aba cine mu nshiku sha batumwa bali abasubwa. Ilyo papitile imyaka iingi ukutula apo Yehova atendekele ukusala abasubwa, kwali abantu abengi abashali Bena Kristu bene bene pantu tabalekonka Kristu. Lelo kwali bamo abali ne cishinka abo Yehova asubile. Aba abasubwa bali kwati ni ngano isho Yesu alandile ukuti shikakulila pamo ne fyani. (Mateo 13:24-30) Na mu nshiku sha kulekelesha mwine, Yehova alitwalilila ukusala aba kaba mwi bumba lya ba 144,000. [2] (Moneni ifyebo na fimbi.) Kanshi Lesa nga asala abantu na bambi ilyo impela ishilaisa, te kuti tulande ukuti ico acita taciweme. (Esaya 45:9; Daniele 4:35; belengeni Abena Roma 9:11, 16.) [3] (Moneni ifyebo na fimbi.) E co tatufwile ukulailishanya nga filya ababomfi bailishenye ku wabengishe incito pa kubapeela amalipilo yamo yene na balekeleshe ukwingila incito.—Belengeni Mateo 20:8-15.
16 Te bonse abasubwa ababa mwi bumba lya “musha wa cishinka kabili uwashilimuka.” (Mateo 24:45-47) Nga filya fine cali mu nshiku sha batumwa, na muno nshiku mwine Yehova na Yesu babomfya fye abantu abanono ku kupekanishisha abantu abengi ifya kulya fya ku mupashi. Mu nshiku sha batumwa, Abena Kristu abasubwa abalembeleko Amalembo ya Bwina Kristu aya ciGriki bali fye abanono. Na muno nshiku mwine, abapekanishisha abantu ba kwa Lesa ‘ifya kulya pa nshita yalinga’ Bena Kristu basubwa abanono fye.
17. Finshi mwasambilila muli cino cipande?
17 Finshi twasambilila muli cino cipande? Yehova akapeela ababomfi bakwe abengi umweo wa muyayaya pano pene pe sonde, kabili alisala na bambi aba kuteka na Yesu ku muulu. Yehova alalambula ababomfi bakwe bonse, abo “umuYuda” e mininako e lyo na abo “abantu 10” bemininako, kabili afwaya ukuti bonse balekonka amafunde yamo yene, e lyo no kutwalilila aba cishinka kabili abaicefya. Bonse balingile ukwikatana no kulabombela Lesa pamo, balingile no kulacita ifingalenga mu cilonganino mwatwalilila ukuba umutende. Ilyo impela ya cino calo ilepalamina, ifwe bonse fwe baba umukuni umo natutwalilile ukubombela Yehova no kulakonka Kristu.
^ [1] (paragrafu 3) Ukulingana na Amalumbo 87:5, 6, nalimo ku ntanshi Lesa akatweba amashina ya bakalateka na Yesu ku muulu.—Abena Roma 8:19.
^ [2] (paragrafu 15) Nangu ca kuti Baibolo pa Imilimo 2:33 yalanda ukuti Yesu alabombela pamo na Yehova pa kusuba umuntu, Yehova e ubasala.
^ [3] (paragrafu 15) Nga mulefwaya ukwishibilapo na fimbi, belengeni icipande icileti “Amepusho Ukufuma ku Babelenga” mu Ulupungu lwa kwa Kalinda ulwa May 1, 2007, amabula 30-31.
