BA YOMARA e lyo na bandume yabo babili ba Marcelo na ba Hiver, bekala mu kamushi akanono mu Guatemala. Ba Yomara batendeke ukusambilila Baibolo ne Nte sha kwa Yehova kabili mu kupita kwa nshita bandume yabo babili nabo balitendeke ukusambilila. Nomba kwaliko ubwafya, bonse batatu tabamona kabili tabaishibe no kubelenga ifilembo fya bashimona. Kanshi abalebasambilisha Baibolo balebelenga amaparagrafu yonse no kubelenga Amalembo.

Na kabili caleafya sana ukuya mu kulongana. Pa kuti bafike ku Ng’anda ya Bufumu iyabelele mupepi, bale-endapo amamineti 40 kanshi balefilwa ukuya beka. Nomba aba bwananyina mu cilonganino, balipekenye ukuti balebasenda ku kulongana. Kabili ilyo batendeke ukulalanda amalyashi ya basambi, aba bwananyina balebafwa ukupekanya e lyo no kwibukisha ifyo bapekenye.

Mu May mu 2019, balitendeke ukulalonganina mu mushi baleikala. Pali iyi nshita, ninshi bapainiya abaupana balikuukila muli uyu mushi. Nangu ca kutila aba baupana tabaishibe ukubelenga no kulemba ifilembo fya bashimona, balefwaisha ukusambilisha ba Yomara na bandume yabo ifya kubelenga no kulemba. E ico, baile ku library no kwashimako ifitabo fya bashimona ifyo basambilamo ifya kusambilisha abashimona.

Tapapitile ne myeshi iingi, ba Yomara, na bandume yabo babili balishibe ukubelenga bwino bwino, kabili ici calengele balunduluke mu fya kwa Lesa. Pali ino nshita, ba Yomara, ba Marcelo, na ba Hiver ni bapainiya ba nshita yonse. Ba Marcelo babomfi batumikila. Bonse batatu balabomba imilimo ya kwa Lesa iingi umulungu fye onse. Ifi babombesha mu mulimo wa kwa Lesa fyalilenga ukuti na ba mu cilonganino na bo balebombesha.

Ba Yomara, ba Marcelo, na ba Hiver balatasha sana ifyo aba mu cilonganino babatungilila. Ba Yomara batile: “Ukutula fye pa bushiku twamonene ne Nte sha kwa Yehova, twalimona ifyo batutemwa. Twalikwata ifibusa ifisuma mu cilonganino twaba kabili twalikwata ulupwa mwi sonde lyonse ulwatemwana.” Ba Yomara na bandume yabo balafwaisha ukwisamona ilyo Yehova akalenga isonde ukuba paradaise.—Amalu. 37:10, 11; Esa. 35:5.