ICIPANDE CA KUSAMBILILAMO 7
ULWIMBO 15 Lumbeni Ibeli lya kwa Yehova!
Bushe Munonkelamo Shani mu fyo Yehova Atubelela Uluse?
“Pantu imwe muleleela abantu icine cine.”—AMALU. 130:4.
IFYO TWALASAMBILILAPO
Twalasambilila pa filangililo fimo ifya mu Baibo ifilanga ifyo Yehova atubelela uluse icine cine. Ukusambilila pali ifi kwalalenga tuletasha sana Yehova pa fyo atubelela uluse.
1. Mulandu nshi cikosela ukwishiba umo umuntu alosha nga alanda ukuti nabelela umuntu munankwe uluse?
ALA TULOMFWA bwino sana nga ca kuti umo atweba ukuti atwelela, maka maka nga natwishiba ukuti twalilandile, nelyo twalicitile fimo ifyamukalifye. Nomba ilingi line cilakosa ukwishiba umo umuntu alosha nga alanda ifi. Bushe alosha mu kuti mucili ifibusa? Nelyo alosha mu kuti talefwaya fye ukutwalilila ukulanda pa fyacitike? Abantu balapilibula ifyapusanapusana nga baeba umuntu ukuti nabamwelela.
2. Bushe Amalembo yalondolola shani ifyo Yehova atwelela? (Moneni na futunoti.)
2 Ifyo Yehova atubelela uluse fwe bantu abashapwililika fyalipusana sana ne fyo tubelelana uluse. Takwaba umuntu uwingatubelela uluse nga fintu Yehova atubelela uluse. Uwalembele Amalumbo alandile pali Yehova ati: “Pantu imwe muleleela abantu icine cine, pa kuti balemutiina.” a (Amalu. 130:4) Ukwabula no kutwishika, Yehova ‘alelela icine cine.’ E utulanga umo ukwelela kwalola. Mu fikomo fimo ifya Amalembo ya ciHebere, abalelemba Baibo pa kulondolola ifyo Yehova elela, balebomfya ishiwi ilyo bashalebomfya pa kulondolola ifyo abantu belela abantu banabo.
3. Bushe ifyo Yehova atubelela uluse fyapusana shani ne fyo fwe bantu tubelelana uluse? (Esaya 55:6, 7)
3 Yehova nga abelela umuntu uluse, alafumyapo ulubembu umupwilapo. Yehova nga atubelela uluse, kuti twatwalilila ukuba ifibusa fyakwe. Ala tulatasha sana pali ifi Yehova atubelela uluse umupwilapo lyonse nga twalufyanya.—Belengeni Esaya 55:6, 7.
4. Finshi Yehova acita pa kuti twishibe umo ukwelela kwa cine cine kwalola?
4 Nga ca kuti ifyo Yehova atubelela uluse fyalipusana ne fyo fwe bantunse tubelelana uluse, bushe fwe bantu abashapwililika kuti twaishiba shani ukwelela kwa cine cine? Muli Baibo Yehova alibikamo ifilangililo ifisuma sana ifilenga twaishiba ifyo atubelela uluse. Muli cino cipande, twalasambililako pa filangililo fimo pali ifi. Ifi ifilangililo fyalatulanga ukuti nga twalapila, Yehova alafumyapo ulubembu kabili alaleka twaba ifibusa fyakwe na kabili. Nga twasambilila pali ifi filangililo, tukalatasha sana Shifwe uwatutemwa pa fyo atubelela uluse mu nshila ishalekanalekana.
YEHOVA ALAFUMYAPO ULUBEMBU
5. Bushe ciba shani nga ca kuti Yehova atwelela?
5 Ilingi line Baibo ilinganya imembu ku fisendo ifyafina. Imfumu Davidi yalondolwele imembu yacitile ukuti: “Imembu shandi nashitulumana pa mutwe wandi; shili nge cipe icafina ico nshingasenda.” (Amalu. 38:4) Lelo Yehova alelela abantu abalapila pa membu shabo. (Amalu. 25:18; 32:5) Ishiwi lya ciHebere ilyo bapilibula ukuti “ukwelela” muli ifi fikomo, lipilibula ukuti “ukwimya” nelyo “ukusenda.” Kuti twaelenganya ukuti Yehova aba nga umwaume wa maka, uwa kuti atutuula icisendo pa mabeya e lyo acitwala ukutali.
“Mwalinjelela” (Amalu. 32:5)
6. Bushe uko Yehova atwala imembu shesu kwalepa shani?
6 Mu Baibo mwaliba icilangililo na cimbi icilanga ukuti Yehova nga atubelela uluse, alasenda imembu shesu ukutali. Pa Amalumbo 103:12 patila: “Filya ku kabanga na ku masamba kwatalukana sana, e fyo na o atalusha kuli ifwe imembu tucita.” Akabanga e katalukisha ku masamba. Akabanga na masamba te kuti fikumane. Aya amashiwi yapilibula ukuti Yehova alasenda imembu shesu ukutali ukwa kuti te kuti twelenganye no kwelenganya. Ala ici cilangililo cilalanga bwino ifyo Yehova atubelela uluse umupwilapo!
“Filya ku kabanga na ku masamba kwatalukana sana” (Amalu. 103:12)
7. Bushe Baibo ilondolola shani ifyo Yehova acita pa membu shesu? (Mika 7:18, 19)
7 Bushe ifi Yehova mu mampalanya atwala imembu shesu ukutali, alashisunga? Awe tashisunga. Imfumu Hisekia yalembele pali Yehova aiti: “Mwalipoosa imembu shandi shonse ku numa yenu.” Nelyo nga fintu futunoti ilanda, “Mwalifumishe imembu shandi shonse pa cinso cenu.” (Esa. 38:9, 17; ftn.) Aya mashiwi yalepilibula ukuti Yehova alasenda imembu sha abantu abalapila no kushipoosa uko shishingamoneka. Na kabili aya mashiwi kuti yapilibula no kuti: “Mwalilenga calamoneka kwati nshacitilepo ne membu.” Na kabili Baibo ilalanga ifyo apoosa imembu shesu ukutali mu cilangililo na cimbi icaba pali Mika 7:18, 19. (Belengeni.) Ifi fikomo filangilila ukuti Yehova alapoosa imembu shesu ica kuti shafika na panshi ya bemba. Kale nga ca kuti bapoosa icintu panshi ya bemba, balefilwa ukucifumya.
“Mwalipoosa imembu shandi shonse ku numa yenu” (Esa. 38:17)
“Mukapoosa imembu shesu shonse muli bemba ica kuti shikafika na panshi” (Mika 7:19)
8. Finshi twasambilila ukufika pano?
8 Ifi filangililo twasambililapo filatulangilila bwino bwino ukuti Yehova nga atubelela uluse, alasenda imembu shesu shonse. Kanshi tatufwile ukutwalilila ukulaumfwa ububi pa fyo twacitile. Cine cine, nga fintu Davidi alandile, “ba nsansa abo baeleela pali bumpulamafunde bwabo kabili abo imembu shabo shafimbwapo; wa nsansa umuntu uo Yehova ashakalubulwishe nangu panono pa lubembu lwakwe.” (Rom. 4:7, 8) Uku e kwelela kwa cine cine!
YEHOVA ALAFUUTA IMEMBU SHESU
9. Filangililo nshi Yehova abomfya pa kutulanga ifyo atwelela umupwilapo?
9 Na kabili mu Baibo Yehova alilanda pa filangililo ifyalenga twishibe ukuti pa mulandu wa cilubula, alafuuta imembu sha bantu abalapila. Mu mampalanya, Baibo ilanda ukuti Yehova alatusamba imembu kabili alatuwamya. Nga acita ifi, uucitile ulubembu alaba uwasanguluka. (Amalu. 51:7; Esa. 4:4; Yer. 33:8) Yehova umwine alilondolola ififumamo nga acita ifi. Alondolola ati: “Imembu shenu nangu shakashika ce, shikabuuta tuutu kwati ni mfula ya bungululu bwa buuta, nangu shingakashika ce kwati ni nsalu yakashikisha, shikaba kwati masako ya mpaanga.” (Esa. 1:18) Calikosa sana ukufumya itoni ilyakashika ce pa ca kufwala. Yehova alibomfya ici cilangililo pa kutulangilila ukutila kuti atusamba imembu shesu ica kuti shaleka no kumoneka.
“Imembu shenu nangu shakashika ce, shikabuuta tuutu kwati ni mfula ya bungululu bwa buuta” (Esa. 1:18)
10. Cilangililo nshi na cimbi ico Yehova abomfya pa kutulanga ifyo atubelela sana uluse?
10 Nga fintu twasambilile mu cipande cafumineko, Baibo na kabili ilinganya imembu ku “nkongole.” (Mat. 6:12; Luka 11:4 ftn) E ico lyonse nga twabembukila Yehova, ciba kwati inkongole shesu shilefulilako fye. Tulamukwatila inkongole ishingi! Nomba nga ca kuti Yehova atubelela uluse, ciba kwati asuulako ku nkongole shesu. Tatwenekela ukubwesha inkongole pa membu isho atubelelapo uluse kale. Filya fine umuntu omfwa bwino nga ca kuti uo akongolako afuuta inkongole, e fyo na ifwe tumfwa bwino nga ca kuti Yehova atubelela uluse!
“Tubeleleniko uluse pa membu shesu” (Mat. 6:12)
11. Bushe Baibo ilosha mwi nga yatila Lesa ‘alafuuta’ imembu shesu? (Imilimo 3:19)
11 Yehova tasuulako fye ku membu shesu, lelo alashifuuta no kushifuuta. (Belengeni Imilimo 3:19.) Natulangilile, nga ca kuti umuntu alilemba icipendo ca ndalama isho akongweseshe umunankwe, pa kulangilila ukuti nasuulako kuli isho nkongole, alashila pa cipendo. Nomba nangu ca kuti nashilapo, icipendo ca ndalama cena cilashala cilemoneka. Lelo ukufuuta icintu kwena kwalipusana. Pa kuti tumfwikishe umulolele ici cilangililo, tufwile ukwibukisha ukuti mu nshita balelemba Baibo, inki balebomfya yalyangwike ukuifuuta na menshi. Umuntu kuti abuula fye icisalu icabomba afuuta ne filembelwe. E ico umuntu nga afuuta inkongole, icipendo ca ndalama tacaleshala cilemoneka. Abantu tabaleishiba no kwishiba ukuti palilembelwe fimo. Caleba fye kwati umuntu takwetepo ne nkongole. Tulatasha sana Yehova pa kwishiba ukuti nga asuulako ku membu shesu, alashifuuta no kushifuuta!—Amalu. 51:9.
“Pa kuti imembu shenu shifuutwe” (Imil. 3:19)
12. Finshi tusambilila ku cilangililo ce kumbi ilyafiita?
12 Yehova alibomfya icilangililo na cimbi pa kutulanga ukuti alafuuta imembu shesu umupwilapo. Umwine alanda ati: “Nkafimba pa filubo fyobe kwati likumbi lifimbilepo kabili nkafimba pa membu shobe kwati likumbi ilyafiita lifimbilepo.” (Esa. 44:22) Yehova nga atubelela uluse, ciba kwati abuula ikumbi lyafiita e lyo afimba pa membu shesu pa kuti shileke ukumoneka.
“Nkafimba pa filubo fyobe kwati likumbi lifimbilepo” (Esa. 44:22)
13. Bushe tumfwa shani nga ca kuti Yehova atubelela uluse?
13 Finshi ifi ifilangililo fitusambilisha? Fitusambilisha ukuti nga ca kuti Yehova atubelela uluse, tatufwile ukutwalilila ukulaumfwa ububi pa fyo twalufyenye. Umulopa wa kwa Yesu Kristu walilenga Yehova asuuleko ku membu shesu. Yehova nga atubelela uluse, ciba fye kwati tatwacitilepo no lubembu. Ifi e fyo Yehova atubelela uluse nga ca kuti twalapila pa membu shesu.
YEHOVA ALALENGA TWABA IFIBUSA FYAKWE NA KABILI
Pa mulandu wa kuti Shifwe wa ku muulu alatubelela uluse, tulaba ifibusa ifisuma na ena (Moneni paragrafu 14)
14. Cinshi cingalenga twacetekela ukuti Yehova kuti atubelela uluse umupwilapo? (Moneni ne fikope.)
14 Yehova nga atubelela uluse, tulaba ifibusa fyakwe na kabili. Apo Yehova alatubelela uluse umupwilapo, tatufwile ukutwalilila ukulaumfwa ububi pa fyo twalufyenye. Tatulingile ukulasakamana ukuti Yehova acili alikalipa pa fyo twalufyenye kabili acili alefwaya inshila ya kutukandilamo. Yehova te kuti acite ifi. Cinshi cingalenga twacetekela Yehova nga atweba ukuti natubelela uluse? Yehova aebele kasesema Yeremia ati: “Nkeleela ifilubo fyabo, kabili nshakebukishe imembu shabo.” (Yer. 31:34) Aya yene amashiwi e yo umutumwa Paulo alelandapo ilyo atile: “Nshakatwalilile ukwibukisha imembu shabo.” (Heb. 8:12) Bushe aya mashiwi yalola mwi?
“Kabili nshakebukishe imembu shabo” (Yer. 31:34)
15. Bushe amashiwi ya kuti Yehova takebukishe imembu shesu yalola mwi?
15 Mu Baibo, ishiwi lya kuti “ukwibukisha,” limo talipilibula ukuti ukwibukisha fimo nelyo ukutontonkanya pali fimo ifyacitike. Lelo kuti lyapilibula no kuti umuntu acitapo cimo. Umo pa fipondo ifyo bapoopeele pamo na Yesu amulombele ati: “Mwe Yesu, mukanjibukishe ilyo mukengila mu Bufumu bwenu.” (Luka 23:42, 43) Talelomba Yesu ukuti akamutontonkanyepo fye pali iyo nshita. Ifyo Yesu alandile fyalelangilila ukuti ali no kucitapo cimo, e kutila ali no kumubuusha. E ico, Yehova nga atila takebukishe imembu shesu, ninshi natubelela uluse pali isho imembu kabili takatukandilepo ku ntanshi.
16. Bushe Baibo ilondolola shani ubuntungwa tukwata pa mulandu wa kuti Yehova alatubelela uluse umupwilapo?
16 Baibo ilabomfya icilangililo na cimbi icilenga twaumfwikisha ubuntungwa tukwata nga ca kuti Yehova atubelela uluse. Pa mulandu wa kuti tatwapwililika kabili tulafwaya ukucita ifyabipa, Baibo itila tuli “basha ba lubembu.” Nomba pa mulandu wa kuti Yehova alatubelela uluse, twaba nga basha ‘abalubuka ku lubembu.’ (Rom. 6:17, 18; Ukus. 1:5) Nga twaishiba ukuti Yehova natubelela uluse, tulaba ne nsansa nga shilya shikwata umusha uulubwike.
“Mwalilubwike ku lubembu” (Rom. 6:18)
17. Bushe ifi Yehova atubelela uluse filenga shani twaundapwa? (Esaya 53:5)
17 Belengeni Esaya 53:5. Baibo itulinganya ku bantu abalwala ubulwele ubukalamba. Ici e cilangililo twalalekeleshako ukulandapo. Pa mulandu wa kuti Yehova alitupeela Umwana wakwe pa kuti abe icilubula, Baibo itila twalyundapwa. (1 Pet. 2:24) Nga twabembuka, bucibusa bwesu na Yehova bulapwa. Lelo pa mulandu wa cilubula, kuti atubelela uluse kabili kuti twaba ifibusa fyakwe na kabili. Nga filya fine umuntu uwalwele sana asekelela nga apola, e fyo na ifwe tusekelela nga ca kuti twaba ifibusa fya kwa Yehova na kabili pa mulandu wa kuti alatubelela uluse.
“Ifilonda fyakwe e fyalengele tupole” (Esa. 53:5)
IFYO TUBA YEHOVA NGA ATUBELELA ULUSE
18. Finshi twasambilila mu filangililo pa fyo Yehova atubelela uluse? (Moneni na kabokoshi akaleti “ Ifyo Yehova Atubelela Uluse.”)
18 Finshi twasambilila mu filangililo ifyaba mu Baibo pa fyo Yehova atubelela uluse pa membu shesu? Twasambilila ukuti Yehova alatubelela uluse umupwilapo kabili takatukandilepo ku ntanshi. Ici cilenga tuleba ifibusa ifisuma na Shifwe uwaba ku muulu. Lelo tufwile ukulaibukisha ukuti ifi Yehova atubelela uluse, bupe atupeela. Icilenga aletubelela uluse ni co alitutemwa kabili wa cikuuku kuli fwe bantunse ababembu. Yehova tatubelela uluse pa mulandu wa kuti twalilinga ukutubelela uluse.—Rom. 3:24.
19. (a) Cinshi tufwile ukulatashishapo Yehova? (Abena Roma 4:8) (b) Finshi tukasambilila mu cipande cikonkelepo?
19 Belengeni Abena Roma 4:8. Ala tulatasha nga nshi pali ifi Yehova ‘atwelela icine cine’! (Amalu. 130:4) Nomba pa kuti Yehova atubelele uluse, tufwile ukucita icintu cimo icacindama. Yesu alondolwele ati: “Nga tamubelela uluse abamulufyanya, na Shinwe wa mu muulu takulamubelela uluse pa fyo mulufyanya.” (Mat. 6:14, 15) Kanshi tufwile ukulapashanya Yehova uutubelela uluse. Nomba kuti twamupashanya shani? Mu cipande cikonkelepo, tukasambilila ifyo twingalamupashanya.
ULWIMBO 46 Tulamutasha Mwe Yehova
a Mu Amalembo ya ciHebere, ishiwi lya kuti “ukwelela” lipilibula ukwelela kwa cine cine, nangu ca kuti kwaliba ukwelela na kumbi. Mu maBaibo ayengi tamwaba ubu ubupusano, lelo muli Baibo—Amalembo ya Calo Cipya mwena e mo bwaba, kabili ici calenga ifyo bapilibula Amalumbo 130:4 fipusaneko ne fyo bapilibula ili lembo mu maBaibo yambi.
