PALI Mateo 21:12, 13 patila: “Yesu aingile mwi tempele no kutamfyamo bonse abaleshitisha na baleshita mwi tempele, kabili apenwine amatebulo ya balekabushanya indalama e lyo ne fipuna fya baleshitisha inkunda. Kabili atile kuli bena: ‘Calembwa ati, “Ing’anda yandi iketwa ing’anda ya kupepelamo,” lelo imwe muleisangula ulucengo lwa fipondo.’”

Ifyalembwa fya kale ifya baYuda filanga ukuti abaleshitisha mwi tempele baleibila abaleshita pantu baleninika sana imitengo ya fintu. Ku ca kumwenako, icitabo ca Mishna (Keritot 1:7) calanda ukuti mu nshita ya batumwa pa kuti umuntu ashite ifipele fibili alingile ukubomba inshiku 25. Ifipele nelyo inkunda e fyo abapiina baletuula amalambo; lelo umutengo wa ifi fyuni walicililemo ica kuti abantu balefilwa ukukumanisha. (Lebi 1:14; 5:7; 12:6-8) Kasambilisha wa baYuda Simeon ben Gamaliel alifulilwe sana pali ifi fyalecitika ica kuti alibwesesheko imiku abantu balingile ukulatuula amalambo, ici calengele umutengo wa fipele ubwele pa nshi, ica kuti umuntu alebomba fye amaawala yatatu pa kuti ashite ifipele fibili.

Kanshi Yesu talufyenye filya aitile abaleshitisha mwi tempele ukuti “fipondo” pantu baleibila abantu kabili bali bafunushi.