Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Bushe bamunyinefwe pamo nga bakangalila wa muputule na baeluda balingile ukucita shani nga babeba ifya kucita ku cilonganino ca kwa Lesa?

Balingile ukwangufyanya ukonka ifyo babeba. Balingile ukuyipusha abati: ‘Bushe ifyo ncita filalenga aba bwananyina batwalilila ukubombela Lesa? Bushe ndashimunuka ukukonka ifyo abaletungulula balanda?’—w16.11, ibu. 11.

Ni lilali abantu ba kwa Lesa bali muli Babiloni?

Baishileba bankole ilyo abatumwa bonse bafwile. Kwaishileba ne bumba lya bashimapepo. Icalici no buteko baletungilila Abena Kristu abasangu kabili balecita ifyalelenga abantu belaumfwa ifyo Abena Kristu abali nge ngano balesambilisha. Lelo imyaka iingi ilyo umwaka wa 1914 ushilafika, abasubwa balitendeke ukufuma muli bunkole.—w16.11, amabu. 23-25.

Mulandu nshi umulimo uo Lefèvre d’Étaples abombele wabelele uwacindama?

Mu myaka ya ba 1520 Lefèvre alipilibwile Baibolo mu ciFrench pa kuti abantu yaweyawe bakwate Baibolo. Ifyo alelondolola amalembo ya mu Baibolo fyalyafwile Martin Luther, William Tyndale, na John Calvin.—wp16.6, amabu. 10-12.

Bupusano nshi bwaba pa “kutontonkanya ififwaya imitima” na pa “kutontonkanya ifya kwa Lesa”? (Rom. 8:6)

Umuntu uutontonkanya pa fifwaya umutima alaba no lunkumbwa lwa mubili kabili abika sana amano ku fyo umubili wakwe uushapwililika ufwaya, ifi fine e fyo alandapo sana no kucindikisha. Umuntu uutontonkanya ifya kwa Lesa abika amano ku fya kwa Lesa kabili e fyo atontonkanyapo; Umwina Kristu wa musango uyu atungululwa no mupashi wa mushilo. Ukutontonkanya pa fifwaya imitima kutungulula ku mfwa lelo ukutontonkanya pa fya kwa Lesa kutungulula ku mweo na ku mutende.—w16.12, amabu. 15-17.

Finshi mulingile ukucita pa kuti mwilasakamana sana?

Mulebalilapo ukucita ifyacindama, mwilaenekela ifyacilamo, mulekwatako inshita ya kuba mweka cila bushiku, muletambako ifyo Yehova abumba, mulesekako, muletukushako umubili, kabili mulelaala amaawala ayengi.—w16.12, amabu. 22-23.

Bushe ‘Enoke bamusendele shani pa kuti emona imfwa’? (Heb. 11:5)

Lesa nalimo alengele Enoke ukufwa ukwabula ukuti umwine eshibe ukuti alefwa.—wp17.1, amabu. 12-13.

Mulandu nshi ukuba uwafuuka kwacindamina na muno nshiku?

Umuntu uwafuuka aleshiba ifyo engacita ne fyo ashingacita. Tulingile ukwishiba ifyo ifintu tucita fikuma abantu bambi kabili tatulingile ukuimona ukuti twalicindama sana.—w17.01, ibu. 18.

Finshi filanga ukuti Lesa aletungulula ibumba litungulula mu nshita ya batumwa nga ifi fine atungulula Ibumba Litungulula muno nshiku?

Umupashi wa mushilo walebafwa ukumfwikisha icine ca mu Malembo. Bamalaika balebafwa ukutungulula umulimo wa kubila imbila nsuma kabili balebomfya Icebo ca kwa Lesa pa kutungulula icilonganino. Ifi fine e fyo caba na muno nshiku.—w17.02, amabu. 26-28.

Finshi fyalenga tulemona ukuti icilubula calicindama?

Fintu fine: Uwatupeele ubupe, ico atupeelele ubo ubupe, ifyo umuntu aipeeleshe pa kutupeela ubo ubupe, e lyo ne fyo ubupe bwalengele twakwata ifyo twalekabila sana. Tulingile ukulatontonkanya sana pali ifi fintu fine.—wp17.2, amabu. 4-6.

Bushe Umwina Kristu kuti ayalula ifyo apingwile ukucita?

Tulingile ukucita ifyo twalanda. Lelo inshita shimo kuti twayaluka mu fyo twapingwile ukucita. Ilyo abantu mu Ninebe balapiile, Lesa alyalwile ifyo apingwile. Limo limo ifintu nga fyayaluka nelyo nga twaishibilapo na fimbi pa fyo twapingwile kuti twayalula ifyo twapingwile.—w17.03, amabu. 16-17.

Mulandu nshi cabipila ukulanda ifyabipa pa bantu bambi?

Ukulanda ifyabipa kuti kwalenga fye ubwafya bwakulilako. Nampo nga nabatufyenga nelyo nga tabatufyengele, ukulanda ifyabipa te kuti kulenge ifintu ukuwama.—w17.04, ibu. 21.