Bushe mwalibelenga bwino bwino magazini ya Ulupungu lwa kwa Kalinda iya nomba line? Moneni nga kuti mwayasuka ifi fipusho:

Fintu nshi fine ifyo twingacita pa kuti tuleimba bwino?

Tulingile ukulaimyako icitabo ca nyimbo pa kwimba. Tufwile ukulaingisha umwela uwingi. Tufwile ukulayasamuna sana akanwa. Tulingile ukulaimbisha.—w17.11, ibu. 5.

Finshi twatemwa pa fyo balesunga imisebo iyaleya ku misumba ya kufulumukilako mu Israele na pa ko bakuulile iyi misumba?

Kwali imisumba ya kufulumukilako 6 mu Israele, kabili imisebo iyaleya kuli iyi misumba baleisunga bwino. Ici calelenga uwafulumukilako afike bwangu kuli iyi misumba ukwabula ubwafya.—w17.11, ibu. 14.

Mulandu nshi icilubula ca kwa Yesu cabela e bupe ubwacindamisha ubo Lesa atupeela?

Pantu cikalenga tukekale umuyayaya, kabili calenga twalubuka ku lubembu ne mfwa. Pa mulandu wa kuti Lesa alitemwa sana abana ba kwa Adamu, atupeele icilubula ca kwa Yesu ninshi tucili ababembu.—wp17.6, amabu. 6-7.

Bushe ifyaba pa Amalumbo 118:22 filanga shani ukuti fyalelosha ku kubuushiwa kwa kwa Yesu?

Abantu tabasumine ukuti Yesu e wali Mesia kabili balimwipeye no kumwipaya. Pa kuti abe ilibwe lya pa “muulu pa koona,” alingile ukubuushiwa.—w17.12, amabu. 9-10.

Bushe bonse abali ifikolwe fya kwa Mesia bali mabeli?

Ifikolwe fya kwa Yesu fimo fyali mabeli lelo fimbi tafyali mabeli. Davidi tali ibeli lya kwa Yese; lelo Mesia atuntwike muli Davidi.—w17.12, amabu. 14-15.

Finshi fimo ifyo Baibolo yalandapo ifingalenga twaba no bumi ubusuma?

Ukulingana na Mafunde ya kwa Mose, abalelwala amalwele yamo balingile ukulaikala beka. Abantu balingile ukusamba nga baikata icitumbi. Amafunde yalilondolwele ifyo abantu balingile ukucita pa kupoosa ubusali. Balingile ukusembulula umwana mu bushiku bwalenga 8, pantu e lyo umulopa wingatimba bwangu.—wp18.1, ibu. 7.

Cinshi cishabipila ku Bena Kristu ukuitemwa mu kulinga?

Tufwile ukutemwa abantu banensu nga fintu twaitemwa. (Marko 12:31) Abalume balingile “ukulatemwa abakashi babo nge mibili yabo.” (Efes. 5:28) Lelo nga tatucenjele kuti twaba bakaitemwe.—w18.01, ibu. 23.

Fintu nshi fimo ifyo twingacita pa kuti tukule mu fya kwa Lesa?

Tufwile ukulabelenga sana Icebo ca kwa Lesa, no kulatontonkanya sana pa fyo tulebelenga kabili tulebomfya sana ifyo tulesambilila. Tulingile ukulaleka umupashi wa mushilo uletutungulula. Na kabili abantu nga batwebako pali fimo, tulekonka.—w18.02, ibu. 26.

Mulandu nshi tushilingile ukucetekela ukuti ing’anga e lyo na basobela ukubomfya intanda kuti batwafwa ukwishiba ifikacitika ku ntanshi?

Kwaliba imilandu iingi, lelo umulandu uukalamba wa kuti Baibolo yalilesha ukucetekela aba bantu.—wp18.2, amabu. 4-5.

Bushe tufwile ukucita shani nga batwita ku ba bwananyina?

Nga ca kuti twasumina ukuya uko batwitile, tufwile ukufikilisha. (Amalu. 15:4) Tatulingile ukufilwa ukuyako pa milandu iishicindeme no kucindama. Uutwitile afwile alibombeshe pa kupekanya ifya kulya.—w18.03, ibu. 18.

Finshi baeluda na batumikila bengasambilila kuli Timote?

Timote alebika sana amano ku bantu kabili alebika ifya kwa Lesa intanshi. Alebombesha mu mulimo wa kwa Lesa kabili alebomfya ifyo alesambilila. Alitwalilile ukuisambilisha no kushintilila pa mupashi wa kwa Yehova. Baeluda na babomfi batumikila kuti bamupashanya.—w18.04, amabu. 13-14.