ICIPANDE CA KUSAMBILILAMO 25
“Ine, ndi no Kufwaya Impaanga Shandi”
“Ine, ndi no kufwaya impaanga shandi no kushisakamana.”—ESEK. 34:11.
ULWIMBO 105 “Lesa Kutemwa”
IFYO TWALASAMBILILA *
1. Cinshi Yehova ailinganishisha kuli nacifyashi?
“BUSHE umwanakashi kuti alaba umwana wakwe uonka?” Ici e cipusho Yehova aipwishe mu nshiku sha kwa kasesema Esaya. Kabili atile: “Kwena aba banakashi kuti balaba, lelo ine nshakakulabe.” (Esa. 49:15) Ilingi Yehova tailinganya kuli nyina umuntunse. Lelo pali iyi nshita e ko ailingenye. Yehova alingenye ifyo omfwa pa babomfi bakwe ku kutemwa uko nyina akwatila umwana, pantu alefwaya ababomfi bakwe ukwishiba ukuti alibatemwa icine cine. Nkashi uwe shina lya kuti Jasmin atile: “Ilyo ulekusha umwana kulaba ukupanga bucibusa ubwaibela na ena ubushipwa.” Ifi fine e fyo na banacifyashi abengi bengalanda.
2. Bushe Yehova omfwa shani nga ca kuti umubomfi wakwe umo aleka ukumubombela?
2 Yehova aleshiba nga ca kuti umubomfi wakwe nangu fye umo aleka ukubila imbila nsuma no kulongana. Kanshi alomfwa ububi sana pa babomfi bakwe abengi abaleka ukumubombela nelyo abanaka cila mwaka *.
3. Cinshi Yehova afwaya abanaka ukucita?
3 Bamunyinefwe na bankashi abengi abanaka balabwelela ku cilonganino, kabili tulatemwa sana nga babwela! Yehova alafwaya babwela, kabili na ifwe e fyo tufwaya. (1 Pet. 2:25) Finshi twingacita pa kuti tubafwe ukubwela? Ilyo tushila-asuka ici cipusho, kuti cawama twaishiba ifilenga aba bwananyina bamo baleka ukulongana no kubila imbila nsuma.
FINSHI FILENGA BAMO BALEKA UKUBOMBELA YEHOVA?
4. Bushe incito ilenga shani bamo baleka ukubombela Yehova?
4 Aba bwananyina bamo balacindikisha sana incito babomba ica kuti balaleka no kubombela Yehova. Munyinefwe Hung, * uwikala ku Asia atile: “Nalepoosa inshita iikalamba na maka ku kubomba incito. Naleibepa nati nga nakwata indalama ishingi e lyo nkalabombela bwino Yehova. Kanshi nalebomba ama-awala ayengi. Natendeke ukulofwa mu kulongana ica kuti nasukile nalekelela fye ukulongana. Nalimwene ukuti Satana abomfya cino calo pa kufumya abantu kuli Lesa panono panono.”
5. Bushe amafya ba Anne bakwete yalengele bacita finshi?
5 Aba bwananyina bamo balafuupuka pa mulandu wa kuti balakwata amafya ayengi. Ba Anne aba ku Britain abakwata abana 5 batile: “Umwana wandi umo afyelwe uwalemana. Mu kupita kwa nshita umwana wandi umwanakashi alitamfiwe, kabili umwana wandi umbi umwaume alilwele ubulwele bwa kuli bongobongo. Nalisakamikwe sana ica kuti nalilekele ukulongana no kubila imbila nsuma. Nasukile naba uwanaka.” Tulomfwa ububi pa fyacitikile ba Anne no lupwa lwabo, kabili tulomfwa ububi na pa mafya yapala aya ayo aba bwananyina na bambi bakwata!
6. Bushe ukukanakonka amashiwi yaba pa Abena Kolose 3:13 kuti kwalenga shani umo aitalusha ku bantu ba kwa Yehova?
6 Belengeni Abena Kolose 3:13. Ababomfi ba kwa Yehova bamo balileka ukumubombela pa mulandu wa kuti uwa bwananyina alibakalifya. Umutumwa Paulo alilandile ukuti inshita shimo kuti twaba “ne ca kuilishanya ku” Mwina Kristu munensu. Nalimo kuti batufyenga. Nga tatucenjele kuti twalaenda ne cikonko ku mukoshi. Ukwenda ne cikonko ku mukoshi kuti kwalenga umuntu aitalusha ku cilonganino ca kwa Yehova. Lekeni tulande pa fyacitikile munyinefwe Pablo uwa ku South America. Balimubepeshe ukuti alicitile ulubembu, kabili ici calengele bamupoke imilimo alebomba mu cilonganino. Cinshi munyinefwe acitile? Atile: “Nalifulilwe, kabili panono panono nali-italwishe ku cilonganino.”
7. Cinshi cingacitika ku muntu nga ca kuti kampingu ilemucusha?
7 Abantu bamo abacitilepo imembu ishikalamba kale nalimo kuti balaumfwa ububi pa myaka iingi ica kuti baleka no kubombela Lesa. Nalimo bamona kwati Lesa te kuti abatemwe. Nangu ca kuti balilapiile kabili balibabelele uluse, kuti balamona kwati tabalinga ukuba pa bantu ba kwa Lesa. Ifi fine e fyo munyinefwe we shina lya kuti Francisco aleumfwa. Atile: “Balinungike ilyo nacitile ubulalelale. Nangu ca kuti pa kubalilapo nalitwalilile ukulalongana, nalisakamikwe sana ica kuti natendeke ukumfwa kwati nshalingile ukuba pamo na bantu ba kwa Yehova. Kampingu yalencusha kabili nalemona kwati Yehova tanjeleela. Mu kuya kwa nshita nasukile naleka ukuba pamo ne cilonganino.” Bushe mumfwa shani pali bamunyinefwe na bankashi abakwata amafya yapala aya twalandapo? Bushe mulomfwa ububi pa fibacitikila? Nga ca kuti mulomfwa ububi, bushe mulemona ukuti Yehova ena omfwa shani?
YEHOVA ALITEMWA IMPAANGA SHAKWE
Kacema umwina Israele alesakamana sana impaanga iyaluba (Moneni paragrafu 8 na 9)) *
8. Bushe Yehova alalaba abalemubombela? Londololeni.
8 Yehova talabako ku bantu abalemubombela, lelo abaleka ukumubombela pa nshita imo. Kabili talaba ifyo bamubombela. (Heb. 6:10) Kasesema Esaya alilembele icilangililo icisuma icilangilila ifyo Yehova asakamana abantu bakwe. Atile: “Akacema impaanga shakwe nga filya kacema acita. Ku kuboko kwakwe akalonganika abana ba mpaanga; kabili akabasendela pa cifuba cakwe.” (Esa. 40:11) Bushe Yehova Kacema Mukalamba omfwa shani nga ca kuti umubomfi wakwe umo aleka ukumubombela? Yesu alilondolwele ifyo Yehova omfwa ilyo aipwishe abasambi bakwe ukuti: “Muletipo shani? Umuntu nga akwete impaanga umwanda umo (100) kabili paluba imo, bushe takashe amakumi pabula na pabula (99) mu mpili no kuya alefwaya imo iilubile? Kabili nga aisanga, ndemweba icine cine nati, alasekelela nga nshi pali imo ukucila pa mpaanga amakumi pabula na pabula (99) ishishaluba.”—Mat. 18:12, 13.
9. Bushe bakacema basuma mu nshita balelemba Baibolo balesunga shani impaanga shabo? (Moneni icikope cili pa nkupo.)
9 Cinshi cibelele bwino ukulinganya Yehova kuli kacema? Pantu mu nshita balelemba Baibolo, kacema musuma alesakamana bwino impaanga. Ku ca kumwenako, Davidi alilwile ne nkalamo e lyo na bere pa kuti acingilile umukuni. (1 Sam. 17:34, 35) Kacema musuma aleishiba nga ca kuti paluba impaanga nangu fye imo. (Yoh. 10:3, 14) Kacema wa musango uyu alesha impaanga shimbi 99 mwi cinka nelyo kuli bakacema bambi pa kuti shicingililwe, lyena aleya mu kufwaya iilubile. Yesu abomfeshe ici icilangililo pa kutusambilisha icishinka icacindama. Atile: “Tata uwaba mu muulu tafwaya ukuti umo pali aba abanono alobe.”—Mat. 18:14.
Kacema umwina Israele alesakama impaanga iyalubile (Moneni paragrafu 9)
YEHOVA ALAFWAYA IMPAANGA SHAKWE
10. Ukulingana ne lembo lya kwa Esekiele 34:11-16, finshi Yehova alanda ukuti e fyo akacita ku mpaanga shakwe ishaluba?
10 Yehova alitutemwa ifwe bonse ukubikako fye na “banono” abaleka ukumubombela. Lesa alitulaya ukupitila muli kasesema Esekiele ukuti akafwaya impaanga shakwe ishaluba kabili akashafwa ukubwelela kuli ena. Alilandile mu kulungatika na pa fyo engacita pa kupususha impaanga shakwe nga filya fine bakacema abena Israele balecita impaanga imo nga yaluba. (Belengeni Esekiele 34:11-16.) Kacema alebalilapo ukufwaya impaanga, kabili ukucita ifi kwalesenda inshita na maka. Nga aisanga aleibwesesha ku mukuni. Lyena nga ca kuti impaanga naicenekwa nelyo nga ili ne nsala aleisakamana bwino no kuikakila pa filonda e lyo aisenda no kuyaipeela ifya kulya. Ifi fine e fyo na baeluda, bakacema ba “mukuni wa kwa Lesa” balingile ukulacita pa kwafwa abaitalusha ku cilonganino. (1 Pet. 5:2, 3) Baeluda balafwaya abantu ba musango uyu, balabafwa ukubwelela ku cilonganino, kabili cikuuku cikuuku balabafwa ukuba ifibusa fya kwa Yehova na kabili. *
11. Cinshi kacema musuma aleishiba?
11 Kacema musuma aleishiba ukuti impaanga kuti yaluba. Kabili taleleka ukusakama bwino impanga pa mulandu wa kuti yacifuma pa mukuni. Tontonkanyeni pa fyo Yehova acitile ku babomfi bakwe abafumine kuli ena pa nshita imo.
12. Finshi Yehova acitile ilyo Yona akene ukumfwila ifyo amwebele?
12 Kasesema Yona taumfwilile Yehova ilyo amwebele ukuya ku Ninebe. Na lyo line, Yehova tasuulile Yona. Ukupala kacema musuma, Yehova alipuswishe Yona kabili alimwafwile ukuba uwashipa pa kuti ayebomba umulimo amupeele. (Yona 2:7; 3:1, 2) Lyena Yehova abomfeshe ulungu pa kusambilisha Yona ifyo ubumi bwa muntu umo na umo bwacindama. (Yona 4:10, 11) Finshi tulesambililako? Baeluda tabalingile ukwangufyanya ukuleka ukwafwa abanaka. Lelo bafwile ukwesha ukwishiba icalengele impaanga ifume ku mukuni. Kabili impaanga nga yabwelela kuli Yehova, baeluda balatwalilila ukulanga ukuti balitemwa impaanga kabili bali-ibikako amano.
13. Finshi twingasambilila ku fyo Yehova acitile ku waimbile Amalumbo 73?
13 Uwalembele Amalumbo 73 alifuupwike ilyo amwene ababifi balemoneka kwati tabacula. Atendeke ukutwishika nga ca kuti mu kucita ifyo Lesa afwaya mulafuma ifisuma. (Amalu. 73:12, 13, 16) Bushe Yehova acitile shani? Tatendeke ukumulengulula. Na kuba Lesa alilengele ifyo uyu mwaume alandile filembwe mu Baibolo. Pa numa uwaimbile ili ilumbo alilwike ukuti ukuba cibusa wa kwa Yehova e kwacindama sana ukucila pa fintu fyonse ifyo umuntu engakwata mu bumi. (Amalu. 73:23, 24, 26, 28) Finshi tulesambililako? Baeluda tabalingile ukwangufyanya ukupingula abatwishika nga mwaliba ubusuma mu kubombela Yehova. Mu cifulo ca kubalengulula, baeluda bafwile ukwishiba icilenga balelanda no kucita ifilanga ukuti balatwishika. Lyena baeluda kuti babomfya Baibolo pa kubakoselesha.
14. Cinshi calengele Eliya akabile uwa kumwafwa, kabili Yehova amwafwile shani?
14 Kasesema Eliya alibutwike Namfumu Yesebele. (1 Isha. 19:1-3) Alemona kwati takwali kasesema na umbi uwalebombela Yehova, kabili alemona kwati umulimo alebomba wali wacabecabe. Eliya alifuupwike ica kuti alefwaya fye no kuti afwe. (1 Isha. 19:4, 10) Yehova talengulwile Eliya, lelo amwebele ukuti tali eka, no kuti alingile ukucetekela amaka ya kwa Lesa. Amwebele no kuti kwali imilimo iingi iyo alekabila ukubomba. Yehova cikuuku cikuuku alikutike ku fyo Eliya ailishenye kabili alimupeele umulimo umbi. (1 Isha. 19:11-16, 18) Finshi tulesambililako? Ifwe bonse, maka maka baeluda, tufwile ukuba ne cikuuku ku mpaanga sha kwa Yehova. Nampo umuntu nga alanda ukuti kuli ifilengele afulwe, nelyo nga alanda ukuti alemona kwati Yehova takabale amwelela, baeluda bakakutikisha ilyo akalabeba ifyo aleumfwa. Lyena bakesha apo bengapesha ukumulenga aishiba ukuti Yehova alimutemwa.
BUSHE TUFWILE UKULAMONA SHANI IMPAANGA SHA KWA LESA ISHALUBA?
15. Ukulingana ne fyaba pali Yohane 6:39, bushe Yesu alemona shani impaanga sha kwa Wishi?
15 Bushe Yehova afwaya tulemona shani impaanga shakwe ishaluba? Kuti twasambilila ku fyo Yesu alecita. Alishibe ukuti Yehova amona impaanga shakwe shonse ukuti shalicindama. Kanshi ale-esha apo engapesha ukwafwa “impaanga ishaluba isha mu ng’anda ya kwa Israele” ukubwelela kuli Yehova. (Mat. 15:24; Luka 19:9, 10) Apo ni kacema musuma, Yesu alyeseshe na maka ukukanalufyapo impaanga ya kwa Yehova nangu imo.—Belengeni Yohane 6:39.
16-17. Bushe baeluda bafwile ukulamona shani umulimo wa kwafwa abaitalusha kuli Yehova? (Moneni akabokoshi akaleti “ Ifyo Impaanga Iyaluba Ingomfwa.”)
16 Paulo aebele baeluda bali mu cilonganino ca ku Efese ukulapashanya Yesu. Atile: ‘Mufwile ukwafwa abanaka, kabili mufwile ukwibukisha amashiwi ya kwa Shikulu Yesu, uwasosele umwine ati, “Mwaba insansa ishingi mu kupeela ukucila ishaba mu kupokelela.”’ (Imil. 20:17, 35) Ifyaba pali ili ilembo filanga ukuti baeluda balikwata umulimo uwacindama uwa kusakamana abantu ba kwa Yehova. Ba Salvador baeluda abekala ku Spain batile: “Nga natontonkanya pa fyo Yehova asakamana impaanga shakwe ishaluba, ndakoseleshiwa ukulaesha apo ningapesha ukushafwa. Nalishiba ukuti Yehova afwaya ndeshisakamana bwino.”
17 Bonse abo tulandilepo muli cino cipande abaitalwishepo kuli Yehova balibafwile ukubwelela kuli ena. Na pali ino ine nshita abengi abaitalusha kuli Yehova balafwaya ukubwela. Mu cipande cikonkelepo tukasambilila na fimbi ifyo twingacita pa kubafwa ukubwelela kuli Yehova.
ULWIMBO 139 Elenganyeni Ukuti E ko Muli Ilyo Fyonse Fyalengwa Ifipya
^ para. 5 Cinshi cilenga abantu bamo ababombela Yehova pa myaka iingi baleka ukumubombela? Bushe Lesa omfwa shani pa bantu ba musango uyu? Twala-asuka aya mepusho muli cino cipande. Kabili twalalanda na pa fyo twingasambilila ku fyo Yehova aafwile bamo abalembwa mu Baibolo abalekelepo ukumubombela.
^ para. 2 UBULONDOLOSHI: Kasabankanya uwanaka ni ulya uushabombapo umulimo wa kubila imbila nsuma no kupanga abasambi pa myeshi 6 nelyo ukucilapo. Na lyo line, bakasabankanya abanaka ni bamunyinefwe na bankashi, kabili twalibatemwa.
^ para. 4 Amashina yamo nabayalula.
^ para. 10 Mu cipande cikonkelepo tukasambilila pa fyo baeluda bengacita ifi fintu fitatu.
^ para. 60 UBULONDOLOSHI BWA CIKOPE: Kacema umwina Israele uwalebika sana amano ku mpaanga iyaluba, aleya mu kuifwaya kabili nga aisanga aleibwesesha ku mukuni. Ifi fine e fyo na bakacema ba ku mupashi bacita.
^ para. 64 UBULONDOLOSHI BWA CIKOPE: Nkashi uwanaka ali muli basi alelolela ukuti itendeke ukwenda, lyena amona ba Nte babili bali ne nsansa ilyo balebila imbila nsuma ku cintubwingi.
