1-2. Mapaalo nshi umuntu akwata pa numa ya kubatishiwa?

 TULATEMWA sana nga twabatishiwa twaba na mu lupwa lwa kwa Yehova. Ala ifi Yehova atusuminisha ukuba ifibusa fyakwe, tumfwa nge fyo Davidi uwaimbile amalumbo aumfwile ilyo atile: “Alipaalwa uo mwasala no kumulenga ukupalama, ukuti ekale mu mansa shenu.”—Amalu. 65:4.

² Yehova tasuminisha fye umuntu uuli onse mu mansa shakwe. Nga fintu twasambilile mu cipande cafumineko, abo Lesa akula bantu abalanga ukuti balafwaya ukuba ifibusa fyakwe. (Yako. 4:8) Nga mwaipeela kuli Yehova no kubatishiwa, mulapalama kuli ena mu nshila iyaibela. Kuti mwacetekela ukuti nga mwabatishiwa, ‘akamupongolwela amapaalo mpaka kukabule incende apa kubika amapaalo yambi.’—Mal. 3:10; Yer. 17:​7, 8.

3. Cintu nshi icacindama ico Abena Kristu abaipeela kabili ababatishiwa bacita? (Lukala Milandu 5:​4, 5)

³ Kwena ulubatisho ni ntendekelo fye iya kubombela Yehova. Nga mwabatishiwa, mwakulaibikilishako pa kuti mulesunga umulapo uo mwalapile kuli Yehova, na pa kuti muletwalilila ukumubombela na lintu mwatunkwa nelyo ilyo mwakwata amesho ayengalenga mwaleka ukuba ne citetekelo. (Belengeni Lukala Milandu 5:​4, 5.) Apo muli basambi ba kwa Yesu, mukalamupashanya kabili mukalaesha na maka yenu yonse ukukonka amafunde yakwe. (Mat. 28:​19, 20; 1 Pet. 2:21) Ifyo twalasambilila muli  cino cipande fyalalenga mwishibe ifyo mwingalacita ifi.

TWALILILENI UKUKONKA YESU NA LINTU MWAKWATA AMAFYA NA LINTU MWATUNKWA

4. Bushe abasambi ba kwa Yesu basenda shani “icimuti ca kucushiwilwapo”? (Luka 9:23)

⁴ Te kutila nga mwabatishiwa ninshi tamwakulakwata amafya. Na kuba Yesu alilandile ukwabula ukupita na mu mbali ukuti abasambi bakwe bakulasenda “icimuti ca kucushiwilwapo.” Bafwile ukulasenda ici cimuti “cila bushiku.” (Belengeni Luka 9:23.) Bushe Yesu aloseshe mu kuti abasambi bakwe bali no kulacula lyonse? Awe. Ico alekomailapo fye ca kuti, nangu ca kuti abasambi bakwe bakulakwata amapaalo, bakulakwata na mafya. Amafya yamo ayo bali no kulakwata yali no kulaba ayakalamba.—2 Tim. 3:12.

5. Bushe Yesu atile abaipusula fimo pa kuti balebombela Lesa bali no kupaalwa shani?

⁵ Nalimo balupwa lwenu balamukaanya ukubombela Yehova, nelyo mwali-ipusula ifintu fimo pa kuti mulebika Ubufumu pa ntanshi. (Mat. 6:33) Nga ca kuti ifi e fyo caba, kuti mwacetekela ukuti Yehova alamona ifyo mumubombela. (Heb. 6:10) Mufwile mwali-imwena ukuti ifyo Yesu alandile fya cine. Alandile ati: “Takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma uushakapokelele imiku 100 pali ino nshita, amayanda na bamunyina ne nkashi na banyina na bana na mabala, e lyo no kumucusha pa mulandu wa ine. Na ku ntanshi akapokelela umweo wa muyayaya.” (Marko 10:​29, 30) Ifyo Lesa amupaala fyalicila pa fyo mwaipusula pa kuti mulemubombela.—Amalu. 37:4.

6. Cinshi mulingile ukulalwishisha “ulunkumbwa lwa mubili” na pa numa ya kubatishiwa?

⁶ Na pa numa ya kubatishiwa, mufwile ukulalwisha “ulunkumbwa lwa mubili.” (1 Yoh. 2:16) No mulandu wa kuti mucili abashapwililika pa mulandu wa kuti mwatuntuka kuli Adamu. Nalimo inshita shimo kuti mwalaumfwa nge fyo umutumwa Paulo aumfwile. Alembele ati: “Mu mutima wandi mwena nalitemwisha amafunde ya kwa Lesa, lelo ine mona mu filundwa fyandi ifunde limbi lilelwa ne funde lya matontonkanyo yandi no kulantwala bunkole kwi funde lya lubembu ilili mu filundwa fyandi.” (Rom. 7:​22, 23) Nalimo kuti mwafuupuka pa mulandu wa kuti mufwile ukulalwisha ulunkumbwa. Nomba ukutontonkanya pa fyo mwalaile Yehova ilyo mwaipeele kuli ena, kukalenga mukatwalilile ukulwisha amatunko. Icishinka ca kuti umulapo uo mwalapile pa kuipeela kuli Yehova, ukalenga cikamwangukileko ukulwisha amatunko. Mulandu nshi twalandila ifi?

7. Bushe ukuipeela kuli Yehova kukalenga shani mukatwalilile ukuba aba cishinka kuli ena?

⁷ Nga mwaipeela kuli Yehova ninshi mwaikaana. Ici cipilibula ukuti namusalapo ukukaana ukucita ifintu ifyo mwingafwaya ukucita ne fintu fimbi ifingakalifya Yehova. (Mat. 16:24) E ico nga mwaeshiwa, tamwakapoose inshita ya kulatontonkanya pa fyo mufwile ukucita pantu ninshi mwalisalapo kale ica kucita, e kutila ukutwalilila ukuba aba cishinka kuli Yehova. Mukalafwaisha ukulenga Yehova alesekelela nangu ubwesho bukule shani. Na imwe mukaba nga Yobo. Nangu ca kuti Yobo alikwete amesho ayakalamba, alandile no mutima wakwe onse ati: “Nshakaleke ukuba uwa kaele mpaka ne mfwa yandi!”—Yobo 27:5.

8. Bushe nga muletontonkanya pa fyo mwaebele Yehova ilyo mwaleipeela kuli ena, cikamwangukila shani ukulwisha amatunko?

⁸ Nga muletontonkanya pa fyo mwaebele Yehova ilyo mwaleipeela kuli ena, mukalakwata amaka ya kulwisha amatunko. Ku ca kumwenako, bushe kuti mwatendeka ukulanga icintemwa kuli muka mwine? Awe, pantu mwalilaya Yehova ukuti tamwakulacita ifya musango uyu.  Nga tamulekele ulunkumbwa lwa kucita ifyabipa lwakula muli imwe, tacakamukosele ukuleka ukutontonkanya pa kucita ifyabipa. Mukafuma “mu nshila ya babipa.”—Amapi. 4:​14, 15.

9. Bushe nga muletontonkanya pa fyo mwaebele Yehova ilyo mwaleipeela kuli ena, cikamwangukila shani ukubika ifya kwa Lesa pa ntanshi?

⁹ Kuti mwacita shani nga ca kuti bamweba ukwingila incito iikalalenga mwikalalongana lyonse? Mukeshiba ico mulingile ukucita. Ilyo bashilamweba ukwingila iyi ncito, ninshi mwalisalapo kale ukukanaingila incito iingalenga mwalafilwa ukulongana. E ico tamwakasalepo ukwingila incito ya musango uyu e lyo pa numa mukale-esha ukucita ifingalanga ukuti mwalibika Yehova intanshi. Nga muletontonkanya pa fyo Yesu aipeeleshe pa kuti alecita ifyo Wishi afwaya, tamwakapoose ne nshita iya kukaana icili conse icingalenga mwakalifya Lesa uo mwaipeelako.—Mat. 4:10; Yoh. 8:29.

10. Bushe Yehova akamwafwa shani pa kuti mukatwalilile ukukonka Yesu pa numa ya kubatishiwa?

¹⁰ Icishinka ca kuti nga mwakwata amatunko na mesho e lyo cimoneka nga ca kuti mulafwaisha ukutwalilila ukukonka Yesu. Kabili kuti mwacetekela ukuti Yehova akamwafwa pa kuti mukatwalilile ukukonka Yesu. Baibo itila: “Lesa wa cishinka, kabili takamuleke ukweshiwa ubwesho ubo mushingashipikisha, lelo ilyo ubo bwesho bwaisa akafwaya na pa kuti mufuminemo pa kuti mube na maka ya kubushipikisha.”—1 Kor. 10:13.

IFYO MWINGACITA PA KUTI MUTWALILILE UKUKONKA YESU

11. Cinshi cimo icawamisha ico mwingacita pa kuti mutwalilile ukukonka Yesu pa numa ya kubatishiwa? (Moneni ne cikope.)

¹¹ Yesu alebombela Yehova no mweo onse, kabili alepepa sana kuli ena. (Luka 6:12) Na kuba icawamisha ico mwingalacita pa kuti mutwalilile ukukonka Yesu pa numa ya kubatishiwa,  kutwalilila ukucita ifingalenga mwapalama sana kuli Yehova. Baibo itila: “Ukulingana ne fyo twalunduluka, natutwalilile ukulaenda bwino muli uyu wine musango.” (Fil. 3:16) Mu nshita mu nshita, mwakulaumfwa amalyashi aya bamunyinefwe na bankashi abasalapo ukulabombesha mu mulimo wa kwa Yehova. Nalimo aba bamunyinefwe na bankashi baliya kwi Sukulu lya Bakabila ba Bufumu nelyo baliya mu kubombela ukwaba ukukabila. Nga kuti mwakumanisha, na imwe bene kuti mwacitako ifi bacita. Abantu ba kwa Yehova balafwaya sana ukubombesha mu mulimo wakwe. (Imil. 16:9) Nomba kuti mwacita shani nga ca kuti pali ino nshita te kuti mucite ifi? Mwilamona ukuti abakumanisha ukucita ifi balimucila. Icacindama kutwalilila ukushipikisha. (Mat. 10:22) Mwilalaba ukuti Yehova alasekelela nga ca kuti mulemubombela apapela amaka yenu kabili ukulingana ne fyo ifintu fili. Ifi e fyo mufwile ukulacita pa kuti mutwalilile ukukonka Yesu pa numa ya kubatishiwa.—Amalu. 26:1.

12-13. Finshi mwingacita nga mwaleka ukuba abacincila? (1 Abena Korinti 9:​16, 17) (Moneni na kabokoshi akaleti “ Twalilileni Ukubutuka.”)

¹² Finshi mufwile ukucita nga ca kuti mulemona ukuti tamulepepa ukufuma pa nshi ya mutima, nelyo nga mulemona ukuti tamutemenwe ukubila imbila nsuma nge fyo mwakutemenwe? Kuti mwacita shani nga ca kuti pali ino nshita tamwatemwa ukubelenga Baibo nge fyo mwatemenwe? Nga ca kuti mwalaumfwa ifi pa numa ya kubatishiwa, tamufwile ukumona ukuti umupashi wa kwa Yehova nauleka ukumutungulula. Pa mulandu wa kuti tamwapwililika, ifyo mumfwa filaaluka-aluka. Nga ca kuti mwaleka ukuba abacincila, muletontonkanya pa mutumwa Paulo. Nangu ca kuti ale-esha ukupashanya Yesu, alishibe ukuti inshita shimo cali no kulamukosela ukucita ifyo alefwaya ukucita. (Belengeni 1 Abena Korinti 9:​16, 17.) Paulo alandile ati: “Nga ncita ukwabula  ukuitemenwa, na lyo line nalipeelwa umulimo mfwile ukubomba.” Ico Paulo alelandapo ca kuti alefwaisha ukubomba umulimo wakwe na lintu ashaleumfwa ukuti alefwaya ukubomba.

¹³ Na imwe bene, mwilasalapo ifya kucita pantu fye e fyo muleumfwa pa mulandu wa kuti tamwapwililika. Mulepampamina fye pa kucita ifisuma na lintu muleumfwa ukuti tamulefwaya ukuficita. Nga mwatwalilila fye ukucita ifisuma, ifyo mumfwa fikaaluka. Ilyo ifyo mumfwa fishila-aluka, nga mwatwalilila ukuisambilisha, ukupepa, ukulongana no kubila imbila nsuma, mukatwalilila ukukonka Yesu pa numa ya kubatishiwa. Aba bwananyina nga bamona mwatwalilila ukushipikisha ilyo mulebombela Yehova, mukabakoselesha.—1 Tes. 5:11.

“MULEYESHA . . . MULEILINGA”

14. Ni muli finshi mufwile ukulaibebeta, kabili mulandu nshi? (2 Abena Korinti 13:5)

¹⁴ Pa numa ya kubatishiwa, calicindama ukulaibebeta cila nshita. (Belengeni 2 Abena Korinti 13:5.) Mu nshita mu nshita, cilawama ukuibebeta pa kuti mumone nga ca kuti mulapepa cila bushiku, mulabelenga no kuisambilisha Baibo, mulalongana, kabili mulabila imbila nsuma. Mule-esha ukucita ifingalenga mwatemwa sana ukucita ifi fintu twalandapo. Ku ca kumwenako, yipusheni amuti: ‘Bushe kuti nalondolwela umuntu amasambililo ya kubalilapo aya mu Baibo? Bushe pali ifyo ningacita pa kuti ningatemenwako umulimo wa kubila imbila nsuma? Bushe nga ndepepa ndalanda mu kulungatika ifyo ndepepelapo, kabili bushe amapepo yandi yalalanga ukuti nalishintilila pali Yehova? Bushe ndalongana lyonse? Kuti nacita shani pa kuti ndebikako amano ilyo tulelongana na pa kuti ndeasukapo?’

15-16. Finshi mwasambilila ku fyo munyinefwe umo acimfishe itunko?

¹⁵ Na kabili cilawama ukuibebeta pa kuti mwishibe ifyo mushicitamo bwino. Ifyo munyinefwe Robert alandile filanga ukuti ifi twalandapo fishinka. Atile: “Ilyo nali ne myaka 20, kwali incito iyo nalebomba inshiku shimo. Bushiku bumo pa numa ya kwinuka ku ncito, umwanakashi umo uo twalebomba nankwe alinjitile ku ng’anda ku mwakwe. Anjebele ati twali no kubako fye babili kabili kwali no kuwama sana. Pa kubala nalewayawaya ilyo nalekaana lelo nasukile namukaanina, namulondolwela ne co nakaanine.” Munyinefwe Robert alicimfishe itunko kabili alicitile bwino. Nomba pa numa ilyo atontonkenye pa fyacitike, amwene ukuti tacitile bwino sana. Atile: “Nalewayawaya ukukaana ifyo alenjeba nelyo nsha-angufyenye ukukaana nga filya Yosefe acitile ilyo muka Potifa alemusembeleka. (Ukute. 39:​7-9) Na kuba, nalipapile ifyo cankosele pa kumukaanina. Ifi ifyacitike fyalengele mone  ukuti nalingile ukukosha bucibusa bwandi na Yehova.”

¹⁶ Na imwe bene nga mwaibebeta nge fyo munyinefwe Robert aibebetele, kuti cawama. Na lintu mwacimfya ubwesho, muleyipusha amuti, ‘Bushe nacikokola pa kuti nkaane?’ Nga mwamona ukuti mufwile ukuwamyako tamulingile ukufuupuka. Mufwile ukutemwa pantu ninshi mwaishiba apo mufwile ukuwamyako. Mulepepela pa fyo mufwile ukuwamyako kabili mulecita ifingalenga mwalafwaisha ukukonka amafunde ya kwa Yehova ayalanda pa kuba ne mibele iisuma.—Amalu. 139:​23, 24.

17. Bushe ifyacitikile munyinefwe Robert fyakumine shani ishina lya kwa Yehova?

¹⁷ Kuli na fimbi ifyo twingasambilila ku lyashi lya kwa munyinefwe Robert. Alandile no kuti: “Ilyo nakaanine ulya umwanakashi twalebomba nankwe, anjebele ati, ‘Wacimfya ubwesho!’ Nalimwipwishe umo aloseshe. Anondolwelele ati umunankwe uwali Inte ya kwa Yehova kale, amwebele ati ba Nte abacaice bonse balacita ifyabipa mu bumfisolo nga bakwata ishuko lya kucita ifyabipa. E ico aebele umunankwe ati ali no kunjesha pa kuti amone nga ca kuti na ine e fyo naba. Lyena nalilwike ukuti nalilengele ishina lya kwa Yehova lyacindikwa kabili ici calengele naba ne nsansa.”

18. Cinshi mulefwaisha ukulacita pa numa ya kubatishiwa? (Moneni na kabokoshi akaleti “ Ifipande Ifyo Mukatemwa.”)

¹⁸ Nga mwaipeela kuli Yehova no kubatishiwa, mulanga ukuti mulefwaya ukulacindika ishina lyakwe nangu mukwate ubwesho bwa musango shani. Kabili kuti mwacetekela ukuti Yehova aleshiba amafya ayo mukwata na matunko ayo mucimfya. Akamupaala pa fyo muibikilishako pa kuti mutwalilile ukuba aba cishinka. Kuti mwacetekela ukutila kuti amwafwa no mupashi wakwe uwa mushilo pa kuti mulecita ifi. (Luka 11:​11-13) Yehova nga amwafwa, mukatwalilila ukukonka Yesu pa numa ya kubatishiwa.