1-2. (a) Cinshi citwafwa ukulashipikisha amafya cila bushiku? Londololeni. (b) Finshi twalasambilila muli cino cipande?

BUSHE mwalibala amwibukishapo ifyo mwashipikishe ubwafya e lyo mwatila: “Nga nshashipikishe bulya bwafya pa lwandi neka.” Fwe bengi twalilandapo aya mashiwi. Nalimo mwalilandile aya mashiwi ilyo mwaibukishe ifyo mwashipikishe ubulwele ubukalamba nelyo ifyo mwashipikishe ilyo mwafwililwe. Nga mwaibukisha ubwafya mwashipikishe, mumfwa ukuti icalengele muleshipikisha cila bushiku, ni co Yehova alemupeela umupashi wakwe uwa mushilo uwaba “maka yacila aya bantunse.”—2 Kor. 4:7-9.

² Na kabili tulakabila umupashi wa mushilo ukutwafwa pa kuti umupashi wa ici calo witulufya. (1 Yoh. 5:19) Na pa kuti tukwate amaka ya kulwishanya ne “mipashi ibifi,” tulakabila umupashi wa mushilo. (Efes. 6:12) Kanshi twalasambilila pa nshila shibili isho umupashi wa mushilo utwafwilamo. Lyena twalasambilila na pa fyo twingacita pa kuti umupashi wa mushilo uletwafwa sana.

3. Cintu nshi cimo ico Yehova abomfya pa kutwafwa ukushipikisha amafya?

³ Umupashi wa mushilo uwa kwa Yehova ulatupeela amaka, nelyo ulatukosha pa kuti tulebomba imilimo nangu tuli na mafya. Umutumwa Paulo alishibe ukuti icalengele atwalilile ukubombela Yehova nangu ca kuti alekwata amafya, ni co aleshintilila pa “maka ya kwa Kristu.” (2 Kor. 12:9) Ilyo ali pa bulendo bwakwe ubwa bumishonari ubwalenga bubili, alebombesha ilyo alebila imbila nsuma kabili alebombesha pa kuti alesanga indalama sha kuisakamaninamo. Aleikala ku Korinti mu ng’anda ya kwa Akula na Prisila abalepanga amatenti. Apo Paulo na o alishibe ukupanga amatenti, inshiku shimo alebombela pamo nabo. (Imil.  18:1-4) Umupashi wa mushilo walyafwile Paulo ukulabombesha pa kuti aleisakamana kabili alebila sana imbila nsuma.

4. Ukulingana ne fyaba pali 2 Abena Korinti 12:7b-9, bwesho nshi Paulo akwete?

⁴ Belengeni 2 Abena Korinti 12:7b-9. Ni mwi Paulo aloseshe ilyo alandile amashiwi yaba muli ifi fikomo aya kuti “umuunga mu mubili”? Nga namukwata umuunga mu mubili kuti mwacula icine cine. Kanshi Paulo alelanda pa bwesho ubwamucushishe sana. Alandile pali ubu bwesho ukuti bwali kwati ni ‘malaika wa kwa Satana uwalemutobaula amapi.’ Nalimo Satana ne fibanda fyakwe te balengele Paulo abe no bwesho ubwali kwati muunga mu mubili. Lelo ilyo bamwene ukuti Paulo ali no bwesho, balebukushishako, kwati baletuninkisha umuunga mu mubili wakwe. Cinshi Paulo acitile?

5. Bushe Yehova aaswike shani amapepo Paulo apepele?

⁵ Pa kubala Paulo alefwaya Yehova amufumye “umuunga.” Atile: “Napapeete Shikulu [Yehova] imiku itatu ukuti amfumye uyu muunga.” Nangu ca kuti Paulo alipepele, alitwalilile ukuba no muunga mu mubili. Bushe ici cilolele mu kuti Yehova taaswike amapepo apepele? Awe. Alyaswike. Yehova tafumishepo ubwafya lelo alipeele Paulo amaka ya kushipikisha. Yehova atile: “Mu kunaka kobe e mo amaka yandi yamonekesha.” (2 Kor. 12:8, 9) Kabili apo Lesa alimwafwile, Paulo alitwalilile ukusekelela kabili alitekele umutima!—Fil. 4:4-7.

6. (a) Bushe Yehova kuti aasuka shani amapepo yesu? (b) Malayo nshi ayaba mu malembo ayali mu paragrafu aya mukosha?

⁶ Bushe na imwe mwalilombapo Yehova ukuti afumyepo ubwafya mwakwete? Nalimo mwalipepelepo imiku iingi lelo ubo bwafya bwalitwalilile kabili nalimo bwalekulilanako. Bushe mwamwene kwati Yehova alimufulilwe? Nga e fyo mwamwene, muleibukisha ifyo cali kuli Paulo. Filya fine Yehova aaswike amapepo Paulo apepele, e fyo akasuka na mapepo yenu! Nalimo Yehova te kuti afumyepo ubwafya mukwete. Lelo kuti abomfya umupashi wa mushilo pa kuti mukwate amaka ya kushipikisha ubwesho. (Amalu. 61:3, 4) Nangu ‘bamupoose pa nshi,’ Yehova takamulekeleshe.—2 Kor. 4:8, 9; Fil. 4:13.

7-8. (a) Bushe umupashi wa mushilo waba shani kwati mwela? (b) Bushe Petro alondolwele shani ifyo umupashi wa mushilo ubomba?

⁷ Ni nshila nshi na imbi umupashi wa mushilo utwafwilamo? Umupashi wa mushilo kuti twaupashanya ku mwela. Ubwato ubuleenda pali bemba apali icikuuku ca mwela kuti bwafika bwino uko buleya nga ca kuti bulolele uko umwela uleya. E fyaba no mupashi wa mushilo, ulalenga twatwalilila ukubombela Yehova nangu tuli na mafya mpaka tukengile mu calo cipya ico Lesa atulaya.

⁸ Pa mulandu wa kuti umutumwa Petro ali mulondo, alishibe ifingi pa fyo amato yenda pali bemba. Nalimo e calengele abomfye icilangililo ca fyo ubwato bwenda pali bemba pa kulangilila ifyo umupashi wa mushilo ubomba. Alembele ukuti: “Pantu bakasesema tabaitendekele fye abene ukulanda amashiwi ya kusesema, lelo umupashi wa mushilo e walengele ukuti balande ayo mashiwi ayafumine kuli Lesa.” Ishiwi lya ciGriki ilyo bapilibula ukuti “walengele” lyalola mu kuti; “ukusendwa, nelyo ukusela.”—2 Pet. 1:21.

9. Finshi Petro alefwaya abantu batontonkanyepo ilyo alembele ukuti umupashi wa mushilo “walengele” balembe?

⁹ Finshi Petro alefwaya abantu batontonkanyepo ilyo alembele ukuti umupashi wa mushilo “walengele” balembe? Luka uwalembele ibuuku lya Imilimo abomfeshe ishiwi lya ciGriki ilyapalana ne li pa kulondolola ubwato ‘ubusendelwe’ no mwela. (Imil. 27:15) Uwasambilila sana ifya mu Baibolo alandile ukuti, ilyo Petro alandile ukuti umupashi wa mushilo  “walengele,” abomfeshe ishiwi ilyali no kulenga abantu batontonkanye pa fyo ubwato bwenda pali bemba. Ico Petro alelandapo ca kuti nga filya fine umwela ulenga ubwato bwaenda bwafika na uko buleya, e fyo no mupashi wa mushilo walengele bakasesema na balembele Baibolo babombe umulimo Lesa abapeele. Uwasambilila sana ifya mu Baibolo alandile no kuti abalembele Baibolo bali kwati mato ayakwete amatanga ayo bafungulwile, baliipekenye ukubomba umulimo uo umupashi wa mushilo walengele babombe. Yehova alicitile ifyo alingile ukucita. Alitumine “umwela,” nelyo umupashi wa mushilo. Abalembele Baibolo nabo balibombele umulimo babapeele. Balikonkele ifyo umupashi wa mushilo wabebele.

10-11. Fintu nshi fibili ifyo tulingile ukucita pa kuti umupashi wa mushilo uletutungulula? Langilileni.

¹⁰ Kwena pali ino nshita Yehova tapeela abantu umupashi wa mushilo pa kuti balembe amabuuku ya mu Baibolo. Lelo Yehova acili alabomfya umupashi wa mushilo pa kutungulula ababomfi bakwe. Yehova acili alacita ifyo alingile ukucita. Kuti twacita shani pa kuti umupashi wa mushilo uletutungulula? Tufwile ukucitapo fimo. Finshi tulingile ukucita?

¹¹ Tontonkanyeni pali ici ica kumwenako. Uuleensha ubwato nga alefwaya umwela umwafwe ukwensha ubwato, afwile ukucita ifintu fibili. Ica kubalilapo, afwile ukulosha ubwato uko umwela uleya. Na kuba ubwato te kuti bwende nga ca kuti buli pa cabu. Ica bubili, afwile ukwimya amatanga no kuyafungulula apo engapesha. Nangu kube umwela, ubwato kuti bwaenda fye nga ca kuti umwela uleingila mu matanga. Na ifwe bene tukatwalilila fye ukubombela Yehova nga ca kuti umupashi wa mushilo watwafwa. Pa kuti umupashi wa mushilo uletutungulula tufwile ukucita ifintu fibili. Ica kubalilapo, tufwile ukucita ifyo umupashi wa mushilo uwa kwa Lesa weba ababomfi bakwe ukucita. Ica bubili, tufwile ukulacita ifyo fintu no mweo wesu onse. (Amalu. 119:2) Nga tulecita ifi, umupashi wa mushilo ukalatupeela amaka ya kutwalilila  ukubombela Yehova ne cishinka mpaka tukengile mu calo cipya ica kwa Lesa.

12. Finshi twalalandapo nomba?

¹² Ukufika pano natulanda pa nshila shibili umo umupashi wa mushilo utwafwila. Umupashi wa mushilo ulatupeela amaka kabili ulatwafwa ukutwalilila aba cishinka na lintu tuli na amafya. Na kabili umupashi wa mushilo ulatutungulula, ulatwafwa ukubomba umulimo uo Yehova afwaya tulebomba, kabili ifi umupashi wa mushilo ucita fikalenga tukabe no bumi bwa muyayaya. Nomba twalalanda pa fintu fine ifyo tufwile ukucita pa kuti umupashi wa mushilo uletwafwa sana.

13. Ukulingana ne fyaba pali 2 Timote 3:16, 17, bushe amalembo kuti yalenga twaba shani, kabili finshi tulingile ukulacita?

¹³ Ica kubalilapo, tufwile ukulasambilila Icebo ca kwa Lesa. (Belengeni 2 Timote 3:16, 17.) Ishiwi lya ciGriki ilyo bapilibula ukuti “yafuma kuli Lesa” lipilibula ukuti “yaputwamo na Lesa.” Lesa abomfeshe umupashi wakwe pa kweba abalelemba Baibolo ifyo alefwaya balembe. Nga tulebelenga Baibolo no kutontonkanya pa fyo tulebelenga, tukalatontonkanya pa fyo Yehova afwaya tulecita kabili fikaba mu mitima yesu. Ifi fyebo fikalenga tukalecita ifyo Lesa afwaya kabili tukalalenga aleba ne nsansa. (Heb. 4:12) Lelo pa kuti umupashi wa mushilo uletwafwa sana, tulingile ukulatantika inshita ya kuisambilisha lyonse no kulatontonkanya sana pa fyo tulesambilila. Lyena fyonse ifyo tukalalanda ne fyo tukalacita fikalalingana ne fyo Icebo ca kwa Lesa cilanda.

14. (a) Cinshi twingalandila ukuti ponse apo tulonganina fwe Bena Kristu palaba umupashi wa mushilo? (b) Finshi tulingile ukulacita pa kuti umupashi wa mushilo uletwafwa sana ilyo tulelongana?

¹⁴ Ica bubili, tufwile ukulapepela Lesa pamo. (Amalu. 22:22) Nga tuli pa kulongana kwesu ukwa Bwina Kristu, ciba kwati tuli apo “umwela ulepuupa.” Ponse apo tulelonganina palaba umupashi wa kwa Yehova. (Ukus. 2:29) Mulandu nshi twalandila ifi? Pantu lyonse ilyo tulelongana na ba bwananyina tulalomba umupashi wa mushilo, tulemba inyimbo sha Bufumu ishashimpwa pa Cebo ca kwa Lesa, kabili tulakutika kuli bamunyinefwe abasontwa no mupashi wa mushilo ilyo baletusambilisha ifya mu Baibolo. Kabili umupashi wa mushilo ulafwa bankashi ukupekanya no kulanda amalyashi. Pa kuti umupashi wa mushilo uletwafwa sana, tulingile ukulaya natupekanya pa kuti tuleasukapo. Nga tulecita ifi, umupashi wa mushilo ukalatwafwa sana ilyo tulelongana nga filya fine umwela ulenga ubwato ubuli na matanga ayo bafungulwile buleenda.

15. Bushe umupashi wa mushilo utwafwa shani ilyo tulebila imbila nsuma?

¹⁵ Ica butatu, tufwile ukulabila imbila nsuma. Nga tulebomfya Baibolo ilyo tulebila imbila nsuma no kusambilisha abantu, ninshi tuleleka umupashi wa mushilo uletutungulula mu mulimo wesu. (Rom. 15:18, 19) Pa kuti umupashi wa mushilo uletwafwa sana, tulingile ukulabomba umulimo wa kubila imbila nsuma lyonse kabili tulingile ukulabomfya sana Baibolo. Cimo ico mwingacita pa kuti mulebila bwino imbila nsuma kulabomfya ifiba apatila ifyo mwingalanda mu Akatabo ka Mikalile no Mulimo Tubomba.

16. Ni nshila nshi iya mu kulungatika iyo twingakwatilamo umupashi wa mushilo?

¹⁶ Icalenga bune, tufwile ukulapepa kuli Yehova. (Mat. 7:7-11; Luka 11:13) Inshila ya mu kulungatika iyo twingakwatilamo umupashi wa mushilo, kulomba Yehova. Takuli icingacilikila amapepo yesu kuli Yehova nangu icingacilikila umupashi wa kwa Lesa uwaba bupe. Umupashi wa mushilo kuti watwafwa nangu tuli mu cifungo, kabili takuli nangu cimo ico Satana engacita icingalenga twafilwa ukupokelela umupashi wa mushilo. (Yako. 1:17) Nomba tufwile  ukulapepa shani pa kuti umupashi wa mushilo uletwafwa sana? Pa kwasuka ici cipusho, natulande pe pepo. Twalalanda pa cilangililo icalembwa fye mwi buuku lya kwa Luka ilya Mbila Nsuma. *

17. Finshi twingasambilila pe pepo ku cilangililo Yesu alandile icaba pali Luka 11:5-9, 13?

¹⁷ Belengeni Luka 11:5-9, 13. Yesu alitulangilile ifyo tufwile ukulomba umupashi wa mushilo. Umwaume uo Yesu alandilepo mu cilangililo balimupeele ifyo alefwaya ‘pa mulandu wa mupampamina.’ Taletiina ukulomba cibusa wakwe ifyo alefwaya nangu ca kuti bwali bushiku sana. * Finshi Yesu alandile ukuti e fyo twingasambilila pe pepo kuli cilya cilangililo? Atile: “Mulelomba, kabili bakamupeela; mulefwaya, kabili mukasanga; mulekonkonsha, kabili bakamwiswila.” Finshi tulesambililako? Pa kuti umupashi wa mushilo uletwafwa, tulingile ukulapepa ukwabula ukunenuka.

18. Ukulingana ne fyo Yesu alandile mu cilangililo, cinshi cingalenga twashininkisha ukuti Yehova akatupeela umupashi wakwe uwa mushilo?

¹⁸ Icilangililo Yesu alandile cilalenga twaishiba ne co Yehova akatupeelela umupashi wa mushilo. Umwaume uo Yesu alandilepo mu cilangililo alefwaya ukusakamana bwino umweni wakwe. Alishibe ukuti alingile ukupekanishisha umweni wakwe ifya kulya uwamutandalile ubushiku, lelo takwete nangu cimo. Yesu atile umunankwe alimupeele ifyo alefwaya pantu talekele ukumulomba. Finshi Yesu aletusambilisha? Alefwaya twishibe ukuti nga ca kuti umuntunse uushapwililika kuti apeela umunankwe ifyo alefwaya pa mulandu wa kuti talekele ukumulomba, ninshi Shifwe wa ku muulu uwa cikuuku akacilapo ukupeela abashinenuka ukumulomba umupashi wa mushilo! Kanshi kuti twashininkisha ukuti Yehova akatupeela umupashi wa mushilo nga twamulomba.—Amalu. 10:17; 66:19.

19. Mulandu nshi twingashininkishisha ukutila kuti twatwalilila ukushipikisha?

¹⁹ Te kuti tutwishike no kutwishika, tukatwalilila ukushipikisha nangu ca kuti Satana taleka ukutusansa. Cinshi cikalenga tukatwalilile ukushipikisha? Ni co umupashi wa mushilo ulatwafwa mu nshila shibili. Inshila ya kubalilapo, ulatupeela amaka pa kuti tuleshipikisha amafya. Inshila ya bubili, ulatupeela amaka ayalenga twatwalilila ukubombela Yehova mpaka tukengile mu calo cipya ica kwa Lesa. Kanshi natutwalilile ukulacita ifingalenga umupashi wa mushilo uletwafwa sana!