Mwe Bacaice, Finshi Mufwile Ukucita pa Kuti Mukabatishiwe?
“Ukucita ukufwaya kwenu, mwe Lesa wandi, e ko natemwa.”—AMALUMBO 40:8.
INYIMBO: 51, 58
1, 2. (a) Londololeni umulandu mushilingile ukusendela ulubatisho buyefya buyefya. (b) Finshi ifyo umuntu alingile ukwishiba bwino ilyo ashilabatishiwa, kabili mulandu nshi?
BUSHE uli mwaice uulefwaya ukubatishiwa? Ala ukubatishiwa kwalicindama nga nshi. Nga fintu twasambilile mu cipande cafumineko, ulubatisho te cintu ca kusenda buyefya buyefya. Nga wabatishiwa ninshi walanga apabuuta ukuti waliipeela kuli Yehova, e kutila, walimulaya ukuti wakulamubombela ubumi bobe bonse kabili wakulabika intanshi ukufwaya kwakwe. Apo ulubatisho te cintu ca kusenda buyefya buyefya, ufwile ukubatishiwa nga waba umukalamba mu fya kwa Lesa, nga wapingulapo we mwine ukubatishiwa, kabili nga walishiba ne fyo cipilibula ukuipeela kuli Lesa.
2 Nomba nalimo umona ukuti taulafikapo ukubatishiwa, nelyo umona ukuti naufikapo lelo abafyashi bobe bafwaya ukuti ukulileko kabili wishibilepo na fimbi. Ifi nga e fyo caba, finshi ulingile ukucita? Taufwile ukufuupulwa. Lelo ufwile ukubombesha pa kuti ukafikepo ukubatishiwa. Pa kuti ukafikepo ulingile ukutontonkanya: (1) pa fyo wasuminamo, (2) pa fyo ucita, na (3) nga ulatasha.
IFYO WASUMINAMO
3, 4. Finshi abacaice bengasambilila kuli Timote?
3 Bushe kuti wayasuka shani aya amepusho: Mulandu nshi nasuminina ukuti Lesa e ko aba? Mulandu nshi nashininkishisha ukuti Baibolo yafuma kuli Lesa? Mulandu nshi nkonkela amafunde ya kwa Lesa ukucila ukulacita ifyo aba mu calo bacita? Aya amepusho kuti yakwafwa ukumfwila ukufunda kwa mutumwa Paulo ukwa kuti: “Mushininkishe mwe bene ico Lesa afwaya, icisuma, icapokelelwa kabili icapwililika.” (Abena Roma 12:2) Mulandu nshi ulingile ukucitila ifyo Paulo alandile?
Timote alisumine icine pantu aletontonkanya sana pa fyo alesambilila kabili balimushinine ukuti fya cine
4 Ifyo Timote acitile kuti fyakwafwa. Banyina na banakulu balimusambilishe Amalembo, kanshi aliyeshibe bwino. Na lyo line, Paulo amwebele ati: “Ikalilila mu fyo wasambilile kabili ifyo bakushinine ukuti fya cine.” (2 Timote 3:14, 15) Ishiwi lya kuti ‘ukushinina’ lipilibula “ukushininkisha no kukanatwishika icintu.” Timote alingile ukushininkisha ukuti icine caba mu Malembo. Kanshi icalengele ukuti asumine, te pa mulandu wa kuti e fyo banyina na banakulu basuminemo, lelo ni co aletontonkanya sana pa fyo alesambilila kabili balimushinine ukuti fya cine.—Belengeni Abena Roma 12:1.
5, 6. Mulandu nshi cacindamina ku bacaice ukwishiba ifya kubomfya ‘amaka ya kupelulula’?
5 Inga iwe, bushe walishininkisha ukuti ifyo wasuminamo e cine? Nalimo kale waishiba ukuti ifyo wasambilila e cine. Nga kale waishiba, uletontonkanya pa fyalenga usumine ukuti ifyo wasambilila e cine. Ukucita ifi kukakosha icitetekelo cobe, ku kakwafwa ukukanacita ifyabipa pa mulandu wa kuti e fyo abanobe bacita, nelyo pa mulandu wa kuti e fyo aba mu calo bacita, kabili ku kakwafwa no kukanalakonkelela ifyo umutima obe ufwaya.
6 Nga waishiba ifya kubomfya ‘amaka yobe aya kupelulula’ ilyo ucili umwaice, tacakalekukosela ukwasuka amepusho ayo abanobe bengakwipusha pamo nga: ‘Waishiba shani ukuti Lesa e ko aba? Nga ca kuti Lesa alitutemwa, cinshi ico alekela ifyabipa ukulacitika? Waishiba shani ukuti ukutula fye na kale Lesa e ko aba?’ Nga uleipekanya bwino, aya mepusho tayakalenge ukaletwishika ifyo wasuminamo, lelo yakakwafwa ukuisambilisha sana Baibolo.
7-9. Bushe icipande citila, “Cinshi Baibolo Isambilisha?” icaba pa jw.org/bem kuti cayafwa shani mwe bacaice ukushininkisha ukuti ifyo mwasambilila e cine?
7 Nga uleisambilisha sana Baibolo ukalayasuka amepusho ayo bengakwipusha, tawakaletwishika ifyo wasuminamo, ukashininkisha ukuti e cine. (Imilimo 17:11) Twalikwata impapulo ishingi ishingakwafwa ukucita ifi twalandapo. Abengi babomfya impapulo ishilanda pali Lesa e lyo na pa fyo abumba. Na kabili abacaice abengi balatemwa ukusambilila icipande citila “Cinshi Baibolo Isambilisha?” ica pa jw.org/bem. Ici cipande kuti mwacisanga nga mwatinika apo balemba ati AMASAMBILISHO YA MU BAIBOLO. Mu cipande citila “Cinshi Baibolo Isambilisha?” mwaliba utumitwe utwalekalekana utulanda pa fyo Baibolo isambilisha ifingalenga washininkisha ukuti ifyo wasumina e cine.
8 Apo ulasambilila Baibolo, nalimo walishiba kale amasuko ku mepusho ayaba muli ici cipande caba pa jw.org/bem. Nomba bushe walishininkisha ukuti amasuko waishiba ya cine? Ifyaba muli ici cipande fikakwafwa ukutontonkanya sana pa malembo ayalekanalekana, kabili paliba na pa kulemba ifyalenga ushininkishe ukuti ifyo wasuminamo e cine. Ukucita ifi ku kalenga waishiba ifya kulondolwela abantu ifyo wasuminamo. Nga mwalikwata intaneti, ulebelenga ifyaba mu cipande citila “Cinshi Baibolo Isambilisha?” ilyo uleisambilisha Baibolo pa kuti wingashininkisha ukuti ifyo wasuminamo e cine.
9 Ufwile ukushininkisha we mwine ukuti ifyo waishiba e cine. Ukucita ifi kukalenga ukaipekanye ukubatishiwa. Nkashi umusepela alandile ati: “Ilyo nshilabatishiwa, naleisambilisha Baibolo kabili nalishininkishe ukuti uku e kupepa kwa cine. Takwaba ubushiku nangu bumo ubo ntwishika ifyo nasuminamo.”
IFYO UCITA
10. Cinshi ico Umwina Kristu uwabatishiwa alingile ukulacitila ifilanga ukuti alikwata icitetekelo?
10 Baibolo itila: “Icitetekelo nga tacakwata imilimo, ninshi califwa.” (Yakobo 2:17) Ifyo ucita fifwile fyalanga ukuti waliba ne citetekelo icakosa. Nga waba ne citetekelo icakosa, Baibolo yalanda ukuti ukaba ne “mibele ya mushilo ne milimo ya bukapepa.”—Belengeni 2 Petro 3:11.
11. Londololeni umo amashiwi ya kuti “imibele ya mushilo” yalola.
11 Bushe “imibele ya mushilo” mibele nshi? Nga ca kuti ifyo ucita fya mushilo ninshi waliba ne mibele iisuma. Ku ca kumwenako, tontonkanya pa myeshi 6 iyapita. Ilyo watunkilwe ukucita icabipa, bushe calikwangukile ukulekanya icalungama ku calubana? (AbaHebere 5:14) Bushe ulebukisha ilyo wacimfishe itunko lya kucita icabipa nelyo ilyo wakeene ukukonkelela ifibusa? Bushe pa sukulu bakwishiba ukuti waliba ne mibele iisuma? Bushe ulatwalilila uwa cishinka kuli Yehova nelyo ulakonkelela abanobe pa kuti belakuseka? (1 Petro 4:3, 4) Kwena bonse tatwapwililika, inshita shimo nangu fye bantu ababombela Yehova pa myaka iingi limo balomfwa insoni kabili cilabakosela ukushimikila abantu. Lelo uwaipeela kuli Lesa alomfwa icilumba ukuba Inte ya kwa Yehova, kabili imibele yakwe iisuma e ilanga ukuti alomfwa icilumba.
12. Finshi fyaba mu “milimo ya bukapepa,” kabili mufwile ukulaimona shani?
12 Finshi fyaba mu “milimo ya bukapepa”? Mu milimo ya bukapepa mwaba imilimo pamo nga, ukulongana no kushimikila. Lelo mwaliba na fimbi ifyo abantu bashingamona pamo nga, ukupepa kuli Yehova e lyo no kuisambilisha Baibolo. Umuntu uwaipeela kuli Yehova tatontonkanya ukuti ukucita ifi twalandapo kwalyafya. Omfwa nga filya Imfumu Davidi yaumfwile ilyo yatile: “Ukucita ukufwaya kwenu, mwe Lesa wandi, e ko natemwa, na mafunde yenu yaba mu mutima wandi.”—Amalumbo 40:8.
Bushe nga ulepepa ulalungatika pa kulanda, kabili ifyo ulanda nga ulepepa bushe filanga ukuti walitemwa Yehova?
13, 14. Cinshi cingafwa mwe bacaice ukuba ne “milimo ya bukapepa,” kabili abacaice banenu bamo banonkelamo shani?
13 Nga ulefwaya ukupangila libela ifya kucita, asuka amepusho ayaba pe bula 308 na 309 mu citabo citila, Ifipusho Abacaice Bepusha, ne Fyasuko Ifingabafwa, Ibuuku 2. Pali aya mabula paba amepusho pamo nga: “Bushe nga ulepepa ulalungatika pa kulanda, kabili ifyo ulanda nga ulepepa bushe filanga ukuti walitemwa Yehova?” “Bushe finshi fimbi ifyo ubelenga pe sambililo lya pa lobe?” “Bushe ulaya mu kushimikila nangu abafyashi bobe tabeleko?” Pali aya mabula paliba na po wingalemba ifyo ulepanga ukucita pa kuwamyako amapepo yobe, ifyo uisambilisha we mwine, ne fyo ushimikila abantu imbila nsuma.
14 Abacaice abengi abatontonkanya pa kubatishiwa balimona ukuti ifyaba pali aya mabula fisuma icine cine. Nkashi wacaice Tilda atile: “Nalibomfeshe ifyebo fyaba muli ici citabo ku kupangila libela ifya kucita. Nalicitile fyonse ifyo napangiile libela, kabili pa numa ya mwaka umo nalibatishiwe.” Ifi fine e fyo na Patrick acitile, atile, “Nalipangiile kabela ifyo nalefwaya ukucita, lelo ukulemba ifyo napangile ukucita kwalengele nabombesha ukufikilisha ifyo napangile.”
Bushe kuti watwalilila ukubombela Yehova nangu ca kuti abafyashi bobe baleka ukumubombela? (Moneni paragrafu 15)
15. Londololeni ico umuntu alingile ukuipingwila umwine ukuipeela.
15 Icipusho na cimbi icaba pe bula 309 ca kuti: “Bushe kuti watwalilila ukubombela Yehova nangu ca kuti abafyashi bobe ne fibusa fyobe baleka ukumubombela?” Nga waipeela kuli Yehova no kubatishiwa wabatishiwa ukaba cibusa wakwe. Kanshi abafyashi bobe nelyo umuntu fye umbi te balingile ukulenga walabombela Yehova. Imibele yobe iya mushilo e lyo ne milimo ya bukapepa ifwile ukulanga ukuti walishininkisha ukutila ifyo wasambilila e cine, kabili ufwaya ukulakonka amafunde ya kwa Lesa. Nga ulecita ifi tapakakokole ukafikapo ukubatishiwa.
ULETASHA
16, 17. (a) Cinshi cifwile ukucincisha umuntu ukuba Umwina Kristu? (b) Langilileni ifyo twingalanga ukuti tulatasha pa cilubula.
16 Bushiku bumo, umuntu umo uwaishibishe Amafunde ya kwa Mose aipwishe Yesu ati: “Lifunde nshi ilikalamba mu Mafunde yonse?” Yesu amwaswike ati: “Uletemwa Yehova Lesa obe no mutima obe onse, no mweo obe onse, no kutontonkanya kobe konse.” (Mateo 22:35-37) Yesu alandile ukuti ukutemwa Yehova e kufwile ukulenga umuntu abatishiwa no kuba Umwina Kristu. Inshila imo iingalenga watemwa sana Yehova kulatontonkanya sana pa cilubula, ubupe ubukalamba ubo Lesa atupeela. (Belengeni 2 Abena Korinti 5:14, 15; 1 Yohane 4:9, 19.) Nga ulecita ifi, ukalatasha Lesa pa bupe ubushaiwamina ubo atupeela.
17 Natulangilile ifyo icilubula cacindama: Elenganya ukuti ulenwena e lyo umuntu aisakupususha. Bushe kuti waikumuna fye amenshi waya na ku ng’anda, walaba na ku ukupuswishe? Awe iyo! Kuti wamutasha kabili lyonse fye kuti ulemutasha pa fyo akupuswishe! Na ifwe bene tulingile ukulatasha Yehova na Yesu pa kutupeela icilubula. E balenga ukuti tukabe no bumi! Balitulubula ku lubembu ne mfwa. Apo balitutemwa, twalikwata isubilo lya kwikala umuyayaya muli Paradaise pano isonde!
18, 19. (a) Mulandu nshi uo mushilingile ukutiinina ukuipeela kuli Yehova? (b) Bushe ukubombela Yehova kuti kwalenga shani mwaba no bumi ubusuma?
18 Bushe ulatasha pa fyo Yehova akucitila? Nga ulatasha, ninshi ufwile ukuipeela no kubatishiwa. Nga waipeela kuli Lesa ninshi wamulaya ukuti wakulacita ukufwaya kwakwe ubumi bobe bonse. Bushe ulingile ukutiina ukulaya Yehova ukuti ukalamubombela? Awe! Yehova afwaya ukuti ifintu filekuwamina, kabili akalambula bonse abacita ukufwaya kwakwe. (AbaHebere 11:6) Wilamona kwati nga waipeela kuli Lesa no kubatishiwa wabatishiwa ninshi ukaipusula ku fintu fingi. Nga waipeela, e lyo ifintu fikawama sana. Munyinefwe uuli ne myaka 24, uwabatishiwe ilyo ashilafisha imyaka 13, atile, “Nga nshabatishiwe bwangu nga nalishibilepo na fimbi pali Lesa, na lyo line ukuipeela kuli Yehova kwalilenga nilafwaisha ifya mu calo.”
Satana ni kaitemwe kabili tamubikako amano
19 Yehova afwaya ukuti ifintu filemuwamina. Lelo Satana ena ni kaitemwe kabili tamubikako amano, nga mwamukonkelela takamupeele nangu cimo icisuma. Pantu na kuba kuti amupeela shani ifisuma ifyo ashakwata? Te kuti amwebe imbila nsuma, kabili takwata isubilo, kuti alenga fye mwafwa pantu na o ali no kufwa!—Ukusokolola 20:10.
20. Finshi uwacaice alingile ukucita pa kuti afikepo ukuipeela kuli Yehova no kubatishiwa? (Moneni akabokoshi akaleti “Ifingakwafwa Ukulunduluka.”)
20 Ukuipeela kuli Yehova e cintu icacindamisha ico wingacita. Bushe nauipekanya ukuipeela kuli Yehova? Nga nauipekanya, wilatiina ukuipeela. Lelo nga ulemona ukuti taulaipekanya, ulekonka ifyo twasambilila muli cino cipande pa kuti ukafikepo ukubatishiwa. Paulo aebele aba bwananyina aba ku Filipi ukutwalilila ukulunduluka. (Abena Filipi 3:16) Nga wakonka ukufunda kwa kwa Paulo, tapakakokole ukaipeela kuli Yehova no kubatishiwa.
