1. Busuma nshi bwaba mu kulanshanya pa fyo twasambilile “icine”?

 “BUSHE mwasambilile shani icine?” Ukwabula no kutwishika aba bwananyina balimwipushapo ici cipusho imiku iingi. Ilingi line, tulepusha uwa bwananyina ici cipusho nga e lyo tuleishibana. Tulatemwa ukwishiba ifyo aba bwananyina basambilile icine kabili tulabebako no mulandu twatemenwa ukuba Inte ya kwa Yehova. (Rom. 1:11) Nga tulelanshanya na ba bwananyina, tulebukisha ico twatemenwa ukuba Inte ya kwa Yehova. Na kabili tulafwaisha ukutwalilila ‘ukulaenda mu cine,’ e kutila ukulacita ifingalenga Yehova atupaala kabili alasekelela.—3 Yoh. 4.

2. Finshi twalasambilila muli cino cipande?

² Muli cino cipande, twalasambilila pa milandu imo iyalenga ukuti tutemwe icine. Twalasambilila ne fyo twingacita pa kuti tutwalilile ukutemwa icine. Ukwabula no kutwishika, ifyo twalasambilila fyalalenga tuletasha sana Yehova pa fyo atusambilisha icine. (Yoh. 6:44) Na kabili, fyalalenga tulefwaisha ukulaebako abantu icine icaba mu Baibolo.

3. Mulandu nshi uwacindama uwalenga tutemwe icine?

³ Kwaliba ifingi ifyalenga ukuti tutemwe icine. Nomba umulandu uukalamba uwalenga tutemwe icine wa kuti, twalitemwa Yehova Lesa, Intulo ya cine. Mu Cebo cakwe twalisambilila ukuti e wabumbile umuulu ne sonde, ni Shifwe  uwatutemwa sana kabili uutusakamana. (1 Pet. 5:7) Twalishiba ukuti Lesa wesu ‘wa luse kabili wa mutembo, alakokola ukukalipa kabili alifulisha icikuuku ne cine.’ (Ukufu. 34:6) Yehova alitemwa umulinganya. (Esa. 61:8) Alomfwa ububi nga tulecula, kabili alafwaisha ukufumyapo ifyabipa fyonse pa nshita iyo umwine asala. (Yer. 29:11) Na ifwe tulafwaisha ukuti akafumyepo ifyabipa. E mulandu wine twatemenwa Yehova icine cine!

4-5. Mulandu nshi umutumwa Paulo alinganishishe isubilo ku nanga?

⁴ Mulandu nshi na umbi uwalenga tutemwe icine? Mwaliba ubusuma ubwingi mu kwishiba icine. Natulandeko pali fimo. Mu cine icaba mu Baibolo, mwaba ne fintu ifisuma ifingi ifili no kucitika ku ntanshi. Pa kulanga ifyo isubilo lyacindama, umutumwa Paulo alembele ukuti: “Ili isubilo tukwete lyaba nge nanga ya mweo, ilyashininkishiwa kabili ilyakosa.” (Heb. 6:19) Nga filya fine inanga ilenga ubwato ukukanasensenunwa, isubilo nalyo lilalenga twatekanya ilyo tuli na mafya.

⁵ Ilyo Paulo alandile aya mashiwi, alelanda pe subilo lya kuya ku muulu ilyo Abena Kristu basubwa bakwata. Lelo aya mashiwi yalabomba na ku Bena Kristu abakwata isubilo lya kwikala muli paradaise pano isonde. (Yoh. 3:16) Twaliba ne nsansa pantu twalikwata isubilo lya kuti tukekala umuyayaya.

6-7. Finshi ba Yvonne banonkelamo ifi baishiba ifikacitika ku ntanshi?

⁶ Natulande pa fyacitikile ba Yvonne. Abafyashi babo tabali ni ba Nte, kabili ilyo bali abaice baletiina sana ukufwa. Ba Yvonne baleibukisha ifyo babelengele ilyo bali abaice ifyo bashalabile. Amashiwi babelengele yaleti: “Kasuba kamo icalo cikapwa.” Batile: “Aya mashiwi yalelenga ndefilwa ukulaala utulo, naletontonkanya sana pa fyo ifintu fyali no kuba ku ntanshi. Naletontonkanya ukuti: ‘Mulandu nshi twikalila inshita iinono, kabili mulandu nshi tufwila?’ Nshaishibe ico twabela pano calo kabili nshalefwaya ukufwa.”

⁷ Ilyo papitileko imyaka, ba Yvonne balitendeke ukulanshanya ne Nte sha kwa Yehova. Batile: “Nalitendeke ukuba ne subilo lya kuti ku ntanshi kuti naikala muli paradaise pe sonde.” Finshi ba Yvonne banonkelamo ifi basambilila icine? Balandile ukuti: “Nalileka ukufufya utulo pa mulandu wa kutiina imfwa nelyo ifyo ifintu fikaba ku ntanshi.” Ukwabula no kutwishika, ba Yvonne balitemwa sana icine, kabili balitemwa no kwebako abantu pe subilo bakwata ilya kuti ku ntanshi ifintu fikawama.—1 Tim. 4:16.

8-9. (a) Mu mulumbe Yesu alandile, bushe atile cinshi umuntu umo acitile ilyo asangile icuma? (b) Inga imwe mumona shani icine?

⁸ Mu cine icaba mu Baibolo mwaba ne mbila nsuma pa Bufumu bwa kwa Lesa. Yesu alingenye icine pa Bufumu bwa kwa Lesa ku cuma ico bafishile. Pali Mateo 13:44, Yesu atile: “Ubufumu bwa kwa Lesa bwaba kwati cuma ico bafishile mu mpanga, ico umuntu asangile e lyo acifisa; kabili pa mulandu wa kuti ali ne nsansa aileshitisha fyonse ifyo akwete no kushitamo ilya mpanga.” Uyu mwaume taile alefwaya icuma. Lelo ilyo acisangile, aileshitisha fyonse ifyo akwete pa kuti ashitemo impanga umwali icuma ico asangile. Mulandu nshi acitile fyonse ifi? Pantu alishibe ukuti icuma ico asangile calicindeme, kabili calicilile na pali fyonse ifyo ashitishe.

 ⁹ Bushe na imwe mumona ukuti icine calicindama? Ukwabula no kutwishika e fyo mumona. Twalishiba ukuti muli cino calo tamwaba icingalenga twaba ne nsansa isho tukwata ilyo tulebombela Yehova, e lyo ne subilo twakwata ilya kwikala umuyayaya mu Bufumu bwa kwa Lesa. Bucibusa twakwata na Yehova bwalicindama sana ukucila pali fyonse ifyo twasha. Icilenga tuleba sana ne nsansa, “kumusekesha.”—Kol. 1:10.

10-11. Cinshi calengele ba Michael baaluke?

¹⁰ Fwe bengi twalisha ifintu ifingi pa kuti tulenge Yehova alesekelela. Bamo balileka incito balebomba iyali no kulenga balumbuke. E lyo bambi nabo balileka ukufwaisha ukunonka icuma. Bamo nabo balyalwike ilyo basambilile pali Yehova. Ifi fine e fyo ba Michael bacitile. Abafyashi babo tabali ni ba Nte. Ilyo bali abaice, balisambilile ifya kulwa karate. Batile: “Nalitemenwe ukuya mu kutukusha umubili. Inshita shimo naleumfwa kwati tapali uwinganguma.” Nomba ilyo ba Michael batendeke ukusambilila Baibolo, balisambilile ukuti Yehova alipata ulubuli. (Amalu. 11:5) Ilyo ba Michael balelanda pa baupana abalebasambilisha Baibolo, batile: “Tabanjebelepo ukuti ndeke ukulwa karate, lelo batwalilile fye ukunsambilisha icine ca mu Baibolo.”

¹¹ Ilyo ba Michael balesambilila pali Yehova, balitwalilile ukumutemwa. Balitemenwe sana ifyo Yehova alangulukilako bakapepa bakwe. Mu kupita kwa nshita, ba Michael baishileishiba ukuti balingile ukwaluka. Batile: “Kwena cali no kunkosela ukuleka karate. Lelo nalishibe ukuti nga naleka, nali no kulenga Yehova alasekelela. Kabili ukubombela Yehova kwalicindeme sana ukucila ifyo natemenwe karate.” Ba Michael balishibe ukuti icine ico basambilile calicindeme sana, e calengele ukuti baaluke.—Yako. 1:25.

12-13. Bushe ba Mayli banonkelemo shani mu cine ico basambilile mu Baibolo?

¹² Icine calicindama, e mulandu wine Baibolo icipashanishisha ku nyali iisanike umwafiita. (Amalu. 119:105; Efes. 5:8) Ba Mayli abekala ku Azerbaijan balatasha sana pa fyo basambilila mu Cebo ca kwa Lesa. Ulupwa bakuliilemo, abafyashi babo tabalepepa kumo kwine. Bawishi bali baShilamu, lelo banyina bali baYuda. Ba Mayli batile: “Nangu ca kuti nshaletwishika ukuti Lesa eko aba, kwali fimo ifyo naletontonkanyapo sana. Naletontonkanya ukuti, ‘Mulandu nshi Lesa abumbile abantu, kabili mulandu nshi umuntu engalaculila ubumi bwakwe bonse e lyo alundapo no kucululuka mu mulilo wa pe?’ Apo abantu batila fyonse ificitika kufwaya kwa kwa Lesa, naletontonkanya ukuti, ‘Ninshi Lesa alomfwa bwino nga amona abantu balecula?’”

¹³ Ba Mayli balitwalilile ukufwaya ukwishiba ifyasuko ku fipusho bakwete. Umuye nshiku, balitendeke ukusambilila Baibolo kabili balishileba Inte ya kwa Yehova. Batile: “Ifyo Baibolo ya-aswike ifipusho nakwete, fyalilengele nashininkisha ukuti ninsanga icine kabili fyalilenga naba ne nsansa. Na kabili fyalilenga naleka ukulasakamana. Nga filya fine ba Mayli bacitile, bonse tulalumbanya Yehova, ‘uwatwitile ukuti tufume mu mfifi, twingile mu lubuuto lwakwe ulwapesha amano.’—1 Pet. 2:9.

14. Cinshi twingacita pa kuti tutemwe sana icine? (Moneni akabokoshi akaleti “ Ifintu na Fimbi Ifyo Bapashanya ku Cine.”)

¹⁴ Twalanda fye pa fya kumwenako ifinono ifilanga ifyo icine cacindama. Ukwabula  no kutwishika, na imwe kuti mwatontonkanyako pali fimbi ifilanga ukuti icine calicindama. Kuti mwafwailapo ifyebo na fimbi ifyalenga tutemwe icine. Nga twatemwa icine, tukalafwaya inshila isha kulangilamo ifyo twacitemwa.

15. Cinshi cimo ico twingacita pa kulanga ukuti twalitemwa icine?

¹⁵ Tulanga ukuti twalitemwa icine nga tulesambilila Baibolo lyonse ne mpapulo ishilanda pali Baibolo. Nangu ca kuti kale twasambilile icine, tatufwile ukuleka ukusambilila. Ulupungu lwa kwa Kalinda ulwabalilepo ukufuma lwatile: “Icine caba kwati kaliluba akaba mu mpanga, akamena pa kati ka fyani ifingi. Pa kukasanga mufwile ukubombesha. Kabili nga mwakasanga, mufwile ukukasenda. Nga mwamona akaliluba kamo, tamufwile ukupeleela fye pali ako kene, mufwile ukufwailapo na tumbi.” Ifi fine e fyo caba na pa kuisambilisha Baibolo, tufwile ukubombesha, nomba nga tuleisambilisha, tulanonkelamo.

16. Bushe ni nshila nshi mubomfya pa kuisambilisha Baibolo? (Amapinda 2:4-6)

¹⁶ Bamo tatwatemwa ukubelenga no  kuisambilisha. Lelo Yehova atweba ukuti ‘tulefwayafwaya’ icine, pa kuti tucishibe bwino. (Belengeni Amapinda 2:4-6.) Nga tuleibikilishako ukufwayafwaya icine, tulanonkelamo. Ba Corey batile nga balebelenga Baibolo balabika sana amano ku cikomo cimo na cimo. Batile: “Ndabelenga amafutunoti yonse, Amalembo yonse ayo balosesheko, e lyo kabili ndafwailapo ifyebo na fimbi. . . . Nga ndecita ifi pa kubelenga, ndasambilila ifingi.” Nampo nga tuisambilisha nga ifi ba Corey baisambilisha, nelyo twalikwata inshila imbi iyo tuisambilishishamo, icacindama ca kuti tulingile ukusangako inshita iya kuisambilisha Baibolo. Pantu nga tulecita ifi ninshi tulelanga ukuti tulatasha pa cine.—Amalu. 1:1-3.

17. Cinshi tufwile ukucita nga twasambilila fimo mu Cebo ca kwa Lesa? (Yakobo 1:25)

¹⁷ Kwena twalishiba ukuti tatulingile ukupelela fye pa kusambilila icine, lelo tulingile ukulacita ne fyo tulesambilila. Nga tulecita ifi e lyo twingalaba ne nsansa. (Belengeni Yakobo 1:25.) Kuti twaishiba shani nga tulacita ifyo tulesambilila? Munyinefwe umo alandile ukuti tulekabila ukuiceeceeta no kumona umo tulecita bwino, e lyo no mo tatulecita bwino, pa kuti tuwamyeko. Umutumwa Paulo atile: “Ukulingana ne fyo twalunduluka, natutwalilile ukulaenda bwino muli uyu wine musango.”—Fil. 3:16.

18. Mulandu nshi tubombela na maka yesu yonse ukulaenda mu cine?

¹⁸ Tontonkanyeni pa busuma tusangamo nga tule-enda mu cine! Ifintu filatuwamina, kabili tulalenga Yehova e lyo na ba bwananyina ukulasekelela. (Amapi. 27:11; 3 Yoh. 4) Ukwabula no kutwishika, takuli nangu cimo icacila pali ifi tusambilile ifyalenga tutemwe icine e lyo no kulacita ifyo tulesambilila.