ICIPANDE CA KUSAMBILILAMO 28
Ubufumu bwa kwa Lesa Buleteka!
“Ubufumu bwa calo nomba bwaba bufumu bwa kwa Shikulwifwe no bwa kwa Kristu wakwe.”—UKUS. 11:15.
ULWIMBO 22 Ubufumu Buleteka—Nabwise!
IFYO TWALASAMBILILA *
1. Finshi twacetekela ukuti fikacitika, kabili mulandu nshi?
NGA MWAMONA amafya ayali mwi sonde, bushe cilamukosela ukushininkisha ukuti ifintu fikawama ku ntanshi? Aba mu ndupwa tabatemwana nge fyo batemwanene kale. Abantu mwi sonde balebelako fye abankalwe kabili ni bakaitemwe. Abengi cilabakosela ukucetekela abantu abakwata amaka ya kutungulula. Nomba ifi fine ifyabipa ificitika kuti fyalenga mwacetekela ukuti ku ntanshi ifintu fili no kuba bwino. Mulandu nshi twalandila ifi? Pantu abantu balecita filya fine fye Baibolo yasobele ukuti e fikalacitika mu nshiku sha kulekelesha. (2 Tim. 3:1-5) Takuli umuntu nangu umo uwingakaana ukuti ubu ubusesemo bulefikilishiwa, kabili ifi bulefikilishiwa cilelangilila ukuti Kristu Yesu alitendeka ukuteka kabili ni Mfumu ya Bufumu bwa kwa Lesa. Nomba ubu busesemo bumo fye pa masesemo ayengi ayalanda pa Bufumu. Icitetekelo calakoselako nga twasambilila pa masesemo na yambi ayafikilishiwa.
Amasesemo ayaba mwi buuku lya kwa Daniele e lyo na mwi buuku lya Ukusokolola, yalalenga twaishiba bwino inshita tufikilepo e lyo ne isheleko (Moneni paragrafu 2)
2. Finshi twalasambilila muli cino cipande, kabili mulandu nshi? (Landeni na pa cikope cili pa nkupo.)
2 Muli cino cipande twalasambilila (1) pa busesemo ubwalenga twishibe ilyo Ubufumu bwatendeke ukuteka, (2) amasesemo ayalenga twishibe ukuti Yesu alitendeka ukuteka kabili ni Mfumu ya Bufumu bwa kwa Lesa ku muulu, na (3) amasesemo ayalangilila ifyo abalwani ba Bufumu bwa kwa Lesa bali no kubonaula. Ukusambilila pali aya amasesemo yonse kwalalenga twishibe apo tufikile e lyo ne nshita isheleko.
IFYO TWINGESHIBA ILYO UBUFUMU BWATENDEKE UKUTEKA
3. Bushe ubusesemo bwaba pali Daniele 7:13, 14 bulenga twacetekela cinshi pa Mfumu ya Bufumu bwa kwa Lesa?
3 Pali Daniele 7:13, 14, paba ubusesemo bwa kuti Kristu Yesu akaba ni kateka musuma uwa Bufumu bwa kwa Lesa. Abantu ukufuma mu nko ‘bakamubombela’ kabili tapakabe nangu umo ukamupyana pa Bufumu. Ubusesemo bumbi ubwaba mwi buuku lya kwa Daniele bwatile Yesu ali no kutendeka ukuteka muli ubu Ubufumu pa mpela ya nshita iyo beta ukuti inshita 7. Bushe kuti twaishiba ilyo Yesu atendeke ukuteka?
4. Londololeni ifyo amashiwi ayaba pali Daniele 4:10-17 yatwafwa ukwishiba umwaka ilyo Kristu ali no kutendeka ukuteka. (Moneni na futunoti.)
4 Belengeni Daniele 4:10-17. “Inshita 7” imininako imyaka 2,520. Iyi nshita yatendeke mu 607 ninshi Yesu talaisa pano isonde, ilyo abena Babiloni bafumishe imfumu ya kulekeleshako pa Bufumu iyo Lesa abikilepo mu Yerusalemu. Kabili yapwile mu 1914 ilyo Yehova abikile Yesu “uwakwata insambu” isha kuteka pa Bufumu. *—Esek. 21:25-27.
5. Kuti twanonkelamo shani mu busesemo ubulanda pa “nshita 7”?
5 Bushe kuti twanonkelamo shani nga twaishiba ubu ubusesemo? Nga twaumfwikisha ubusesemo ubulanda pa “nshita 7” cilenga twacetekela ukuti Yehova alafikilisha fyonse ifyo alaya pa nshita yalinga. Nga filya fine Yehova apimine inshita ilyo Ubufumu bwalingile ukutendeka ukuteka, akafikilisha amasesemo yonse ayo atulaya pa nshita yakwe umwine. Ca cine ubushiku bwa kwa Yehova ‘tabwakacelwe!’—Haba. 2:3.
IFYO TWAISHIBA UKUTI KRISTU ALITENDEKA UKUTEKA MU BUFUMU BWA KWA LESA
6. (a) Finshi twamona ifilangilila ukuti Kristu alitendeka ukuteka mu muulu? (b) Bushe ifilangilila ukuti Yesu alitendeka ukuteka fifikilisha shani ubusesemo ubwaba pa Ukusokolola 6:2-8?
6 Ilyo Yesu alepwisha umulimo wakwe pano isonde alisobele pa fintu ifyali no kulenga abasambi bakwe baishiba ukuti alitendeka ukuteka mu muulu. Fimo ifyo alandilepo ukuti e fyali no kulacitika ni nkondo, ifipowe, e lyo ne finkukuma. Alandile no kuti kukaba ne fikuko nelyo amalwele “mu ncende shimo shimo,” kabili pa fikuko ifyabako muli shino nshiku sha kulekelesha paba ne cikuko ca COVID-19. Ifi fyonse fyaba pa “cishibilo” ca kubapo kwa kwa Kristu. (Mat. 24:3, 7; Luka 21:7, 10, 11) Ilyo papitile imyaka ukucila pali 60 ukutula apo Yesu abwelelemo ku muulu, aebele umutumwa Yohane ukuti ifi fintu fyali no kucitika. (Belengeni Ukusokolola 6:2-8.) Ifi fyonse ifyo asobele filacitika ukutula apo Yesu atendekele ukuteka mu 1914.
7. Cinshi ifyabipa ifingi ficitikila ukutula apo Yesu atendekele ukuteka?
7 Mulandu nshi ifintu fyaishilebipilako ilyo Yesu atendeke ukuteka? Kuti twasanga icasuko pa Ukusokolola 6:2. Ilyo Yesu atendeke ukuteka mu Bufumu bwa kwa Lesa, abalilepo ukulwa inkondo. Bushe alwile na bani? Alwile na Satana ne fibanda fyakwe. Ukulingana na Ukusokolola icipandwa 12, Satana tacimfishe ubu bulwi kabili ena ne fibanda fyakwe babapoosele pano isonde. Ici calilengele Satana afulwe sana ica kuti alitendeke ukusansa abantu, e calenga ifintu ukubipa mwi sonde.—Ukus. 12:7-12.
Tatusekelela nga twamona ifyabipa filecitika nomba nga twamona ifyo amasesemo yalefikilishiwa muno nshiku, tulashininkisha ukuti Ubufumu bwa kwa Lesa buleteka (Moneni paragrafu 8)
8. Bushe ukumona uko amasesemo ayalanda pa Bufumu yalefikilishiwa kutwafwa shani?
8 Bushe kuti twanonkelamo shani nga twaishiba aya amasesemo? Nga twamona ifyo ifintu fili e lyo ne fyo imibele ya bantu yalwike, kuti twaishiba ukuti Yesu alitendeka ukuteka. Kanshi mu nshita ya kufulwa nga twamona ifyo abantu baba bakaitemwe kabili abankalwe, tuleshiba ukuti balefikilisha fye amasesemo ayaba mu Baibolo. Ubufumu bwa kwa Lesa buleteka! (Amalu. 37:1) Kabili tufwile ukwenekela ifyabipa ukulafulilako fye ilyo Armagedone ilepalama. (Marko 13:8; 2 Tim. 3:13) Ala tulatasha sana ifi Shifwe wa ku muulu uwatutemwa alenga twaishiba umulandu amafya yafulila ifi mwi sonde.
IFYO ABALWANI BA BUFUMU BWA KWA LESA BAKABONAULA
9. Bushe ubusesemo bwalembwa pali Daniele 2:28, 31-35, bulondolola shani ubuteko bwa maka ubwa kulekeleshako, kabili ni lilali bwatendeke ukuteka?
9 Belengeni Daniele 2:28, 31-35. Tulamona uko ubu busesemo bulefikilishiwa muno nshiku. Iciloto ico Nebukadnesari alotele calelanda pa fikacitika “mu nshiku sha kulekelesha,” Kristu nga atendeka ukuteka. Pa balwani ba kwa Yesu paba no buteko bwakwatisha amaka ubo “amakasa ya cela ne bumba” yemininako. Ubu ubuteko bwalitendeka ukuteka. Bwatendeke ukuteka ilyo kwali Inkondo ya Calo iya Kubalilapo lintu ubuteko bwa Britain na America bwatendeke ukubombela pamo no kupanga ubuteko bwa Anglo-America. Icimpashanya ico Nebukadnesari alotele calelanda na pa fintu fibili umo ubu buteko ubwakwatisha amaka bwali no kupusanako na mabuteko yambi.
10. (a) Finshi Daniele asesemepo ifyo tumona mu buteko bwa Anglo-America ubwa kwatisha amaka? (b) Finshi ifyo tushilingile ukucita? (Moneni akabokoshi akaleti “ Cenjeleni!”)
10 Ica kubalilapo, ubuteko bwa Anglo-America bwalipusanako na mabuteko ayo Nebukadnesari amwene mu ciloto pantu bwena, bwapangwa ne cela icatobenkana ne bumba. Ibumba limininako “abana ba bantu” nelyo abantu abatungululwa no buteko bwakwatisha amaka. (Dan. 2:43) Muno nshiku tulamona amaka ayo abantu bakwata ayalenga cilekosela intungulushi ukubomba bwino imilimo iyo bafwile ukubomba. Aya maka yalamoneka ilyo abantu balesala intungulushi, ilyo bapanga utubungwe utulandilako abantu, ukuya mu misebo mu kuilishanya e lyo na lintu bapanga utubungwe utulandilako ababomfi.
11. Bushe ifi ubuteko bwa Anglo-America buteka filenga shani twashininkisha ukuti tuleikala mu nshiku sha kulekelesha?
11 Icalenga bubili, nga fintu Baibolo yasobele ubuteko bwa Anglo-America ubo amakasa ya cimpashanya yemininako, e buteko bwakwatisha amaka ubwa kulekeleshako ukuteka. Takwakabe ubuteko na bumbi ubukapyana ubuteko bwa Anglo-America. Lelo pa Armagedone, Ubufumu bwa kwa Lesa bukonaula ubuteko bwa Anglo-America pamo na mabufumu yonse aya bantunse. *—Ukus. 16:13, 14, 16; 19:19, 20.
12. Finshi fimbi ifyo Daniele aseseme, kabili filenga shani twilasakamana?
12 Kuti twanonkelamo shani muli ubu ubusesemo? Daniele aliseseme na fimbi ifilelangilila ukuti tuleikala mu nshiku sha kulekelesha. Ukucila pa myaka 2,500 iyapita, Daniele aseseme ukuti pa numa ya buteko bwa Babiloni kwali no kwisa amabuteko na yambi ayakwatisha amaka 4 ayali no kukwata amaka pa bantu ba kwa Lesa. Na kabili asobele ukuti ubuteko bwa Anglo-America, e bwali no kulekeleshako. Ici cilalenga twacetekela ukuti Ubufumu bwa kwa Lesa nomba line buli no konaula amabufumu ya bantunse yonse kabili e bukalateka isonde lyonse.—Dan. 2:44.
13. Bushe “imfumu yalenga 8” e lyo ne “imfumu 10” ifyo balumbula pa Ukusokolola 17:9-12 fimininako cinshi, kabili ubu ubusesemo bwafikilishiwa shani?
13 Belengeni Ukusokolola 17:9-12. Ilyo kwali Inkondo ya Calo iya Kubalilapo, ifintu ifingi fyalyonaike kabili kwaishilecitika icintu cimo icalengele ukuti ubusesemo na bumbi ubwa mu Baibolo bufikilishiwe. Bakateka balefwaya ukuti mu calo conse mube umutende. E ico mu January 1920 balipangile akabungwe ka League of Nations, lyena mu October 1945 akabungwe ka United Nations e kaishilepyana pali League of Nations. Aka kabungwe baketa ukuti “imfumu yalenga 8.” Lelo te buteko ubwakwatisha amaka pantu icalenga kakwate amaka mulandu na mabuteko ayakatungilila. Baibolo ita aya mabuteko ukuti “imfumu 10.”
14-15. (a) Cinshi Baibolo pa Ukusokolola 17:3-5 ilanda pali Babiloni Mukalamba? (b) Finshi abantu ababa mu kupepa kwa bufi balecita?
14 Belengeni Ukusokolola 17:3-5. Mu cimonwa ico Lesa alangile Yohane amulangile cilende, “Babiloni Mukalamba” uwimininako ukupepa konse ukwa bufi. Bushe ici cimonwa cafikilishiwa shani? Pa myaka iingi ababa mu kupepa kwa bufi balabombela pamo na bakateka no kubatungilila, lelo nomba line Yehova ali no kulenga imitima ya mabuteko “ukuti icite ifyo umwine alefwaya.” Finshi fikacitika nga caba ifi? Aya amabuteko, e kutila “ishamfumu 10” shikemina ukupepa konse ukwa bufi no kukonaula.—Ukus. 17:1, 2, 16, 17.
15 Twaishiba shani ukuti Babiloni Mukalamba ali no konaulwa nomba line? Pa kuti twasuke ici cipusho, tufwile ukwibukisha ukuti umusumba wa Babiloni uwaliko kale walicingililwe na menshi aya mu mumana wa Yufrate. Ibuuku lya Ukusokolola lilinganya abatungilila Babiloni Mukalamba ku ‘menshi.’ (Ukus. 17:15) Baibolo ilanda no kuti amenshi yali no ‘kukama’ icilelangilila ukuti abengi abatungilila ukupepa kwa bufi bali no kufumamo. (Ukus. 16:12) Kanshi ubu ubusesemo bulefikilishiwa muno nshiku pantu abantu abengi balitendeka ukufuma mu kupepa kwa bufi kabili balileka no kuya kuli bashimapepo babo pa kuti babafwe pa mafya bakwete.
16. Mulandu nshi cawamina ukwishiba ilyo akabungwe ka United Nations katendeke e lyo na pa konaulwa kwa kwa Babiloni Mukalamba?
16 Kuti twanonkelamo shani muli aya amasesemo? Filya bapangile akabungwe ka United Nations e lyo ne fi abantu abengi baleka ukutungilila ukupepa kwa bufi filelangilila ukuti tuli mu nshiku sha kulekelesha. Bushe ifi abantu baleka ukutungilila Babiloni Mukalamba cilepilibula ukuti e bakalenga akonaike? Awe! Nga fintu tulandilepo kale, Yehova akalenga imitima ya “shamfumu 10” e kutila amabuteko ayatungilila akabungwe ka United Nations “ukuti icite ifyo umwine alefwaya.” Ishi ishamfumu ishitungilila Babiloni Mukalamba shikamusansa ukwabula ukwenekela kabili ici cikapapusha abantu abengi mwi sonde. * (Ukus. 18:8-10) Babiloni Mukalamba nga bamonaula, ifikacitika fikakuma abantu bonse mu calo kabili nalimo fikalenga no kuti kukabe amafya. Nomba kukaba ifintu fibili ifikalenga abantu ba kwa Lesa bakasekelele. Ukupepa kwa bufi ukwaba mulwani wa kwa Yehova Lesa pa myaka iingi ninshi nabakonaula umupwilapo kabili ninshi ukulubuka kwesu kwapalama!—Luka 21:28.
MULECETEKELA UKUTI YEHOVA AKACINGILILA ABANTU BAKWE KU NTANSHI
17-18. (a) Cinshi twingacita pa kuti tutwalilile ukulakosha icitetekelo cesu? (b) Finshi tuli no kusambilila mu cipande cikonkelepo?
17 Daniele asobele ukuti “ukwishiba kwine kwine kukafula.” Kabili ca cine kwalifula! Pali ino nshita twalyumfwikisha amasesemo ayalanda pa nshiku tuleikalamo. (Dan. 12:4, 9, 10) Ifyo aya amasesemo yafikilishiwa muno nshiku fyalilenga twacindika sana Yehova e lyo ne Cebo Cakwe. (Esa. 46:10; 55:11) E ico kanshi twalilileni ukukosha icitetekelo cenu ilyo muleisambilisha Amalembo e lyo no kwafwa bambi ukuba ifibusa fya kwa Yehova. Akacingilila bonse abamucetekela kabili akabapeela “umutende wa pe.”—Esa. 26:3.
18 Mu cipande cikonkelepo, tukalanda pa masesemo ayalanda pa fyali no kulacitika mu cilonganino ca Bena Kristu mu nshiku sha kulekelesha. Tuli no kusambilila ifyo aya amasesemo yalelangilila ukuti tuleikala mu nshiku sha kulekelesha kabili tuli no kusambilila na fimbi ifilangilila ukuti Yesu uuli ni Mfumu e utungulula abantu bakwe.
ULWIMBO 61 Mwilabwelela Inuma, Mwe Nte!
^ Muno nshiku kuli ifintu ifingi sana ifilecitika! Ubufumu bwa kwa Lesa bwalitendeka ukuteka, nga filya fine amasesemo ayengi aya muli Baibolo yasobele. Muli cino cipande twalasambilila pa masesemo ayalalenga tukoshe icitetekelo muli Yehova no kukanalasakamikwa. Na kabili twalasambilila ifyo twingacetekela ukuti akulatwafwa pali ino nshita e lyo na ku ntanshi.
^ Moneni isambililo 32 icishinka 4 mu citabo citila Kuti Mwaba ne Nsansa Umuyayaya! kabili tambeni vidio itila Ubufumu bwa kwa Lesa Bwatendeke Ukuteka mu 1914 pa jw.org.
^ Nga mulefwaya ukwishibilapo na fimbi pa busesemo bwa kwa Daniele, moneni Ulupungu lwa kwa Kalinda ulwa June 15, 2012 amabu. 14-19.
^ Nga mulefwaya ukwishibilapo na fimbi pa fili no kucitika ku ntanshi, moneni icipandwa 21 mu citabo citila Ubufumu bwa kwa Lesa Bwalitendeka Ukuteka!
