1-2. Cinshi cingalenga Lesa alepokelela ukupepa kwesu?

 BUSHE finshi mutontonkanyapo nga mwaumfwa amashiwi ya kuti “ukupepa Lesa”? Nalimo mutontonkanya pa wa bwananyina uufukeme alepepa kuli Yehova ilyo ashilaya mu kusendama. Nelyo ulupwa ulwa nsansa abalesekelela ilyo balesambilila Baibolo.

² Ifi balecita aba twalandapo fyaba mu kupepa Lesa. Bushe Yehova kuti apokelela ukupepa kwabo? Kuti apokelela nga ca kuti balecita ifyo afwaya kabili nga balimutemwa no kumucindika. Twalitemwa sana Yehova. Twalishiba ukuti alilinga ukumupepa kabili tulafwaya ukumupepa mu nshila iisuma.

3. Finshi twalasambilila muli cino cipande?

³ Muli cino cipande, twalasambilila pa kupepa uko Lesa alepokelela mu nshita balelemba Baibolo. Na kabili twalasambilila pa fintu 8 ifyo tulingile ukucita pa kuti Lesa alepokelela ukupepa kwesu. Ilyo tulesambilila pali ifi, tuletontonkanya na pa fyo twingacita pa kuti tulewamyako ifyo tupepa Lesa. Twalasambilila no mulandu ukupepa kwa cine kulengela tuleba ne nsansa.

4. Bushe abalepepa Yehova ku kale balangile shani ukuti balimucindike kabili balimutemenwe?

⁴ Ku kale, abaume ba cishinka pamo nga Abele, Noa, Abrahamu na Yobo, balilangile ifyo bacindike no kutemwa Yehova.  Balangile shani? Bali ne cishinka kuli ena, bali ne citetekelo, kabili baletuula na malambo. Baibolo tayatweba ifyo balingile ukucita pa kuti Lesa alepokelela ukupepa kwabo. Lelo balecindika Yehova, kabili Yehova alepokelela ukupepa kwabo. Pa numa Yehova apeele abena Israele Amafunde ya kwa Mose. Mu Mafunde ya kwa Mose mwali ne fyo balingile ukulacita pa kuti Yehova alepokelela ukupepa kwabo.

5. Bushe Yehova alefwaya abantu balemupepa shani ilyo Yesu afwile no kubuushiwa?

⁵ Ilyo Yesu afwile no kubuushiwa, Yehova tale-enekela abantu ukulabomfya ifyali mu Mafunde ya kwa Mose pa kumupepa. (Rom. 10:4) Abena Kristu bali no kulakonka ifunde ilipya e kutila, “ifunde lya kwa Kristu.” (Gal. 6:2) Pa kukonka ili funde, tabalingile ukulasungila fye ku mutwe ifyo balingile ukucita ne fyo bashalingile ukucita, lelo balingile ukulapashanya ifyo Yesu alecita no kulakonka ifyo alesambilisha. Na muno nshiku mwine Abena Kristu balabombesha pa kukonka Kristu na pa kuti balelenga Yehova alesekelela kabili ‘balesanga ukutuusha.’—Mat. 11:29.

6. Mepusho nshi mulingile ukutontonkanyapo pa kuti munonkelemo muli cino cipande.

⁶ Ilyo tulelanda pali cimo na cimo pa fyaba mu kupepa kwesu, muletontonkanya pali ifi fipusho, ‘Bushe ndabombesha ukukonka ifi tulesambilila? Bushe muliko umo ningile ukwaluka pa kuti ndepepa bwino Yehova?’ Kuti mwaba ne nsansa pa fyo mulecita pali ino nshita, lelo mufwile ukulomba Yehova ukuti amulenge mwishibe umo mulingile ukwaluka.

7. Bushe Yehova amona shani amapepo ayafuma pa nshi ya mutima?

⁷ Mu kupepa Yehova mwaba ne pepo. Amalembo yapashanya amapepo yesu ku fyanunkila ifyapekanishiwa bwino ifyo baletuula pa cikuulwa ca mushilo, e lyo na pe tempele. (Amalu. 141:2) Ifi fyanunkila fyalefumya akacena akasuma, akanunkila, akalelenga Lesa asekelela. Ifi fine e fyaba na mapepo yesu, ‘yalamusekesha’ nangu tulandile fye amashiwi ayanono. (Amapi. 15:8; Amala. 33:10) Twalicetekela ukuti Yehova alasekelela nga tulemweba ifyo twamutemwa ne fyo tumutasha pa fyo atucitila. Alafwaya tulemweba ifitusakamika, ifyo tutontonkanyapo, e lyo ne fyo tufwaisha. Ilyo tushilapepa kuli Yehova tufwile ukutontonkanya sana pa fyo twalamweba. Nga tulecita ifi, tukalapeela “ifyanunkila” ifisuma kuli Shifwe wa ku muulu.

8. Ni nshila nshi imo iyo twingalumbanishishamo Lesa?

⁸ Mu kupepa Yehova mwaba no kumulumbanya. (Amalu. 34:1) Tulalumbanya Yehova nga tule-ebako abantu pa mibele yakwe iisuma e lyo na pa milimo yakwe. Tukakwata ifingi ifya kulumbanya Yehova nga ca kuti tulatasha pa fyo atucitila. Nga tuletontonkanya pa busuma bwa kwa Yehova, tukakwata ifingi ifyo twingamulumbanishishapo. Nga tulebila imbila nsuma ‘tulatuula ilambo lya kulumbanya Lesa, e kutila, icisabo ca milomo.’ (Heb. 13:15) Nga filya fine tupekanya ifyo twalaeba Yehova mwi pepo, e fyo tufwile no kulapekanya ifyo twalaya mu kweba abantu tubilako imbila nsuma. Tufwaya “ilambo lya kulumbanya” ilyo tutuula ukuba ilisuma sana. E mulandu wine tubela abacincimuka ilyo tulebila imbila nsuma.

9. Bushe tunonkelamo shani mu kusangwa mu kulongana nga filya abena Israele balenonkelamo? Landeni pa fyo munonkelamo mu kulongana.

⁹ Mu kupepa Yehova mwaba no kusangwa mu kulongana. Abena Israele babebele ukuti: “Imiku itatu mu mwaka abaume benu  bonse bakalemonekela ku cinso ca kwa Yehova Lesa wenu ku cifulo akasala.” (Amala. 16:16) Nangu ca kuti baleesha amayanda yabo na mabala ukwabula uwa kuyalinda, Yehova abalaile ukuti: “Umuntu nangu umo takakumbwe icalo cobe ilyo waya ku kumona icinso ca kwa Yehova Lesa obe.” (Ukufu. 34:24) Apo abena Israele balicetekele sana Yehova, baleya mu kusefya imitebeto imiku itatu mu mwaka kabili balenonkelamo icine cine. Ku ca kumwenako, balesambilila ifingi pa Mafunde ya kwa Lesa, balekwata ne nshita ya kutontonkanya pa fisuma fyonse ifyo Yehova abacitiile, e lyo kabili baleipakisha ukuba pamo na bakapepa banabo. (Amala. 16:15) Ifi fine e fyo na ifwe tunonkelamo nga tulebombesha ukusangwa mu kulongana. Tontonkanyeni pa fyo Yehova omfwa nga twaisa natupekanya ifyasuko ifipi, lelo ifyaumfwika.

10. Bushe ukwimba kwacindama shani mu kupepa kwesu?

¹⁰ Mu kupepa Yehova mwaba no kumwimbila inyimbo. (Amalu. 28:7) Abena Israele balemona ukwimbila Yehova inyimbo ukuti kwalicindeme mu kupepa kwabo. Imfumu Davidi yalisalile abena Lebi 288 aba kwimba pe tempele. (1 Imila. 25:1, 6-8) Na muno nshiku mwine kuti twalanga ifyo twatemwa Lesa nga tulemwimbila inyimbo sha kumulumbanya. Tatufwile ukwishiba sana ukwimba pa kuti tulumbanye Lesa. Tontonkanyeni pali ici: Nga tulelanda, “tulaipununa imiku iingi” lelo ici tacilenga twaleka ukulanda ilyo tuli pa kulongana nelyo ilyo tulebila imbila nsuma. (Yako. 3:2) Kanshi tatufwile ukulafilwa ukulumbanya Yehova mu nyimbo pa mulandu wa kuti tatwakwata ishiwi ilisuma.

11. Ukulingana na Amalumbo 48:13, mulandu nshi tufwile ukutantikila inshita ya kusambilila Baibolo ngo lupwa?

¹¹ Mu kupepa Yehova mwaba ukusambilila Icebo cakwe e lyo no kusambilisha abana pali ena. Pa bushiku bwe Sabata, abena Israele tabalebombapo imilimo ili yonse lelo balebomfya bulya ubushiku ku kukosha bucibusa bwabo na Yehova. (Ukufu. 31:16, 17) Abali ne cishinka balefunda abana babo pali Yehova e lyo na pa fisuma ifyo alebacitila. Na muno nshiku mwine tufwile ukutantika inshita ya kubelenga e lyo no kuisambilisha Icebo ca kwa Lesa. Ukucita ifi kwaba pali fimo ifyo tucita ilyo tulepepa Yehova kabili kulatupalamika sana kuli ena. (Amalu. 73:28) Nga tulesambilila Baibolo ngo lupwa, tukaafwa abana besu ukuba ifibusa fya kwa Shifwe uwa kutemwa uwa ku muulu.—Belengeni Amalumbo 48:13.

12. Finshi twingasambilila ku fyo Yehova alemona umulimo uo abalepanga ifya kubomfya pa cikuulwa ca mushilo balebomba?

¹² Mu kupepa Yehova mwaba ukukuula e lyo no kuwamya ififulo fya kupepelapo. Baibolo ilanda ukuti umulimo wa kupanga icikuulwa ca mushilo e lyo ne fya kubomfya pali ici cikuulwa wali “mulimo wa mushilo.” (Ukufu. 36:1, 4) Na muno nshiku mwine Yehova amona ukuti ukukuula Amayanda ya Bufumu e lyo ne fikuulwa fimbi ifya kupepelamo, mulimo wa mushilo. Bamunyinefwe na bankashi bamo balapoosa inshita iikalamba ukubombako uyu mulimo. Ala tulatasha sana pali ifi babombesha! Lelo nabo bene balabombako umulimo wa kubila imbila nsuma. Bamo pali aba kuti bafwaya no kubombako bupainiya. Baeluda kuti balanga ukuti balatasha sana pa mulimo wa makuule nga ca kuti tabaleshingashinga ukusonta aba bamunyinefwe ababombesha nga nabafikapo ukuba bapainiya. Nampo nga twalishiba umulimo wa kukuula nelyo iyo, bonse kuti twabombako uyu mulimo nga ca kuti tulesunga ifikuulwa ifya busaka nelyo tulefiwamya.

13. Bushe tulingile ukulamona shani imisangulo tusangula?

 ¹³ Mu kupepa Yehova mwaba no kutungilila umulimo wa Bufumu nga tulesangula imisangulo. Abena Israele tabali na kumonekela ku cinso ca kwa Yehova minwe nkutwa. (Amala. 16:16) Bali no kupeela Yehova ifya bupe ukulingana na po bakwatile. Ifi balecita balelanga ukuti baletasha sana pali fyonse ifyo Yehova alebapeela. Bushe kuti twalanga shani ukuti tulatasha pali fyonse ifyo Yehova atucitila? Inshila imo, ni lintu tulesangula umusangulo wa pa cilonganino no wa mwi sonde lyonse ukulingana na po tukwatile. Umutumwa Paulo atile: “Nga cine cine mulefwaya ukusangula, Lesa akapokelela ubupe bwenu nga mwapeela ukulingana na po mukwatile te pa fintu mushikwete.” (2 Kor. 8:4, 12) Yehova alatasha sana pa bupe ubuli bonse ubo twingamupeela, ubufumine pa nshi ya mutima temulandu no kuti nabucepa.—Marko 12:42-44; 2 Kor. 9:7.

14. Ukulingana na Amapinda 19:17, bushe Yehova amona shani ifyo twafwilisha aba bwananyina abalekabila ubwafwilisho?

¹⁴ Mu kupepa Yehova mwaba no kwafwilisha Abena Kristu banensu abalekabila ubwafwilisho. Yehova alaile ukuti ali no kupaala abena Israele abaleafwilisha abapiina. (Amala. 15:7, 10) Kanshi nga twa-afwilisha uwa bwananyina uulekabila ubwafwilisho, Yehova amona ukuti e o twapeela ubupe. (Belengeni Amapinda 19:17.) Ku ca kumwenako, ilyo abena Filipi batumine ifya bupe kuli Paulo ninshi ali mu cifungo, Paulo aitile ubupe bwabo ukuti lyali “lilambo ilyapokelelwa, ilya kusekesha Lesa.” (Fil. 4:18) Tontonkanyeni pa baba mu cilonganino cenu, bushe mwaliba abali bonse abo mwingafwa? Yehova alasekelela nga amona ifyo tulebomfya inshita yesu, amaka yesu, ifyo twaishiba, e lyo ne fyo twakwata ku kwafwa abalekabila ubwafwilisho. Amona ukucita ifi ukuti fyaba mu kupepa kwesu.—Yako. 1:27.

15. Mulandu nshi twingalandila ukuti te cisendo ukupepa Yehova nangu ca kuti tulapoosapo inshita na maka?

¹⁵ Pa kuti tube mu kupepa kwa cine tulakabila ukubombesha e lyo no kupoosapo inshita. Na lyo line, ukucita ifi te cisendo. (1 Yoh. 5:3) Mulandu nshi cishabela cisendo? Pantu tupepa Yehova pa mulandu wa kuti twalimutemwa. Elenganyeni umwana umunono uulefwaya ukupeela bawishi fimo. Kuti apoosa inshita iikalamba ukulenga icikope ica kupeela bawishi. Uyu mwana tatontonkanya ukuti aleonaula fye inshita yakwe ukucita ifyo. Alitemwa bawishi kabili alaba ne nsansa nga abapeela ica bupe. Ifi fine e fyo caba na kuli ifwe, apo twalitemwa Yehova tulaitemenwa ukupoosa inshita yesu na maka pa kuti tulemupepa.

16. Ukulingana na AbaHebere 6:10, bushe Yehova amona shani ifyo tumubombela?

¹⁶ Abafyashi ababa no kutemwa tabenekela ukupokelela ubupe bumo bwine ku bana bonse. Balishiba ukuti abana balipusanapusana mu fyo bengacita. Shifwe wa ku muulu na o alishiba ifyo bonse umo umo twingacita. Nalimo kuti mwacita ifintu ifingi ukucila abantu abo mwaishiba kabili abo mwatemwa. Nelyo te kuti mucite ifingi ukucila abantu abengi abo mwaishiba, nalimo pa mulandu wa myaka, ubumi bwenu, nelyo imilimo mwakwata mu lupwa. Tekwesha ukufuupuka. (Gal. 6:4) Yehova takalabe imilimo yenu. Nga ca kuti mulebombela Yehova apapelele amaka yenu, kabili namwishiba no mulandu mulemubombela, akalasekelela. (Belengeni  AbaHebere 6:10.) Yehova aleshiba ne fyo mufwaisha ukucita ifyaba mu mutima wenu. Afwaya ukuti muleba ne nsansa ilyo mulemubombela.

17. (a) Nga ca kuti cilatukosela ukucitako fimo ifyaba mu kupepa kwesu, finshi twingacita? (b) Bushe ifili mu kabokoshi akaleti “ Kuti Mwaba Sana ne Nsansa” fyamwafwa shani ukuba ne nsansa?

¹⁷ Finshi mwingacita nga ca kuti cilamukosela ukucita ifyo twalandapo, pamo ngo kuisambilisha Baibolo e lyo no kubila imbila nsuma? Nga ca kuti lyonse tulebombesha mu mulimo wa kubila imbila nsuma kabili tuleisambilisha Baibolo, tukalaya tuletemenwako ukucita ifi. Kuti twalinganya fimo ifyaba mu kupepa kwesu ku kuteya ifyangalo fimo nelyo ku kusambilila ukulisha icilimba. Te kuti twishibe ifya kuteya icangalo cimo nelyo ukwishiba ifya kulisha icilimba nga ca kuti tuisambilisha fye mu nshita mu nshita. Nomba finshi fingacitika nga ca kuti twapingulapo ukulaisambilisha cila bushiku? Pa kubalilapo nalimo kuti twalaisambilisha fye pa mamineti ayanono, lelo mu kupita kwa nshita kuti twaya tulelefyako inshita ya kuisambilisha. Nga tulemona ifisuma ifilefuma mu fyo tuleisambilisha, tukatendeka ukulafwaisha ukuteya ico cangalo nelyo ukulalisha icilimba. Ifi fine e fyo cingaba nga ca kuti tulefwaya ukutemwa sana ukulabila imbila nsuma e lyo no kuisambilisha Baibolo.

18. Cintu nshi icacindama ico tulingile ukucita, kabili cinshi cikacitika?

¹⁸ Icintu icacindama ico tufwile ukucita, kulabomba apapelele amaka yesu mu kupepa Yehova. Nga tulecita ifi, tukaba ne nsansa kabili tukakwata isubilo lya kulapepa Yehova umuyayaya. (Amapi. 10:22) Tatusakamikwa sana nga tuli na mafya pantu twalishiba ukuti Yehova alaafwa ababomfi bakwe. (Esa. 41:9, 10) Kwaliba ifintu ifingi ifilenga tuleba ne nsansa ilyo tulepepa Shifwe uwatutemwa uwalinga “ukupokelela ubukata no mucinshi” ukufuma ku fibumbwa fyakwe!—Ukus. 4:11.