Ilyo abalebila imbila nsuma bailebalefulilako, bamunyinefwe balekabila impapulo sha kubomfya ishingi. Bamunyinefwe ku Bethel ya ku Brooklyn balepanga magazini, lelo balebomfya utwampani nga balefwaya ukupanga ifitabo. Inshita imo akampani kalebapangila ifitabo kalifililwe ukupanga ifitabo ifingi ifya kubomfya nga balebila imbila nsuma, pa myeshi iingi. E ico munyinefwe Rutherford aipwishe munyinefwe Robert Martin uwali kangalila ku fakitare, nga ca kutila kuti batendeka ukuipulintila ifitabo.

Munyinefwe Martin atile: “Ifyo balandile fyaliweme sana. Ici calepilibula ukuti twali no kwisula fakitare iipya iya kupangilamo ifitabo.” Bamunyinefwe balitendeke ukusonkela icikuulwa mu 18 Concord Street ku Brooklyn, kabili balishitile na fimashini fyonse ifyo balekabila pa kutendeka ukupulinta ifitabo.

Abantu bamo tabatemenwe ilyo bamwene ifyo aba bwananyina balecita. Umukalamba umo uwa kampani kaletupangilako ifitabo alishiletandalila fakitare yesu iya kupangilamo ifitabo iipya. Alandile ukuti: “Namukwata fimashini ifisuma sana ifya kupangilako ifitabo, nomba tamukwete nangu umo uwaishiba ifya kufibomfya. Mu myeshi fye 6 ninshi namonaula ifi fimashini fyonse.”

Munyinefwe Martin atile: “Ifyo uyu mwaume alandile nalimo cali cine, lelo taishibe ukuti Yehova kuti atwafwa, kabili alitwafwile. Ifyalandile munyinefwe Martin fyali fya cine. Tapakokwele fimashini ifipya ifyo bashitile fyalepanga amabuuku 2,000, cila bushiku.

Abantu ba kwa Yehova tabatendeke fye ukuipangila ifitabo, lelo balitendeke ukubomfya nshila na imbi pa kubila imbila nsuma. Batendeke ukubomfya umulabasa wa pa cilimba. Pa Mulungu akasuba pa 26 February, 1922, munyinefwe Rutherford alandile ilyashi pa cilimba pa muku wa kubalilapo. Alandile ilyashi lyaleti  “Millions Now Living Will Never Die” (Abengi Abali no Mweo Pali ino Nshita Tabakatale Abafwa), alandile pa mulabasa wa KOG mu Los Angeles, ku California, U.S.A.

Abantu nalimo 25,000 e bakutike kuli ili lyashi. Bamo balitumine na makalata ya kutasha pe lyashi. Umo uwatumine kalata ni Willard Ashford, uwaleikala mu Santa Ana, ku California. Atashishe munyinefwe Rutherford pe lyashi alandile ilyali “ilisuma.” Lyena atile: “Pa ng’anda pa mwesu twalikwata abalwele batatu abashenda. Kanshi nangu amwisa mupepi no ko twikalila nga tatwaishile mu kukutika kwi lyashi.”

Mu milungu yakonkelepo aba bwananyina balilandile amalyashi na yambi pa cilimba. Ilyo umwaka walepwa Ulupungu lwa kwa Kalinda lwatile “abantu nalimo 300,000 e bakutike ku malyashi pa cilimba.”

Ilyo Abasambi ba Baibolo bamwene ifyo abantu balefwaisha ukukutika ku mbila nsuma, basalilepo ukukuula umulabasa pa mpanga bakwete ku Staten Island, mupepi na Bethel ya ku Brooklyn. Pa myaka iingi Abasambi ba Baibolo balibomfeshe uyu mulabasa wa WBBR, ku kubila imbila nsuma ya Bufumu ku bantu abengi.

Mu Ulupungu lwa kwa Kalinda ulwa June 15, 1922, balibilishe ukuti kuli no kuba ukulongana kukalamba pa Cedar Point, mu Ohio, ukufuma pa 5 ukufika pa 13 September, 1922. Abasambi ba Baibolo bali ne nsansa ilyo baleya kuli uku kulongana.

Ilyo munyinefwe Rutherford alelanda ilyashi lya kubalilapo pa kulongana, aebele abalongene ati: “Ninshinikisha ukuti Shikulu, alapaala kuno kulongana, kabili alalenga kuno kulongana kulenge abantu ukubila sana imbila nsuma.” Abalelanda amalyashi pali uku kulongana balekoselesha sana abalongene ukubila imbila nsuma.

Pali Cisano pa 8 September, abantu abali nalimo 8,000, balingile mu cikuulwa umo munyinefwe Rutherford ali no kulandila ilyashi. Balefwaya ukumfwa ifyo ali no kulondolola umwalolele ifilembo fya “ADV,” ifyali pa tupepa baleitilapo abantu. Abantu bamo ilyo baleikala nalimo balimwene insalu iikalamba iyo bapombele mu mutenge pa ntanshi ya cisebele. Ba Arthur Claus, abaile kuli uku kulongana ukufuma ku Tulsa, mu Oklahoma, U.S.A., balisangile icipuna apa kwikala apali no kulenga baleumfwa bwino ifyo  balelanda pa cisebele. Muli shilya nshiku ilyo kushilaba ifisoselo ifyo tubomfya nga tuli pa kulongana kulamba, ukusala apa kwikala apasuma kwalicindeme.

Ilyo ilyashi lya kwa munyinefwe Rutherford lishilatendeka, ceyamani alibilishe ukuti ilyo munyinefwe Rutherford akulalanda ilyashi, takuli nangu umo uo bakulasuminisha ukwingila mu cikuulwa umo ali no kulandila ilyashi pantu tabalefwaya ifya kupumfyanya. Pa 9:30, munyinefwe Rutherford alitendeke ukulanda ilyashi, kabili abalilepo ukulanda pa mashiwi ya kwa Yesu ayaba pali Mateo 4:17 ayakuti: “Ubufumu bwa mu muulu nabupalama.” Ilyo alelondolola ifyo abantu bali no kumfwa pa Bufumu, alandile ukuti: “Yesu umwine alilandile ukuti mu nshita ya kubapo kwakwe ali no kulobolola abantu, kabili pali iyi nshita akalonganya abantu aba cishinka.”

Munyinefwe Claus uwali mu cikuulwa mu kati, atile: “Twalekutikisha fyonse ifyo munyinefwe Rutherford alelanda.” Lelo munyinefwe Claus aishiletendeka ukumfwa ukulwala kabili afwaile ukuti afumineko pa nse. Ba Claus balifumine pa nse nangu ca kuti balishibe ukuti tababasuminishe ukwingila na kabili ilyo munyinefwe Rutherford alelanda ilyashi.

Ilyo papitile inshita iinono, ba Claus balitendeke ukumfwako bwino. Balandile ukuti ilyo balebwelelamo ku cikuulwa, baumfwile fye uko abantu batootele. Ici calengele bafwaishe ukubwelela mu cikuulwa. Ba Claus batontonkenye ukuti nga balingile ukunina pa mutenge pa kuti fye bakutike ilyashi, ninshi bali no kunina pantu tabalefwaya ukupuswa ili lyashi. Ba Claus abali ne myaka 23 pali iyi nshita, balimwene apa kuninina icikuulwa. Ilyo bafikile pa mutende, basangile iwindo lya pa mutenge nalisuka. Batile ilyo bafikile pe windo baleumfwa bwino “ifyo munyinefwe Rutherford alelanda.”

Ba Claus tabali beka pa mutenge. Abanabo bamo nabo epo bali. Umo umunabo uo bali nankwe pa mutenge Frank Johnson, abepwishe  ukuti: “Bushe naukwatako akamwele akanono ako twingaputwilako fimo?”

Ba Claus batile: “Ee ninkwata.”

Ba Frank batile: “Cawama, pantu twacilapepa ukuti tusange uukwete umwele ukuti tuputwileko fimo. Bushe naumona iyi nsalu bapombele apa? Nabalembapo fimo. Ubike sana mano ku fyo munyinefwe Rutherford alelanda. Nga atila fye, ‘E ico sabankanyeni, sabankanyeni,’ ufwile ukuputula ishi ntambo 4.”

Ba Claus e lyo nabo bali nabo mu mutenge batendeke fye ukulolela muninyefwe Rutherford alande aya mashiwi, ninshi babekata umwele. Tapakokwele munyinefwe Rutherford alifikile apali icishinka cikalamba mu lyashi lyakwe. Apo alitemenwe sana ifyo alelanda, alefwaya no kupunda ilyo alandile amashiwi ya kuti: “Beni inte sha kwa Lesa isha cishinka kabili isha cine. Twalilileni ukulwisha mpaka bonse ababa muli Babiloni bomfwe icine. Bilisheni ubukombe mpanga yonse. Aba pano isonde bafwile ukwishiba ukuti Yehova e Lesa wa cine no kuti Yesu Kristu ni Mfumu ya shamfumu kabili Shikulu wa bashikulu. Ino ni nshita yacindamisha iishatala aibako. Moneni, Imfumu ileteka! Imwe ni mwe babomfi ba Mfumu. E ico sabankanyeni, sabankanyeni, sabankanyeni, Imfumu no bufumu bwa iko!”

Ba Claus batile, bena e lyo na bo bali nabo baliputwile intambo isho bakakileko insalu, ne nsalu yalifungulwike bwino sana. Kabili nga filya fime pa tupepala twa kwitilapo abantu ku kulongana balembele ifilembo fya “ADV” ifyalepilbula mu ciNgeleshi ukuti “advertise,” amashiwi ayapilibula “sabankanyeni,” pa nsalu balembelepo ukuti: “Sabankanyeni Imfumu no Bufumu.”

Ukulongana kwali pa Cedar Point, kwalilengele aba bwananyina ukubika amano ku mulimo wacindama sana uwa kubila imbila nsuma, kabili bonse abalefwaya ukubomba balebombesha muli uyu mulimo. Kolopota umo (abo pali ino nshita beta ukuti painiya ba nshita yonse) uwa ku Oklahoma, U.S.A., alembele ukuti: “Icitungu tubombelamo abantu abengi babomba mu mikoti ya malasha, kabili bapiina sana.” Alandile no kuti abantu abengi nga babelenga ifiba muli magazini ya Golden Age, “balalukusha ifilamba.” Mu kulekelesha atile: “Twaliba sana ne nsansa pantu tulakoselesha abantu abengi.”

Aba abasambi ba Baibolo balishibe ukuti balingile ukubomba uyu mulimo bwangu, pantu balishibe umwalolele amashiwi ya kwa Yesu ayaba pali Luka 10:2 ayakuti: “Ukulobolola kukalamba, lelo ababomfi bena nabacepa.” Ilyo umwaka wa 1922 walepwa, abasambi ba Baibolo balefwaisha ukulasabankanya Ubufumu mwi sonde lyonse.