Bakabilisha ba Bufumu Bacita Lipoti

Asangile Imifwaile mu Bumi

YESU atile alishiba impaanga shakwe. (Yohane 10:14) Nga ca kuti umuntu alikwata umutima usuma no kutemwa umutende no bulungami, uyo muntu akatintilwa ku bakonshi ba kwa Yesu. Umuntu uwa musango yo akasanga imifwaile mu bumi, nge fyacitile umwanakashi umo mu Belgium. Ili e lyashi lyakwe:

“Lintu Inte sha kwa Yehova bakonkonseshe pa mwinshi wandi, nali uwapopomenwa nga nshi kabili naletontonkanya ulwa kupelesha ubumi bwandi. Nalitemenwe cintu Inte shasosele pa lwa kupikulula ku mpika sha ici calo calwala lelo nshatemenwe imfundo ya kuti Lesa alikwetemo ulubali. Nalilekele ukuya ku calici imyaka cinekonsekonse mu kubangilila, apantu nalipatile ubumbimunda namwene mulya. Mu kuba ne Nte, nangu ni fyo, namwenemo icine mu cintu basosele kabili naishile mu kwiluko kuti, na kuba, cili icakosa ukwikala ukwabula Lesa.

“Ku ca bulanda, pa numa ya kutandala kunono, ukukumana ne Nte kwalilufiwe. Nayumfwile uwapelelwa. Napeepele ifipaketi fya fwaka fibili ubushiku bumo kabili nayalukile fye na ku miti ikola. Ukufwaya ukulanshanya na shikulu umuyashi, nayobeke mu kupupe mipashi. Fintu nali uwatiinishiwa lintu nali neka ubushiku nakumenye ukusansa kwa fibanda nge ca kufumamo! Ici casendeleko imyeshi. Icungulo bushiku cimo na cimo nalitiinishiwe pe tontonkanyo lya kuba neka.

“Lyene, bushiku bumo naile ndeendauka, ukupita mu nshila yapusanako ukufuma ku ya lyonse, kabili naishile ku cifulo ca cikuulwa cikalamba. Ku kupapushiwa kwandi namwene ibumba likalamba palya. Ukupalamina, namwene ukuti cali ni Nte sha kwa Yehova mu mibombele ya kukuula Iŋanda ya Bufumu. Naibukishe ukutandala Inte bacitile pa ŋanda yandi, kabili natontonkenye fintu cingaba icawamisha nga ca kuti icalo conse kuti caikala nga fintu aba bantu baikele.

“Mu cituntulu nafwaile ukuti Inte shikabwele ku ŋanda yandi, e co nalandile kuli bamo aba abo abalebomba pa cikuulwa. Nalipepele kuli Lesa, kabili inshiku ikumi pa numa umwaume uwankumenye pa kubalilapo aali pa mwinshi wandi. Atubulwile ukuti tutwalilile isambililo lya Baibolo, kabili nalisumine mu buseko. Ilyo line fye andaalike ku kulongana pa Ŋanda ya Bufumu. Nalicipokelele. Nshatalile monapo ica kutamba ca musango yo! Nalifwailishe apalepa abantu abatemwana kabili abali aba nsansa. Kabili epo bali mu kupelako!

“Pa numa ya ico naile mu kulongana konse. Pa numa ya milungu mupepi na itatu, nalekele icibelesho cabipa ica kupeepa. Napoosele ifitabo fyandi pa lwa kulengule ntanda na maseleti yandi aya nyimbo sha busatana, kabili naleumfwa ukuti ifibanda fyalekakatukako kuli ine. Naikele umwabela ifipimo fya Baibolo ifya kwa Yehova, kabili pa numa ya myeshi itatu natendeke ukushimikila imbila nsuma. Pa numa ya myeshi mutanda nalibatishiwe. Inshiku shibili pa numa ya lubatisho lwandi, natendeke bupainiya bwa kwafwilisha.

“Ndatootela Yehova pa fintu fyonse ifisuma ancitila. Ubumi bwandi bwalikwata imifwaile mu kulekelesha. Ee, ishina lya kwa Yehova lupungu ulwakosa umo nasangile icubo no kucingililwa. (Amapinda 18:10) Mu cine cine njumfwa nge fyayumfwile kemba wa malumbo lintu alembele Ilumbo 84:10 ukuti: ‘Ubushiku bumo mu mansa shenu bwawama ukucile nshiku ikana limo pa nse: Ninsalo kuba ku mwinshi wa ŋanda ya kwa Lesa wandi, ukucilo kwikala mu mahema ya babifi.’”

Uyu mwanakashi wa mutima wafuuka alisangile imifwaile mu bumi. E fyo no uuli onse engasanga uwafwailisha Yehova no mutima usuma.