Lesa Alasuka Amapepo

Korneli ali muntu uwafwaile ububile bwa kwa Lesa ukupitila mu kupepa libili libili, kabili alepepa ukufuma pa nshi ya mutima. Ukulundapo alibomfeshe bwino icifulo akwete pamo nga umukalamba wa fita. Ukulingana na Baibolo, ‘alepeelesha ne fya nkumbu’ ku balanda.—Imilimo 10:1, 2.

PALI ilya nshita, mu cilonganino ca Bwina Kristu mwali abaYuda basumina, insangu, na bena Samaria. Korneli ali Mwina fyalo uushasembululwa kabili taali mu cilonganino ca Bwina Kristu. Bushe ico cilepilibula ukuti amapepo yakwe yali aya fye? Iyo. Yehova Lesa alimwene imilimo ya kwa Korneli kabili alikutike ku mapepo yakwe.—Imilimo 10:4.

Ukupitila muli malaika, Korneli asangile icilonganino ca Bwina Kristu. (Imilimo 10:30-33) Pali uyu mulandu, aba mu ng’anda yakwe bakwete ishuko lya kuba Abena fyalo bashasembululwa aba ntanshi ukupokelelwa mu cilonganino ca Bwina Kristu. Yehova Lesa amwene ukuti ica kukumanya ca kwa Korneli nacilinga ukulembwa mu Baibolo. Ukwabula ukutwishika, alyalwike mu fingi pa kuti imikalile yakwe ileumfwana na mafunde ya kwa Lesa. (Esaya 2:2-4; Yohane 17:16) Ica kukumanya ca kwa Korneli cifwile ukukoselesha sana aba nko shonse abalefwaya ububile bwa kwa Lesa. Moneni ifya kumwenako fimo.

Ifya Kumwenako Fya Muno Nshiku

Umukashana wa ku India alekabila sana icisansamushi. Aupilwe ilyo ali ne myaka 21, kabili aishilekwata abana babili. Pa numa fye ya kukwata umwana wa bubili, umulume alifwile. Mu kupumikisha fye, ilyo ali ne myaka 24, aishileba mukamfwilwa ninshi akwete umwana umwanakashi uwa myeshi ibili no mwaume uwa myeshi 22. E mulandu wine kanshi alefwaila icisansamushi! Ni kwi ali no kucisanga? Inshita ya bushiku imo, ninshi nacululuka sana, apepele ati, “Tata wa ku Muulu, napaapaata nsansamusheni ukupitila mu Cebo cenu.”

Ulucelo lwakonkelepo, alipokelele umutandashi. Ali ni Nte ya kwa Yehova. Bulya ubushiku, ubutumikishi bwakwe ubwa ku ng’anda ne ng’anda bwalyafishe pantu banono fye balemupokelela. Apo alinakile kabili ali uwafuupulwa, afwaile ukubwelela ku ng’anda, lelo aishiletontonkanya ukuti ayeko pa ng’anda fye imo ilyo talabwelelamo. Pali ilya ng’anda e po asangile uyu mukamfwilwa wacaice. Alimupokelele kabili apokele ne citabo icilondolola Baibolo. Uyu mwanakashi asangile icisansamushi mu kubelenga ici citabo na mu kulanshanya na Nte. Asambilile pa lwa bulayo bwa kwa Lesa ubwa kubuusha abafwa na pa lwa Bufumu bwa kwa Lesa, ubwalaswa  bulenge isonde lyonse paradise. Ne cacindamishe, aishileishiba no kutemwa Lesa wa cine umo, Yehova, uwayaswike ipepo lyakwe.

Nora, uwikala mu musumba wa George, ku South Africa, asalilepo umweshi umo uwa kubombako umulimo wa kushimikila inshita yonse. Ilyo talatendeka, apepele kuli Yehova ukufuma pa nshi ya mutima ukuti asange uwingafwaisha icine cine ukusambilila Baibolo. Mu cifulo ca kubombelamo apeelwe mwali ne ng’anda ya muntu umo uwalekalipa sana nga atandalilwa na Nora imiku yafumineko. Mu kushipa, Nora alibwelelepo pa ng’anda ilya na kabili. Alisungwike pa kusanga ukuti muli ilya ng’anda mwalikuukiile umuntu umbi uwe shina lya Noleen. Na kabili, Noleen na banyina balepepa kuli Lesa pa kuti abafwe ukumfwikisha Baibolo. Nora alondolola ukuti, “Ilyo nabepwishe nga kuti batemwa ukusambilila Baibolo, balicankilwe.” Mu kwangufyanya Noleen na banyina balilundulwike. Mu kuya kwa nshita, bonse babili batendeke ukubomba pamo na Nora umulimo wa kundapa kwa ku mupashi.

Ica kumwenako cimbi icilangisha amaka ye pepo, ca baupana babili abekala mu musumba wa Johannesburg ku South Africa. Inshita ya bushiku pa Cibelushi cimo mu 1996, icupo ca kwa Dennis na Carol cali mupepi no kupwa. Mu kulekelesha, basalilepo ukupepela ukwafwa, kabili bacitile ico mu kubwekeshabwekeshapo ukufikila bwaila sana. Ulucelo lwakonkelepo, pa 11:00 hrs, Inte sha kwa Yehova shibili shakonkweshe pa ciibi cabo. Dennis aliswileko no kubeba ukuti balolele ete umukashi wakwe. Dennis lyene asokele Carol ukuti, nga abengisha mu ng’anda, bakatwalilila ukulaisa. Carol acinkwileko Dennis ukuti bali balepepela ukwafwa no kuti nalimo ici cali casuko ca kwa Lesa ku mapepo yabo. E co baingishe Inte sha kwa Yehova mu ng’anda kabili isambililo lya Baibolo lyalitendeke mu citabo ca Ukwishiba Uko Kutungulula ku Mweo wa Muyayaya. Dennis na Carol balicankilwe sana pa lwa fintu basambilile. Kalya kene kasuba, balisangilwe na ku kulongana pa Ng’anda ya Bufumu iya Nte sha kwa Yehova pa muku wa kubalilapo. Ukupitila mu kubomfya fintu basambilile mu Baibolo, Dennis na Carol balipwishishe amafya mu cupo cabo. Pali ino nshita baliba aba nsansa, pantu ni bakalumbanya ba kwa Yehova ababatishiwa kabili balebako bambi pa lwa fisumino fyabo ifyashimpwa pali Baibolo.

Ni Shani Nga ca Kuti Muleyumfwa Abashawaminwa Ukupepa?

Bamo abafumaluka bayumfwa ukukanawaminwa ukupepa pa mulandu wa mikalile yabo iyabipa. Yesu Kristu, alilandilepo pa lwa muntu wa musango yo, uwali umusangushi uwasuulwa. Ilyo aingile mu lubansa lwe tempele, uyu muntu ayumfwile ukukanawaminwa ukuya ku cifulo cintu balepepelako. “Aiminino kutali, . . . lelo akunta fye pa cifuba cakwe, ati, Mwe Lesa, mukonsoloke kuli ne mubembu.” (Luka 18:13) Yesu atila, uyu muntu e wasenaminwe. Ubu bushinino bwa kuti Yehova Lesa cine cine afwaya ukwafwa ababembu abalapila mu kufumaluka.

Moneni ica kumwenako na cimbi ica mulumendo umwina South Africa uwe shina lya Paul. Ilyo ali umwaice, Paul alesangwa ku kulongana kwa Bwina Kristu na banyina. Lelo ilyo aile ku sukulu lya ku sekondari, atendeke ukubishanya na bacaice abashalekonka inshila sha kwa Lesa. Lintu apwile isukulu, aingile incito ya bushilika mu buteko bwafumineko ubwa kapaatulula ka nkanda  ubwa mu South Africa. Lyene, mu kupumikisha, umukashana wakwe aishilepwisha bucibusa bwabo. Iyi mikalile yabula ukwikusha yalengele Paul ukupopomenwa sana. Ebukisha ukuti, “Icungulo cimo napepele kuli Yehova no kulomba ukwafwa kwakwe, nangu cingati nshabalile mpepa kuli Lesa mu kufumaluka pa myaka iingi.”

Bwangu bwangu fye pa numa ya kupepa, banyina kwa Paul bamulaalike ukusangwa ku Cibukisho ca mfwa ya kwa Kristu icibako cila mwaka. (Luka 22:19) Cintu banyina Paul bacitile camoneke ukuibela kuli wene, apo alipumbwike kabili takwete ubuseko muli Baibolo. “Namwene kulya kulaalikwa ukuti kwali casuko kwi pepo lyandi kuli Yehova kabili natontonkenye ukuti mfwile ukucitapo cimo.” Ukufuma ilya nshita ukuya na ku ntanshi, Paul atendeke ukusangwa ku kulongana konse ukwa Bwina Kristu. Pa numa ya kusambilila Baibolo pa myeshi ine, alibatishiwe. Na kabili alekele ukusambilila pa fya buinjiniya no kusalapo ukubomba umulimo wa nshita yonse uwa kushimikila. Ilelo, Paul aba uwa nsansa, tapopomenwa pa lwa mikalile yakwe iya kale. Pa myaka 11 nomba, alibombela pa maofeshi yanono aya Watch Tower Society mu South Africa.

Cine cine Yehova Lesa mu kusenamina alomfwa amapepo kabili “aba kalambula wa bamufwayafwaya.” (AbaHebere 11:6) Mu kwangufyanya ubushiku ubukulu ubwa kwa Yehova bukesa kabili bukapwisha ububifi bonse. Pali ino nshita, Yehova aleyasuka amapepo ya bantu bakwe pa kubakosha no kubatungulula lintu mu kupimpa balebomba uyu mulimo wacindama. E ico, abengi ukufuma mu nko shonse baleisa mu cilonganino ca Bwina Kristu kabili balepaalwa ukupitila mu kwishiba Baibolo no ku kwishiba e kutungulula ku mweo wa muyayaya.—Yohane 17:3.

[Icikope pe bula 5]

Ipepo lya kwa Korneli ilya kufuma pa nshi ya mutima lyalengele ukuti umutumwa Petro amutandalile

[Icikope pe bula 6]

Amapepo yalyafwa abengi mu nshita sha kucula

[Ifikope pe bula 7]

Caliba fye bwino ukupepa ukuti Lesa atwafwe ukumfwikisha Baibolo

Abaupana kuti bapepa ukuti Lesa abafwe pa kuti icupo cabo cibe icakosa