Bushe Ishina “Umwina Kristu” Lileloshiwa Mumbi?

BUSHE ukubo Mwina Kristu cipilibula nshi? Kuti mwayasuka shani? Abantu bapusanapusana mu fyalo ifingi balipushiwe ico cine cipusho mu kupumikisha fye, kabili pa fyasuko fyabo pali ne fi:

“Ukukonka Yesu no kumupashanya.”

“Ukubo muntu musuma no kwakanyako bambi ifyo ukwete.”

“Ukupokelela Kristu nga Shikulu kabili Umupusushi.”

“Ukuya ku Minsa, ukusalika, no kupoka Imfumu.”

“Nshasumino kuti pa kuba Umwina Kristu kano waya ku calici.”

Nangu fye madikishonari yapeela amabupilibulo ayengi kabili ayapikana. Na kuba, dikishonari imo yakwata amabupilibulo 10 pa lwa numbwilo ya kuti “Abena Kristu,” ubupilibulo bwa kubalilapo butila “ukusumina atemwa ukuba mu mipepele ya kwa Yesu Kristu” no bwa kulekeleshako butila “umuntu umusuma nelyo uwapokelelwa.” Te ca kupapa ukuti abengi calibakosela ukulondolola fintu cipilibula ukuba Umwina Kristu.

Imimwene Yapusanapusana

Ilelo, umo kuti asanga ukutila abaitunga ukuba Abena Kristu, kumo fye na ba kuti bengila icalici limo line, bakwata imimwene yapusanapusana pa lwa fisambilisho pamo nga nampo Baibolo cine cine yalipuutwamo kuli Lesa, ukutunganya kwa kuti umuntu asangwike fye, ukuibimba kwe calici mu mashiwi ya calo, no kushimikilako bambi pa lwa cisumino cobe. Amalyashi yalanda pa lwa mibele, pamo nga ukuponya ifumo, ukulaalana kwa baume beka beka, ne fyupo fya kutolana fye, ilingi line yaleta ifikansa. Icilenga sana ubu bwafya kuba ne mimwene yapusanapusana.

Ku ca kumwenako, icilye ca ba Protestanti cimo, nomba line casuminishe ukusumbule nsambu isho icalici lyakwata “isha kusala kwa cinkumbawile ukwa kwa shimapepo uulaalana na baume banankwe pa kuti engaba mwi bumba likalamba ilya bashimapepo be calici,” e fyo ulupapulo lwa Christian Century lwashimike. Abasoma ifya mipepele bamo balanda fye no kutila nangu tautetekele muli Yesu kuti waisapusuka. Basumina ukuti abaYuda, abaShilamu, na bambi “kuti baya ku muulu [ukupala fye Abena Kristu],” e fyashimike ilyashi lyali mu nyunshipepala ya The New York Times.

Kuti mwatontonkanyapo shani nga ca kuti uwatemwa imfundo sha kwa Marx alelumbilisha kapitolizimu nelyo uwatemwa demokrasi alelumbilisha imitekele ya lucu, atemwa uusakamana ifilengwa na Lesa aletungilila ukubungaule miti? Kuti mwatila “Uyo muntu cine cine te kuti abe umukonshi wa kwa Marx nelyo te kuti abe kalumbilisha wa demokrasi kabili te kuti abe uusakamane ifilengwa na Lesa,” kabili nga ca kuti mwasosa ifyo fine ninshi mwalungika. Lelo, nga mwatontonkanya pa mimwene yalekanalekana iyo abantu baitunga ukuba Abena Kristu bakwata, kuti mwamona ifyo abene beka bapusana nga nshi kabili na fintu bapililika ifyo Yesu Kristu, Katendeka wa buKristu, asambilishe. Cinshi ici ciletulangilila pa buKristu bwabo?—1 Abena Korinti 1:10.

Amatukuto ya kufwaisha ukwalula ifisambilisho fya Bwina Kristu pa kuti fingalingana ne mifwaile yabo ni kale yatendeke, nga fintu twalamona. Ni shani Lesa na Yesu Kristu bayumfwa pa lwa kwalula kwa musango yo? Bushe amacalici yasambilisha ifisambilisho fipililika ifya kwa Kristu yalingile ukulaita ayene yeka ukuti ya Bwina Kristu? Aya mepusho yalayasukwa mu cipande cikonkelepo.