Inyimbo Ishitemuna Lesa

Inyimbo shalondololwa ukuti e “kulamuka ukwakokwesha kabili ukwa cifyalilwa apakalamba pa kulamuka konse ukusuma ukwabako.” Ukupala ululimi, inyimbo shaba bupe bwaibela ubwapusanya abantunse ukufuma ku finama. Inyimbo shilemya inkuntu. Shilomfwika bwino kabili tashilabwa bwangu. Ne cacila pali ifi fyonse, inyimbo kuti shatemuna Lesa.

NGA fintu Baibolo ilangilila, abena Israele balitemenwe inyimbo. Ukulingana na Unger’s Bible Dictionary, inyimbo shali “kulamuka kwalumbwike mu nshita sha pa kale isha Baibolo.” Apo ukwimba no kulisha ifilimba fyali mu mikalile ya cila bushiku na mu mipepele yabo fyalebamo. Lelo ukwimba mu mashiwi e kwalebomfiwa sana.

Imfumu Davidi yasontele abeminishi mu bena Lebi “pa mulimo wa kwimba” pe hema, ilyo ukukupawila kwe tempele lyakuulilwe no mwana wakwe Solomone kushilabako. (1 Imilandu 6:31, 32) Lintu icipao ca cipingo, icaleimininako ukubapo kwa kwa Yehova cafikile mu Yerusalemu, Davidi ateyenye aba mu bena Lebi “ku kwibukisha kabili ku kutootela no kutasha Yehova.” Baleimba ‘ne fipe fya mapango na bansango, . . . ne nyimbo mu malimba, . . . na mapenga.’ Aba baume ‘balipatwilwe mu mashina yabo, ku kutootela Yehova, pantu lwa muyayaya uluse lwakwe.’—1 Imilandu 16:4-6, 41; 25:1.

Ukwankulana kwa kuti “lwa muyayaya uluse [lwa kwa Yehova]” kumoneka imiku iingi mwi buuku lya Baibolo ilya Amalumbo, ilyabamo inyimbo ishingi. Ku ca kumwenako, mu Amalumbo 136 ulubali lwa cibili ulwa cikomo cimo na cimo ica mu fikomo 26 lulabwekeshiwa bwekeshiwapo muli ayo mashiwi. Uwasoma ifya Baibolo umo, mu kulanda pa lwa ili lumbo, atile: “Ukwipipa kwa fyebo ukwa muli ili lumbo kwalilenga cangukile abantu ukushimbula. Uuli onse uwalyumfwapo, kuti aliibukisha.”

Amashiwi ya pa muulu aya mu malumbo yalangilila ukuti ifilimba fyalebomfiwa sana. Ilumbo 150 mu kulunda pa myando lilalumbulapo  ne ntandala, insango, akaoma, icimpeta, na malimba. Nangu cibe fyo, icikomailwapo sana caba kubomfya ishiwi lya buntunse. Icikomo 6 cikonkomesha ukuti: “Lekeni icipema conse citashe Yehova. Aleluya!”

Apo inyimbo shilalangisha ukuyumfwa kwesu, icililishi mu nshita sha Baibolo calelenga abantu ukulembe nyimbo sha bulanda nelyo isha kubwekeshabwekeshapo. Nangu cibe fyo, inyimbo sha musango yu tashaleimbwa ilingi mu Israele. Encylopedia wa Baibolo uwa Insight on the Scriptures, * atila: “Mu nyimbo isha bulanda mweka emo basalile ukulaimba isha kubwekeshabwekeshapo ukucila ukwimba fye atemwa ukwalula amashiwi no kukomaila pa mashiwi yene yene.”

Yesu na batumwa bakwe aba busumino baimbile amalumbo kuli Yehova ubushiku lintu Yesu ashilafwa, kabili ukwabula no kutwishika balebwekeshapo amashiwi ya mu Amalumbo aya Hallel. (Amalumbo 113-118) Fintu ici cifwile cakoseshe abasambi ba kwa Yesu ukulolenkana ne mibele ya kulufya Shikulu wabo! Ne cacilapo, umupampamina wabo uwa kutwalilila nga babomfi ba busumino aba kwa Mulopwe Wasumbukisha uwa bubumbo, Yehova, ufwile walingilishiweko ilyo baimbile imiku isano amashiwi ya kubwekeshapo ayatila “pantu lwa muyayaya uluse lwakwe.”—Amalumbo 118:1-4, 29.

Abena Kristu ba mu kubangilila aba mu Efese na mu Kolose balimbile ‘isha malumbo ne sha kutasha kuli Lesa’ (amashiwi yabomfiwa yapilibula, “inyimbo sha kwa Lesa”). Kuli ishi nyimbo balundileko ne “nyimbo sha bumupashi” isha imbilwe mu mitima yabo. (Abena Efese 5:19; Abena Kolose 3:16) Ukupitila muli fyonse fibili inyimbo na mu kulanda, mu kulinga balibomfeshe utunwa twabo mu kutasha. Bushe Yesu talandile ukuti “ku bwingi bwa fya mu mutima e fyo akanwa kasosa”?—Mateo 12:34.

Inyimbo Ishifulwisha Lesa

Te nyimbo shonse ishalumbulwa mu Baibolo ishalesekesha Lesa. Tontonkanyeni pa cacitike pa Lupili lwa Sinai, palya Mose apokelele Amalango, ukusanshako na Amafunde Ikumi. Lintu Mose atentemwike ulupili, cinshi aumfwile? “Te congo ca bantu abalecimfya,” “te congo ca bantu abalecimfiwa,” lelo “congo ca bantu abaleimba.” Iyi mimbile yali iyaampana no kupepa utulubi, icibelesho icaishilebalamuna ubukali bwa kwa Lesa no kufumamo imfwa sha bantu nalimo 3,000 bakashika ba shilya nyimbo.—Ukufuma 32:18, 25-28.

Nangu ca kuti abantu kuti bashika, ukulisha, kabili no kuipakishe nyimbo isha musango onse, te nyimbo shonse ishisekesha Lesa. Mulandu nshi? Umutumwa wa Bwina Kristu Paulo alondolwele ukuti: “Pantu bonse nababembuka, kabili bapelebela ku bukata bwa kwa Lesa.” (Abena Roma 3:23) Imipepele ya cisenshi umwaba ukupupa ubufyashi, icifundisho ca mweo ushifwa, no kucindikisha Maria nga “nyina wa kwa Lesa” ilingi line fiba e mitwe ya nyimbo shashikwa. Lelo, ifi fisumino ne fibelesho filasaalula Lesa wa cine, pantu fyalipusana ne casokololwa mu Cebo cakwe icapuutwamo, Baibolo.—Amalango 18:10-12; Esekiele 18:4; Luka 1:35, 38.

Ukusala Inyimbo Mano Mano

Ukusala inyimbo pa nyimbo shapusanapusana ishingi kuti cabe cayafya. Inkupo isha matepu yakopwa shapangilwa ukucincisha bakashita ukushitako umusango uuli onse uwa nyimbo isha pali tepu. Lelo nga ca kutila umo ni kapepa wa kwa Lesa kabili alefwaya ukusekesha Lesa, akacenjela kabili akasalulula mano mano ukusengauke nyimbo baimbamo ne sho bashaimbamo ifisumino fya mipepele ya bufi nelyo ishikomaila pali bucisenene no kupupe fibanda.

Ababombele pa nshita imo mu Afrika muli bumishonari bwa Bwina Kristu ba Albert, basumine ukuti tabakwete sana inshita ya kulisha piyano mu cifulo balebombelamo. Nangu cibe fyo, libili libili balekutika ku maseleti yamo ayo baikwatile. Ba Albert balibwelelamo ku calo cabo, kabili pali lelo batandalile filonganino fya Bwina Kristu nga kangalila wenda. Tabakwata sana inshita ya kukutika ku nyimbo. Basosele abati: “Kashika wa nyimbo natemwisha ni Beethoven. Mu myaka yonse iyi, nalilonganika inyimbo isha misango misango isho aimba.” Ukukutikako kuli ishi nyimbo kulabaletela ubuseko bukalamba. Kwena, uuli onse aliikwatila nyimbo shintu atemwa, lelo nga Bena Kristu tulebukisha ukufunda kwa kwa Paulo ukwa kuti: “E ico nga mulelya nalimo mulenwa, nalimo conse ico mulecita, citeni fyonse ku kucindika Lesa.”—1 Abena Korinti 10:31.

 Inyimbo no Kuipeela

Ico Susie atemwishishe ni nyimbo. Susie atile: “Natampile ukulisha piyano lintu nali ne myaka 6, ukulisha violin lintu nali ne myaka 10, na pa kulekelesha ukulisha nsango ilyo nali ne myaka 12.” Pa numa Susie ailesambilila pa lwa nsango ku Royal College of Music iyabela mu London, ku England. Asambilile pa myaka ine no mwina Spain uwalumbuka mu kulisha nsango kabili alundileko umwaka na umbi uwa kusambilila ku Paris Conservatoire, no kukwata digiri mu kwimba pamo pene na badiploma ba kulalisha nsango no kusambilisha ukulisha piyano.

Susie atendeke ukubishanya ne cilonganino ca Nte sha kwa Yehova mu London. Mu cilonganino ali alimwenemo ukutemwana kwine kwine pa kati ka Nte. Mu kupita kwa nshita, ukutemwa Yehova ukwa kwa Susie kwalikulileko, kabili ukupimpa kwakwe mu mulimo kwalimucincishe ukufwaya inshila shintu engabombelamo Yehova. Ici camufishishe ku kuipeela no kubatishiwa. Susie atila: “Ukukonkelela imikalile ya kwimba inyimbo kwali kuipeela, e co kuli ine ubumi bwa kuipeela tacali ceni.” Inshita Susie alebomfya ku kwangala iciila yaliya ilecepelako ilintu aya mu kushimikila kwa Bwina Kristu ukwebako bambi imbila nsuma iya Bufumu bwa kwa Lesa mu kumfwila amakambisho ya kwa Yesu.—Mateo 24:14; Marko 13:10.

Apo Susie pali lelo apoose inshita inono ku nyimbo, ayumfwa shani? Atila: “Inshita shimo ndafuupulwako pa kukanaba ne nshita ya kubelesha ukwimba, lelo ncili ndalisha ifilimba fyandi no kuipakisha inyimbo. Inyimbo shaba bupe ukufuma kuli Yehova. Ndaipakisha inyimbo mu kucishamo pali nomba pantu nalitangisha umulimo wakwe mu bumi bwandi.”—Mateo 6:33.

Inyimbo Ishilumbanya Lesa

Ba Albert na Susie capamo ne Nte sha kwa Yehova shimbi mupepi na mamilioni 6 lyonse balalumbanya Yehova Lesa mu nyimbo. Pa kulongana kwa Bwina Kristu ukucitwa mu Mayanda ya Bufumu mu fyalo 234, uko cingacitika, batendeka no kwisalila ukulongana kwabo ne nyimbo isha kwimbila Yehova. Mu mashiwi ya shiko aya kushimpa na ya kubenda, ishi nyimbo ishisuma shabamo na mashiwi ayashimpwa pa Malembo ayalumbanya Yehova Lesa.

Bonse mwi bumba balasansula amashiwi yabo ukwimba mu cikabilila ukuti Yehova ni Lesa uusakamana (Ulwimbo 44). Balembo lwimbo ulwa kutasha Yehova (Ulwimbo 190). Ishi nyimbo shilanda pa lwa mabuseko ne fishingamo fya bumunyina bwa Bwina Kristu, imikalile ya Bwina Kristu, kabili ne mibele iya Bwina Kristu. Ukulunda pa busuma bonse ubu kwaba ne misango yalekanalekana iyo Inte ukufuma ku Asia, Australia, Europe, kabili na ku North America na South America shaimbilamo ishi nyimbo. *

Amashiwi ya kwiswila aya lwimbo lwakulisha ulwa bufumu ulwalembelwe mu nshiku sha kwa kemba wa malumbo yatila: “Imbeni kuli Yehova ulwimbo lupya, imbeni kuli Yehova, mwe ba pano isonde bonse; imbeni kuli Yehova, cindikeni ishina lyakwe; bileni ukupususha kwakwe akasuba na kasuba. Londolweleni ubukata bwakwe mu nko, ifipesha amano fyakwe mu bantu na bantu bonse.” (Amalumbo 96:1-3) Ifi e fintu Inte sha kwa Yehova shicita mu ncende mwabela, kabili shilemulalika ukuti mukembile pamo nabo ili lumbo. Bakamusengela pa Mayanda yabo aya Bufumu, apo mwingayasambilila ifya kulumba Yehova ukupitila mu nyimbo ishimusekesha.

[Amafutunoti]

[Icikope pe bula 28]

Ukwimbila Yehova Amalumbo