Bakacema ba Bwina Kristu, ‘Kusheni Imitima Yenu’!

“YEHOVA e mucemi wandi; nshibulwa.” Davidi alumbulwile ukucetekela kwa cine cine muli Lesa pa kubomfya ayo mashiwi. Yehova alimutungulwile, lwa ku mupashi, ku “mulemfwe uteku” na ku “menshi ayatekanya,” ukumutungulula “mu makuba ya bulungami.” Lintu ashingilwe na balemukaanya, Davidi alitungililwe no kukoseleshiwa, ifyamulengele ukulanda kuli Yehova ukuti: “Nshitiina bubi; pantu imwe muli pamo na ine.” Ukukwata Kacema Wakulisha uwa musango yu, Davidi ali no mupampamina wa “kwikala mu ng’anda ya kwa Yehova inshiku pe.”—Amalumbo 23:1-6.

Umwana wa kwa Lesa uwafyalwa eka na o alyumfwilepo fintu Yehova asakamana mu kutemwa, kabili mu kupwililika apashenye ukusakamana kumo kwine pa kubomba na basambi bakwe ilyo aikele pe sonde. E co Amalembo yamwita ati “umucemi musuma,” “umucemi wakulisha,” kabili “umucemi mukalamba.”—Yohane 10:11; AbaHebere 13:20; 1 Petro 5:2-4.

Yehova na Yesu Kristu balatwalilila ukucema ababatemwa. Ubucemi bwabo bulangishiwa, ku cipimo cimo, mu kupayanya kwabamo kutemwa ukwa bakacema banono mu cilonganino. Paulo alelanda na ba bakacema banono ilyo atile: “E ico muleyangwa mwe bene no mukuni onse uo Umupashi wa mushilo wamubikileko bucilolo; akucemeni ulukuta lwa kwa Shikulu ulo anonkeele mu mulopa wakwe wine.”—Imilimo 20:28.

Ukucemo mukuni mu kukonke icipasho cintu Yehova na Kristu Yesu batubikila te mulimo wayanguka, lelo calicindamishapo nomba ukucila na kale. Tontonkanyeni pa Nte ukucila pali milioni umo ishabatishiwa mu myaka itatu iyapita! Aba bapya tabakwata icikulilo ca ku mupashi icifuma mu kubomba pa myaka iingi. Kabili tontonkanyeni pa Nte abacili abana nelyo abapungwe. Bakabila ukusakamanwa te ku bafyashi babo beka lelo kabili na kuli bakacema banono aba mu cilonganino.

Na kabushe, Umwina Kristu uuli onse kuti aba na mafya, ukusanshako no bwafya bwa kukonkelesha bambi. Bonse tulingile kushomboka pa kucincintila ukusonga kwa maka ukwa kukonkelela imikalile ya mu calo iya kuiposaika. Mu fyalo fimo, bakasabankanya ba Bufumu napamo kuti bafuupulwa pa mulandu wa kuti abantu balakaana ukukutika ku bukombe bwabo. Bakasabankanya abengi baba na mafya ya kulwalilila. Amafya ya ndalama nalimo kuti yalenga bamo ukufubaalila mu kufwaya Ubufumu intanshi. Cine cine fye, ifwe bonse—ukusanshako na bakokola mu cine—tukabila kabili twalilinga ukwafwiwa na bakacema baba no kutemwa.

Ukukuntwa Kwalinga

Abena Kristu ba mu mwanda wa myaka uwa kubalilapo balikonkomeshiwe ukuti: ‘Kusheni imitima yenu’! (2 Abena Korinti 6:11-13) Baeluda ba Bwina Kristu kuti bacita bwino ukumfwila uku kufunda mu mulimo wabo uwa bucemi. Ni shani fintu bengacite co? Kabili ni shani pa lwa babomfi batumikila, ubwingi bwabo abaleenekelwa ukwisaba bakacema?

Pa kuti baeluda ba Bwina Kristu bengaba lipaalo ku mukuni, icilingile ukubakunta te kufikilisha incito fye. Bafundwa ukuti: “Cemeni umukuni wa kwa Lesa uuli kuli imwe, ukuumona, te ku kupatikishiwa lelo ku kuitemenwa; te ku kumwenamo ubunonshi bwa nsoni, lelo ku kucincila kwa mutima.” (1 Petro 5:2) E co ubucemi busuma busanshamo ukuitemenwa no kucincila mu kubombela bambi. (Yohane 21:15-17) Cipilibula ukumona ukukabila kwa mpaanga kabili ukulayankula kuli kwene mu kampampa. Cipilibula ukulangisha imibele isuma iya Bwina Kristu  iyaishibikwa nge fisabo fya ku mupashi ifya kwa Lesa ilintu tulebomba na bambi.—Abena Galatia 5:22, 23.

Ubucemi limo limo busanshamo ukutandalila bamunyina mu mayanda yabo. * Lelo bakacema ‘abakusha imitima yabo’ balaipeelesha abene. Uko e kuti, balabomba ne fyacila fye pa ifipempu fya bucemi. Balashukile nshita iili yonse ku kucema bambi ababa mu mukuni.

Ukukansha Bambi Ukuba Bakacema

Munyina uuli onse, te mulandu no mushinku, “nga atinamina bucilolo, mulimo usuma afwaya.” (1 Timote 3:1) Ababomfi batumikila abengi balilangisha ukuitemenwa ukufikapo ku milimo yalundwako. Na pa kucite ifyo, baeluda balaitemenwa ukwafwa aba bamunyina baitemenwa ukutendeka ukubombako uyu mulimo pa “kutinamina bucilolo.” Ici cilepilibula ukubakansha pa kuba bakacema basuma.

Pa mulandu wa kukakatila sana ku fipimo fyasumbuka ifya kwa Lesa, icilonganino ca Bwina Kristu ica kwa Yehova tacanashiwa na bakacema ba bufi kwati ni balya balondololwa pali Esekiele 34:2-6. Aba bakacema ba bufi baali abasenukwa mu menso ya kwa Yehova kabili ici cali calungama. Mu cifulo ca kuliisha umukuni, baleiliisha abene. Balifililwe ukukoselesha ishanaka, ukundapa ishalwala, ukukaka ishafunika, atemwa ukubwesha ishapaswa nangu ukufwaya ishaluba. Mu kubomba nge mimbulu ukucila nga bakacema, balititikishe impaanga. Impaanga shalekeleshiwe shalisalangene, no kulalulumbalulumba fye apabula uwa kushisakamana.—Yeremia 23:1, 2; Nahumu 3:18; Mateo 9:36.

Ukupusanako kuli balya bakacema babulwo busumino, bakacema ba Bwina Kristu balakonke ca kumwenako ca kwa Yehova. Balatungulule mpaanga ku “mulemfwe uteku” uwa ku mupashi na ku “menshi ayatekanya” aya ku mupashi. Balatukuta ukutungulule mpaanga “mu makuba ya bulungami” ukupitila mu kushafwilisha ukumfwikisha Icebo ca kwa Yehova kabili no kucibomfya mu bumi bwa shiko. Kuti bacite ci bwino bwino pantu baba “abakampuko kusambilisha.”—1 Timote 3:2.

Ukusambilisha kwa baeluda ilingi line kucitilwa pa cisebele mu kulongana kwa cilonganino. Nangu cibe fyo, baeluda balasambilisha no muntu umo umo. Kwena, bamo balikampuka mu misambilishishe ya umuntu umo umo, bambi nabo bakwate ca bupe ca kulanda amalyashi. Lelo ukukanalamuka mu lubali lumo lwa kusambilisha te lyonse kwingalenga umo ukukanafikapo nga kasambilisha. Baeluda balasambilisha pa kubomfya inshila shonse shintu baishiba, ukusanshako no kucema. Limo limo ubucemi bucitwa lintu bwatantikilwa libela, ku ca kumwenako, pa kutandala ukwateyanishiwa libela. Lelo ilingi line ubucemi kuti bwabombwa na mu kukanatantikila libela, na co cine cabe ca bunonshi apakalamba.

Bakacema Kabili Bakasambilisha Inshita Yonse

Dokota akabila ukwishiba no kubelesha pa kubombe ncito yakwe. Lelo cintu abalwele batashako kuli dokota ca kubalange cikuuku, ukubalangulukilako, ukubangwa no kubatemwa mu kufumaluka. Iyi mibele eyo dokota alingile ukukwata. Imibele iyapalako eyo kasambilisha musuma kabili kacema alingile ukukwata, na kabili ilingile ukuba lubali lwa mikalile yakwe iya cila bushiku. Kasambilisha umwine mwine alaiteyanya ukusambilisha abo ali nabo inshita yonse lintu cakabilwa. Amapinda 15:23 yatila: “Icebo, ifyo cawama mu nshita iyene ya ciko!” “Inshita iyene” napamo kuti yaba lintu umo alelanda pa cisebele, ilyo aleshimikila ku ng’anda ne ng’anda, atemwa lintu alelanshanya na umbi mu Ng’anda ya Bufumu nangu pa telefoni. Mu nshila imo ine, kacema musuma alatukuta ukulangisha imibele iisuma, iya kwangwako pa nshita yonse, te lintu fye ali pa cipempu ca bucemi. Pa kuba ‘nakusha umutima wakwe,’ alashukile inshita iili yonse iya kucema impaanga, ukubapeela ukusakamana uko bakabila mu nshita yalinga. Ici e cimupango ukuba uwatemwikwa mu menso ya mpaanga.—Marko 10:43.

Ba Wolfgang, pali nomba ni baeluda, bebukisha inshita lintu umubomfi utumikila umo pamo no mukashi wakwe baishileisha ku  myabo. Batile: “Abana besu balitemenwe ifyo babasakamene ne fyo twaipakishe capamo. Bacili balalandapo.” Icine cine, uyu mubomfi utumikila alilangilile ukuti alasakamana; ‘alekusha umutima wakwe.’

Na mumbi umwa ‘kukushisha umutima wa umo,’ ni mu kupempula abalwele, ukubalembelako ifyebo ifipi ifya kukoselesha, atemwa ukubatumina telefoni—icili conse ica kubeshibisha ukuti mulabangwako! Itemenweni ukubafwilishako ilintu bakabila. Nga ca kuti balefwaya ukulanda, kutikisheni. Landeni pa fintu ifya kukoselesha, imibombele ya teokrasi iya kucincimusha iya mu cilonganino ca pa mwenu kabili ne ya ku filonganino fimbi. Bafwilisheni ukutontomesha pa nshita ya ku ntanshi iishaiwamina iyabikilwa abo batemwa Yehova.—2 Abena Korinti 4:16-18.

Mu Kulunda pa Fipempu fya Bucemi

Ukwibukisha imifwaile ya bucemi, takuli kutwishika ukuti ukuya mu bucemi bwa tantikilwa libela mu mayanda ya bamunyina, nangu calicindama, caba fye lubali ulwa fintu fyabimbwamo. Kacema waba no kutemwa ‘alakusha umutima wakwe,’ pa kuba uutununukwa mu mibele yonse kabili na pa nshita iili yonse. Bucibusa bwapalamisha buntu alundulula na bamunyina bushininkisho bwa kuti mu nshita sha busanso, tabafwile kutiina icabipa, ukwishibo ukuti munyinabo  uwabatemwa, kacema wa Bwina Kristu, alabasakamana.—Amalumbo 23:4.

Kanshi, imwe bonse bakacema ba Bwina Kristu ‘kusheni imitima yenu.’ Langisheni ukutemwa kwafumaluka kuli bamunyinenwe—bakoselesheni, bapembesuleni, bakuulilileni lwa ku mupashi mu nshila iili yonse mwingacite co. Bafwilisheni ukuba abashangila mu citetekelo. (Abena Kolose 1:23) Impaanga ishipeelwa kuli bakacema ba Bwina Kristu ‘abakushe mitima yabo,’ tashakabulwe kantu. Shikafwaisha ukwikalilila mu ng’anda ya kwa Yehova inshiku pe nga fintu Davidi acitile. (Amalumbo 23:1, 6) Ici cine fye e cifwaisha kacema wa kutemwa.

[Futunoti]

[Akabokoshi pe bula 30]

Bakacema ba Bwina Kristu

• Babomba mu kucincila na mu kuitemenwa

• Balaliisha no kusakamana umukuni

• Balafwilisha bambi ukufikapo ku kuba bakacema

• Balapempula abalwele no kubasakamana

• Baliba abaibukila ukwafwa bamunyinabo lyonse

[Ifikope pe bula 31]

Cibe ni mu mulimo wa mwi bala, pa kulongana, atemwa pa kwisha fye, baeluda lyonse baba ni bakacema