Ifipusho Ukufuma ku Babelenga

Muli Esaya Icipandwa 53 mwabamo ulubali lwa kusesema ukwaishibikwa sana ukwa kwa Mesia. Esa 53 Icikomo 10 citila: “Yehova atemenwe ukumufwante cibi, amulengo bucushi.” Cinshi cintu ici cipilibula?

Cili icayanguka ukumona umulandu pali Esaya 53:10 pengemine cipusho. Abena Kristu ba cine tabengatontonkanyo kuti Lesa wesu uwa cililishi kabili uwa nkumbu kuti ‘atemwo kufwanto uli onse nelyo ukumulengo bucushi.’ Baibolo yalitupeela apashimpwa ukucetekela kwa kuti Lesa tabekelwa mu kulungulusha abantu ba kaele. (Amalango 32:4; Yeremia 7:30, 31) Pa myaka iingi Yehova pa nshita shimo napamo alisuminisha ukucula pa milandu iyaba mu kumfwana na mano yakwe no kutemwa. Lelo mu kushininkisha te walengele Umwana wakwe uwatemwikwa, Yesu ukucula. E co, cinshi cintu ici ciputulwa cipilibula?

Kwena, kuti twayafwilishiwa ukwishiba ubupilibulo nga twalolesha pa cikomo conse, ukumona ukubomfiwa kwe shiwi lya kuti “atemenwe” no “kubekelwa.” Pali Esaya 53:10 pabelengwo kuti: “Yehova atemenwe ukumufwante cibi, amulengo bucushi; ilyo mukacito mweo wakwe ube ilambo lya pa lubembu, akamono bufyashi, akatantalishe nshiku shakwe, ne ca kubekelwa ca kwa Yehova cikafukila mu kuboko kwakwe.”

Ubukombe bonse ubwaba muli Baibolo bulangilila ukuti “ica kubekelwa ca kwa Yehova,” icilumbwilwe pa mpela ya cikomo, cashimpwa pa kupwishishisha imifwaile yakwe ukupitila mu Bufumu. Ico Yehova acitile cikebela bumulopwe bwakwe kabili cikalenga ulubembu lwapyanwa—e kuti ulubembu lwesu ukufumishiwa pa bantunse abacumfwila. (1 Imilandu 29:11; Amalumbo 83:18; Imilimo 4:24; AbaHebere 2:14, 15; 1 Yohane 3:8) Inkaama kuli ici conse ya kuti Umwana wa kwa Lesa aali no kwisasanguka umuntunse no kupeela ilambo lya cifuta mulandu. Nga fintu twaishiba, mu kucite fyo, Yesu aliculile. Baibolo itwebo kuti “asambilile icumfwila kuli ifyo aculileko.” E co Yesu alimwenenemo muli kulya kucula.—AbaHebere 5:7-9.

Yesu aalishibiile kabela ukuti umulimo ukankaala untu aalefwaya ukubomba wali no kusanshamo ukushikitika. Ici calimonekesha pali Yohane 12:23, 24, apo tubelenga ukuti: “Yafike nshita iya kuti acindamikwemo Umwana wa muntu. Ndemwebe cine cine, nati, ngo luseke lwa ngano taluponene mu mushili no kufwa, lwikala ulwine lweka; lelo nga lwafwa, lutwale fisabo ifingi.” Cine cine, Yesu alishibe ukuti alingile ukuba na bumpomfu ukufika fye na ku mfwa ya kucushiwa. Icalembwa citwalilila ukutwebo kuti: “Nomba umutima wandi wasakamikwa. Nga ndesosa shani? Bushe nsose, nati, Tata, ntuuleni ku nshita ino? Lelo ni pali ici e co naishila ku nshita ino. Ndetila, Mwe Tata, cindikeni ishina lyenu. E lyo kwafumine ishiwi mu muulu, aliti, Nindicindika, na kabili nkalicindika.”—Yohane 12:27, 28; Mateo 26:38, 39.

Muli iyi nshila e mo twingomfwila Esaya 53:10. Yehova alishibe bwino ukuti ifyo Umwana wakwe aali no kupitamo fyali no kusanshamo ukufwantwa mu nshila imo. Lelo, Yehova alibekeelwe muli ico pa mulandu wa kuti amwenene libela ica kufumamo ca bukata. Muli yo nshila Yehova ‘atemenwe ukufwanta’ Mesia. Kabili Yesu na o abekeelwe mu cintu aali no kwisapwilikisha na cintu aishilepwilikisha. Cine cine, nga fintu Esaya 53:10 asondwelela, ‘ica kubekelwa ca kwa Yehova califukiile mu kuboko kwakwe.’