Ukuya mu Kubombela ku Fishi Fyaba pa Pacific!

 ABAYENDO baali umwa kutuushisha pa kulolela indeke pa fibansa fikalamba ifya ndeke mu Brisbane na Sydney, mu Australia, balicincimwike sana. Ibumba lya bantu 46 lyali no kunina indeke ukuya ku Samoa uko akasuba kalotoka sana ku kuyakumana na bambi 39 abafumine ku New Zealand, Hawaii, na ku United States. Ifipe basendele fyaliibelele nga nshi, ifyafulilemo fisolobelo, pamo nga basando, basoo, ne fya kutulilako, ifyapusanako ku fyo umo ilingi asenda pa lwendo lwa kuya ku cishi cishaiwamina ica pa Pacific. Lelo kwena, ulwendo lwabo lwaliibelele nga nshi.

Pali ulu lwendo, babomfeshe indalama shabo kabili bali no kuyabomba pa milungu ibili ukwabula ukulipilwa apo bali babomfi ba kuitemenwa aba mulimo wa bukuule uwangalilwa na maofeshi ya Bainjiniya ba Makuule muli ici citungu ayabela pa maofeshi yanono aya Nte sha kwa Yehova mu Australia. Uyu mulimo wafwilishiwa ne misangulo ya kuitemenwa, usanshamo ukukuula Amayanda ya Bufumu, Ifiyanda fya Kulonganinamo, amayanda ya bamishonari, amaofeshi yanono aya Watch Tower nelyo aya bakapilibula aya kubombela ifilonganino fya Nte sha kwa Yehova ifilelunduluka nga nshi mu fishi fya pa Pacific. Natumone ababomfi bamo aba mu mabumba yalekuula Amayanda ya Bufumu mu fyalo fyabo.

BaMax, abapaalika imitenge, ba ku Cowra mu New South Wales, ku Australia. Balyupa kabili bali na bana 5. BaArnold bafuma ku Hawaii. Bene na bakashi babo bakwata abana babili, kabili ni bapainiya, nelyo abatumikishi ba nshita yonse. BaMax, na baArnold ni baeluda ku filonganino fya ku mwabo. Ukwabula ukutwishika, aba baume pamo na babomfi abengi, tababomba umulimo wa kuitemenwa pa mulandu wa kuti balikwata sana inshita. Lelo bene ne ndupwa shabo balimona ukuti kuli ukukabila, kabili balefwaya ukwafwilishako ukufika apapelele amaka yabo.

Ababomfi Ukufuma ku Fyalo Ifingi Babomba Umulimo Wacindama

Icifulo cimo uko imibombele no kulamuka kwabo fyalekabilwa ni ku Tuvalu, icalo ca ku Pacific umwikala abantu mupepi na 10,500, icabela ukutali pa fishi 9 ifya mupepi na equator pa kati ka kapinda ka ku kuso na ku masamba ya Samoa. Cila cishi cakula ukufika ku masikweya kilomita 2.5. Ilyo calefika mu 1994, Inte 61 isha kulya shalekabila Ing’anda ya Bufumu na maofeshi ya bakapilibula ayakalamba mu kwangufyanya.

 Muli iyi ncende yakabisha iya ku Pacific, ifikuulwa fikabila ukukosa sana pa kuti tafiwile ku mfula ya citalawe ne nkuuka shabipisha. Lelo pa fishi tapaba sana ifisolobelo ifisuma ifya kukuulila. Cinshi bacitile pa kupwisha ubu bwafya? Ifisolobelo fyonse pamo nga malata na makapuloshi, ifipuna na maketani, ifya mu cimbusu, utwa kukwika ku mipaipi ya menshi ya kusamba, amanati ne misomali fyafumine ku Australia.

Ilyo ifisolobelo fishilafika, akalibumba kanono akabangilile ukufika kawemye icifulo ca kukuulapo no kubika umufula. Lyene ababomfi ukufuma ku fyalo fyalekanalekana balishilekuula, bapenta no kubikamo fyonse ifyalekabilwa mu fikuulwa.

Mu Tuvalu, iyi mibombele yakalifye shimapepo wa mulya mwine uwabilishe pa wailesi ukuti Inte shilekuula “Ulupungu lwa Babele”! Lelo, bushe cali shani? BaGraeme, ababomfi ba kuitemenwa batila: “Ilyo abalekuula Ulupungu lwa Babele ulwalandwapo mu Baibolo bafililwe ukumfwana lintu Lesa afulungenye indimi shabo, balilekele ukukuula kabili ulupungu talwapwile.” (Ukutendeka 11:1-9) “Lelo capusanako ilyo tulebombela Yehova Lesa. Umulimo lyonse ulapwa te mulandu no kupusana kwa ndimi ne fikulilo.” No yu wine mulimo walipwile mu milungu fye ibili. Abantu 163, pamo no mukashi wa kwa cilolo mukalamba mu buteko balisangilweko ku kupeelwa kwa fikuulwa.

BaDoug ba kangalila wa bukuule balandile pali ci ca kukumanya ati: “Twalisekelele ukubomba na babomfi ba kuitemenwa ukufuma ku fyalo fimbi. Imibombele yesu yalipusanapusana, amashina twitilamo ifintu yalipusanapusana, ne fintu tupima mu nshila shapusanapusana, lelo pali fi tapali icaletele ubwafya.” Apo balibomba sana imilimo ya bukuule iya uyu musango, balundapo kuti: “Ici cilanenga ukushininwa sana ukuti nga pali ukwafwa kwa kwa Yehova abantu bakwe kuti bakuula icikuulwa ukuli konse pano calo, te mulandu na kuntu bali nelyo amafya ya kuli ico cifulo. Ca cine, twalikwata abaume balamuka abengi sana, lelo umupashi wa kwa Yehova e ulenga ukuti tutunguluke.”

Umupashi wa kwa Lesa na kabili ulenga indupwa sha Nte isha pa cishi ukupekanya ifya kulya no mwakusendama, nangu ca kutila kuli bambi uko kuba kuipusula sana. Kabili abo abapokelelwa bwino muli yo nshila balatasha sana. BaKen, ukufuma ku Melbourne, mu Australia, ababombele pa makuule ya musango yu mu French Polynesia batila: “Twaishile nga basha, lelo twalesungwa nge shamfumu.” Limo, Inte shabela muli iyo ncende, shilabombako umulimo wa kukuula. Mu fishi fya Solomon Islands, abanakashi balepindula indaka ku minwe. Abaume na banakashi 100, balenina impili shalokelemo ne mfula ishitali no kusenda amatani 40 aya mbao. Na bacaice na bo balebombako. Umubomfi umo ukufuma ku New Zealand ebukisha ukuti: “Munyina wacaice uwa pa cishi alesenda imifuko ya sementi ibili nangu  itatu pa muku umo. Kabili alelaisha insakalabwe akasuba konse, mu kasuba na mu mfula.

Mwaliba ubusuma na bumbi mu kubombela pamo ne Nte sha ku ncende kuli ubukuule. Aba kwi ofeshi lya Watch Tower Society ilya ku Samoa bashimika ukuti: “Bamunyina ba pa cishi balisambilila imilimo ingabafwa ukukuula no kuwamya Amayanda ya Bufumu e lyo no kukuula cipya cipya ifikuulwa pa numa ya nkuuka. Na kabili kuti bayafwiwa ukusanga umwakuliila mu bwikashi umo cishayanguka ukucite co.”

Umulimo wa Bukuule Washimikila Bwino

BaColin bali mu Honiara kabili bamwene Iciyanda ca Kulonganinamo cilekuulwa. Apo calibasekeshe, balembele aya mashiwi kwi ofeshi lya Watch Tower ati: “Bonse balikatana kabili tabakwata icipyu, na kabili baba fye ngo lupwa lumo.” Pa numa fye ya ico, ilyo baile ku mushi ku myabo ku Aruligo, apalepa bakilomita 40 ukufuma ku Honiara, bene no lupwa lwabo bakuulile Ing’anda ya Bufumu iyabo. Lyene batumine ubukombe na bumbi kwi ofeshi ati: “Twalipwisha ukukuula Ing’anda yesu iya Bufumu ne tebulo lya kwa kalanda epo lili, e co, bushe kuti twatendeka ukulalonganina kuno?” Mu kwangufyanya balibateyanishishe kabili abantu ukucila pali 60 balalongana lyonse.

Impanda mano ya kabungwe ka European Union yalimwene ubukuule mu Tuvalu. Yaebele umubomfi umo ati: “Ninjishiba bonse balamwebapo ici, lelo, kuli ine ico mulecita cipesha mano!” Umwanakashi ubombela apafikila amafoni aipwishe umubomfi waletandala ukuti: “Cinshi bonse musansamukile? Pakabile na se!” Tababalile abamonapo ifyo ubuKristu bubomba mu nshila ya cine cine kabili mu kuipeelesha filya.

Ukuipusula Ukwabula Ukulangulushiwa

Pali 2 Abena Korinti 9:6, Baibolo itila: “Uutanda alefusha, akaseepe fyafula.” Ababomfi, indupwa shabo, ne filonganino baletwalilila ukutanda ukwabula akaso ilyo baleyafwilisha Inte shinabo pa fishi fya pa Pacific. BaRoss, baeluda ukufuma ku Kincumber, mupepi na ku Sydney, batila: “Icilonganino nabamo, calisangwilileko indalama mupepi na hafu wa shalekabilwa ku kwendela, kabili bukwe bwandi uo twaishile nankwe ansanshishepo ba dola 500.” Umubomfi umbi ashitishe motoka wakwe pa kuti asange isha kwendela. Umbi na o ashitishe impanga yakwe. BaKevin balibulishepo ba dola 900, e co bashitishe inkunda 16 isha myaka ibili. Umwishibishi wabo, abafwile ukusanga uwa kushita uwatile kuti ashita pali ba dola 900 abulishe!

Ilyo baipwishe BaDanny na BaCheryl nga calilingile ukupoosa ba dola 6,000, ku kwendela pamo na ku fipooswa fimbi. Bayaswike ati: “Ee! Nangu fye nga twapoosele ba dola 12,000 nga calilingile sana.” BaAlan ukufuma ku Nelson, mu New Zealand, balundapo ukuti: “Indalama napoosele pa kuya ku Tuvalu, nga kuya ku Europe, nga shalikumene no kushalapo. Lelo, bushe nga nalikwete amapaalo, nelyo ifibusa ifingi ifya fikulilo fyapusanapusana, nelyo ukuipusula pa kuti ngafwe bambi? Iyo! Lelo, kwena, conse ico napeele bamunyina ba pa cishi, balimbweseshe no kucishapo.”

Cimbi icalenga ukuti umulimo utunguluke kwafwa kwa lupwa. Nangu line bamo balaya na bakashi babo ababombako ne ncito pa bukuule, bamo balashala balesakamana abana baya ku sukulu no kubombako imilimo imbi iya lupwa. BaClay batila, “ukuitemenwa kwa mukashi wandi ukwa kusakamana abana na ba mu ng’anda ilyo nafuminepo kwalicilile sana pa kuipusula kwandi.” Cine cine, abaume bonse abaupa abashaile na bakashi babo kuti basumine co ukufuma pa nshi ya mutima!

Ukutula apo ubukuule bwapwila mu Tuvalu, ababomfi ba kuitemenwa balikuula Amayanda ya Bufumu, Ifiyanda fya Kulonganinamo, amayanda ya ba mishonari, na maofeshi ya bakapilibula mu Fiji, Tonga, Papua New Guinea, New Caledonia, na mu fifulo fimbi. Pali ino nshita kuli amapekanyo ya kukuula amakuule ukusanshako na ya pa kati ka kapinda ka kulyo na kabanga ka Asia. Bushe kukaba ababomfi abengi?

Cilemoneka kwati tapakabe bwafya. Aba kwi ofeshi lya Watch Tower ku Hawaii balemba ukuti, “Bonse kuno ababombeleko umulimo wa bukuule mu fyalo fimbi, balipusha ukuti bakabete na kabili nga kwaba amapekanyo ya kukuula. Nga bafika fye ku mwabo, balatendeka ukusunga indalama sha kubomfya ukuya kumbi.” Bushe umulimo wa bukuule kuti wakana shani ukubombwa bwino ilyo pali ipaalo lya kwa Yehova no kuipeelesha kwabula bukaitemwe ukwapala uku?

[Icikope pe bula 9]

Ifisolobelo Fya Kubomfya pa Bukuule

[Ifikope pe bula 9]

Ibumba lya babomfi pa cifulo ca bukuule

[Ifikope pe bula 10]

Ilyo ubukuule bwapwile, twalisekelele pa fyo umupashi wa kwa Lesa wapwishishishe