Baeluda—Kansheni Bambi Ukusenda Icisendo

MU FILONGANINO fyonse ifya Nte sha kwa Yehova mwi sonde, mulekabilwa sana abaume bengabomba bukangalila. Kuli ifintu fitatu ifilengele ukuti kube uku kukabila.

Ica ntanshi, Yehova alefisha ukulaya kwakwe ukwa kulenga ‘uwacepa ukuba uluko lwakosa.’ (Esaya 60:22) Ku cikuuku cakwe ica pa fye, abasambi bapya nalimo milioni umo balibatishiwa ukuba Inte sha kwa Yehova mu myaka itatu iyapita. Abaume bacetekelwa balekabilwa ku kwafwilisha aba babatishiwe fye nomba line ukulunduluka no kufika pa kukosoka kwa Bwina Kristu.—AbaHebere 6:1.

Ica bubili, bamo ababomba bueluda pa myaka iingi balefilwa ukubomba incito sha cilonganino pa mulandu wa bukote no kulwala.

Ica butatu, baeluda bamo aba Bwina Kristu abapimpa balebombela nomba na mu Makomiti ya Kumfwaninamo ne Fipatala, mu Makomiti ya Makuule aya mu Fitungu, nelyo mu Makomiti ya Fiyanda fya Kulonganinamo. Limo limo pa kuti fye babombe bwino balashiila bambi ukubomba imilimo imo baalebomba mu filonganino babamo.

Kuti caba shani pa kuti abaume bafikapo abalekabilwa nga nshi basangwe? Kano fye kwaba ukukansha aba musango yo. Baibolo ikoselesha bakangalila ba Bwina Kristu ukukansha ‘abantu ba cishinka abengasambilisha na bambi.’ (2 Timote 2:2) Ukukansha kusambilisha nangu ukufunda umuntu ukuti abe uwalinga, uwafikapo nelyo uwalamuka. Natumone ifyo baeluda bengakansha abaume bambi abafikapo.

Pashanyeni Yehova

Ukwabula no kutwishika Yesu Kristu ali uwalinga, uwafikapo kabili uwalamuka mu mulimo wakwe, kabili icalengele ukuti abe fyo cintu cayeba! Akanshiwe na Yehova Lesa umwine. Finshi fyalengele ukuti ukukanshiwa kwakwe kube ukwafikapo? Yesu alumbula ifintu fitatu, nga fintu fyalembwa pali Yohane 5:20 ukuti: “Wishi [1] atemwo Mwana, kabili [2] amulanga fyonse ifyo umwine acita. Ne [3] milimo iyacisha ifi akamulanga.” Ukubebeta ifi fishinka cimo cimo kuti kwatwafwa ukumfwikisha uyu mulandu wa kukansha.

Moneni ukuti Yesu abalilapo ukusosa ati: “Wishi atemwo Mwana.” Ukutula fye pa kulengwa, Yehova ni cibusa mwine mwine ku Mwana wakwe. Amapinda 8:30, 31 yalatwebako ulwa ubu bucibusa ati: “E po nali [ine ne Yesu] mupepi na kuli wene [Yehova Lesa], umwana wa kulelwa, nali ica kupekelwa cakwe ubushiku no bushiku, uwaleangala ku cinso cakwe mu nshita shonse.” Yesu taletwishika ukuti Yehova ‘alepekelwa muli wene.’ Kabili Yesu tafishile kusekelela aumfwile ilyo alebombela pamo na Wishi. Ala cilawama ilyo baeluda ba Bwina Kristu na bantu balekansha baba ifibusa fine fine!

Ica bubili ico Yesu alumbwile ca kuti Wishi “amulanga fyonse ifyo umwine acita.” Aya mashiwi yaumfwana ne calembwa pa Amapinda 8:30, ica kuti, Yesu ‘ali mupepi’ na Yehova ilyo fyonse fyalelengwa. (Ukutendeka 1:26) Baeluda kuti bapashanya ici ca kumwenako cisuma pa kubombela pamo na babomfi batumikila, ukubalanga ifyo bafwile ukufikapo ukubomba imilimo yabo. Lelo te babomfi batumikila fye abapya abalingile ukulakanshiwa. Ni shani pali balya bamunyinefwe ba busumino abatinamina bucilolo pa myaka iingi lelo abashasontwa? (1 Timote 3:1) Baeluda bafwile ukufunda aba baume ukufunda kwa kulungatika pa kutila beshibe umo balingile ukuwamyako.

 Ku ca kumwenako, umubomfi utumikila kuti aba uwashintililwapo, uubangilila, kabili uwangwa imilimo yakwe. Kabili kuti aba kasambilisha musuma. Kuti alebomba fye bwino imilimo iingi mu cilonganino. Lelo, napamo te kuti akutuluke ukuti taba ne cikuuku ku Bena Kristu banankwe. Baeluda bakabila ukulango “bufuuke bwa mano.” (Yakobo 3:13) Bushe tacili cikuuku eluda nga alanda no yo mubomfi utumikila, ukumulondolwela bwino ubwafya, ukumupeela ifya kumwenako fya kulungatika, no kumweba ifyo engawamyako? Nga ca kuti eluda ayangwo ‘kulungamo umucele mu mifundile yakwe,’ uulefundwa akomfwila kulya kufunda. (Abena Kolose 4:6) Ca cine, umubomfi utumikila akalenga umulimo wa kwa eluda ukucilapo ukuwama nga ali uwaitemenwa ukumfwila ukufunda konse uko afundwa.—Amalumbo 141:5.

Mu filonganino fimo, baeluda lyonse balakansha ababomfi batumikila mu fyo bengabomba. Ku ca kumwenako, balasenda ababomfi batumikila abafikapo ilyo baletandalila abalwele nelyo abakote. Ici cilenga ababomfi batumikila ukubelesha ubucemi. Ca cine, fingi ifyo umubomfi utumikila engacita ku kulundulula ukukula kwakwe ukwa ku mupashi.—Moneni umukululo uli pe samba uuleti “Ifyo Ababomfi Batumikila Bengacita.”

Ica butatu icalengele ukusambilisha kwa kwa Yesu ukuba ukwafikapo ca kuti ilyo Yehova alemukansha alimukwatile umulimo alefwaya ukuti akabombe. Yesu alandile ulwa kwa Wishi ukuti akalanga Mwane “milimo iyacisha ifi.” Ifyo Yesu apitilemo pano isonde fyamulengele ukulundulula imibele ali no kubomfya pa kubomba imilimo yakwe iya ku ntanshi. (AbaHebere 4:15; 5:8, 9) Ku ca kumwenako, Yesu alaswa apeelwe umulimo ukalamba, uwa kubuusha no kupingula imintapendwa ya bantu abafwa!—Yohane 5:21, 22.

Pa kukansha ababomfi batumikila, baeluda bafwile ukukwatila aba bantu imilimo bakabomba ku ntanshi. Nangu ca kuti pali ino nshita cilemoneka ukuti baeluda na babomfi batumikila bali fye abalinga ukubomba imilimo ilipo, bushe kukaba baeluda na batumikila bakumanina nga ca kuti icilonganino cipya capangwa? Bushe bakakumanina nga ca kuti ifilonganino ifingi fyapangwa? Mu myaka itatu iyapita, kwali ifilonganino ukucila pali 6,000 mwi sonde lyonse. Ici cilengele ukuti kube ukukabila baeluda na babomfi batumikila abengi nga nshi ku kusakamana ifi filonganino ifipya!

Baeluda, bushe mulepashanya ica kumwenako ca kwa Yehova pa kuba na bucibusa bwine bwine na ba baume mulekansha? Bushe mulebalanga ifya kubomba umulimo wabo? Bushe mulatontonkanyapo na pa kukabila kwingabako ku ntanshi? Ukukonka ica kumwenako ca kwa Yehova ifyo akanshishe Yesu kukalenga mwafuma amapaalo ayengi nga nshi ku bengi.

 Mwilatiina Ukupeelako Bambi Umulimo Wenu

Baeluda balamuka ababelesha ukubombe milimo iingi ukwabula ubwafya nalimo kuti bashimunuka ukupeelako bambi imilimo yabo. Nalimo kuti balyesesheko ukucite co ku numa uku kabili ifyafuminemo tafyaweme. E ico kuti balatontonkanya ukuti, ‘Nga ulefwaya incito ukubombwa bwino, ufwile ukuibombela fye we mwine.’ Lelo bushe ukutontonkanya kwa musango yu kulomfwana no kufwaya kwa kwa Yehova, nga fintu kwalondololwa mu Malembo, ukuti abashaishiba sana bafwile ukusambilila ku baishibisha?—2 Timote 2:2.

Umutumwa Paulo alibipilwe ilyo Yohane Marko uo baleenda na o, ashile umulimo wakwe pa Pamfulia no kubwelela ku ng’anda. (Imilimo 15:38, 39) Na lyo line, Paulo talekele cilya cacitike ukumufuupula ukukansha bambi. Asalile uwa bwananyina na umbi, umulumendo Timote, no kumukansha mu mulimo wa bumishonari. * (Imilimo 16:1-3) Pa Berea abantu tabatemenwe bamishonari nangu panono ica kuti calyafishe Paulo ukwikala palya pantu. Ici calengele ukuti ashile ubutungulushi bwa cilonganino cipya kuli Sila, uwa bwananyina wakosoka kabili umukalamba, na Timote. (Imilimo 17:13-15) Ukwabula ukutwishika Timote asambilile ifingi kuli Sila. Mu kupita kwa nshita, ilyo Timote afikilepo ukubomba imilimo na imbi, Paulo amutumine ku Tesalonika ku kukoselesha icilonganino kulya.—1 Abena Tesalonika 3:1-3.

Icibusa cali pali Paulo na Timote tacali nga cilya ciba pa ba makwebo, nelyo ica patali patali. Bali fibusa fya cine cine. Ilyo Paulo alembeele icilonganino ca mu Korinti, alandile pali Timote, uo alepanga ukutuma kulya, ati “mwana wandi uwatemwikwa kabili uwa cishinka muli Shikulu.” Akonkenyepo ukusosa ati: “[Timote] e ukalenga imwe ukwibukishe mibele yandi iya muli Kristu.” (1 Abena Korinti 4:17) Timote acitile umwabela ukukanshiwa akanshiwe kuli Paulo, ica kuti alifikilepo ukubomba imilimo apeelwe. Bamunyinefwe abalumendo abengi nga nshi baba babomfi batumikila abafikapo, baeluda bafikapo, kabili bambi nabo ni bakangalila benda pa mulandu wa fyo basambilishiwe ku bakalamba ababangilweko, nga filya Paulo ayangilwe kuli Timote.

Baeluda, Kansheni Bambi!

Ukwabula no kutwishika, ukusesema kwa pali Esaya 60:22 kulefikilishiwa. Yehova alelenga ‘uwacepa ukubo luko lwakosa.’ Pa kuti ulu luko lube “ulwakosa,” lufwile ukuteyanishiwa bwino. Baeluda, bushe te kuti mutontonkanyeko inshila na shimbi isha kukanshishamo abaume baipeela abafikilepo ukukanshiwa? Shininkisheni ukuti umubomfi utumikila umo umo naibukila umo engakabila ukuwamyako pa kuti alunduluke. Na imwe bamunyinefwe ababatishiwa, bombeleni pa bwafwilisho bonse ubo mwapokelela. Shukileni inshita ya kulundulwilamo ukulamuka kwenu, amano, e lyo no kwishiba bwino umulimo wenu. Tatuletwishika ukuti Yehova akapaala uku kutantika kusuma ukwa kwafwako bambi.—Esaya 61:5.

[Futunoti]

[Akabokoshi pe bula 30]

Ifyo Ababomfi Batumikila Bengacita

Nangu ca kuti baeluda bafwile ukusambilisha ababomfi batumikila, kwaliba ifingi ifyo ababomfi batumikila bengacita pa kuti balundulukileko mu fya ku mupashi.

—Ababomfi batumikila bafwile ukukampuka no kuba abashintililwapo ilyo balebomba imilimo yabo. Bafwile na kabili ukulasambilila bwino. Ilingi line, ukulunduluka kufuma mu kusambilila na mu kucita ifilesambililwa.

—Ilyo umutumikila alepekanya ukulanda ilyashi pa kulongana kwa Bwina Kristu, tafwile ukwikata na ku cani, alingile ukwipusha eluda wafikapo sana ukumwebako ifyo engalanda ilyashi.

—Umubomfi utumikila kuti na kabili aipusha eluda ukumona ifyo alelanda ilyashi lya Baibolo no kumufunda pa kuti awamyeko.

Ababomfi batumikila bafwile ukulomba, ukupokelela, no kumfwila ukufunda kwa baeluda. Nga balecite fi, ukulunduluka kwabo ‘kukamoneka kuli bonse.’—1 Timote 4:15.