Ifipusho Ukufuma ku Babelenga

Amashiwi yaba pa AbaHebere 12:4 aya kuti: “Mucili tamulalukaanya ukufika no kusuumo mulopa” yalola mwi?

Amashiwi ya kuti ‘mulalukaanya ukufika no kusuumo mulopa’ yapilibula ukushipikisha ukufika ku mfwa, ukusuumo mulopa.

Umutumwa Paulo alishibe ukuti pa mulandu wa citetekelo cabo, Abena Kristu AbaHebere bamo bamo ‘bashishimishe ku bwafya bwa fya kucula.’ (AbaHebere 10:32, 33) Ilyo alelanda pali ci, cimoneka kwati Paulo alandile ishiwi lya mampalanya ilya kushomboka mu kucimfyanya kwa lubilo lwa baGriki, ulwalesanshamo ukubutuka, ukulwa, no kulwa kwa nkonya, no kupoosa discus na javelin. E co, pa AbaHebere 12:1, akonkomeshe Abena Kristu banankwe ukuti: “Tube abafuule cifinine conse no lubembu ulwalambatila, tubutuke no mukoosha ulubilo ulwabikilwa ifwe.”

Pa numa ya fikomo fitatu, pa AbaHebere 12:4, Paulo afwile nomba alekele ukulanda pa lubilo no kutendeka ukulanda pa kucimfyanya kwa nkonya. (Bonse abalebutuka na balelwa balilumbulwa pali 1 Abena Korinti 9:26.) Abalelwa ubulwi bwa nkonya kale balefwala impapa ku maboko. Napamo ifi balefwala nalimo balebikako “ifyela nelyo fimbi ifya nshimbi ifyo fyalecena sana abalelwa.” Ifyangalo fya musango yu ifya lucu fyalelenga abantu ukusuumo mulopa, nelyo fye ukufwa.

Abena Kristu AbaHebere balikwete ifya kumwenako ifingi ifya babomfi ba busumino aba kwa Lesa abapakeswe no kucushiwa icabipisha, ukufika fye na ku mfwa, “ukufika no kusuumo mulopa.” Moneni ilyashi Paulo alandile pa lwa fyo aba cishinka ba ku kale bashipikishe:

“Bapoolelwe amabwe, baputwilwe pa kati kuli basoo, balyeshiwe, baipayawilwe ku lupanga; baendawike nabafwale mpapa sha mpaanga ne mpapa sha mbushi, ababa no bubusu, abacushiwa, abacitwo bubi.” Pa numa ya ico, Paulo alandile pali Kawaminisha wa citetekelo cesu, Yesu: “Ashipikishe ku capindama, ukusuule nsoni, no kwikala ku kulyo kwa cipuna ca bufumu ca kwa Lesa.”—AbaHebere 11:37; 12:2.

Cine cine, bengi ‘abalukeenye ukufika no kusuumo mulopa,’ e kuti, ukufika ku mfwa. Ici cacilile pa kushomboka no lubembu ulwa kubulwa icitetekelo. Bali aba cishinka na lintu balecushiwa, ukutwalilila na bucishinka bwabo ukufika ku mfwa.

Abapya mu cilonganino ca mu Yerusalemu, napamo pa numa ya kuba Abena Kristu ninshi kulya kupakasa kwabipisha ukwa ku kale kwalipwa balibwelele inuma, kabili tabapitilepo mu mesho yakakale fi. (Imilimo 7:54-60; 12:1, 2; AbaHebere 13:7) Na kabili, na mesho ayashali sana ayatapata yalefuupula bamo bamo mu kutwalilila muli uku kucimfyanya; ‘balenaka no kuba abatompoke mitima.’ (AbaHebere 12:3) Balekabila ukulunduluka ukuya ku kukosoka. Ici kuti cabapeela amaka ya kushipikisha conse, nangu casanshishemo ukucushiwa ukufika ku mfwa.—AbaHebere 6:1; 12:7-11.

Abena Kristu abengi mu nshiku shesu ‘balilukaanya ukufika no kusuumo mulopa,’ ukwipaiwa pa mulandu wa kukana ukunashako UbuKristu bwabo. Ukucila ukulenga amashiwi ya kwa Paulo pa AbaHebere 12:4 ukututiinya, kuti twalayamona nga yalelanga icipimo twapampamina ukufikapo, pa kuti tube aba cishinka kuli Lesa. Mu fikomo fya ku ntanshi muli kalata alembele abaHebere umo wine, Paulo alembele ukuti: “Tube abatootela . . . kabili e fyo tupyungile Lesa ukumutemuna no bufuuke na katiina.”—AbaHebere 12:28.