Aba pe Sonde Bonse Baonaulwa!

Tontonkanyeni pa bantu ababa mu calo lelo, abakuula imisumba, abakwata ne ntambi ishingi, abatunguluka mu fya sayansi, kabili ababa iminshipendwa. Kuti cayanguka ukumona kwati bakabako umuyayaya, bushe te ifyo? Bushe kuti mwatontonkanya ukuti bushiku bumo cino calo kuti caloba? Kwena ico kuti cayafya ukwelenganya. Lelo, bushe mwalishiba ukuti ukulingana ne citabo cimo icashintililwapo, kwali abantu abaonawilwe umupwilapo ilyo kushilaba ababako lelo?

Tatulelanda pa bantu abali abatuutu. Icalo icalobele calilundulwike, mwali misumba, ifintu ifisuma, kabili balishibe sayansi. Lelo, Baibolo ishimika ukuti mu kupumikisha fye, pa bushiku bwalenga 17 ubwa mweshi wa cibili, imyaka 352 ilyo Abrahamu ashilafyalwa, ilyeshi lyalitendeke ilyaonawile abantu bonse. *

 Bushe ili lyashi lya cine? Bushe cine cine icintu ca musango yo calicitike? Bushe ca cine ukuti pa ntanshi ya bantu ababako nomba, kwali abantu bambi abalelunduluka kabili abaonawilwe? Nga e ko bali, mulandu nshi baonawililwe? Cinshi calubene? Kabili bushe pali ico twingasambilila kuli ubu bonaushi?

Bushe Cine Cine Aba pe Sonde Aba ku Kale Balyonawilwe?

Akayofi ka musango yo akaibela, nga kalicitike, te kuti kalabwe umupwilapo. E ico, mu fyalo ifingi mwaba ifilenga abantu ukwibukisha bulya bonaushi. Ku ca kumwenako, tontonkanyeni pa bushiku bwa kulungatika ubwalembwa mu Malembo. Umweshi wa bubili kale waletendeka pa kati ka October ukufika pa kati ka November ukulingana na kalenda tubomfya nomba. E ico ubushiku bwalenga 17 cimo cine nalimo no bushiku bwa kubalilapo mu November. Kanshi, te cela mushuke ukuti abantu mu fyalo ifingi basefesha imitebeto ya bafwa pali iyi nshita mu mwaka.

Fimbi ifishinina ukuti Ilyeshi e ko lyali fyaba mu nshimi sha bantunse. Kwena, mu bwikashi bonse ubwa kale mwaba inshimi sha kuti ifikolwe fyabo bapuswike ilyeshi lyaliko isonde lyonse. Bantele mafwasa ba mu Afrika, abena Celt ba ku Bulaya, na bena Inca aba ku South America—bonse bakwata inshimi shapalako, nge fyo na bambi bakwata, pamo nga bantu ba ku Alaska, Australia, China, India, Lithuania, Mexico, Micronesia, New Zealand, na mu ncende shimo isha ku North America e lyo na bambi.

Kwena, ilyo papita imyaka iingi nga nshi, ishi nshimi balishiwamya, lelo shonse shakwata ifyebo fimo ifilanga ukuti fyafuma kumo kwine: batila Lesa alikalipe pa mulandu wa bubifi bwa bantunse. Aletele ilyeshi likalamba. Abantunse bonse balyonawilwe. Lelo, abalungami abanono, balibakilwe. Aba bakulile icibwato umwapusukile abantu ne nama. Ilyo papitile inshiku, ifyuni fyalituminwe ku kufwaya impanga iyauma. Awe icibwato casukile caikala pa muulu wa lupili. Ilyo abapuswike bafumine, baninike ilambo.

Bushe ici cilelanga cinshi? Kwena amalyashi te kuti yapalane fye kuli cela mushuke. Ubushininkisho bonse ubwa ishi nshimi bulanga ukuti ilyashi lya kale ilya mu Baibolo ilya kuti abantunse bonse bafuma ku bapuswike ilyeshi ilyaonawile icalo lya cine. Kanshi, tatukabila ukushintilila pa nshimi ku kwishiba ifyacitike. Twalikwata ilyashi lyasungwa bwino mu Malembo ya ciHebere aya mu Baibolo.—Ukutendeka, ifipandwa 6-8.

 Mu Baibolo mwaba ilyashi lya kale ilyapuutwamo ukufuma fye ilyo ubumi bwatendeke. Lelo, ubushinkisho bulanga ukuti ili te lyashi fye lya kale. Ukusesema kwa iko ukufishiwapo na mano yashika ayabamo yalanga ukuti yaba ico iitunga ukuba, e kuti Icebo ca kwa Lesa ico apeela bantunse. Baibolo tayaba nge nshimi pantu yene mwaliba na mashina ne nshita pamo ne mitande ya kufyalwa no bulondoloshi bwa fyalo mu lyashi lya kale ishimika. Ilatwafwa ukwishiba ifyo imikalile yali ilyo kushilaba Ilyeshi kabili ilondolola umulandu icalo conse caonawililwe.

Bushe cinshi cabipile kuli balya bantu abaliko pa ntanshi ya lyeshi? Icipande cikonkelepo calalanda pali ici cipusho. Ici cipusho nacicindama ku basakamikwa pa fyo cikaba ku ntanshi ku bantu ba muli cino calo.

[Futunoti]

[Charti pe bula 4]

(Nga mulefwaya ukumona charti, moneni muli magazini)

Inshimi Shilanda pa Lyeshi Shilasangwa mwi Sonde Lyonse

Country Correspondencies 1 2 3 4 5 6 7 8 9 10

Greece 7 ◆ ◆ ◆ ◆ ◆ ◆ ◆

Rome 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Assyria 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

India - Hindu 6 ◆ ◆ ◆ ◆ ◆ ◆

New Zealand - Maori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Yakima 7 ◆ ◆ ◆ ◆ ◆ ◆ ◆

Mississippi U.S.A. - Choctaw 7 ◆ ◆ ◆ ◆ ◆ ◆ ◆

Mexico - Michoacan 5 ◆ ◆ ◆ ◆ ◆

South America - Quechua 4 ◆ ◆ ◆ ◆

Bolivia - Chiriguano 5 ◆ ◆ ◆ ◆ ◆

Guyana - Arawak 6 ◆ ◆ ◆ ◆ ◆ ◆

1: Lesa akalipa pa mulandu wa bubifi

2: Ukonawila ku Lyeshi

3: Lesa e walandile ukuti libeko

4: Ukusoka kwa kwa Lesa kwapeelwa

5: Abantunse abanono bapusuka

6: Bapusukila mu bwato

7: Inama shapusuka

8: Icuni nelyo icibumbwa cimbi catumwa ku nse

9: Bwasuka bwaikala pa muulu wa lupili

10: Baninika ilambo ilyo bafuma