Ilyashi lya Bakabilisha ba Bufumu

Amayanda ya Bufumu ya Bantu Bonse

ILYO alekansha abasambi bakwe ifya kubomba ubutumikishi bwa ku cintubwingi, Yesu Kristu abakoseleshe ‘ukubilikishisha pa muulu wa mitenge.’ (Mateo 10:27) Bali no kubomba ubutumikishi bwabo ubwa Bwina Kristu pa lwalaala, ku cintubwingi. Ukukonka uku kufunda, umulimo wa Nte sha kwa Yehova ucitwa pa lwalaala. Ukubomba uyu mulimo pa lwalaala kwalenga Inte sha kwa Yehova ukucimfya ukukaanya no kusenaminwa ku bantu.

Nangu ca kuti ukulongana kwa pa cilonganino ukwa Nte sha kwa Yehova kwa bantu bonse, impatila ilenga abantu bamo ukushimunuka ukwisa ku Ng’anda ya Bufumu. Ifi e fyo caba mu calo ca Finland. Bambi balashimunuka ukuya ku fifulo fipya. Lintu Ing’anda ya Bufumu yakuulwa nelyo lintu iyalipo kale yawamishiwa, ilingi kulaba ukuteyanya ukuti abali bonse kuti baisatandala. Kuti kwaba umulimo wa kulaalika abena mupalamano ukwisatandala ku Ng’anda ya Bufumu no kwishiba umulimo wa Nte sha kwa Yehova.

Mu ncende imo, baNte bateyenye kampeni wa kushalika magazini pa bushiku ubo bwine abantu bali no kwisatandala ku Ng’anda ya Bufumu iipya. BaNte babili bakumenye umwaume umukoloci uwatile alaipakisha ukubelenga bamagazini ba Ulupungu lwa kwa Kalinda na Loleni! Bamunyina bamwebele pa lwa kuteyanya kwaliko ukwa bantu abali bonse ukwisatandala ku Ng’anda ya Bufumu kabili baipeele ukumusenda. Ulya mwaume atile kuti atemwa ukutandala. Umukashi wakwe, pa kumfwa ifyo balelanshanya atile, “Na ine ndefwaya ukukonka!”

Ilyo aingile mu Ng’anda ya Bufumu, ulya mwaume aliloleshe no kutila: “Iyi penti tayafiita. Kwena, iyi penti isuma kabili yalibuuta. Banjebele ati Ing’anda ya Bufumu ikapentwa na penti yafiita!” Balya baupana babili balitandele pa kashita no kulomba impapulo balelangisha.

Icilonganino cimo calefwaya ukubilisha mu nyunshipepala ya cikaya pa lwa kuteyanya kwaliko ukwa kuti abali bonse kuti batandala pa bushiku bwa kupeela Ing’anda yabo iya Bufumu. Pa numa ya kumwishibisha ulwa uku kuteyanya kwali no kubako, umukalamba wa bakalemba atile icipande cilembwe pali ili lyashi. Bamunyina balisumine, kabili tapakokwele, icipande cisuma icakumene hafu we bula califumine mu nyunshipepala, icalandile pa cali no kucitika no kulondolola imibombele ya ico cilonganino ca Nte sha kwa Yehova.

Lintu ico cipande cafumine, Nte umo umukoloci akumene no mwina mupalamano uwamwebele ati: “Muli ilyashi lisuma pa lwa Nte sha kwa Yehova mu nyunshipepala ya lelo!” Ulya Nte ashimikile ulya muntu no kumushila broshuwa wa Inte sha kwa Yehova mu Mwanda wa Myaka Walenga Amakumi Yabili.

Ukulunda pa kulungika imimwene yalubana iyo abantu bakwata pa Nte sha kwa Yehova, ukuteyanya kwa musango yu ukwa kuti abali bonse baisatandala ku Ng’anda ya Bufumu na maprogramu ya kupeela Amayanda ya Bufumu ayapya kwalicincisha bakasabankanya pa kubakoselesha ukulaalika abantu abengi ukusangwa ku kulongana. Mu fyalo ifingi, ukusanshako na Finland, abantu balisambilila ukuti Amayanda ya Bufumu aya Nte sha kwa Yehova ya bantu bonse.