Bonse Tulafwaya Ukututasha

UBU bushiku bwali bushiku busuma ku kakashana. Nangu ca kuti pa nshita shimbi kalekabila ukulungikwa, pali ubu bushiku bwena, kaliicindike icine cine. Lelo ubu bushiku pa numa ya kukatwala mu kusendama, banyina baumfwile kalelila. Ilyo bakepwishe ico kalelilila, kaipwishe uku ninshi kaleshinshimukila akati: “Bushe na lelo nacilufyanya?”

Ico cipusho calengele nyina ukumfwa sana ububi. Lyonse alangufyanya ukulungika umwana wakwe. Lelo, nangu line namona ifyo akaana kanakashi kakwe kaesha ukuba umwana musuma, nyina talandilepo ishiwi nangu limo ilya kumutasha.

Te tukashana fye tukabila ukutashiwa no kushininkisha ico. Bonse tukabila ukutashiwa—nga fintu fye tukabila ukufundwa no kulungikwa.

Tumfwa shani bamo nga batutasha ukufuma pa mutima? Bushe tulomfwa bwino no kusansamuka? Tufwile tulomfwa ukuti umo acimona no kuti alatusakamana. Tulashininwa ukuti ukubombesha kwesu takwaciba kwa fye, kabili cilatucincisha ukubombesha na ku ntanshi. Te ca kupapa ukuti ukutasha ukufuma pa mutima ilingi kulatupalamika ku muntu uwalanda fimo ifya kukoselesha.—Amapinda 15:23.

Yesu Kristu alishibe ukuti ukutasha kulakabilwa. Mu mulumbe wa matalanti, shikulu (uwaleimininako Yesu umwine) atasha sana umusha umo na umo, atila: “Cisuma, we musha musuma kabili uwa cishinka!” Mwandi balyumfwile bwino! Nangu line balamwike mu nshila shapusanapusana, batashiwe cimo cine.—Mateo 25:19-23.

E co, shi natwibukishe nyina wa kalya kakashana. Tatufwile ukulolela bambi balukusha ifilamba pa kuti tubatashe. Lelo, kuti twaimika ubuyo bwa kumona umo twingatasha bambi. Cine cine twaba no mulandu usuma uwa kutasha ukufuma pa mutima pa nshita iili yonse.