Ifipusho Ukufuma ku Babelenga

Cinshi Esaya 30:21 asosela ukuti icebo ca kwa Yehova cafuma “ku numa yenu,” ilyo icikomo cibalilepo cilanda ulwa kwa Yehova ukuba ku ntanshi? ici cikomo citila, “amenso yenu yakamona Kasambilisha wenu.”

Pali Esaya 30:20, 21 tubelengapo ukuti “Takafisame kabili Kasambilisha wenu, na menso yenu yakamona Kasambilisha wenu, kabili ilyo mwapaatukila ku kwa kulyo nangu ku kwa kuso, amatwi yenu yakomfwe cebo cafuma ku numa yenu, icileti, Iyi e nshila, e mo mwende.”

Ukulingana ne fyo ili lembo lyalanda, uulebelenga amona Yehova, Kasambilisha Wakulisha ku ntanshi yakwe lelo aumfwa ishiwi Lyakwe ku numa. Lelo, aya mashiwi ya mampalanya e co tulingile ukuyomfwila mu mampalanya mwine.

Ukulanda kwa mu mampalanya ukwa cikomo 20 kulenga umo ukutontonkanya pa musha ulepyungila shikulu wakwe, aba uwaipekanya lyonse ukucita ifyo shikulu wakwe amweba. Nga filya fine umusha apoosa amano ku kuboko kwa kwa shikulu wakwe pa kuti eshibe ico alefwaya ukucita, e fyo na bantu ba kwa Yehova ilelo bapoosa sana amano ku mafundisho ya mu Baibolo ayo Yehova abafunda ukupitila mu kuteyanya kwakwe ukwa pe sonde. (Amalumbo 123:1, 2) Ca cine, balomfwila ubutungulushi bwakwe, baba abaibukila kuli fyonse ifyo Yehova alebalanga ukupitila mu “musha wa cishinka kabili uwashilimuka.”—Mateo 24:45-47.

Nga kanshi, kuti twasondwelela cinshi pa lwa ishiwi ilyo ababomfi bakwe bomfwa ukufuma ku numa? Ca mano ukusondwelela ukuti ishiwi lilefuma ku numa ilya kwa Lesa ni lilya alandile kale, ukupitila mu Cebo cakwe icalembwa kabili ililondololwa ukupitila muli “kangalila wa cishinka.” (Luka 12:42) Ababomfi ba kwa Lesa muno nshiku bomfwe shiwi lyakwe ukupitila mu kubelengesha Baibolo no kubomfya ifishinte fya iko mu mikalile yabo no kwafwiwa ne mpapulo shipekanishiwa no “musha wa cishinka kabili uwashilimuka,” “kangalila wa cishinka.” Ukushintilila pa butungulushi bwa pa nshita iyene ubwa kwa Kasambilisha Mukalamba no kuba abaibukila ulwa uku kupayanya kwakwe no kupitila mu kusambilila Icebo ca kwa Lesa, icalembelwe myaka ishishibantu, ababomfi bakwe mu mampalanya balamumona ku ntanshi no kuumfwa ishiwi lyakwe ililefuma ku numa.—Abena Roma 15:4.