Bushe Muleibukisha?

Bushe mwalyumfwikishe ifyo mwabelengele muli bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifi fipusho:

• Kuti twamwenamo shani mu kwishiba ulupwa lwa kwa Shafani?

Shafani ali wa kukopolola amabuuku kabili kalemba wa Mfumu Yoshia iya Yuda. Shafani ali muntu wacindama uwatungilile umulimo wa mfumu uwa kubwesha ukupepa kwa cine. Babili pa bana ba kwa Shafani batwalilile ukutungilila Yeremia muli bucishinka. Kabili umwana wakwe umbi pamo na beshikulu bakwe babili na bo babomfeshe ififulo fyabo ku kutungilila ukupepa kwa cine. Ne fwe bene tufwile ukubomfya ifyuma fyesu ne fifulo twakwata ku kutungilila ukupepa kwa cine.—12/15, amabula 19-22.

• Bushe Irene Hochstenbach akumamo shani ukwikala no bulema bwakulisha e lyo no kubombela Yehova?

Ilyo ali ne myaka 7, amatwi yakwe yalikomene. Nangu line ni nkomamatwi, alisambilila ukulanda na bambi kabili pali nomba enda no mwina mwakwe (kangalila wa muputule) ilyo aletandalila ifilonganino mu Netherlands.—1/1, amabula 23-6.

• Fitabo nshi fibili ifipya ifya kutwafwa ukusambilila Baibolo ifyafumine pa Kulongana kwa Citungu ukwa “Bakabila Bapimpa aba Bufumu”?

Abena Kristu mwi sonde lyonse balisangalele pa kupokelela icitabo ca Pepeni Lesa Wine Wine Eka, icateyanishiwe ukusambilila na bapya nga bapwisha ukusambilila icitabo ca Ukwishiba Uko Kutungulula ku Mweo wa Muyayaya; icitabo cimbi cipya ni Palameni Kuli Yehova, icilanda sana pa mibele ya kwa Yehova ne mibombele yakwe. Cilanga ne fyo twingamupashanya mu fyo alanga imibele yakwe.—1/15, amabula 23-24.

• Bushe amashiwi yaba pa Amapinda 12:5, ayatila: “Amapange ya balungami ya bupingushi” yalola mwi?

Amatontonkanyo ya bantu basuma yaba ayasuma kabili yalola ku micitile yabulo lufyengo kabili iyalungama. Apo ukutemwa Lesa na bantu banabo e kucincisha abalungami, amapange yabo yasuma.—1/15, ibula 30.

• Cinshi cingafwa umuntu ukumona incito mu nshila yalinga?

Caliwama ukusambilishiwa ukutemwa incito ukufuma ku bwaice. Baibolo itukoselesha ukubomba bwino, ukutaluka ubunang’ani. (Amapinda 20:4) Kabili ikoselesha Abena Kristu ukukanaobelwa ne ncito. Tufwile ukwishiba ukuti ukubombela Lesa e kufwile ukucindamisha mu bumi bwesu. (1 Abena Korinti 7:29-31) Na kabili, Abena Kristu ba cine balicetekela ukuti Lesa takabalekeleshe.—2/1, amabula 4-6.

• Ni pi iciipailo calumbulwa Intanshi muli Baibolo?

Ni pa Ukutendeka 8:20, apalanda pa ciipailo Noa apangile ilyo afumine mu cibwato pa numa ye Lyeshi. Lelo, cimoneka kwati, Kaini na Abele balibomfeshe ifipailo pa kutuula ifya bupe fyabo. (Ukutendeka 4:3, 4)—2/15, ibula 28.

• Bushe Abena Kristu bamo kuti babomfya shani bwino inshita ilyo ifintu fyayaluka?

Bamo balisumina—nelyo baliitendekelako ukwalula incito icalenga bakwata inshita iikalamba iya kubomba ubutumikishi. Bambi balilundako inshita na mashuko ya kubomba mu mulimo wa kwa Lesa ilyo imilimo yabo iya lupwa yacepako, pamo nga lintu abana bakula no kuupwa nelyo ukuupa.—3/1, amabula 19-22.

• Bushe ica kumwenako ca kwa Yona ne ca mutumwa Petro kuti fyatwafwa shani ukumona bambi nga fintu Yehova abamona?

Bonse bene, Yona na Petro balikwete ifilubo fyaishibikwa mu mitontonkanishishe na mu fyo bacitile ilyo icitetekelo cabo ne cumfwila fyaeshiwe. Na lyo line, Yehova alimwene imibele isuma iyo bakwete kabili atwalilile ukubabomfya mu mulimo wakwe. Ilyo bambi batukalifya nelyo batulenge nsoni, kuti twatontonkanya sana pa mibele yabo iyo twamona ukuti isuma e lyo na pa busuma Lesa amona muli bene.—3/15, amabula 16-19.

• Mulandu nshi amanambala ya mwi buuku lya Amalumbo yapusanina mu maBaibolo yalekanalekana?

Paliba ubupusano pa manambala ye buuku ili mu ciHebere na mu yapilibulwa mu ciGriki muli Septuagint. AmaBaibolo ya nomba kuti yapusanapusana, nampo nga yapilibwilwe ukufuma mu malembo ya ciHebere nelyo muli Septuagint.—4/1, ibula 31.