Ni kwi Mwingasanga Ifyakatamikwa Fine Fine?

RODOLPHE aipwishe mipulwe mipulwe ati: “Nga mulefwaya ukusala icalici ukwa kupepa pantu fye e kwalepepa abafyashi benu, cinshi mushingasalila imipepele ya fikolwe fyesu iyaliko imyaka 2,000 iyapitapo ku bena Celt?” Ifi fyebo filenga uwacaice ukuseka.

Rodolphe alanda ukuti: “Bucibusa bwandi na Lesa bwalicindama nga nshi. Nshifwaya nangu panono ukutontonkanya ukuti mfwile ukupatikishiwa ukusumina ifisumino fimo ifya cishilano, pa mulandu fye wa kuti balupwa lwandi abaliko imyaka ishishi bantu e fyo balepepa.” Rodolphe aceeceetele ifintu mu kusakamana; tamwene uyu mulandu wacindama ngo wingapyanwa fye iyo.

Nelyo ca kuti ukushiila abana kukula imipepele kulecepelako ilelo, abengi batwalilila ukuikuminisha ku mipepele ya balupwa lwabo. Lelo bushe calilungama ukulambatila ku fisumino fya bafyashi? Bushe Baibolo itilapo shani?

Pa numa ya myaka 40 mu ciswebebe, Yoshua, uwapyene Mose, aimikile abena Israele ica kusalapo: “Nga cabipa mu menso yenu ukubombela Yehova, saleni lelo untu mulebombela; atemwa imilungu iyabombele bashinwe abali kwi shilya lya Mulonga, atemwa imilungu ya bena Amore abo muleikala mu calo cabo; lelo ine na ba mu ng’anda yandi, tulebombela Yehova.”—Yoshua 24:15.

Shibo umo uo Yoshua alelandapo ni Tera, wishi wa kwa Abrahamu, uwaleikala mu musumba wa Uri, uwali ku kabanga ka mumana wa Yufrate pali yo nshita. Baibolo tailanda fingi pali Tera, ilandapo fye ukuti alepepa imilungu imbi. (Yoshua 24:2) Umwana wakwe Abrahamu, nangula taishibishe ubufwayo bwa kwa Lesa mu kufikapo, ali-itemenwe ukusha umusumba wa ku mwabo ilyo Yehova amwebele ukufumamo. Abrahamu asalile imipepele yapusana ne ya bawishi. Pa mulandu wa ici, Abrahamu apokelele amapaalo ayo Lesa amulaile, kabili abele umuntu wacindikwa ku mipepele iingi nga “shibo wa bonse abatetekela.”—Abena Roma 4:11.

Baibolo kabili ishimika bwino pa lyashi lya kwa Ruti, nacikolwe wa kwa Yesu Kristu. Ruti, umwanakashi umwina Moabu waupilwe ku mwina Israele, aishileba mukamfwilwa kabili alolenkene no kusalapo: nampo nga afwile kutwalilila ukwikala mu calo ca ku mwabo nelyo ukukonka nafyala ku Israele. Pa kwishiba ifyo ukupepa Yehova kwakateme ukucila ukupepa ifilubi uko abafyashi bakwe balepepa, Ruti apampamine ukweba nafyala ati: “Abantu benu e bantu bandi, na Lesa wenu e Lesa wandi.”—Ruti 1:16, 17.

Ilyo Dictionnaire de la Bible ilanda pa bucindami bwa ili lembo mu mutande wa Baibolo, ilondolola ati ifi  fyebo filanga “ifyo umwanakashi umwina fyalo, uwafyalilwe ku bantu abasenshi abali pa bulwani kabili abapatilwe ku bena Israele, . . . pa mulandu wa kutemwa uluko lwa kwa Yehova no kupepa kwakwe, aishileba nacikolwe wa Mfumu ya mushilo Davidi ku maka ya bulesa.” Ruti tashingashingile ukusala imipepele yapusene ku ya bafyashi bakwe, e ico, alipaalilwe na Lesa.

Ilyashi lishimika pa kutendeka kwa buKristu lilandilapo fye pa milandu abasambi ba kwa Yesu bafumine mu imipepele ya fikolwe fyabo. Mu lyashi umutumwa Petro alandile ilyakwetemo ubushinino bwa maka, alaalike bumba “[ukuipususha] kuli ino nkulo yapondama” ukupitila mu kulapila ku membu shabo no kubatishiwilwa mwi shina lya kwa Yesu Kristu. (Imilimo 2:37-41) Ica kumwenako capulilemo cali ca kwa Sauli, umuYuda uwalepakasa Abena Kristu. Ilyo aleya ku Damaseke, amwene icimonwa ca kwa Kristu, na pa numa Sauli abele Umwina Kristu no kwishibikwa ngo mutumwa Paulo.—Imilimo 9:1-9.

Abena Kristu ba kubalilapo abengi tabaishileba Abena Kristu mu nshila ya lulumbi nge fi cali kuli Paulo. Na lyo line, bonse bali no kusha imipepele ya buYuda nelyo iya kupepa imilungu ya cisenshi iyalekanalekana. Abapokelele ubuKristu babupokelele ninshi nabeshiba ne fishinka, ilingi line pa numa ya kulanshanya kwatantalila pa mulimo Yesu abomba nga Mesia. (Imilimo 8:26-40; 13:16-43; 17:22-34) Balya Bena Kristu ba kubalilapo balishibe bwino umulandu balekabila ukwalukila. Ubwite bwali bwa bonse, abaYuda na bashali baYuda, lelo ubukombe tabwa-alwike. Pa kusekesha Lesa, calicindamishe ukukonka imipepele ipya, iya buKristu.

Ukusalapo Kwatukuma

Te ca kutwishika na kutwishika ukuti mu myaka ya kubalilapo paleba ukushipa pa kufuma mu mipepele ya mu lupwa iya cishilano—ubuYuda, ukupepa imfumu, ukupepa balesa ba cisenshi—no kwisaikuminisha ku mipepele yasuulwa ku baYuda na bena Roma. Uku kusala mu kwangufyanya kwaletele ukupakaswa kwakaluka. Ukulingana ne fyalandile Hippolyte Simon, shikofu wa baKatolika ku Clermont-Ferrand, mwi buuku alemba ilya Vers une France païenne? (Abena France Ukusanguka Abasenshi?) atile, ilelo, pafwile paba ukushipa kwapalako pa “kukaanakulilwa no kuyobeka mu kukonkelesha bambi ukuli fye mpanga yonse.” Pafwile paba ukushipa pa kuba mu mipepele yabamo abantu abanono iyo limo limo basuusha, imipepele ya Nte sha kwa Yehova.

Paul, umulumendo wa ku Bastia, ku Corsica, uwakuliile mu Katolika, inshita shimo alebombako imilimo ye calici, pamo ngo kushitisha amakeke pa kuti akabungwe ka bwafwano aka baKatolika kengakwatako ulupiya. Pa kufwaya ukumfwikisha Baibolo, asumine ukulalanshanya lyonse ne Nte sha kwa Yehova. Mu kuya kwa nshita ailwike ukuti ifyo alesambilila fyali no kumunonsha inshiku shonse. E ico, Paul asumine ifyakatamikwa fya mu Baibolo umupwilapo no kuba Inte ya kwa Yehova. Abafyashi bakwe tabamulengulwile, kabili uku kusala kwakwe takwaonawile bulupwa bwapalamisha.

Amélie ekala ku kapinda ka ku kulyo aka France. Balupwa wakwe ni Inte sha kwa Yehova ukufika pa nkulo yalenga bune. Mulandu nshi asalilepo imipepele ya bafyashi bakwe? Alondolola ati: “Taufwile ukuba Inte ya kwa Yehova pa mulandu wa kuti abafyashi bobe nelyo abafyashi ba bafyashi bobe ni Nte sha kwa Yehova ukutula na kale. Lelo kwi pele pele, kuti waisatila, ‘Uku e ko na ine mpepa, pantu ifi e fyo nasuminamo.’” Ukupala abacaice abengi Inte sha kwa Yehova, Amélie alishiba  ukuti ifyo asuminamo fimupeela ubuyo mu bumi kabili fyaba ni ntulo ya nsansa sha cishinka.

Umulandu wa Kusuminina Ifyakatamikwa fya kwa Lesa

Ibuuku lya Amapinda, icipandwa 6, icikomo 20, likoselesha abo bafwaya ukusekesha Lesa ati: “We mwana wandi, bake funde lya kwa wiso, kabili wileka malango ya kwa noko.” Ukucila ukulumbilisha icumfwila cabule fishinka, ukufunda kwapala uku kukonkomesha abacaice ukupokelela ifipimo fya bukapepa ukupitila mu kukosha icitetekelo no kuisalila ukubombela Lesa. Umutumwa Paulo alaalike abanankwe “[ukushininkisha] ifintu fyonse,” ukulingulula ifyo balesambilishiwa ukumona nga fyaleumfwana ne Cebo ca kwa Lesa no kufwaya Kwakwe, no kucite ifyo fine.—1 Abena Tesalonika 5:21.

Ifi e fyo Inte sha kwa Yehova abacilile amamilioni 6, abaice na bakalamba, bapingula ukucita, nampo nga bakuliile mu ndupwa sha Bwina Kristu nelyo iyo. Ukupitila mwi sambililo lya Baibolo ilya mukoosha, balisanga amasuko ya mpomfu ku mepusho yabo pa fyo bafwaya ukucita kabili banonka ukwishiba kwine kwine pa kufwaya kwa kwa Lesa ku bantunse. Ilyo banonka fye uku kwishiba, basumine ifyakatamikwa fya kwa Lesa no kubomba apapela amaka yabo ukucita ico Lesa afwaya.

Nampo nga mulabelenga lyonse uno magazini nelyo iyo, shi sumineni ubwafwilisho Inte sha kwa Yehova bapeela ubwa kubebeta Baibolo no kumona ifyakatamikwa fya ku mupashi. Nga mwacite ci, “[mukasonda] no kumono kuti aliwama Yehova” kabili mukanonka ukwishiba, ukukamutungulula ku bumi bwa ciyayaya, nga mwabomfya kwene.—Amalumbo 34:8; Yohane 17:3.

[Icikope pe bula 5]

Inkulo shine isha lupwa lwa Nte sha kwa Yehova mu France

[Icikope pe bula 7]

Ruti asalilepo kubombela Yehova mu cifulo ca milungu ya fikolwe