Ilyashi Lya Bakabilisha Ba Bufumu

Ica Kwafwa Ukusungilila Ukushila kwa Mulopa

MWI sonde lyonse ababomfi ba kwa Yehova balilanga bucishinka kuli Lesa ukukuma ku kushila kwa mulopa. (Imilimo 15:28, 29) Ibumba lya musha wa cishinka kabili uwashilimuka lyalipeela ubwafwilisho ku ba bwananyina ba Bwina Kristu. (Mateo 24:45-47) Natumone ifyo cali ku Philippines.

Iofeshi lya Nte ku Philippines lyatile: “Mu 1990 twaebelwe ukuti abeminishi ba pa Bethel ya ku Brooklyn bali no kwisakumanina kuno Philippines. Bamunyinefwe ba ku maofeshi yalekanalekana aya ku Asia, ukusanshako Korea, Taiwan, na Hong Kong balilaalikwe. Balilaalikwe pa kuti babafwe ukupanga Amadipartmenti Yapeela Ifyebo pa fya Fipatala pa maofeshi babako no kuteyanya Amakomiti ya Kumfwaninamo ne Fipatala. Pa kubala, aya makomiti yali fye mu misumba ikalamba ine mu Philippines.” Aya makomiti yali no kulafwaya badokota bengatemwa ukubombela pamo na ifwe ukukuma icisumino cesu ica Bwina Kristu pa mulopa. Kabili yali no kulayafwa aba bwananyina ilyo kwaba amafya pa lwa mulopa.

Remegio alisalilwe ukubomba muli Komiti wa Kumfwaninamo ne Fipatala mu Baguio. Mu kupita kwa nshita, badokota batendeke ukumona umulimo wa uyu komiti. Remegio ebukisha inshita imo ilyo badokota bakumene na Komiti wa Kumfwaninamo ne Fipatala balefwaya ukwishiba ifya kuundapa abalwele baNte abakeene umulopa. Remegio atile: “Badokota batendeke ukwipusha ifipusho, lelo nafililwe ukwasuka ifyo fipusho pantu fyali ifyayafya.” Apepele kuli Yehova ukumwafwa ifya kucita pali ubu bwafya. Remegio akonkanyapo ukusosa ati: “Pa numa ya cipusho cimo na cimo, badokota bambi baleimya amaboko no kulanda ulwa fyo babombele no bwafya bwa musango yo.” Remegio alitemenwe pali ubu bwafwilisho, maka maka apo uku kulanshanya kwa fipusho ne fyasuko kwasendele amaawala yabili.

Nomba mu calo conse mwaba amakomiti 21, kabili bamunyina 77 e baba muli aya makomiti. Danilo, Nte uuli ni dokota, atila: “Badokota baleshiba ukuti baNte abalwele balikwata ukuteyanya ukubasakamana bwino.” Dokota umo talefwaya ukulepula munyinefwe ukwabula ukumubikamo umulopa. Lelo, uyu munyina akakatile ku fisumino fyakwe. Balimulepwile kabili takwali ubwafya. Dipartimenti Upeela Ifyebo pa fya Fipatala atila: “Dokota alipapile pa fyo uyu munyinefwe apolele bwangu. Atile: ‘Ukulingana ne fyacitika pali uyu mulwele, nga ca kuti Nte alekabila opareshoni ya musango yu ukwabula ukubikwamo umulopa, nkamubombelapo.’”