“Kwateni Kampingu Musuma”

ABANTU abengi bayumfwa ukuti bafwile ukucita ifyo kampingu wabo abeba ukucita ilyo balepingula pali fimo. Lelo pa kuti kampingu wesu afikepo ukututungulula, alekabilwa ukukanshiwa bwino ukwishiba ubusuma no bubi, kabili tufwile ukwibukila nga nshi ifyo atutungulula.

Bebeteni icacitikile umwaume we shina lya Sakeo, nge fyo calembwa mu Baibolo. Sakeo, uwaleikala mu Yeriko, aali ni kasonkesha mukalamba kabili ali mukankaala. Ukulingana na fintu asumine umwine, anonkele icuma ukupitila mu kufinsha—ukwabula ukutwishika ifyo alecita fyalekalifya abantu bambi. Bushe kampingu wa kwa Sakeo alemucululusha pa mulandu wa ifi fyabipa alecita? Nga ca kuti alemucululusha, ninshi afwile aisuulileko fye.—Luka 19:1-7.

Lelo ifyacitike inshita imo, e fyalengele Sakeo ukukutuluka ifyo alecita. Yesu aishile ku Yeriko. Sakeo aali umwipi kabili alefwaya ukumumona, lelo tamumwene pa mulandu we bumba. E ico abutukile ku ntanshi no kunina ku muti pa kuti amumone bwino. Pa kutemunwa ku fyo Sakeo alefwaisha ukumumona, Yesu amwebele ukuti alemutandalila mu ng’anda yakwe. Sakeo ali-itemenwe ukulanga icileela ku mweni wakwe uwalumbuka.

Ifyo Sakeo amwene no kuumfwa ilyo aali na Yesu fyamufikile pa mutima kabili fyalengele ayalula ifyo alecita. Atile: “Moneni! Mwe Shikulu, hafu wa fyo nakwata, ndepeela abapiina, na conse ico nafinshishe ku muntu ndebweseshapo imiku ine.”—Luka 19:8.

Kampingu wa kwa Sakeo alikanshiwe, kabili ali-ikutike no kukonka ifyo amwebele ukucita. Ifyatumbwikemo fyaliweme nga nshi. Tontonkanyeni ifyo Sakeo ayumfwile ilyo Yesu amwebele ati: “Ipusukilo liishile mu ng’anda ino lelo!”—Luka 19:9.

Mwandini ca kumwenako ca kukoselesha! Cilanga ukuti te mulandu ne fyo twalecita kale, kuti twayaluka. Nga Sakeo, kuti twayangwa amashiwi ya kwa Yesu—e kutila ayalembwa mu Baibolo—no kulundulula amano ya kwishiba ubusuma no bubi. Lyene nga fintu Petro acincishe, kuti ‘twakwata kampingu musuma.’ Kuti twaumfwila kampingu wesu uwakanshiwa no kucite cisuma.—1 Petro 3:16.