Ubumi Bwabo

Insansa Shishaifulila!

NGA FINTU CASHIMIKWA NA BA REGINALD WALLWORK

“Mu calo takwaba ico mwingalinganya ku nsansa twakwete mu mulimo wa nshita yonse uwa bumishonari uwa kubombela Yehova!” Aya mashiwi yali pa kapepala umwina mwandi alembele kabili nakasangile ilyo afwile fye mu May 1994.

ILYO natontonkanya pa mashiwi ya kwa Irene, ndebukisha imyaka 37 iya nsansa twapoosele muli bumishonari mu Peru. Twaliipakishe ukubishanya kusuma ukwa Bwina Kristu ukutula apo twaupanine mu December 1942—kabili pali ifi e po nalatendekela ilyashi lyandi.

Irene akushiwe nge Nte ya kwa Yehova mu Liverpool, ku England. Ali umo pa bana banakashi batatu, bawishi bafwile mu Nkondo ya Calo iya 1. Mu kukonkapo banyina baupilwe kuli baWinton Fraser, kabili bakwete umwana mwaume, Sidney. Ilyo Inkondo ya Calo iya 2 ishilatampa, ulupwa lwakuukile ku Bangor, ku North Wales, uko Irene abatishiwe mu 1939. Sidney abatishiwe mu 1938, e ico wena na Irene babombeele bupainiya pamo—bakabilisha ba nshita yonse—ku lulamba lwa kapinda ka ku kuso aka Wales, ukufuma ku Bangor ukufika ku Caernarvon, ukubikako ne cishi ca Anglesey.

Pali ilya nshita, nali mu Cilonganino ca Runcorn, icabelele bakilomita 20 pa kati ka kapinda ka ku kuso na kabanga ka Liverpool, uko nalebombela nga kangalila wa kutangilila nge fyo twita pali lelo. Irene anjipwishe pa kulongana kwa muputule nga kuti apeelwa icifulo umo engashimikila, apo aishile mu kwikala na Vera, nkashi nankwe umukalamba uwaupilwe uwaleikala mu Runcorn. Irene pamo na ine twaleumfwana bwino sana mu milungu ibili iyo ali na ifwe, kabili pa numa nalimutandalile ku Bangor imiku iingi. Ifyo natemenwe nga nshi pa mpela ya mulungu imo ilyo Irene asumine ukuupwa kuli ine!

 Ilyo line fye nabwelelemo ku ng’anda pa Mulungu, natampile ukupekanya ubwinga bwesu, lelo pali Cibili napokelele telegramu. Mwali amashiwi ya kuti: “Njeleleniko mukwai uyu telegramu alamukalifya, takwakabe bwinga. Kalata wa kulondolola akesa pa numa.” Nalifulungene. Cinshi calengele?

Kalata wa kwa Irene afikile ubushiku bwakonkelepo. Anjebele ukuti ali no kuya ku Horsforth ku Yorkshire ku kubomba bupainiya pamo na Hilda Padgett. * Alondolwele ukutila umwaka umo uwapitile alisumine ukuyabombela ukwali ukukabila kukalamba nga alombwa ukuyabomba. Alembele ati: “Kuli ine uyu wali mulapo kuli Yehova, kabili apo uyu wali mulapo nalaile kuli wene ilyo nshilakwishiba, ningile ukufikilisha.” Nangu nali no bulanda, nalikumbilwe sana bucishinka bwakwe kabili nalimwaswike muli telegramu ukuti: “Kabiye. Nkakulolela.”

Ilyo ali ku Yorkshire, Irene akakilwe imyeshi itatu mu cifungo pa mulandu wa kukanayafwilishako inkondo. Lelo ilyo papitile imyeshi 18, mu December 1942, twalyupene.

Inshiku sha Kubalilapo

Mu 1919 bamayo bashitile amavolyumu yonse aya Studies in the Scriptures. * Nangu cingati batata balandile fye cishinka pali iyi nshita ukuti bamayo tabatalile ababelengapo icitabo, bamayo balefwaisha ukubelenga aya amavolyumu bwino pamo na Baibolo wabo. Balibelengele no kubatishiwa mu 1920.

Batata tabayafishe kabili tabalelesha bamayo ukucita ico balefwaya, pali ci pali ukukusha abana babo bane, abakalamba bandi abanakashi babili, Gwen na Ivy; umukalamba wandi umwaume, Alec; pamo na ine mu cine. BaStanley Rogers ne Nte shimbi isha busumino mu Liverpool baleya mu kulanda amalyashi ya ku cintubwingi mu Runcorn, uko icilonganino cipya capangilwe mu nshita inono. Ulupwa lwesu lwalecita bwino lwa ku mupashi mu cilonganino.

Gwen alesambilishiwa amasambililo ya kuya ku nkosho mu Church of England lelo bwangu bwangu alilekele ilyo atampile ukusambilila Baibolo pamo na bamayo. Ilyo shimapepo atutandalile ukwishiba ico tushalesangilwa ku mafundisho alefundisha, bamukonkenye amepusho ayo afililwe ukwasuka. Gwen aipwishe ico Ipepo lya We Shifwe lilandapo kabili nangu tafwaile ukulondolola lyene alimulondolwelele! Alekeleshe ukulanshanya pa kumwambwila amashiwi yaba pali 1 Abena Korinti 10:21, ukulandikisha ukuti takatale ‘aliila pa matebulo yabili.’ Ilyo shimapepo afumine mu ng’anda yesu atile akapepelako Gwen no kwisayasuka amepusho yakwe, lelo tabweleleko. Pa numa ya kubatishiwa, Gwen bwangu bwangu aali kabilisha wa mbila nsuma uwa nshita yonse.

Icilonganino calebikako amano ku bacaice. Ndebukisha ukukutika ku lyashi lyalandilwe na eluda umutandashi ilyo naali ne myaka 7. Pa numa alandile na ine. Namwebele ukuti nalebelenga pali Abrahamu ne fyo afwaile ukutuula Isaki, umwana wakwe ilambo. Eluda anjebele ukuti: “Kabiye ku mpela ya cisebele no kunshimikila ilyo lyashi lyonse.” Ala nalitemenwe ukuyaiminina palya no kulanda “ilyashi lya ku cintubwingi” ilya kubalilapo!

Nabatishiwe ilyo nali ne myaka 15 mu 1931, umwaka bamayo bafwilemo, kabili nalilekele isukulu no kuyatendeke ukusambilila ifya kulungisha amalaiti. Mu 1936 amalyashi yaleekopwa pa maseleti balelisha pa lwalala, kabili nkashi wa cikalamba akoseleshe ine no mukalamba wandi ukupamfiwa mu kubombako uyu mulimo. E ico ine na Alec twaile ku Liverpool mu kushita incinga iyakwete icibokoshi ca mawilo ica kutinta apa kusendela icilimba ca maseleti. Icisoselo twacikakile ku numa ku mulongoti walepele bamita babili. Uwapangile icibokoshi atwebele ati tabalile apangapo icintu ca musango yu, lelo calibombele bwino! Twalicincimwike ukupwisha ukubombela mu cifulo ca kushimikilamo, kabili  twatashishe nkashi wa cikalamba pa kukoselesha atukoseleshe na pa mashuko ya mulimo twakwete.

Inkondo ya Calo iya 2—Yali ni Nshita ya Kweshiwa

Ilyo nkondo yapaleme, ine na Stanley Rogers twalipamfiwe ukusabankanya ilyashi lya ku cintubwingi ilyali no kulandwa mu London’s Royal Albert Hall pa September 11, 1938 ilyaleti: “Ishibeni Ifishinka.” Pa numa nalisabankenyeko ili lyashi ilyo lyalembelwe mu katabo, pamo na katabo ka Fascism or Freedom, akasabankanishiwe umwaka wakonkelepo. Ututabo tonse twasansalike bwino bwino ifyalefwaya ukucita ubuteko bwa lucu ubwa kwa Hitler wa ku Germany. Pali iyi nshita, naishibikwe cine cine mu Runcorn ku mulimo wa ku cintubwingu uwa kushimikila kabili nalicindikwe. Cine cine, pa mulandu wa kuti naleba solwesolwe mu mulimo wa fya bulesa e calengele ukulabomfiwa, maka maka imyaka ya ku ntanshi.

Akampani nabombeele twapangene ukuyakabikila amalaiti mu fakitare ipya iyali ku nse ye tauni. Ilyo naishibe ukuti fakitare yali no kuba ya fyanso fya nkondo, nabebelepo fye ukuti te kuti mombelemo. Nelyo abanyingishe incito tabatemenwe, kapitao alimpokolwele, kabili napeelwe incito imbi. Naishileishiba ukuti banasenge ba kwa kapitao nabo bene bali ni Nte ya kwa Yehova.

Uo twalebomba nankwe ankoseleshe apakalamba ilyo atile: “Reg, twalishibe ati uli no kukaana ukubombako, apo ulabomba umulimo wa kushimikila pa myaka iingi.” Na lyo line, nali no kucenjela, apo abo twalebomba nabo balefwaya ukumbika mu bwafya.

Ukulembesha kwa kukaana umulimo wa fita pa mulandu wa fyo nasumine kwalisuminishiwe ku cilye ca ku Liverpool mu June 1940 cikulu fye ndebomba umulimo wa kulungisha amalaiti. Ici kwena canengele ukutwalilila mu mulimo wa Bwina Kristu.

Ukuya mu Mulimo wa Nshita Yonse

Ilyo inkondo yapwile, napingwile ukuleka incito no kutampa ukubombela pamo na Irene mu butumikishi bwa nshita yonse. Mu 1946, nakuulile ing’anda ya mipeto iya kutinta iyalepele bamita basano, yali e ng’anda yesu, kabili mu mwaka wakonkelepo, batwebele ukukuukila ku Alveston, umushi uwabela ku Gloucestershire. Mu kukonkapo, twabombele bupainiya mwi tauni lya kale ilya Cirencester na mu musumba wa Bath. Mu 1951, naebelwe ukutandalila ifilonganino ifyabela ku kapinda ka ku kulyo aka Wales ukubomba bukangalila bwa kwenda, lelo ilyo imyaka ibili tailakumana, twaile ku Sukulu lya Baibolo Ilya Gileadi Ilya Watchtower ku kusambilila umulimo wa bumishonari.

 Ikalasi lyalenga 21 ilya Gileadi lyabelele pa South Lansing ku citungu ca New York icabela ku kapinda ka kulyo, kabili twapwishishe mu 1953 pa Kulongana kwa New World Society ukwali mu New York City. Ine na Irene tatwaishibe uko baali no kututuma ukufikila ubushiku twapwile. Ala twalisansamwike pa kwishiba ukuti twali no kuya ku Peru. Cinshi twasansamukile? Pantu Sidney Fraser, ndume ya kwa Irene citika, no mwina mwakwe, Margaret, balebombela pa ofeshi linono ilya Nte sha kwa Yehova ukucila pa mwaka umo pa numa ya kupwisha ikalasi lyalenga 19 ilya Gileadi!

Ilyo twalelolela ifitupa fya kutusuminisha ukuyaikala, twabombele panono pa Bethel ya ku Brooklyn, lelo bwangu bwangu twalimine ukuya ku Lima. Pa fifulo 10 twali no kubombela umulimo wa bumishonari, twabalile ku Callao, icabu cikalamba ica Peru, kwi samba lya ku Lima. Nangu twasambilileko amashiwi yamo yamo aya ciSpanish, pali iyi nshita ine na Irene tapali uwalelanda bwino muli ulu lulimi. Twali no kubomba shani umulimo wesu?

Amafya na Mashuko ya Kushimikila

Ku Gileadi batwebele ukuti nyina tasambilisha umwana ululimi. Lelo, umwana asambilila ilyo nyina aleyasukana nankwe. E co batufundile ukuti: “Ingileni mu mulimo wa kushimikila bwangu bwangu, kabili mulesambilila ululimi ku bantu. Abantu bakamwafwilisha.” Ilyo natendeke ukuumfwako panono no kupwisha ubwafya, elenganyeni ifyo naumfwile ilyo mu milungu ibili twafikilemo, bansontele ukubomba bukangalila bwa kutangilila pa Cilonganino ca Callao! Nailemona Sidney Fraser, lelo ukupanda mano ampandile kwali cimo cine nge fyo batwebele ku Gileadi—ukulabishanya ne cilonganino na bantu mu cifulo cesu ica kushimikilamo. Napampamine pa kukonka uku kufunda.

Bushiku bumo pa Cibelushi ulucelo, nasangile kabasa pa cifulo abombela. Atile: “Mfwile ukutwalilila no mulimo wandi, nomba mukwai ikaleni mulandeko na ine.” Namwebele ukuti kuti nacite co lelo icipangano ni ci: “Ilyo nalufyanya, mukwai munungike. Nshakalipe.” Alisekele kabili alisumine ico namwebele. Nalemutandalile miku ibili mu mulungu no kusango kuti e nshila iingabomba iya kubelesha ululimi lupya, nge fyo naebelwe.

Ku Ica e cifulo ca bubili twailebombela, kabili cali fye nkuma ukuti na ko nasangile kabasa umbi kabili namulondolwelele pa fyo nacitile ku Callao. Na o asumine ukungafwilisha, e co iciSpanish nalelanda catampile ukulalondolokako, nangu palipitile imyaka itatu ukuti mfikepo ukulanda bwino. Uyu muntu lyonse ali uwapamfiwa, lelo nalikumanishe ukutungulula isambililo lya Baibolo pa kulamubelengela Amalembo no kumulondolwela ifyo yalelanda. Umulungu umo ilyo naile ku kumumona, uwamwingishe incito atile aliya ku kwingila incito imbi ku Lima. Inshita imbi ilyo ine na Irene twaile ku kulongana kwa citungu ku Lima, nasangile uyu muntu kabili. Ala caliweme ukwishiba ukuti afwaile Inte uko kwine pa kutwalilila ukusambilila wene no lupwa lwakwe baishileba ababomfi ba kwa Yehova abaipeela!

Mu cilonganino cimo, twasangile ukuti umulumendo no mukashana tabalembeshe icupo cabo, lelo balibatishiwe. Ilyo twalanshenye nabo ifishinte fya mu Baibolo, bapingwilepo ukulembesha icupo cabo, icabafishishepo ukuba Inte shabatishiwa. E co napekenye ukubatwala ku maofeshi ya buteko ku kulembesha icupo. Lelo kwali ubwafya pantu abana bane abo bakwete nabo tabalembeshiwe, kabili ici cali lifunde. Tatwaishibe ifyo umukalamba we tauni ali no kucita. Umukalamba we tauni atile: “Apo abanenu Inte sha kwa Yehova bantu basuma, balipekanya ukuti mupane mwi funde, nshalembe ifipepala fya kumutwala ku cilye pa mwana umo na umo kabili nalabalembesha mwi funde ukwabula ukumulipilisha.” Kwena twalitashishe, apo ulu lupwa lwali lupiina kabili ukubalipilisha nga calibakosele!

Pa numa baAlbert D. Schroeder ukufuma ku amaofeshi yakalamba aya ku Brooklyn aya Nte sha kwa Yehova balitutandalile kabili batashishe ukwisula ing’anda ya bamishonari ku ncende na imbi iya mu Lima. E co ine na Irene na ba bwana nkashi babili, Frances na Elizabeth Good ukufuma ku United States, na baupana abena Canada twaselele ku citungu ca ku San Borja. Mu myaka ibili nelyo itatu, twapangile icilonganino na cimbi icalekula.

 Ilyo twabombeele mu Huancayo, umwabe milundu ya pa kati iyalepa bamita 3,000, twabishenye ne cilonganino umwali Inte 80. Kulya, nabombele mu bukuule bwa Ng’anda ya Bufumu iya bubili iyali no kukuulwa mu calo. Nasontelwe ngo mwiminishi wa Nte sha kwa Yehova ukukuma ku fya mafunde, apo twali no kuya imiku itatu ku cilye ku kupeelwa insambu ya ncende twashitile. Uku kubombesha, pamo no mulimo wa kupanga abasambi ku babomfi ba busumino abengi muli ilya myaka ya kutendekelako, kwabikile umufula uwa kulundulukilamo kusuma uko tulemona nomba mu Peru—ukufuma pa Nte 283 mu 1953 ukufika pa Nte 83,000 leelo.

Ukubwelelamo Kwaletele Ubulanda

Twaipakishe ukubishanya kusuma na bamishonari banensu mu mayanda yonse twalimo aya bumishonari, umo ilingi nakwete shuko lya kwangalila imilimo ya pa ng’anda. Pali Cimo lyonse ulucelo, twalekumana ukulanda pa mulimo tukabomba muli uyo mulungu no kwakanya imilimo ya kusakamana ing’anda yesu. Umulimo ukalamba twaishibe wali kushimikila, kabili ico caletwafwa ukubombela pamo abaikatana. Ndatemwa ilyo naibukisha ukuti tatwabalile atukansana apakalamba mu mayanda yonse twaikelemo.

Umulimo wa kulekelesha twapeelwe wali mu Breña, mwi komboni limbi ilya mu Lima. Icilonganino calimo kutemwana umwali Inte 70 cakulile lubilo lubilo ukucila pali bakasabankanya 100, ilyo icilonganino na cimbi capangilwe mu Palominia. Ni pali iyi ine nshita Irene alwele. Pa kubala nailwike ukuti limo limo taleibukisha ifyo alelanda, kabili inshita imbi aleluba pa kubwelela ku ng’anda. Nangu line aleundapwa bwino, calebipilako fye.

Ku ca bulanda mu 1990, nalipekenye ukubwelelamo ku England uko nkashi yandi Ivy atupokelele cisuma cisuma mu ng’anda mu mwakwe. Papitile fye imyaka ine, mu mwaka aali no kuba ne myaka 81, Irene alifwile. Nalitwalilila mu mulimo wa nshita yonse, ukubomba bueluda muli cimo pa filonganino fitatu mu mushi njikala. Limo limo, ndaya na ku Manchester mu kukoselesha akalibumba ka ciSpanish akaba kulya.

Nomba line nakwete ica kukumanya icawamisha icacitike ku myaka ya ku numa ilyo nalelisha amalyashi ya maminiti yasano pa cilimba candi ica maseleti ku bene mayanda. Ndebukisha bwino bwino umwana we sukulu umukashana uwaiminine ku numa ya banyina pa mwinshi, alekutika ubukombe.

Uyu mukashana mu kupita kwa nshita akuukile ku Canada, kabili umunankwe uwikala mu Runcorn mwine uuli ni Nte nomba batwalilile ukulembeshanya nankwe amakalata. Nomba line alembeele ukutila BaNte babili balimutandalile kabili balandile amashiwi ashaenekele ayamwibukishe ifyo aumfwile kale mu lyashi lyakopwa ilya maminiti yasano. Pa kwishibe cine, pali nomba mubomfi waipeela uwa kwa Yehova kabili alombele ukuti bakamutashisheko kuli ulya mulumendo uwatandalile banyina pa ng’anda ukucila pa myaka 60! Cine cine, tatwishiba ifyo imbuto sha cine shikalimbuka no kukula.—Lukala Milandu 11:6.

Cine cine, ndebukisha no kutasha apakalamba nga nshi pa fyo nabombela Yehova mu mulimo uucindami. Ukutula apo naipeelele mu 1931, nshatala mbulwa ku kulongana kwa bantu ba kwa Yehova. Nangu ine na Irene tatwatalile atukwata abana ba kuifyalila, ndasangalala pa kukwata abana baume na bakashana 150 aba ku mupashi, bonse ukubombela Shifwe wa ku muulu, Yehova. Nge fyo umukashi wandi uwatemwikwa asosele, amashuko ya mulimo twakwete icine cine yatuletele insansa shishaifulila.

[Amafutunoti]

[Icikope pe bula 24]

Bamayo, ku kutendeka kwa ba1900

[Icikope pe bula 24, 25]

Ku kuso: Hilda Padgett, Ine, Irene, na Joyce Rowley mu Leed, ku England, mu 1940

[Icikope pe bula 25]

Pa muulu: Ine na Irene ku ntanshi ya ng’anda yesu iya mipeto iya kutinta

[Icikope pe bula 27]

Ukusabankanya ilyashi lya ku cintubwingi mu Cardiff, ku Wales, mu 1952